MI KE SA MAS Edishon revisá 2016 Copyright © House of Worship Foundation Eskritor: pastornan Raimy i Arlette Juliet Diseño di portada: Raimy-Jonathan Juliet Diseño gráfiko: Maristella Martis Revishon: Luisette Martis - Elma Huggins - Maristella Martis Iglesia House of Worship Erosweg 52, Curaçao +5999-738-4344 ofisinahow@gmail.com www.how-online.org Den e buki akí nos a hasi uzo di Beibel Santu, 1997 Editorial Evangelica Kòrsou.

E buki akí ta di:

Mi a aseptá Señor Hesus den mi kurason riba (fecha):

Mi a batisá riba (fecha):

Romanonan 10:8-11 “8Ma kiko e ta bisa? ‘E palabra ta serka di bo, den bo boka i den bo kurason’–esta, e palabra di fe, kual nos ta prediká, 9ku si bo konfesá ku bo boka Jesus komo Señor, i kere den bo kurason ku Dios a lant’E for di e mortonan, lo bo ta salbá; 10pasobra ku kurason hende ta kere pa haña hustisia, i ku boka e ta konfesá pa haña salbashon. 11Pasobra Skritura ta bisa: ‘Ken ku kere den djE lo no keda brongosá.’”

Dios a stima mundu asina tantu, ku El a duna Su Yu unigénito, pa ken ku kere den djE no bai pèrdí, ma tin bida etèrno.

Dios Su plan di salbashon ta perfekto! E ta pa trese prosperidat den bo kurpa, alma i spiritu. “16Pasobra Dios a stima mundu asina tantu, ku El a duna Su Yu unigénito, pa ken ku kere den djE no bai pèrdí, ma tin bida etèrno. 17Pasobra Dios no a manda e Yu den mundu pa kondená mundu, ma pa mundu wòrdu salba dor di djE.” (Juan 3:16-17) Dios a mira ku hende a purba tur kos pa salba, sana i liberá su mes, pero sin resultado. Dor di desobedensia hende a peka i a separá su mes for di Dios; su relashon ku Dios a kibra. Pa e motibu akí, tur hende ta nase komo un pekadó. Beibel ta bisa: “pasobra tur a peka i ta falta e gloria di Dios,” (Romanonan 3:23). Pero Dios a primintí pordon i bida eterno atraves di Su Yu stimá, na ken ku pidiÉ. Pa medio di e morto di Hesus na e krus i resurekshon riba e di tres dia, Hesus a paga e preis pa nos pikánan. Ku Su morto i ku Su sanger, El a redimí nos; El a kumpra nos i a libra nos for di e sentensia di morto eterno, ku ta e kondenashon di fièrnu. P’esei nos por bisa ku di bèrdat Hesus a bini pa salba hende (Marko 2:17). Awor den e parti natural, si un hende ta malu e ta bai dòkter. Pero si un hende mester di pordon pa su pikánan, e mester bai serka Dios. Awor un hende ta puntra: Kon mi por bai bèk serka Dios? Kon mi por konektá bèk ku Dios?

5

6

Hesus di: “... Ami ta e kaminda, i e bèrdat, i e bida; ni un hende no ta bin serka e Tata, sino pa medio di Mi.” (Juan 14:6). Bo no por risibí pordon i salbashon dor di bo bon obranan òf pa medio di un otro kaminda, solamente pa medio di Kristu Hesus. Salbashon ta un don, un regalo, ku Dios ta ofresé na tur hende: riku i pober, pretu i blanku, esklabo òf liber, studiá òf no studiá. E ta e don di grasia di Dios (Tito 2:11). Grasia ta un regalo ku bo no meresé, ni bo no por traha p'e. E ta un regalo no meresí. Pero pa motibu di e amor ku Dios tin pa hende, E mes a traha un manera pa hende por rekonsiliá kunÉ. Esei ta e grasia di Dios i ta e grasia akí ta konektá nos bèk ku Dios. Loke nos mester hasi ta: Atmití ku nos ta bayendo den e direkshon robes. Rekonosé ku nos ta un pekadó. Pidi Dios pa pordoná nos. Risibí Su Yu Hesus den nos kurason. Beibel ta siña nos ku si nos konfesá ku nos boka i kere den nos kurason ku Hesus ta e úniko i sufisiente Salbador, ku El a muri i ku Dios a lant’É for di morto riba e di tres dia, nos lo ta salbá. Pasobra ku kurason hende ta kere pa haña hustisia i ku boka e ta konfesá pa haña salbashon.

