Embed Size (px)
DESCRIPTION
poesie di Damiano Marchesan
Citation preview
“Le do porte”
poesie di Damiano Marchesan
AUTORITRATTO
E són propio me!
Cargo de astio e rabia drento.
Figio d’ un nio che svende fogi de carton
su fogi bianchi, perchè ’i ha robao 'l color
de quel penelo in man de l’ultimo pitor,
che de quel bianco ha fato un nuolo sora 'l mar.
Figio de cu ha la forsa de sigà:
"Quel bianco xe 'l gno sogno e me lo vanto strento !"
E són propio me!
Co’ quela idea de libertà.
Figio de un nìo che pôrta sora 'l palmo de la man
zente che frega quii Graisani e quel Palù…
e co’ la velma, drento 'l nuolo su quel mar,
’i scrive ben, ma quel che leso xe solo FALSITÀ.
E són propio me!
Che crê incora in te’l valor de l'onestà,
co' quela rabia che vien fora de ’na pena
e pùnta duto su la forsa d’ una rima,
che su quel nuolo volarave ganbià 'l testo in VERITÀ.
VITA
E 'desso m'he fermao!
Me sénto.
No he più fiao.
'Sta strà che la và in zoso,
se ferma giusto in meso.
He córso !
Xe stao un lanpo.
Per vardà indrio xe tenpo.
Me tiro suzo stieto,
e ciapo fiao in te'l peto.
Le ganbe và più pian,
me giuto co' 'ste man.
La strà se fà in salita:
he cognossuo la vita.
PRIMAVERA
De pena stieta e de lengua sita.
Tu, Primavera,
la megio musa.
Comò 'l sercio perfeto
de 'na giossa de piova
drento ’na busa.
FIOR CHE MÔRE
Fior che serca luse,
drento un sésto pien de spine.
Fior che no’ se vêrze,
pe’ no’ veghe la so’ fine.
Zovene speransa
pe’ un doman co’l sielo biavo,
figio de un presente
sconto senpre drio d’ un nuolo.
Lagreme che no vien zoso,
su quel sterpo ormai spacao
co 'l suriso falso
d’ un bruto amor che t'ha segnao.
Fior, no se capisse
qual che xe 'l tovo color…
piturao de nero
anche 'l rosso de’l to' cuor.
CUOR DE LONSERNA
Una rosa che vêrze 'l so' fior
cô la note più ciara se fà, co’ la luna;
e 'l se sêra, finìo un finto amor
cô la brosa lava le fogie, una a una.
Cuor de lonserna.
Luse, che fa ciara ’na contrada.
A vênde basi e frasi, o do caresse.
A quel viso che mai se ferma e ’scolta.
T'ha piturao ’l sielo co’ un soriso,
quando anche l'ultimo lamento de la sera 'l se dirada.
Tu ! Un sión, che vol fermasse !
E tu pagaravi tu, pe’ sintì denovo "la to' prima volta".
RUSA
Conta, conta frà, che te boge drento ?
He l'anemo lisiero e tormentao,
a muminti xe 'l svolo d’ un corcal
quando 'l sol s’ha ’pena dismissiao
e despùo xe restie che sbate in cuor,
guidae de’l sirocal.
Xe amor diverso.
Che no giudica solo cu t’ ha messo a ’l mondo.
Co’l rispeto pe’ quel Dio che no se fà mai domande.
Perche la so’ risposta xe una sola:
l'amor xe grando.
Penso, e són cussì picolo vissin de tu,
omo grando de onestà, davanti al mondo
e a i giudissi de la zente che ciama amor la falsità.
Frà, xe duto istesso tra me e tu.
Al sielo e ’l mar, al stesso blu.
Al pecao tovo xe conpagno a ’l mio.
E l'amicissia xe… ’l istesso sintimento che ne liga,
amico mio.
MARE…
'Na parola sola
che, dîta pe' ’talian,
xe, si, duto-un co’ la gno tera
ma ’nte’l nostro ciacolà
xe la to’ presensa
paragonagia a quel
che xe l'imensità.
LA STURA E 'L GRANSO
Són quà per tu... colpa 'l destin.
Comò un passpartù.
A rosegà anche l'ultima trassia de morbin.
Vêrze quel scorso, serao ben strento.
Vardà se 'rìvo, giossa a giossa, magnate drento.
A1 pezo granso, al più cativo.
Quel che decide se al doman... xe morto o vivo!
E che tu pînsi, bestia bastarda!
Nostro Signor... m'ha fato stura.
