Rikohin Tinige’ As Itmas Rebirenti

OBISPO TOMAS A. CAMACHO

Chalan Kanoa, Saipan

July 02, 2000 asta April 13, 2003

CHA'-MU MA'A'AÑAO, LAO FANHONGGE July 02, 2000

Pa'go i XIII Damenggo gi otdinario na tiempo Añu B. I ebanghelio ni manmanana'i hit para este na Damenggo machuchule' ginen i tinige' San Marcos, Kapitulu 5. Guiya este na ebanghelio pot si Jairus yan i haga-ña ni matai. Para ta komprende hafa ha keke sangani hit este na ebanghelio maila' ya ta usa este na ehemplo. Gi gipot San Vicente guini giya Saipan gi 1992 ha sangani yo' un palao'an ni este na estoria-ña. Guenao na sakkan ha tutuhon sumiente una kosa na ti otdinario gi halom tiyan-ña. Humanao para i hospitat ya mareseta. Masodda' na guaha tumor o sino kalang balabola dumadangkulo gi halom estomagu-ña. Nina'luhan gue' lao taya' ha sangani fuera di i asagua-ña ha'. Ha tutuhon i dos humanao para u fanayuyot gi as Santa Maria giya As Teo yan mabisisita i gima'yu'us San Vicente. Mananayuyyot siha i dos kuanto i siña. Ayu na simana anai matutucha i nobenan San Vicente mareseta gue' ta'lo pot i para u ma'atmiti gi hospitat para i operasion. Sinangani gue' ni dokto na guaha sen na'manman masusedi. Taigue esta i tumor ni estaba gi halom tiyan-ña. Nina'sen magof i palao'an ni este na notisian i dokto ya sen magof gue' yan i asagua-ña matto para i gipot San Vicente para u mana'i gue' grasia pot este na milagro ni matto giya guiya. Sen bonito i estorian este na palao'an ha na'fanmanlili'e' hit i hinengge-ña gi fino' i Saina ni ta hungok pa'go guini na ebanghelio. Hahasso este siha na palabras. Masusedi este anai guaguaguato si Jesukristo para i gima' Jairus para u na'homlo' i haga-ña. Guaha malak guatu giya guiya ya ilek-ña, "Matai esta i haga-mu; para hafa un atborota mas i ma'estro?" Mumisen lago' i atadok-ña si Jairus. Lao antes di u guaha sinangan-ña fine'naigue' gue' as Jesus ya ilek-ña, "Cha'-mu ma'a'añao; lao fanhongge." Este mismo na klasen hinengge yan inangokko matto gi este na palao'an ginen i fino' Jesukristo ni ha hungok gi tinayuyot-ña yan i asagua-ña. Si Santa Maria fine'na pumo'lo i hinengge-ña yan i inangokko-ña gi lahi-ña as Jesukristo. Kon todu si San Vicente ha po'lo todu i hinengge-ña yan i inangokko-ña gi as Jesukristo. Guiya este i et mismo na hinengge yan inangokko ni ha sangangani hit si Jesukristo pa'go ginen i palabras gi ebanghelio. Kada unu giya hita pa'go guini guaha ta padedesi, guaha chathinassoso-ta, guaha kilu'us ta u'uma. Siña ha' guaha umestototba hinasso-ta pot i hinemlo'-ta. Siña ha' parehu hamyo yan si Jairus, guaha addet chetnot-ña gi familia-mu. Siña ha buente na kalang hao i hagan Jairus, hoben, ya guaha problema-mu yan i familia-mu. Kada unu giya hita guaha umestototba hinasso-ta yan ti siña hit mantrankilu. Kada unu giya hita guaha makkat na kilu'us ta u'uma gi korason-ta. Para kada unu giya hita ha sangangani hit si Jesukristo ayu i ha sangani si Jairus ni ta hungok pa'go guini na ebanghelio: "Cha'-mu ma'a'añao; lao fanhongge." Kada unu giya hita sinangangani as Jesukristo ayu i ha sangani ayu na palao'an i masodda' kanset gi tiyan-ña ya manayuyot gi as Santa Maria yan as San Vicente. Gi tinayuyot-ña ha hungok i sinangan-ña si Jesukristo: "Cha'-mu ma'a'añao, lao fanhongge." Si yu'us ma'ase' ni atension-miyu yan adios asta otro simana. Si Yu'us en fambinendisi, i + Tata, yan i Lahi-ña, yan i Espiritu Santo. Amen.

2

"MAOLEKÑA MANGAGAO YA TI MANA'I, KI MANOFRESI YA TI MA'AGRADESI"