Kisas bo ta pensa ku e piká ku bo a hasi, Dios lo no pordoná bo. Esei no ta bèrdat. 1 Juan 1:9, ta bisa: “Si nos konfesá nos pikánan, E ta fiel i hustu pa pordoná nos nos pikánan i pa limpia nos di tur inhustisia.” Awor ta na nos pa rekonosé i konfesá nos pikánan, arepentí i pidi Dios Su pordon. Dios ta semper kla pará pa risibí nos i duna nos un bida nobo, atraves di Su Yu Hesus. Beibel ta bisa den e evangelio di Juan kapítulo 1 versíkulo 12: “Ma tur esnan ku a risibiE, na nan El a duna e derecho pa bira yunan di Dios, esnan ku ta kere den Su nòmber,” Komo hende nos tur ta kreashon di Dios. Pero esaki no ta nifiká ku outomátikamente nos ta yu di Dios. Un hende ta pasa for di ta kreashon di Dios pa bira yu di Dios, na momento ku e aseptá Kristu Hesus den su kurason. E ora ei e hende akí ta haña e derechi pa bira un yu di Dios.

Awe bo tambe por risibí e derechi pa bira un yu di Dios. Kere den Hesus Su nòmber i risibiÉ den bo kurason awe, i bira un yu di E Dios bibu, Kreador di shelu i tera. Habri bo kurason i permitiÉ drenta pa E por duna bo Su pas, Su felisidat, Su seguridat berdadero i bida eterno. Ora nos ta papia di bida eterno, nos ta referí na bida asta despues di morto. Esaki ta únikamente posibel pa e hende ku ta kere den Hesus. Na momento ku un hende kere den Hesus, e ta pasa di morto pa bida. E hende akí lo tin bida eterno i lo no peresé nunka.

7

Bida eterno ta e echo ku nos por konosé e úniko Dios berdadero i Hesukristu, Kende Dios a manda (Juan 17:3). “Ata, Mi ta para na porta i ta bati; si un hende tende Mi bos i habri porta, lo Mi drenta serka djé, i lo sena kuné i é ku Mi.” (Revelashon 3:20) Si awe bo ke tuma e desishon pa risibí Hesus den bo kurason, ripití e orashon akí: “Señor Hesus, awe mi ta gradisí Bo pa un dia nobo. Pordoná mi tur mi pikánan i fayonan. Mi ta rekonosé ku Bo a muri pa mi pikánan. Bin biba den mi kurason i duna mi un bida nobo. Mi ta pidi Bo esaki, Dios, den nòmber di nos Señor Hesus. Amèn.”

“Mi ta bisa boso ku asina tambe lo tin mas goso den shelu pa un pekadó ku repentí, ku pa nobent’i nuebe hende hustu ku no tin mester di repentimentu.” (Lukas 15:7)

8

Salbashon ta un kaminda ku nos ta kana i ku ta hiba nos na bida eterno, na momento ku nos aseptá Kristu Hesus.

“11I e testimonio ta esaki, ku Dios a duna nos bida etèrno, i e bida aki ta den Su Yu. 12Esun ku tin e Yu tin e bida; esun ku no tin e Yu di Dios no tin e bida.” (1 Juan 5:11-12) Salbashon ta un kaminda ku nos ta kana i ku ta hiba nos na bida eterno, na momento ku nos aseptá Kristu Hesus. Juan 3:16, ta bisa: “Pasobra Dios a stima mundu asina tantu, ku El a duna Su Yu unigénito, pa ken ku kere den djE no bai pèrdí, ma tin bida etèrno.” Dios tabata sa ku hende no por a salba su mes, ta p’esei El a manda Su Yu pa salba nos. Hesukristu, ku a wòrdu krusifiká, Kende a muri i Dios Tata a lanta for di e mortonan, ta e úniko nòmber ku nos por haña salbashon aden. “I no tin salbashon den ningun otro; pasobra no tin bou di shelu ningun otro nòmber ku a wòrdu duná na hende, pa medio di kual nos mester wòrdu salbá.” (Echonan 4:12) Sin Dios nos ta pèrdí, den skuridat i sin speransa. Awor pa nos por risibí e salbashon akí, nos mester arepentí i kombertí. “Repentí anto i kombèrtí, pa boso pikánan wòrdu kitá, pa tempunan di refreskamentu por bin for di e presensia di Señor,” (Echonan 3:19) Kiko ta nifiká arepentí i kombertí na Señor?