E ’l m'ha anche scrito in fondo 'l scorso:
" No 'vê paura”
Vèrzo 'l gnò scorso, serao ben strento.
E la belessa me circonda. Nissun lamento.
Drento a 'sta stura, solo certesse!
E 'l to' doman... in boca d' un pesse.
I° MAGIO
E che tu vol fâ de grando ?
Vôgio solo lavorà
oto ore a ’l giorno,
mantignì ’na famegia,
sensa nissuna maravegia.
Vôgio lavorà,
vôgio deventà grando
vôgio la dignità.
Vôgio che cù che xe in olto
vardi un solto zoso
e ’i finissa ’sto sopruso.
Vôgio alsàme la matina
e vardà ’nte’i vogi ’l mondo,
dîli che són vivo,
no vôgio tocà ’l fondo.
Vôgio restà omo
no vôgio cage ’nte’l scuro più profondo
vôgio fâi una riada a ’l mondo.
De grando... magari no sarè sior
ma bramo, zuro, bramo solo de ’vê un lavor.
EL BARCO
Drento d’ un mar biavo, òmini e ’l Barco.
Pescauri d’ oltri tinpi
nati de un penelo ’ncora sporco.
Mane ,legno, vita e morte,
rughe e stienzere…
la stéssa sorte.
AMOR MIO
E prima de tu?
Ninte !...
E dopo de tu?
Ninte !...
Ma 'desso...
'desso xe un logo che no cognosse 'l confine...
xe ’l logo ’ndola tu són per man co’ le
stele…
xe un logo sensa un pareo co’ scrito fine...
xe 'l logo ’ndola che 'l mar xe senpre in
fele...
Al prima e ’l dopo rêsta ’l ninte,
Ma 'l 'desso xe un arconbè de mile tinte.
SULI
'Scólto… e són sordo.
La vose no sénto.
Orbo… ma vardo,
e drento un lamento.
Le mane xe tante,
ma ’l cuor no’ le sénte.
I oci me serca,
no’ vego la zente.
Xe un sìgo stropao !
Al fiao s'ha fermao !
e vardo per su
e me sénto co' tu.
Tignìte per man
e veghe ’l doman,
e ’l ricordo de tu
se pitùra de blu.
AL PONTE TRA I DO TAPI
Insieme...
e lontan le sponde.
Gèreno tapi inte'l paluo,
in meso a un mar che ne vol sconde.
La vogia de stà più tacai,
drento de un sogno realizao.
’Spetà la séca rassegnai,
per dé quel baso sensa fiao.
Ma incuo xe ganbiao 'l mondo.
Tu són al gno ponte tra i do tapi:
insieme, mota in t'un sigondo,
a dismissià 'sti fiuri fiapi.
Un ponte che ne vanta strinti,
piturao de'l color del nostro sielo,
tra quii do tapi, ormai cuntinti,
'desso quel mar par un rïelo.
LA TELA E 'L PITOR
No pôsso date quel che vôgio.
Ma, vôgio date quel che pôsso.
Drento 'l tramonto, a veghe megio,
xe la speransa, quel bel rosso.
E te caresso co' un bel bianco,
sensa tiralo co'l penelo.
De le restie no sôn mai stanco.
Per quela vela me và 'l zalo.
Per 'sto gnò mar che me fà vive
varavo mile tinte e tanti blu.
No pôsso date quel che vôgio.
Ma t'he za dâo tanto de più.
NOSTALGIA
Gravo: ’na lengua de sabion ’nte’l mar de tanto in tanto caressagia de’l coldo sirocal. Vàrdo Gravo de lontan… végo prima i palassi grandi de ’l canpanil e inte’l cuor méto la man: tra garghe ano al posto de l’anzolo cataremo un baìl.
LA CESA
Vinti guardiani…
diese per parte.
Bricole de marmo
su un mar de fede e arte.
Vinti guardiani…
corpi perfeti.
Che vanta suzo i resti d’ una ciesa,
pregi e difeti.
Vinti guardiani…
co stranba la sorte.
A conpagnà quii do nuvissi sora l'altar
e, 'l giorno drio, ’scoltà canti de morte.
Passao e presente...
Guardiani e custodi
de mila preghiere e cussà quanti pecai,
de la gnò zente.
LE DO PORTE
Caligo
Nuoli sdiunfi de lagreme e de àneme
sielo e morte
drio de le do porte
Camini che fuma
e fugheri che no' scolda
odor de morte
drento quele porte
Casuni che no' xe famegia
no se magna
no se canta
no se rîe
no se stà in pie
Silensio e morte
propio drio de le do porte.
Copyright@2013