July 09, 2000

Pa'go i XIV Dameñggo gi Otdinario na tiempo. I Ebañghelio machuchule' ginen i tinige' San Marcos, kapitulu 6. Guiya este na Ebañghelio anai tuma'lo tatte si Jesukristo gi señgsoñg-ña giya Nasaret ya ti ma'agradesi gue'. Para ta komprende hafa masusedi maila' ya ta ekuñgok este un ratu. Guaha fino' i manamko' na sen magahet. Ilek-ñiha, "maolekña mangagao yan ti mana'i, ki manofresi ya ti ma'agradesi". Guaha nai manofresi hao para un cho'gue una kosa ya masañgani hao na ti manisisita ayudu-mu? Puti siniente-mu. Sesso masusedi este. Mandaña' teñga i famalao'an para maplanuyi hafa na gupot. Sigi manmatareha hayi para u fina'tinas i difirentes na putahi. Pot los uttimu, hagu ti mana'i hao tareha-mu. Pues masañgani hao para un fanayuda gi ayu i mas mappot tareha-ña. Pat sino un lahi sigi ha' ha andi'e' un palao'an. Ha agañg gi telefon i palao'an kao siña umali'e' i dos, sinañgani gue' na taya' lugat-ña. Ha agañg para u egga' i dos movie, ilek-ña na para u fanestudia. Pues ha agañg ta'lo lao sinañgani gue' na ha pupulan i che'lu-ña dikike'. Pot los uttimu, ha atmiti na ti guinaiya gue'. Ti ma'agradesi i inefresi-ña. O sino manaplika hao para un facho'cho'. Un tuñgo' ha' na guaha bakante para ayu na cho'cho' sa' un taitai gi gaseta. Matago' hao para un tuge' papa' i kapasidat-mu na klasen cho'cho' ya umali'e' hamyo yan i ma'gas. Despues humanao hao para i gima'-miyu para un nañgga i ma'agañg-mu. Maloffan unos kuantos dias, un simana mas. Despues di dos simana un agañg gi telefon i ofisina ya sinañgani hao ni sekretaria na esta guaha otro makonne' para ayu na cho'cho'. Ti ma'agradesi i inefresi-mu. Ti manisisita hao. Maseha hayi ni esta ha ekspirensia este - ya kasi todos hit esta ta ekspirensia este - siña ha komprende hafa siniente-ña si Jesukristo guini na Ebañghelio i ta huñgok maproklama pa'go. Ha diñgu si Jesukristo i señgsoñg-ña ya sumaga giya Capernaum. Ginen enao na lugat nai ha tutuhon sumetmon, ya mamta i maolek masañgan-ña gi todu i lugat. Huñggan guaha unos kuantos ti umaksepta gue', lao mayot patte maseha manu ha hanague ma'aksepta yan maninteresao nu guiya. Despues un dia ha disidi si Jesukristo para u ta'lo tatte gi señgsoñg-ña giya Nasaret para u setmuni i achataotao-ña mismo. Ti parehu na tratamento mana'i gue' gi señgsoñg-ña. En lugat di u fanmagof, makuestiona gue'. Anai malak guatu gi synagoga, o kapiya, manáñañgon i taotao siha: "Amanu nai umeskuela este? Adda ti guiya este i katpenteru, i lahen Maria?" Este na sinañgan-ñiha kumeke ilek-ña: "Hayi gue' este ha popo'lo? Hayi ha keke'dagi? Otdinario ha' gue' na taotao ya hafa'papale' gue'." Ha kontinua i Ebañghelio ya ilek-ña, "... ti manmalago' ma'aksepta gue'." Estague' si Jesukristo na ha ofresen maisa gue' para i taotao-ña mismo; ya ti ma'agradesi. Marichasa gue'. Todos hit ta tuñgo' hafa siniente-ña i Saina guini. Sin duda, este i mas na'piniti na sinienten taotao. Pues siña manmañodda' hit konsuelo na kon todu si Jesukristo ti ma'agradesi i inefresi-ña. Fuera di este, siña maneyak hit hafa bida-ña pot este na asunto. Fine'na, maila' ya ta atan hafa gi magahet i rason na ti ma'aksepta i inefresi-ta. Kumeke ilek-hu: Debi di ta atan i lina'la'-ta kao gaige i difekto giya hita na ti manma'aksepta hit. Siguru yo' na kon todu si Jesukristo ha faisen maisa gue' sa' hafa na ti ma'aksepta gue'. Sin duda, tunas gue' na taotao sa' ha chocho'gue i minalago' Yu'os. Pues taigue i defekto giya guiya. Ti la'yiyi libiano este i para ta eksaminan maisa hit. Debi ti ta fanomtom. Yañggen mampos ta eksaminan maisa hit siña ha' uttimoña ta kritikan mamaisa hit todu i tiempo. Ya ti gof maolek enao. Lao yañggen ti nahoñg ta eksaminan maisa hit, pues uttimoña todu i tiempo otro taotao ta akukusa ni linachi-ta siha. Ya taya' probecho-ta. Yañggen ti manma'aksesepta hit sa' pot i baba kustumbre-ta, yan manimpitosu hit, pues debi di ta rialisa na kombieni na ta tulaika i kustumbre-ta. Yañggen ti manmalago' hit ta tulaika i

3

baban kustumbre-ta pues ti manonesto hit ya ni ñgaian na ta fanma'aksepta. Debi di ta fanonesto sa' yañggen ahe', pues ta dagenmamaisa ha' hit. Siguru na anai ti ma'agradesi si Jesukristo, onesto ha eksaminan maisa gue'. Pot los uttimu, ripara ha' hafa bida-ña si Jesukristo. Anai ti ma'aksepta gue' gi señgsoñg-ña, ahe' ti mamatani. Humanao gue' para ayu na lugat anai ma'aksepta gue' yan enao na sumetmon. Hahasso na pot i ti inagradesi hao ni un taotao ti kumeke ilek-ña na todu i taotao ti umagradesi hao. Sigi ha' manespiha sa' siempre guaha para un inagradesi. Hahasso na gaige guihi huyoñg un taotao ni ha nisisita amigu taimanu ha' na hagu un nisisita amigu, o sino guahu hu nisisita amigu. Ya mientras ki un sosodda' enao na amigu, fanhoñgge na si Yu'os todu i tiempo siempre inagradesi hao achokka' taimanu alastrao-mu. Si yu'us ma'ase' ni atension-miyu yan adios asta otro simana. Si Yu'os en fambinendisi, i + Tata, yan i + Lahi-ña, yan i + Espiritu Santo. Amen.