10

Echonan 2:38, ta bisa: “... Repentí, i laga kada un di boso wòrdu batisá den e nòmber di Jesu-Cristo pa pordon di boso pikánan; i boso lo risibí e don di Spiritu Santu.” Arepentí ta nifiká: pa haña duele di loke bo a hasi, rekonosé i konfesá bo pikánan i fayonan, kambio di pensamentu, kambio den komportashon. Ora un hende kombertí, e ta arepentí. E ta bira di su mal kamindanan i e ta rekonsiliá ku Dios. Pa motibu di nos pikánan, nos tabata meresé kastigu di morto. Pasobra ta pa motibu di hende, piká a drenta den mundu i morto a bini di piká. Pa e motibu akí morto a pasa pa tur hende, pasobra tur a peka i e pago di piká ta morto. Pero Kristu Hesus a paga e preis dor di drama Su sanger pa pordon di nos pikánan. P’esei ta solamente pa medio di Kristu, nos ta wòrdu rekonsiliá ku Dios. Ku esaki Hesus a restourá nos relashon ku Dios. Un hende ku no konosé Señor ta kana riba un kaminda robes, un kaminda ku Señor no a plania p'e. Beibel ta papia di dos kaminda: e kaminda hanchu i e kaminda smal. 1. E KAMINDA HANCHU KU TA HIBA NA PERDISHON E kaminda akí ta hanchu, pasobra e ta kontené tur sorto di dios falsu, bruheria, konfushon, idolatria (adorashon di ídolo/diosnan falsu), homoseksualidat, adikshon etc. E kaminda akí ta engañoso. E ta mustra plasentero i ta aparentá di ta yen di goso, pero finalmente e ta hiba bo na pèrdishon.

11

2. E KAMINDA SMAL KU TA HIBA NA BIDA ETERNO Beibel ta bisa ku hopi no ta haña e kaminda akí. Hesus ta bisa: “Pasobra hopi ta yamá, ma poko ta skohí.” (Mateo 22:14) Pa bo pertenesé na esnan skohí, bo mester kana riba e kaminda smal. E kaminda akí ta guia na: Salbashon. Bida na abundansia. Sanashon i liberashon. Pero mas ku tur kos, riba e kaminda akí tin un Dios so, E Dios real. Su nòmber ta Yehovah. Bo no por yega serka Dios pa medio di un imágen trahá pa man di hende, ni ningun forma di okultismo. Superstishon tampoko lo no yuda bo yega serka Dios. Ku okultismo i superstishon nos ta komprondé lo siguiente. Okultismo: práktikanan okulto manera magia i astrologia. Superstishon: un kreensia kaminda un kos, akshon òf sirkunstansia ku no ta relatá na un suseso ta influensiá su resultado. Por ehèmpel, un hende ta mira un pushi pretu i ta haña un aksidente di outo. E ta relatá e aksidente di outo, na e echo ku el a mira un pushi pretu. E kosnan akí ta abominabel (horibel) dilanti di Dios i ta muestra di falta di fe den Dios Todopoderoso, E Doño di tur kos.

“Jesus a bis’é: ‘Ami ta e kaminda, i e bèrdat, i e bida; ni un hende no ta bin serka e Tata, sino pa medio di Mi.’” (Juan 14:6)

12

Pues segun bo ta kana riba e kaminda ku ta e bèrdat, ku ta hiba bo na bida, bo ta haña un enkuentro ku E Dios bibu. Segun bo ta biba p’E, E Dios akí ku a krea shelu i tera, laman i tur kos den dje, ta ekipá i kapasitá bo pa hasi Su trabou. 2 Korintionan 3:16-17, ta bisa ku si un hende kombertí, su velo ta wòrdu kitá. “16ma ki ora ku un hende kombertí na Señor e velo ta wòrdu kitá. 17Awor Señor ta e Spiritu; i kaminda e Spiritu di Señor ta, ei tin libertat.” Un hende ku no ta kombertí no konosé Dios i e tin un velo su dilanti. Un velo ta un pida tela ku ta tapa kabes, skouder i tambe kara di un hende. Aki e palabra velo ta uzá den un forma figurativo. E hende ku no ta kombertí tin un velo su dilanti, di manera ku e no ta mira e benefisionan ku e ta haña ora e kana e kaminda smal. Kristu Hesus ta e úniko ku por kita e velo ei, ora E bin biba den bo kurason. E historia di Saulo (Pablo) i su enkuentro dramátiko ku Hesus, ta duna un bon ilustrashon di esaki (Echonan 9:1-19). Ora bo no ta kombertí, tin un velo diki diki poné bo dilanti. Esaki ta e velo di sieguedat, kabesura, terkedat, rebeldia etc. Pero ora Kristu bini den bo kurason, e velo akí mester kita i bo ta kombertí. Dios a ungi Señor Hesus pa kita e velo. Na momento ku e velo kita i bo haña un enkuentro real ku Dios, libertat ta bini den bo kaminda. E libertat akí ta hiba bo na aserká, alabá i adorá Dios sin ningun bèrgwensa. Niun hende ni nada no por hòrta bo libertat, solamente bo mes por renunsi’é.

