Gasan: hpung masha shada gumhpraw hpe atu (interest) hku hkoi sha hkat re lam mai a ni? Chyum laika kaw, Ja joi 1, joi2, joi 3 jaw da nna hpa ga ga shangun ai lam lawm ai. Amyat ntam da ai wa hpe zing la kau ai, amyat tam da ai wa hpe bai kahtap jaw ai lam hpe ga shadawn la nna, K.K tinang hpe jaw da ai sutgan tinang chye ai ladat hte law htam wa hkra galaw ai gaw, gumhpraw interest hte hkoi sha ai raitim n-shut ai nga ai nga nna, chyum mungga chye ai ni myit la let galaw nga ma ai. Ndai lam jaw nga a ni?

Chyeju hte naw htai ya rit.Naw SengRegards,Naw Seng | pupunu@gmail.com

Htai : Karai Kasang ra sharwng ai lam gaw, Israela amyu ni Shi hpe tut nawng mahku mara kam hpa manoi manat ai hte asak hkrung nga nna, shada da ra rawng gawngkya ai ni a ntsa ahkaw ahkang la, baw daw sha ai lam n galaw ai sha, shada tsaw ra matsan dum ai myit madun hkat na shangun mayu ai re.

(a) Hkoi ai lam mai tim atu (sh) amyat n mai la ai ngu ai chyum ga ni gaw lawu de na ni rai nga ai.

Pru 22:25 nang hte rau nga ai nye a amyu matsan mayan wa hpe, gumhraw hkoi ya n yang gaw, gumhpraw boi sha ai wa zawn shi hpe hkum di et; amyat hkum hpyi et.

Jaw Jau 25:35-38 Na a hpu nau matsan jaren hkrum nna, n-gun htum mat yang, nang shi hpe shadaw na rai ndai; amyu kaga shingbyi manam hpe zawn, nang shi hpe woi lahku nga na rai ndai. Shi hta atu amyat la lu na n rai; na a hpu nau wa nang kaw nga lu hkra, na a Karai Kasang hpe hkrit hkungga nga u. Gumhpraw rai ti mung, sha hpa rai ti mung hkoi ya yang, atu amyat lu la na hkum myit et. Ngai gaw nanhte hpe Hkanan mung jaw nna, nanhte a Karai Kasang rai na matu, nanhte a Karai Kasang Yehowa rai nga nngai.

Ezekela 18:13 amyat hte gumhpraw hkoi ya ai hte, law htam na matu boi ya ai wa rai yang, dai wa gaw hkrung nga na kun? Shi hkrung nga na nrai; ndai matsat shabat amu ni hpe galaw ai majaw, shi teng teng si na ra ai.

Ndai "Tara. J 5:1-2 Sanit ning ningdaw shagu raw dat lam hpaw lu na rai ndai. Raw dat lam ngu ai gaw ndai rai nga ai; htingbu manang wa hpe arai hkoi ya ai hka madu kadai mung, ahka dai hpe raw dat lu na rai nga ai; Yehowa a raw dat ningdaw rai nga ai majaw htingbu manang kaw na mung, hpu nau wa kaw na mung, ji la lu na n rai".

(b) Maigan masha ni hpe gaw mai ai:

Tara J 15:3 Maigan masha kaw na chyawm gaw ji la lu na ahkang nga nga ai.

Tara J. 23:19-20 Na a amyu shada gumhpraw, sha hpa hte hkoi shap ai hpa baw hta mung, atu amyat hpyi la lu na n rai. Maigan masha hpe chyawm gaw hpyi lu na rai myit

dai, nang galaw ai lam magup hta na a K.K Yehowa nang hpe shaman ya n ga gaw, na amyu shada atu amyat hte hkoi shap ai lam koi gam na rai ndai.

Sh.K 15:5 Tinang a gumhpraw hpe ladu lai ai amyat hte nhkoi……

Ngu ai chyum daw hpe hti yu yang gumhpraw hkoi shap ai lam gaw sut hpaga lam hku mai hkoi shap ai (sh) atu amyat la nna hkoi shap mai ai ngu ai hpe madun ai re.

(c) Dai ni na Hkristan ni sharin la na lam

Lahta na tara ni hpe yu ai shaloi moi shawng de na yi sun hkauna galaw sha ai aten na tara ni rai nga ma ai. Dai tara ni a yaw shada ai lam gaw, manang wa ra rawng gawngkya nga ai hpe ahkaw ahkang la nna, shada law hpa, baw daw, atu, amyat la la ai lam hpe hkum pat ai lam rai nna; hpaga dingda magam bungli a matu gumhpraw n mai rang ai lam n rai nga ai. Dinghku sut su wa na matu hte, uhpawng sut masa ringchying wa na matu ram ging ai atu, amat mai la nga ai. “Karai Kasang gaw sut gan lu su chye ai atsam jaw nga ai, rai tim Karai Kasang hpe malap mali kau ai yubak ndu hkra sadi ra ai" (Tara Jahprang 8:18).

Yesu mung baw daw, law hpa amyat la sha ai hpe ninghkap tim (Lk 6:34; Mt 25:42-45; Lk 16:19-25; Yaku 4:13; 5:1-6); "nye a gumhpraw hpe ngai bai wa yang arang hte atu lu la hkra, gumhpraw boi ai shara e hpa rai n bang da n ta? (Lk 19:23)" ngu nna masa lam jaw ang ai hku ram ging ai atu amyat la mai ai lam sharin da nga ai.