KATTAN UN SENDALU GINEN VIETNAM July 16, 2000

Pa'go i XV Damenggo gi otdinario na tiempo, Añu B. I ebanghelio ni manmanana'i hit para este na Damenggo machuchule' ginen i tinige' San Marcos, Kapitulu 6. Guiya este na ebanghelio anai ha sangani si Jesukristo i mandisipulu-ña para u fanma'oleos ni laña i manmalangu. Para ta komprende hafa ha kekesangani hit este na ebanghelio maila' ya ta usa este na ehemplo. Malago' yo' tumaitai este na katta ginen un sendalu ni gumera giya Vietnam. Ha tuge' este na katta ginen i kattre-ña gi hospitat anai estaba mana'sasaga gue' sa' dinanche bala. Estague' tinige'-ña: "Gigon dinanche yo' pumara hu siente i taotao siha gi oriya-hu. Kalang mohon guaguahu ha' na maisa. Este nai hu hasso ayu i ginen hu hungok na sinangan i manamko' na yanggen kumeke matai hao, pumara un siente i taotao siha gi oriya-mu. Hahagu ha' na maisa. Addet dinanche-ku ni bala; pakpak i bomba gi tattek-ku ya ha utot i akague na adeng-hu, yan ha danche lokkue' i akague na kannai-hu yan i tatalo'-hu, yan i ilu-hu. Gotpe manma'edot i tataotao-hu ya kalang para bai lalangu lao hu kontra kuanto i siña pot no bai lalangu sa' matto gi hinasso-ku na yanggen lalangu yo' siempre matai yo'. "Manestaba tres pat kuatro na praktikante gi hilo'-hu machocho'gue kuanto i siña para bai ma'ayuda. Siha mas manluhan ni irida-hu. Durante este siha duru di hu cho'gue kuanto i siña para bai fanayuyot. Lao durante todu este siha ti siña yo' manhasso tunas. Lao matto dangkulon hinengge-ku gi as Yu'us. Hu siente na kumeke matai yo' ya hu cho'gue kuanto i siña para munga yo' matai. Guenao na momento nai hu hasso na guaha isao-hu dangkulo. "Hu chagi ta'lo manayuyot lao ti siña. Hu faisen i praktikante para bai makuentusi yan para bai ma'ayuda manayuyot. Lao kalang mohon guaguahu ha' na maisa. Ayu siha i manestaba gi oriya-hu i bos-ñiha ha' hu huhungok. Despues di dos oras mana'ma'udai yo' gi helicopter na batkon aire. "Anai matto yo' gi hospitat hu siente kuatro o sino sinko na taotao muna'o'omak yo'. Este nai hu baba i mata-hu lao enao ha' i un pie siña hu li'e' gi me'nan mata-hu ya maya'. Este nai guaha dumilok papa' gi hilo'-hu. Ti siguru yo' hayi gue' lao hinaso-ku na i chaplain. Despues di hu li'e' gue' hu tutuhon chatgua-hu. Ti siña yo' kumuentos esta sino ki para bai ñangon ha' ya ombres este makkat. "Anai esta para bai lalangu machom atadok-ku ya hu hungok i bos-ña si pale' ilek-ña, 'Kao mañotsot hao ni isao-mu?' yan todu i nina'siña-hu hu ñangon hulo', 'Hunggan!' Despues hu siente si Pale' ha palala'i laña i ha'i-hu antes di u falingu i hinasso-ku. Despues guaha masusedi ya ni ngai'an nai bai maleffa - ya taya' nai masusedi este nu guahu!

4

"Gotpe ha' mama'-i-taguan yo'; ya mumagof siniente-ku, ya kalang mohon mama'ya yo' gi mapagahes. Kalang humuyong yo' guini na tataotao-hu yan i anti-hu. "Despues di este makmata yo' dos pat tres biahi durante dies dias; esta ti ma'añao yo' matai. Gi magahet hu nanangga na bai matai. Bonito este na kattan este na sendalu anai ha risibi i santos oleos o sino i sakramenton manmalangu. Bonituña este na estoria-ña ki i tinaitai-hu siha gi lepblon teologia. Este i sakramenton manmalangu si Jesukristo tumutuhon. Ha na'fanhomlo' i manmalangu gi tiempo-ña anai ha pacha ilon-ñiha ya ha oleos siha. Ya pa'go na ebanghelio ha na'klaru na si Jesukristo ha na'i i manapostoles ni este na nina'siña pot i para u makontinua i ministro-ña para u na'fanhomlo' i taotao. Ilek-ña i ebanghelio pot siha, "Manma'oleos ni laña i manmalangu ya manhomlo' siha." (Mk 6:13) Gi taiguini na manera i kattan Santiago gi Nuebu Testamento ha sangani i antigu na mangilisyanu para u mapresenta siha para u mana'fanhomlo', ilek-ña: "Yanggen guaha malangu gi entre hamyo? Debi di u na'ma'agang i mamale' i gima'yu'us, ya siha u matayuyuti gue' yan u ma'oleos gue' ni laña gi na'an i Saina, ya i tinayuyot gi hinengge u sinatba i malangu, ya i Saina u kinahat gue' hulo'. Yanggen guaha ha kometi isao, siempre ma'asi'i gue'. (James 5:14-15) Estague' bida-ña este na sendalu giya Vietnam ni ha tuge' este na katta. Ha sangan i sen na'manman na mana'homlo' gue' gi hinasso, gi tataotao yan gi ante anai ha risibi i sakramenton manmalangu. Yanggen para ta esplika hafa kumeke ilek-ña este na sakramento pues siña ta sangan taiguini: Guiya este anai ha kontinunua si Jesukristo i na'homlo' na ministro-ña pa'go na tiempo ni ha tutuhon anai estaba gue' gi tano'. Taimanu ha' na ha na'fanhomlo' i manmalangu gi tiempon-ña ginen i fuetsan i tataotao-ña, pues taiguenao ha' lokkue' ha kontinunua numa'homlo' si Jesukristo ginen i aksion yan seremonias gi gima'yu'os-ña. Kumeke ilek-ña na et mismo Kristo ni numa'homlo' gi tiempon i ebanghelio guiya ha' lokkue' numana'homlo' pa'go na tiempo. Hokkok ha' difirensiaña i manera nai ha na'fanhomlo' siha. Gi tiempon ebanghelio ha na'fanhomlo' siha ginen i tataotao-ña. Ha pacha siha ni kannai-ña mismo. Lao pa'go na tiempo numana'homlo' gue' ginen i luma'la' ta'lo na tataotao-ña, i mistika na tataotao-ña, era i gima'yu'us. Ha papacha hit indirektamente ginen i kannai i mamale' ya yanggen macho'gue taiguini ma'ekspirerensia parehu na klasen hinemlo' ni ma'ekspirensia gi tiempon ebanghelio. Pot enao na yanggen guaha pinadesisi-ta siriosu, o sino esta manamko' hit, o sino para ta fanma'opera ni dangkulo ya trabiha ti ta risisibi este i sakramenton manmalangu, pues este na ebanghelio ha tatago' hit para ta risibi este na sakramento. Pat sino yanggen guaha miembro gi familia o sino atungo'-ta ni siriosu chetnot-ña ya trabiha ti ha risisibi este na sakramento pues nihi ya ta ayuda siha para u marisibi. Yanggen ta ekungok i inagan-ña si Jesukristo pues hita lokkue' siña ta angokko na ta mana'fanhomlo' ginen chetnot tataotao, pat hinasso, o sino spirituat taimanu ha' i taotao siha gi tiempon ebanghelio ni manafanhomlo' yan este na sendalu giya Vietnam. Bonitu este na mensahi pa'go na ebanghelio. Estague' i maolek na notisia ni ha kuentutusi hit si Jesukristo pa'go. Estague' kumeke ilek-ña este na misterio i ta selelebra gi Santa Misa.