13

Abo mester tuma e desishon di mantené un bon relashon ku Dios i no permití nada stroba bo. E desishon ta den bo man. Algun rekisito ku bo mester tene kuenta kuné, ora bo skohe pa e kaminda smal: 1. Stima Dios ku henter bo kurason, ku henter bo alma, ku henter bo mente i ku tur bo forsa. Esaki ta e adorashon di mas haltu ku un hende por duna Dios, dor di warda tur Su mandamentunan (Deuteronomio 6:5). 2. Stima bo próhimo manera bo mes (Marko 12:31). 3. Bo mester bandoná tur plaser di karni (Galationan 5:19-21). E deseonan di karni i E Spiritu semper ta bringa ku otro. E karni ta hiba na maldat (e kaminda hanchu). Miéntras ku e fruta di Spiritu ta produsí: amor, goso, pas, pasenshi, kariño, bondat, fieldat, umildat i dominio propio (Galationan 5:22-23). E kualidatnan akí mester biba den bo. 4. Okupá bo mes ku lesamentu di E Palabra di Dios. Obedesé E Palabra pa bo por hasi bo kaminda prosperá i pa bo tin éksito (Josué 1:8). 5. Laga E Spiritu Santu di Dios dirigí bo. E úniko forma ku E Spiritu di Dios por dirigí bo ta dor di lesa, skucha i kana den obedensia di Su Palabra. 6. Hasi orashon pa bo tin komunion ku Dios. Den orashon bo ta adorá, alabá, gradisí, konfesá, pidi i supliká pa bo mes i pa otronan. Dios ta skucha orashon di e hende hustu (Proverbionan 15:29).

14

Ora ku bo biba pa agradá Dios, bo ta kanando riba e kaminda smal. Si problema i opstákulo presentá, Dios mes ta yuda bo vense tur. E kaminda smal tin: Poder, outoridat, siguridat, protekshon. Bendishon, viktoria, libertat. Santidat, puresa, lus. Bèrdat, onestidat, sinseridat, integridat. E fruta di E Spiritu ku ta: amor, pasenshi, pas, goso, amabilidat, bondat, kariño, umildat i dominio propio. No desviá for di e kaminda, ya ora bo yega na e porta di bida eterno i bo mira Hesus pará na porta, E por bisa: “Drenta, Mi sirbidó fiel, bin kompartí den Mi legria.” Tuma e desishon di nenga bo mes i renunsiá tur loke bo tin pa sigui Hesus. Bo mester entregá bo boluntat i bo bida kompleto den Su man, pasobra E ta bo doño. Bo ta pertenesé na Kristu Hesus, pasobra Kristu ta Señor, E Doño di tur kos. Unabes ku bo entregá bo mes kompletamente na Dios i bo obedes’É den tur kos, bo ta kla pa risibí tur loke E tin pa bo. “13Drenta dor di e porta smal, pasobra hanchu ta e porta i espasioso e kaminda ku ta hiba na destrukshon, i hopi ta esnan ku ta drenta dor di dje. 14Pasobra chikitu ta e porta i smal e kaminda ku ta hiba na bida, i poko ta esnan ku ta hañ’é.” (Mateo 7:13-14)

15

Boutismo ta muestra ku un persona a muri pa e manera bieu di biba, i a resusitá den

e manera nobo di un bida den Kristu.

Ora bo tuma e desishon di sigui e kaminda di bida, Hesus ta e ehèmpel ku bo ta skohe pa sigui. Hesus a bai nos dilanti den tur kos. E ta nos ehèmpel i modelo perfekto. Hesus tambe a obedesé E Palabra i a wòrdu batisá (Lukas 3:21). NIFIKASHON DI BOUTISMO E boutismo den awa ta visibel, eksterno i di un realidat spiritual interno. E realidat spiritual interno ta ku e persona a muri pa piká i pa mundu. Ku boutismo e hende bieu ta wòrdu derá i ta lanta un kriatura nobo. “3Of boso no sa ku nos tur ku a wòrdu batisá den Cristo Jesus a wòrdu batisá den Su morto? 4Pesei nos a wòrdu derá huntu kunE dor di boutismo den morto, pa meskos ku Cristo a wòrdu lantá for di e mortonan dor di e gloria di e Tata, nos tambe por kana den nobedat di bida. 5Pasobra si nos a wòrdu uní kunE den e semehansa di Su morto, siertamente nos lo ta uní kunE tambe den e semehansa di Su resurekshon, 6sabiendo esaki, ku nos hende bieu a wòrdu krusifiká huntu kunE, pa deshasí di nos kurpa di piká, pa nos no ta esklabu di piká mas;” (Romanonan 6:3-6) Batisá ta nifiká pa bisti bo mes ku Kristu (Galationan 3:27). Boutismo ta referí na e sufrimentu i morto di Kristu. Boutismo ta representá e morto, e resurekshon i tur loke a hiba Kristu na e susesonan ei.