5

Ayu i ha cho'gue si Jesukristo para i taotao siha gi tiempon ebanghelio malago' gue' para u cho'gue para hita pa'go na tiempo --- lao debi di ta sedi gue' sa' ti siña ha cho'gue yanggen ti manmalago hit. Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-na, yan i Espiritu Santo. Amen.

YANGGEN TI SIÑA TA LETKE I PROBLEMA July 23, 2000

Pa'go i XVI Damenggo gi otdinario na tiempo Añu B. I Ebanghelio ni manmanana'i hit para este na Damenggo machuchule' ginen i tinige' San Marcos, Kapitulu 6, betsikulu 30 asta 34. Guiya este na Ebanghelio anai ha agang si Jesukristo i mandisipulu-ña para u fandeskansa gi otro bandan hagoi. Yanggen matto i problema giya hita insigidas manmalago' hit para ta suhayi. Ya hunggan magahet guaha na biahi na i para ta suhayi i problema mas maolek para ta cho'gue. Pot ehemplo yanggen un yengyong i ramas ni guaha chonchon sasatan amariyu, i mas dinanche para un cho'gue era para un falago chaddek. Yanggen humugagando hao golf ya un li'e' na mamamaila' i hemhom uchan, gaiprobechoña hao gi clubhouse ki un efotgon. Ti kumeke ilek-ña na dange' hao sa' un suhayi i problema. Siña ta alok na tomtom hao sa' pot i ti un falague i para un nina'tailayi. Lao ti todu i tiempo siña ta suhayi i problema. Guaha na problema ayu i ti siña maneskapa hit. Ti siña manmalago hit ginen siha sa' madalalalaki hit maseha amanu hinanao-ta. Masusedi este gi as Jesukristo gi Ebanghelio ni ta hungok maproklama pa'go. Mana'achonnek i taotao siha guatu gi uriya-ña yan gi uriyan i mandisipulu. Magulululume gue' yan i mandisipulu-ña ni taotao makeke pacha gue' ni kannai-ñiha yan para u makuentusi, yan para u fanmangagao ayudu. Pot i mineggai taotao asta ti siña siha mañocho. Fuera di este annok na manyayas esta i mandisipulu. Ti apmam ha' nai manmafatto tatte ginen mañetmon yan manna'homlo' manmalangu. Anai manlini'e' siha as Jesukristo maninagang para un sasahnge na lugat para u fandeskansa. Entonses manma'udai gi bote para u fanhanao para i otro banda gi hagoi. Si Jesukristo yan i mandisipulu macho'gue este pot i para u fañuha un ratu ginen i linahyan taotao. Lao i taotao siha matungo' para manu siha ya madalalaki siha manisgen i kanton hagoi para i otro banda. Anai manmatto si Jesukristo yan i mandisipulu-ña gi mahananague masodda' guenao i linahyan taotao. Ti macho'cho' i hinasson-ñiha ni para u fandeskansa. I problema (era i linahyan taotao) ni masuhayi gi un bandan hagoi masodda' gi otro banda. Este na sinisedi sesso ta ekspirensia. Ti lache yo' para bai sangan na todos hit esta ta ekspirensia este. Guini gi halacha masusedi este gi enteru i mundo. Unos kuantos años maloffan meggai na taotao mansen magof ya maselebra anai madesgrana i kumunista giya Rusia. Ilek-ñiha na pot los uttimu pumara i aminason gera siha ya ti para u fanma'añao na u guaha geran dangkulo. Lao ti apmam matutuhon mangera i taotao giya Bosnia yan gi otro banda siha ni taya' nai ta hungok na na'an lugat. Siña ta alok na i problema ni ta dingu gi un banda gi hagoi ha dalalaki hit guatu gi otro banda. Ta sosodda' taiguini na situasion guini mismo giya Saipan. Unos kuantos años maloffan meggai dumingu i gima'-ñiha giya Chalan Kanoa sa' bula pikatdia yan burukento i lugat. Lao despues di manla'apmam gi nuebu na lugat matutuhon manmasusedi gi nuebu na lugat-ñiha ayu siha i masuhayi giya Chalan Kanoa. Kalang mohon mandinalalaki siha guatu gi nuebu na gima'-ñiha ni mismo problema ni madingu giya Chalan Kanoa. Yanggen para ta arekla i problema guaha na biahi na kalang ta na'keketunas i plywood ni mañague' ya pumakke'. Anai un yemme' papa' i un banda ya un atani kahulo' i otro banda. Ti gi kumunida ha' nai masusesedi este sino ki masusesedi lokkue' gi lina'la-ta mismo. Tenga mañodda' hao cho'cho' ni maolek na suedo yan ya-mu i che'cho' lao namaike i ma'gas-mu. O sino guaha na biahi na ilek-mu na esta na'hong hao ni suetdo-mu para un na'fañocho' i familia-mu lao despues mayulang i kareta-mu ya un

6

nisisita mit pesos para u mafa'maolek. Ilek-mu na para un deskansa pa'go sa' esta manasagua todu i famagu'on-mu. Despues mumalangu si nana-mu ya ha nisisita ayudon salape' yan i tiempo-mu. Taya' uttimo-ña este siha na problema. Lao hafa mohon para ta cho'gue yan este siha na problema i tumattitiyi hit? Estague' unu siña ta cho'gue. Ta atan i problema ginen otro banda. Ti siña ta alok na guaha na biahi nai matto gi hinasso-ña si Jesukristo na problema pot i lahyan na taotao umespipiha gue'. Lao kalang taiguenao ta li'e' pa'go guini na ebanghelio. Guiya kumombida i mandisipulu para u fañuha ginen i linahyan pot i para u fandeskansa. Lao masodda' ha' ta'lo i linahyan taotao gi otro bandan hagoi. Lao para hafa ta puni, guaha na biahi nai ta nisisita ta fañuha un ratu ginen i taotao siha. Pot ehemplo guaha na biahi nai ha nisisita i nana para u suha un ratu ginen i famagu'on-ña kuentan para u na'deskansa i titanos-ña. Taya' tinailaye-ña este. Kon todu si Jesukristo sesso humanao guiguiya ha' na maisa para u fanayuyot. Este na ebanghelio i ta hungok maproklama pa'go klaru ha sangan si Jesukristo na para u fañuha un ratu ginen i linahyan taotao. Lao ti macho'cho' i planu-ña. Madalalaki ha' gue' ñguatu gi otro bandan hagoi. Lao maolek ta ripara hafa bida-ña. Ha atan i problema ginen otro banda. Ripara ha' sa' et mismo taotao manmatto guatu gi otro bandan hagoi. Lao en lugat di u lalalo', nina'ma'ase'. En lugat di u konsidera siha komu problema, ha disidi para u usa este komu opottunida para u fana'gue siha. Hita lokkue' siña ta cho'gue taiguini. Yanggen ti siña ta suhayi i problema pues ta cho'gue kuanto i siña na empeño para ta aprobecha i gaige gi me'na-ta na situasion. Si yu'us ma'ase' ni atension-miyu. Adios asta otro Damenggo ya si Yu'us en fambinendisi.

KAO SIÑA TA SATBA I PROBLEMA? July 30, 2000

Pa'go i XVII Damenggo gi otdinario na tiempo Añu B. I ebanghelio ni manmanana'i hit para este na Damenggo machuchule' ginen i tinige' San Juan, Kapitulu 6, betsikulu 1 asta 15. Guiya este na ebanghelio anai ha na'fañocho si Jesukristo i 5000 na taotao. Ginen hu hungok masangan, "Guaha na problema hokkok ha' amot-ña i para ta aksepta na taya' amot-ña." Ya hunggan magahet guaha nai manmatto giya hita este na klasen problema i taya' amot-ña. Lao hafa taimanu para tungo'-ta na este pat ayu na problema taya' amot-ña? Hafa taimanu para tungo'-ta ngai'an nai para ta famara chumagi yan ngai'an nai para ta sigi ha' muna'kesiña? Yanggen ta chocho'gue una kosa ni kalang mappot pat sino komplikao mas libianu para hita i para ta alok imposipble ya basta hit chumo'gue. Estague' na siniente gaige gi ebanghelio ni ta hungok maproklama pa'go. Manestaba si Jesukristo yan i madisipulu-ña gi fina'halom tano'. Manhanao para este na lugat para u fandeskansa. Lao ti macho'cho' i minalago-ñiha. Mandinalalaki ni linahyan taotao guatu guihi na lugat ni mahananague. Gigon ha li'e' si Jesukristo i linahyan taotao i fine'na na hinasso-ña i para u na'fañocho siha. Ha faisen i mandisipulu-ña: "Amanu nai siña hit manmamahan pan para este siha na taotao?" Ma'atan gue' ni mandisipulu-ña yan un dangkulo na kuestion gi matan-ñiha. Hunggan magahet guaha punto guini na u makuestiona sa' hunggan bula taotao. Ilek-ña i ebanghelio na mas di sinko mit manestaba guenao. Taya' salape'-ñiha si Jesukristo yan i mandisipulu-ña para u fanmamahan sufisiente pan para todu este siha. Ya achokka' siakasu guaha salape'-ñiha amanu siha nai siña manmamahan pan para este siha guihi gi halom tano'? Yan siakasu na guaha bentan pan taimanu para katgan-ñiha guatu ayu na kantidan pan ni manisisita ni sinko mit? Imposipble este para macho'gue. Kalang mohon debi di u ma'aksepta na taya' remedio-ña este na probleman-ñiha. Ya hunggan magahet kalang tairemedio este na situasion nai mangaige siha. Para hita lokkue' guaha nai manmatto problema ni mampos mandangkulo. Ilek-ta imposipble para ta cho'gue. Ahe' ti pot i mangago' hit sino ki ti ta hulat chumo'gue. Pues para hafa ta gasta tiempo-ta di batde. Kada unu giya hita guaha nai ta ekspirensia este, ya siempre mato ha' ta'lo giya hita este na klasen ekspirensia. Siña ha' guaha giya

7

hita ha ekspirerensia este pa'go na momento. Hafa para ta cho'gue yanggen matto este na okasion? I. I fine'na ni siña ta cho'gue era i para ta detetmina kao siña ta cho'gue pat ti siña. Para hafa ta puni guaha na problema ti siña ta satba. I madisipulu masen tungo' na ti mana'siña masatba este na probleman-ñiha. Imposipble para u mana'fañocho este na kantidan taotao. Sesso ta ekspirensia este lokkue'. Ya mientras mas chaddek ta tungo' na ti ta na'siña chumo'gue una kosa mas maolek para hita, en lugat di ta sigi ha' gumasta tiempo-ta dibatde. Mientras mas chaddek ta tungo' na ti ta na'siña mas chaddek hit manmalak guatu gi as Yu'us para ta fanmangagao ayudu sa' ta tungo' ha' na para si Yu'us taya' ti ha na'siña. Lao debi di ta cho'gue fine'na kuanto i siña na empeño para ta cho'gue na maisa. II. I segundo era i para ta chagi chumo'gue hafa nina'siña-ta. Ha tago' si Jesukristo i mandisipulu-ña para u macho'gue hafa nina'siñan-ñiha. Ilek-ña nu siha: "Na'fanmata'chong i taotao siha." Ti siña mana'fañocho i taotao siha lao guaha siña macho'gue, era i para u mana'fanmata'chong i taotao siha. Yanggen esta apmam di ta cho'gue che'cho' mangge' gi lamasa ta agradesi chumo'gue cho'cho' masahalom, tat komu manguassan pat kumatpenteru. Mappot ta li'e' i adelanto gi che'cho' lamasa lao ti siña ti un li'e' i adelanto yanggen manguaguassan hao. Hokkok ha' para un cho'gue, talak tatte. Ya yanggen monhayan, pues monhayan. Ya satisfecho hao. Entonses, yanggen ta fana' un dangkulo na problema munga hit umalok insigidas na ti ta na'siña ya para ta fangieto ha'. Lao nihi ya ta atituyi fine'na ya ta detetmina kao siña ta cho'gue pat ti siña. Yanggen ti siña ta cho'gue ni hita ha' na maisa pues ta gagagao si Yu'os ni ayudu-ña. Pot los uttimu, yanggen ta sodda' na ti ta na'siña sumatba i problema pues ta atan ginen otro banda i problema sa' siña ha' guaha didide' ta cho'gue, maseha ti todu, para ta satba i problema. Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-ña, yan i Espiritu Santo. Amen

KAO MA'LAK KANDET-MU? August 6, 2000

Pa'go i Transfigurasion i Saina. I ebañghelio machuchule' ginen i tinige' San Marcos, kapitulu 9. Guiya este na ebañghelio anai matulaika figura-ña si Jesukristo gi ekso. Miala' ya ta ekungok este na estoria un ratu. Esta la'apmam, un kompanian television ha na'hanao i mas kapas na taotao-ña para India para u litratu (video) si Madre Teresa. Malago' este na kompanian television para u malitratu i hetmanan Madre Teresa anai manmakokonne' ayu siha i mañgeke matai ginen i chalan giya Calcutta guatu gi anai mañasaga i hetmana. Guini na lugat anai mañasaga siha nai mana'fangagasgas yan manma'asisiste i mañgeke matai. Estague' ilek-ña si Madre Teresa, "manma'asisite este siha i mañgeke matai ni mankariñsa yan manmagof matan-ñiha na hetmana." Este i sagan-ñiha i hetmana estaba templon paganu. Homhom sanhalom-ña sa' mandikike' i bintana-ña ya manatkilo' nai mangaige.