17

Boutismo ta muestra ku un persona a muri pa e manera bieu di biba, i a resusitá den un manera nobo di biba den Kristu. E resurekshon for di awa, ta simbolisá resurekshon di e kristian tambe. Boutismo ta bini despues di a wòrdu konvensé di piká, despues di a arepentí i a konfesá Kristu komo Señor i Salbador. Ora bo batisá, bo ta duna un testimonio personal pa medio di e boutismo. Boutismo ta duna testimonio ku bo ta labá, santifiká i hustifiká den e nòmber di Hesus i dor di E Spiritu di Dios (1 Korintionan 6:11). Tin okashon i sirkunstansianan kaminda un persona no por batisá, manera morto, un enfermedat grave òf un kousa similar; manera por ehèmpel den e kaso di e ladron ku a arepentí banda di Hesus na e krus (Lukas 23:42-43). Pero si un persona ku tin e posibilidat di por batisá, deliberadamente ta rechasá e boutismo di awa, e persona akí ta desobedesé E Palabra di Dios. Nos por lesa esaki den Lukas 7:30, kaminda e fariseonan deliberadamente a desobedesé i a rechasá e propósito di Dios pa nan bida. Tur desobedensia ta piká. E FORMA DI BATISÁ E palabra griego ‘baptizo’ ta nifiká: imershon, sumergí, bai abou, muri. Pues e boutismo kristian ta dor di imershon; ke men, bai bou di awa. Den Beibel nos por mira algun echo den kaso di boutismo di den awa:

18

1. Boutismo den awa ta rekerí awa. “I siguiendo riba e kaminda, nan a yega na un lugá ku tin awa, i e eunuko a bisa: ‘Ata awa! Kiko ta stroba pa mi wòrdu batisá?’” (Echonan 8:36) 2. Boutismo ta rekerí awa na abundansia (Juan 3:23). 3. Esun ku batisá i esun ku ta batis’é, tur dos mester ta den awa (Echonan 8:38). 4. Esun ku ta wòrdu batisá mester bai kompletamente den awa (Romanonan 6:4; Kolosensenan 2:12). 5. Esun ku a wòrdu batisá mester sali for di awa bèk (Mateo 3:16; Echonan 8:39). Promé ku un persona batisá, e mester: Arepentí di su pikánan. Kere den E Evangelio di nos Señor Hesukristu. Duna fruta di arepentimentu. Wòrdu siñá apropiadamente i tin un eksperensia kla di su salbashon. Si bo batisá un hende sin ku el a pasa den e proseso akí, lo bo batisá un pekadó ‘seku’ i e lo sali un pekadó ‘muhá’. KI ORA MESTER BATISÁ? Tèstamènt Nobo no ta spesifiká ningun tempu pa batisá, pero e persona mester ta plenamente konsiente di su eksperensia nobo ku Señor. Un beibi, por ehèmpel, no ta konsiente di su aktonan.

19

E no ta konsiente di piká, ni e no tin un eksperensia di su salbashon. Kada hende mester por skohe konsientemente pa e desishon akí. Den e tempu di e apòstelnan e echo di kere, aseptá i konfesá Kristu i Su Evangelio tabata representá persekushon, pèrdida di propiedat, fortuna, herensia i asta nan bida. Ta e konvikshon ku nan a risibí pa kuminsá un bida nobo ku Kristu, a guia nan pa obedesé Su Palabra. Ora E Palabra di Dios konvensé bo, bo ta obedesé i batisá mesora. Den e buki di Echonan 22:16, nos por lesa kaminda Beibel ta bisa: “I awor, pakiko bo ta tarda? Lanta, i wòrdu batisá i laba kita bo pikánan, invokando Su nòmber.” “I korespondiendo na esei, boutismo awor ta salba boso–no e kitamentu di sushi for di e karni, ma un apelashon na Dios pa un bon konsenshi–pa medio di e resurekshon di Jesu-Cristo,” (1 Pedro 3:21)

20

Ta importante pa despues di boutismo, nos tambe apartá nos mes den ayuno i buska

e direkshon di Dios pa nos bida.

Despues ku Juan Boutista a batisá Hesus, nos ta mira ku E Spiritu Santu a baha riba Hesus i El a wòrdu yená ku Spiritu Santu. Nos ta mira tambe ku Spiritu Santu a hiba Hesus mesora den desierto, pa E yuna i wòrdu prepará pa Su ministerio. P’esei ta importante pa despues di boutismo, nos tambe apartá nos mes den ayuno i buska e direkshon di Dios pa nos bida. Dios lo revelá e propósito pa nos bida i Su Reino na nos. Den e kapítulo akí, nos ta bai bira mas konsiente di E Spiritu Santu di Dios i Su poder manifestá den nos. Komo yunan di Dios, nos mester sa kiko tin den nos. E Palabra di Dios ta bisa den 1 Juan 4:4: “Boso ta di Dios, yu chikitunan, i boso a vense nan; pasobra mas grandi ta Esun ku ta den boso ku esun ku ta den mundu.” E PROMÉ FASE Nos tur tabata i ta buskando algu pa yena e bashí ku ta solamente Dios por yena. Na momento ku nos a tende e palabra di speransa (E Evangelio), nos a bin komprondé ku rekonsiliashon ku Dios ta posibel, i nos a risibí Kristu Hesus komo nos Rei i Salbador (2 Korintionan 5:19). Na momento ku nos risibí Kristu, nos ta risibí e derechi sagrado pa bira yunan di Dios (Juan 1:12). Nos a bira e tèmpel di E Dios bibu i E Spiritu di Dios ta bin biba den nos (1 Korintionan 3:16).

22

Asina nos ta subi riba e kaminda ku ta dirigí na e bèrdat i bida (Juan 14:6). Pero pa nos por kana korektamente riba e kaminda, bèrdat i bida, nos tin mester di guia. KEN LO TA NOS GUIA? E Spiritu Santu ku Hesus a primintí nos ku E lo manda pa nos, lo guia nos den tur bèrdat (Juan 16:13-15). E lo papia i revelá nos tur e bèrdat. Na momento ku nos stima Hesus i warda Su mandamentunan, Spiritu Santu ta bin biba den nos. “15Si boso ta stimaMi, boso lo warda Mi mandamentunan. 16I lo Mi pidi e Tata, i E lo duna boso un otro Konsolador, pa E keda serka boso pa semper, 17esta, e Spiritu di bèrdat, Kende e mundu no por risibí, pasobra e no ta mir’E ni konos’E, ma boso konos’E pasobra E ta biba serka boso i lo ta den boso.” (Juan 14:15-17) DIKON DIOS A PRIMINTÍ NOS SU SPIRITU SANTU? Dios a primintí nos Su Spiritu Santu, pasobra sin E Spiritu Santu nos no por ta manera djE. Tur ku kere pa medio di fe den Kristu Hesus, lo risibí E Spiritu Santu di Dios (Galationan 3:14). Tin hende ta kere ku e promesa di E Spiritu Santu tabata pa e tempu di e apòstelnan so. Dios no ta hasi distinshon di persona, pero esnan ku ta agrad’É ta risibí Su promesa.

23

E promesa akí no ta mará na un tempu spesífiko. Den Joel 2:28-32, tin pará bon kla ku den e último tempu, Dios lo drama Su Spiritu riba tur karni. Ke men no pa e apòstelnan so, sino pa tur ku kere. Nos por konkluí ku E Trinidat ta bèrdat, pasobra Dios a presentá Su mes na tres manera: 1. Dios Kreador - Yehovah. 2. Dios revelá - Kristu Hesus. 3. Dios manifestá - Spiritu Santu. Spiritu Santu ta un Persona ku ta bin biba den bo ku Su hustisia, huisio, karakter, poder, outoridat, disiplina, amor, obedensia i abilidatnan. Den un palabra bisá, Su semehansa. KON MI POR RISIBÍ E PROMESA? Obedensia ta e yabi pa risibí E Spiritu Santu di Dios. Si nos ta stima Hesus, nos ta hasi loke ku E bisa nos. Esei ta hiba nos na: Arepentimentu. Kere den Kristu Hesus i tin fe den djE. Warda tur Su mandamentunan. Batisá den e nòmber di Tata, Yu i Spiritu Santu. Biba den obedensia i santidat.