8

I taotao television ti matuñgo' na homhom sanhalom-ña este na guma' ya ti manmañule' manma'lak na kandet. Entonses, ilek-ñiha taya' baliña i para u malitratu i hetmana mientras manmachocho'cho' gi halom guma' sa' mampos homhom. Lao guaha gi entre i litratista ilek-ña, "esta yaki mangaige hit guini pues maila' ya ta aprobecha ya ta litratu ha' sa' siña ha' suette ya maolek." Anai monhayan, nina'fanmanman siha sa' todu i linitraton-ñiha guihi gi halom homhom manhuyoñg sen maolek kalañg mohon guaha espesiat na kandet umi'ina i hetmana siha mientras machocho'gue i che'cho'-ñiha. Ilek-ñiha i litratista, ti mahulat makomprende hafa na klaru i litrato siha. Lao ayu i gume'hilulu'i i che'cho' ha hoñgge na guaha milagrosu na kandet umina i litraton-ñiha. Ha esplika este gi lepblo ni ha tuge' despues. Ilek-ña: "Ayu na guma' anai estaba si Madre Teresa yan i hetmana-ña siha manma'asisiste i mañgeke matai misen ginefli'e' ... Un siente ha' este insigidas gigon humalom hao guihi. Este na ginefli'e' ma'lak, kalañg i koronan i mañantos ni sesso i attista mapenta gi uriyan i ilon i mansinantusan na lalahi yan famalao'an. Ilek-ña, ahe' ti ha na'manman yo' pot i ma'lak halom ayu na homhom guma' ya annok ayu na mina'lak gi litratu." Anai ha sañgan este i litratista ahe' ti manguiguifi gue'. Manmatuge' pot este i mina'lak i mañantos gi Biblia yan gi lepblo siha pot i lina'la' i mañantos. Pot ehemplo, ilek-ña gi Biblia gi Lepblon Exodus na anai tumunok si Moises ginen i ekso despues di kumuentos yan si Yu'us "mali'e' ni taotao na dodoñggat i lassas mata-ña ya manma'añao manarima." (Ex 34:30) Maila' pa'go ya ta bira hit guatu gi ebañghelio ni ta huñgok si San Pedro, si San Santiago, yan si San Juan masañgan gi ekso na gotpe muma'lak i matan Jesukristo "kalañg i atdao." Sen ti maleffa si San Pedro ni este na lini'e'-ña. Sakkan maloffan ha tuge' papa' pot este, ilek-ña: "Hami in li'e' ni matan-mami i fuetsa-ña. Manestaba ham guihi anai inenra gue' yan nina'annok i gloria-ña as Yu'us Tata, anai hoñgga i bos Yu'us gi hilo'-ña, ilelek-ña, "Guiya este i kiridu na Lahi-hu, ni muna'mamagof yo'!" Hami mismo humuñgok este na bos matto ginen i lañget, anai manhahami yan guiya gi santos na sabana. (2 Pt 1:16-18) Ti siña ta tuñgo' hafa ayu i manina ginen i matan Jesukristo guihi gi sabana. Ni tampoku ti siña ta tuñgo' hafa ayu i manina ginen i matan Moises yan i mañantos. Yan ti siña ta tuñgo' hafa ayu i manina gi litraton Madre Teresa guihi gi halom homhom na guma' anai manestaba i mañgeke matai. Hita siña ta sañgan na guiya este na ininan Yu'us ni ha i'ina este i hemhom na tano'. Maseha hafa taimanu hineñggen-ñiha i otro taotao siha pot este na inina hita ta hoñgge na kada Kilisyanu ma'agañg para guiya u fanina o sino kandet para este i hemhom na tano'. Hita ta hoñgge na todu i Mañgilisyanu guaha obligasion-ñiha para u mana'annok i mina'lak i Kristo gi asodda'-ñiha na taotao guini gi tano' ginen i klasen lina'la' ni mapraktitika. Guiya si Jesukristo mismo sumañgani i mandisipulu-ña: "Kalañg hamyo kandet para todu i tano'. I siuda ni gaige gi ekso' ti siña mana'na'. Taya' sumosoñgge i fallot ya para u po'lo gi papa' tason; enlugat, siempre ha po'lo gi sagan fallot, anai siña ha chalapon i inina-ña gi todu i halom guma'. Taiguini ha' lokkue i kandet-miyu debi di u fañila' gi me'nan taotao, kosa ki siña mali'e' i manmaolek siha na bidan-miyu ya ginen este nai u matuna si Tatan-miyu ni gaige gi lañget." (Mt 5:14-16) Estague' otro ehemplo pot este na punto. Un biahi makombida si Madre Teresa para u kuentos gi un auditorium eskuela.