24

Ta meskos ku ora Hesus a bisa Su disipelnan den Lukas 24:49, “... ma boso mester keda den e stat Jerusalèm te ora boso wòrdu bistí ku poder for di ariba.” , e disipelnan a hasi manera El a bisa nan. Aki Yerusalèm ta representá orashon i santidat. Si nos por interpret’é, e lo zona asin’aki: “Ma boso mester keda den orashon i santidat te ora boso wòrdu bistí ku poder for di ariba.” (Echonan 1:4-5, 8). Esakinan tur a keda perseverá den orashon den un akuerdo. Nan a hasi manera Hesus a bisa nan. Nan a obedesé i e resultado ta históriko: nan a wòrdu batisá ku E Spiritu Santu. Ku e yenura total akí, nan a kuminsá testifiká di Hesus. Echonan 2:37, ta mustra nos ku esnan ku a skucha a wòrdu konmoví i konvensí te den profundidat di nan kurason. Hesus tambe a hasi aktonan di obedensia. Hesus tambe a kumpli ku E Palabra, El a batisá i Spiritu Santu a baha riba djE (Lukas 3:21-22). El a hasi esaki komo un akto di interseshon i pa kumpli ku tur hustisia. Hesus, yen di Spiritu Santu, a bolbe for di Yordan i a wòrdu hibá dor di E Spiritu den desierto (Lukas 4:1). Den desierto bo ta wòrdu moldiá i formá; bo karni (bo ego, bo kièr etc.) mester muri. Beibel ta bisa ku ora Hesus a bini bèk for di desierto, El a bini den e PODER di E Spiritu, pasobra El a pasa e prueba ku gran éksito.

25

E Spiritu di Dios a ungi Hesus pa: Prediká E Evangelio. Proklamá libertat na e prezunan. Restourá bista di e siegunan. Duna libertat na esnan oprimí. Proklamá e aña agradabel di Señor. (Lukas 4:18-19) Ta E Spiritu di Dios ta Esun ku ta ungi nos pa hasi e trabou. P’esei nos tin mester di E Spiritu di Dios (1 Korintionan 12:3). Bo por imaginá bo un mundu sin Spiritu Santu? Lo no tabatin kreashon, universo, humanidat, Beibel, salbashon, sanashon, liberashon, arepentimentu, kristianismo etc. Spiritu Santu ta Dios manifestá. P’esei nos tin mester di E Spiritu Santu, pasobra ora nos tin E, nos lo no seka di paden. “38Esun ku kere den Mi, manera e Skritura a bisa: ‘For di su paden lo kore riunan di awa bibu.’ 39Ma esaki El a bisa di e Spiritu, Kende esnan ku a kere den djE tabata bai risibí; ...” (Juan 7:38-39)

26

Nos Tata ku ta den shelu, Bo nòmber sea santifiká. Ku Bo reino bin. Ku Bo boluntat sosodé

na tera meskos ku den shelu.

Orashon ta komunikashon den e forma di mas ekstenso entre e yunan di Dios i Dios Tata. Orashon ta nifiká pa bo tin kontakto ku Dios i pa papia kunÉ. Tin diferente manera i dimenshon di orashon. Pero e motibu di orashon ta, pasobra Dios Tata ke tin komunion íntimo ku Su yunan. Den e komunion akí, E ta revelá nos Su aliansa. Ta un bendishon pa Su yunan por ta sintá na Su pianan i tin komunion kunÉ. Hesus a siña Su disipelnan hasi orashon di e manera akí: “9... Nos Tata ku ta den shelu, Bo nòmber sea santifiká. 10Ku Bo reino bin. Ku Bo boluntat sosodé na tera meskos ku den shelu. 11Duna nos awe nos pan di kada dia. 12I pordoná nos nos debenan, meskos ku nos tambe ta pordoná nos debedónan. 13I no hiba nos den tentashon, ma libra nos for di e malbado. (Pasobra di Bo e reino ta, i e poder i e gloria, pa semper. Amèn.)” (Mateo 6:9-13) E promé kos ku Hesus a siña Su disipelnan den e orashon akí, ta pa rekonosé ku Dios ta mas haltu ku hende. El a siña nan rekonosé Dios komo nan Tata i pa santifiká Su nòmber. Ademas El a siña nan ku Dios Su boluntat ta mas haltu ku e boluntat di hende, i ku ta esaki ta loke nos mester ke pa sosodé den nos bida aki na tera. Tambe Hesus a siña Su disipelnan pa pidi Dios nan pan di kada dia. Den Beibel, pan ta representá E Palabra di Dios. Den nos orashon nos mester pidi Dios pa Su Palabra ta nos guia tur dia di nobo.

28

Konfeshon di nos pikánan ta importante dilanti di Dios. Esaki ta hasi ku nos ta sinsero i onesto dilanti di djE. Pordoná ta masha esensial den relashon ku nos orashon. Pasobra si nos no pordoná, Dios tampoko ta pordoná nos nos faltanan. No ta kumbiní nos pa kana sin e pordon di Dios. P’esei nos mester pordoná tur hende ku a falta ku nos. Hesus a siña Su disipelnan pa hasi orashon pa liberashon. Nos mester keda rekonosé ku e reino, e poder i e gloria ta di Dios pa semper. E Palabra di Dios ta mustra nos den Salmo 100, kon pa drenta Su presensia. E ta mustra esaki den un forma simpel, pero tambe hopi spesífiko. Salmo 100, ta bisa: “1Grita di alegria na SEÑOR, mundu henter. 2Sirbi Señor ku goso; bin den Su presensia ku kantamentu gososo. 3Rekonosé ku SEÑOR, E ta Dios; E ta Esun ku a traha nos, i no ta nos a traha nos mes; nos ta Su pueblo, i e karnénan ku E ta pastoriá. 4Drenta Su portanan ku gradisimentu, i Su plenchinan ku alabansa; dun’E gradisimentu, bendishoná Su nòmber, 5pasobra SEÑOR ta bon; Su miserikòrdia ta pa semper, i Su fieldat ta pa tur generashon.” Formanan pa drenta Su presensia di akuerdo ku Salmo 100: Ku alegria. Sirbiendo Señor. Ku kantamentu gososo.

29

Rekonosiendo Dios komo Dios. Ku gradisimentu. Ku alabansa. Bendishonando Su nòmber. Hesus a siña nos tres dimenshon pa hasi orashon: “7Pidi, i lo wòrdu duná na boso; buska, i boso lo haña; bati, i lo wòrdu habrí pa boso. 8Pasobra ken ku pidi ta risibí, i esun ku buska ta haña, i pa esun ku bati lo wòrdu habrí.” (Mateo 7:7-8) 1. PIDI Ora nos ta pidi, nos mester pidi di akuerdo ku Dios Su boluntat. Den presensia di nos Tata, nos por pidi i esaki lo wòrdu duná na nos. Hesus a bisa: “... kiko ku boso pidi e Tata, E lo duna boso den Mi nòmber.” (Juan 16:23). Ta Dios Su boluntat pa Su yunan pidiÉ. 2. BUSKA Beibel ta bisa: “Ma buska promé e reino di Dios i Su hustisia, i tur e kosnan aki lo wòrdu añadí na boso.” (Mateo 6:33). Ora nos ta buska e kara di Dios, nos mester hasié ku henter nos kurason, i E Palabra di Dios ta bisa ku nos lo hañ’É. “Ma for di ayanan lo bo buska SEÑOR bo Dios, i lo bo hañ’E si bo busk’E ku henter bo kurason i ku henter bo alma.” (Deuteronomio 4:29)

30

Buskamentu di Señor ta rekerí profundidat. E ta pa: Tuma tempu ku Dios. Tin un relashon íntimo kunÉ. Apartá for di tur impuresa. Duna adorashon profundo. 3. BATI Ora nos bati na e porta di Dios, E lo habri pa nos. Nos Tata ku ta na shelu nunka lo keda sin kontestá. Ora nos bati na e porta korekto, nos lo drenta den e lugá korekto. Esei ta e lugá kaminda nos lo tin komunion íntimo ku Dios. “E komunion íntimo di SEÑOR ta ku esnan ku ta tem’E, i E lo hasi nan konosé Su aliansa.” (Salmo 25:14) “I esaki ta e konfiansa ku nos tin Su dilanti, ku si nos pidi kualkier kos konforme Su boluntat, E ta tende nos.” (1 Juan 5:14)

31

ORASHON FINAL “Tata Santu, Bo nòmber sea santifiká, Bo boluntat sea hasí na tera meskos ku na shelu. Nos ta presentá _________________ (bo nòmber) Bo dilanti. Nos ta gradisí Bo ku el a kuminsá un bida nobo den Kristu. Danki, Señor, ku e lo stima Bo i sirbi Bo tur e dianan di su bida. Danki, Spiritu Santu, ku Abo lo ta su mihó Amigu. Bendishon’é, Señor, den nòmber di Kristu Hesus. Amèn.”

32

IGLESIA HOUSE OF WORSHIP Sirbishinan: Sirbishi di Alabansa i Adorashon Djadumingu 10:00 - 13:00 Estudio Bíbliko Djamars 19:30 - 21:00 Sirbishi di Hubentut Djabièrnè 19:00 - 21:00 Orashon di mardugá Djaluna - Djabièrnè 5:00 - 6:00 Orashon di mèrdia Djaluna - Djabièrnè 12:00 - 13:00 Puntonan di kontakto: Adrès: Erosweg 52, Curaçao Telefon: +5999-738-4344 E-mail: ofisinahow@gmail.com www.how-online.org