9

Durante anai kumuekuentos mansilensio todu i taotao siha yan chetton i inatan-ñiha giya guiya yan magogof ekuñgok todu i palabras ni ha sasañgan. Puru ha' otdinario na palabras ha u'usa, lao pot guiya sumasañgan este siha na palabras na magof ekuñgok gue'. Guaha ga'chochoñg-ña i palabras ni ha u'usa ni ti siña ta esplika. Kalañg ha na'ma'lak i auditorium ni gumaige-ña ya ha i'ina i hinasson todu i taotao ni manestaba guenao. Anai monhayan kumuentos, todu i taotao siha manmalago' para u mapacha i kannai-ña. Gof dikike' figura-ña yan masoksok yan minagagago ni mas baratu na yaddas yan yayas pusision-ña, tumotohge guihi ha sasañgan pot i ginefli'e' i Saina nu siha. Si Madre Teresa magahet ma'lak na kandet mani'ina guini gi hemhom na tano'. Pot los uttimu, maila' pa'go ya ta atan maisa hit ni mangaige guini.. Taimanu ha' si Moises yan si Jesukristo, yan si Madre Teresa, hita lokkue' manma'agañg para kandet este i hemhom na tano'. Pa’go na Damenggo manmafafaisen hit para ta atan maisa hit kao ta chocho'gue i manmatago'-ta. Manmafafaisen hit pa’go para ta atan maisa hit kao ta na'fani'ina i kandet-ta gi me'nan otro taotao siha kosa ki siña mali'e' yan u matuna si Yu'us Tata-ta gi lañget. Ya yañggen siakasu na ahe' ti ta chocho'gue maolek este siha i manmatago'-ta, pa’go nai manmakombibida hit para ta fanmañotsot yan para ta tutuhon di nuebu para ta fanla'la' sigun gi manmatago'-ta. Si yu’os ma’ase’ ni atension-miyu yan adios asta otro simana. Si Yu’os en fambinendisi, i + Tata, yan i Lahi-ña, yan i Espiritu Santo. Amen.

TA NISISITA AYUDON YU'OS February 02, 2001

I ebañghelio ni maproklama pa'go guini gi V Dameñggo gi Otdinario na Tiempo, Añu C, ha sañgani hit na sin i ayudon Yu'os ti siña ta cho'gue maolek i che'cho'-ta. Para ta komprende este na mensahi maila' ya ta ekuñgok este na estoria. Siña ha' buente guaha nai un hungok este i para bai sangan. Un palao'an ni sen yaña flores matto gi un tenda, ni fuera di otro kosas siha, manmambebendi lokkue' tinanom. Ha li'e' gi maseta flores rosat. Mamahan un pat ya ha chule' guatu gi gima'-ñiha. Masañgani na yaña i rosat fresko na lugat pues ha po'lo i maseta gi sala sa' air conditioned.

Ha asiste maolek i flores-ña, sesso ha riega yan ha nana'ye abonu. Umannok na mansen la'la' i tinanom-ña sa' mandañgkulo yan bedde i hagon-ñiha. Ha nanañgga na para u fanflores mandañgkulo na rosat. Lao gi kada humuyoñg i kapuyo' mamba'ba' ya manmalayu insigidas.

Despues di dos mesis o'son, pues ha laknos i dos maseta ya ha po'lo gi sanhiyoñg gi kanton gua'ot gi lagon i gima'-ñiha. Nina'sen lastima i palao'an ni todu i gasto-ña yan minapot-ña.

Gi et mismo tiempo mana'atattiyi i problema-ña siha. Addet chetnot-ña i che'lu-ña ya mana'saga gi hospitat. Mayulañg i karetan-ñiha ya mas di mit pesos ginasta para u mafa'maolek. Ma'agañg gue' gi eskuela sa' guaha problema-ña i lahi-ña.

10

Ha cho'gue kuanto i siña para u satba todu este siha na achaki-ña. Ha tutuhon fumaisen maisa gue' kao guaha bida-ña tailayi ya makastitiga gue'.

Un dia anai esta sen baba siniente-ña, ya esta ni mona' ni tatte gue', ha disidi para u hanao para i laundromat para u fama'gasi. Guenao nai para u disimula i problema-ña yan i manatuñgo'-ña. Ha kilili i balutan-ña odda' ya gi kinekeyoñg-ña gi petta ha li'e' gi kanton gua'ot na manflores i rosat un sen dañgkulo yan atagga'.

Ha ripara na ti nahoñg i rosat ni hanom ha' yan i abonu yan i air conditioned gi halom guma' para u fanflores. Ha nisisita lokkue' i ininan i atdao.

Guenao na momento nai mañgonsidera un ratu. Despues gotpe matto gi hinasso-ña na ayu i ha nisisita i rosat guiya lokkue' ha nisisita para i lina'la'-ña.

Ti inayuda gue' ni todu ayu siha i ha cho'gue pot i problema-ña. Huñggan ha nisisita este siha lao guaha fatta. Kalañg i rosat ni guaha fatta-ña gi halom guma', era taya' ininan atdao, guiya lokkue' guaha fatta-ña, era taigue' si Yu'os gi lina'la'-ña.

Uma'achule' este na rosat yan este na palao'an yan i estorian San Pedro pa'go guini na ebañghelio.

Tulanoche si San Pedro yan i manga'choñg-ña mampeska ya taya' kinenne'-ñiha. Taya' probecho-ña i che'cho'-ñiha. Macho'gue todu i nina'siñan-ñiha, lao ti nahoñg. Guaha fatta-ña.

Pues anai sumaonao si Jesukristo mumaolek todu. Kalañg i rosat ni inina somnak, yan i palao'an ni ha sodda' si Yu'os, si San Pedro yan i manga'choñg-ña masodda' i punto para u masatba i probleman-ñiha.

Fatta gi as San Pedro yan i manga'choñg-ña i mas impottante na kosas, es di sit, i ayudu yan i fuetsan Yu'os. Taigue' giya siha i ayudu yan i fuetsan Jesukristo.

Gaige guini gi estorian este na palao'an yan i estorian San Pedro klaru yan impottante na leksion.

Todos hit ta nisisita si Yu'os gi lina'la'-ta. Huñggan, prisisu para ta cho'gue kuanto i siña para ta satba i problema-ta siha. Lao ti nahoñg ni este ha'. Guaha mas ta nisisita. Ta nisisita i ayudu yan i fuetsan Yu'os yañggen manmatto i problema-ta.

Klaru yan gof impottante hafa taimanu para ta aplika este siha gi lina'la'-ta.

Yañggen ta ekspirerensia problema gi lina'la'-ta, ya kalañg taya' adelanto, siña ha' buente parehu i rason-ta yan i rason-ña este na palao'an yan i rason-ña si San Pedro.

Maila' ya ta ripara sa' siña ha' buente ta keke satba i problema-ta yan hita ha' na maisa, ya manmaleleffa hit na ti nahoñg ni hita ha' na maisa. Manmaleleffa hit na ta nisisita lokkue' si Yu'os para u ayuda hit.

I satbasion para i problema-ta parehu ha' yan i satbasion para i problema-ña este na palao'an, yan San Pedro. I satbasion para i problema-ta, es de sit, para ta na'saonao si Yu'os gi lina'la'-ta.

Pot los uttimu, yañggen ta cho'gue este pues siempre matarabira i lina'la'-ta parehu yan i lina'la' este na palao'an yan i lina'la' San Pedro.

Siempre ta deskubre, parehu yan si San Pedro. Siempre ta diskubre na malago' si Yu'os para u bendisi hit mas ki i ta gagagao gue'.

11

Malago' si Yu'os para u na'i i lina'la'-ta minetgot yan kinabales ni ti ta nanañgga.

Hokkok ha' para ta cho'gue i para ta baba i korason-ta para i guinaiyan Yu'os, para ta ekuñgok i sinañgan-ña, yan para ta yotte i talaya-ta.

Siempre si Yu'os ha cho'gue i pumalu.

Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-ña, yan i Espiritu Santo. Amen.

KAO PLATON PAPPET HAO? February 11, 2001

I ebañghelio ni maproklama pa'go guini gi VI Dameñggo gi Otdinario na Tiempo, Añu C, machuchule' ginen i tinige' San Lucas, Kapitulu 6. Ilek-ña na ayu ha sañgañgani hit i tano' ha kokontra ayu i ha sañgañgani hit si Jesukristo. Para ta komprende este na mensahi maila' ya ta atituyi este.

Guaha na biahi nai matto gi siniente-ta na taya' numisisita hit, taya' prisisu nu hita, taya' bali-ta, ti manimpottante hit. Pi'ot yañggen guaha problema-ta teñga nai mandedesnek este siha na baban siniente. Yañggen guaha nai matto este siha na siniente giya hagu pues ekuñgok sa' gaige guini na ebañghelio i ta huñgok maproklama pa'go un impottante na mensahi para hagu. Estague' i mensahi:

Bula manmasusesedi nu hita guini gi tano' ni ha sañgañgani hit na taya' bali-ta, na ti manimpottante hit. Lao guini na ebañghelio ha sañgani hit si Jesukristo na huñggan bula bali-ta yan manimpottante hit, guini gi setmon-ña - Setmon gi Ekso. I rason na hita espesiatmente ha setmuni si Jesukristo, es di sit, para u na'siguru na ta komprende na manimpottante hit.

En primet lugat, manmafa'tinas hit gi imahen Yu'os, ya sigun gi planon Yu'os para ta fanla'la' yan guiya para todu i tiempo.

Estague' i rason na kada unu giya hita impottante.

I rason na gof impottante este i Setmon gi Ekso - espesiatmente para hita - sa' ha sañgañgani hit un mensahi ni sen ti parehu yan i mensahi ni ha sañgañgani hit i tano'. I tano' ha sañgañgani hit na hita ni taotao kalan platon pappet - despues di ma'usa masoñgge. I tano' ha sañgañgani hit na hita ni taotao kalan i ruedan kareta - despues di gastadu mayute'. I tano' ha sañgañgani hit na hita ni taotao kalan i latan gimen ni despues di magimen i sinahguan-ña machule' i basihu guatu gi dump. Pot i ta lili'e' sesso este siha na manmasusesedi enao mina' guaha na biahi na ta tutuhon humoñgge hafa i tano' ha sañgañgani hit.

Estague' un estoria pot un Indian na patgon lahi. Siña ha' buente guaha esta nai un huñgok este na estoria. Sen umaya este yan i punton Jesukristo guini gi Setmon gi Ekso ya ti baba para ta ripiti.

Un dia este na patgon ha sodda' un chada' aguila. Ha chule' ya ha po'lo gi chechon yan i chada' mannok siha. Ti apmam mapulakes i chada' aguila yan unos kuantos na chada' mannok.

Manchagigo mandañgkulo i puyitos aguila yan i puyitos mannok siha. Gi kada maka'guas i edda' ni puyitos mannok manmanespipiha na'-ñiha, i aguila lokkue' ha ka'guas i edda'. Gi kada mañgati i puyitos

12

mannok i aguila lokkue' kumati. Gi kada mana'palappa i pappan-ñiha i puyitos mannok mangugupo unos kuantos potgadas hulo', guiya lokkue' i aguila ha na'pala''a i pappa-ña.

I rason na gof impottante este i Setmon gi Ekso - espesiatmente para hita - sa' ha sañgañgani hit un mensahi ni sen ti parehu yan i mensahi ni ha sañgañgani hit i tano'. I tano' ha sañgañgani hit na hita ni taotao kalan platon pappet - despues di ma'usa masoñgge. I tano' ha sañgañgani hit na hita ni taotao kalan i ruedan kareta - despues di gastadu mayute'. I tano' ha sañgañgani hit na hita ni taotao kalan i latan gimen ni despues di magimen i sinahguan-ña machule' i basihu guatu gi dump. Pot i ta lili'e' sesso este siha na manmasusesedi enao mina' guaha na biahi na ta tutuhon humoñgge hafa i tano' ha sañgañgani hit.

Estague' un estoria pot un Indian na patgon lahi. Siña ha' buente guaha esta nai un huñgok este na estoria. Sen umaya este yan i punton Jesukristo guini gi Setmon gi Ekso ya ti baba para ta ripiti.

Un dia este na patgon ha sodda' un chada' aguila. Ha chule' ya ha po'lo gi chechon yan i chada' mannok siha. Ti apmam mapulakes i chada' aguila yan unos kuantos na chada' mannok.

Manchagigo mandañgkulo i puyitos aguila yan i puyitos mannok siha. Gi kada maka'guas i edda' ni puyitos mannok manmanespipiha na'-ñiha, i aguila lokkue' ha ka'guas i edda'. Gi kada mañgati i puyitos mannok i aguila lokkue' kumati. Gi kada mana'palappa i pappan-ñiha i puyitos mannok mangugupo unos kuantos potgadas hulo', guiya lokkue' i aguila ha na'pala''a i pappa-ña.

Entonses estague' na manmatto hit ta'lo tatte gi Setmon gi Ekso guini na ebañghelio.

Para ayu i lahyan na taotao ni manmatata'choñg guihi na okso - ayu siha i manmakonsidedera ni este na tano' komu platon pappet - despues di ma'usa masoñgge - mansinañgañgani siha as Jesukristo, "Mandichosu hamyo ni mamopble; iyon-miyu i rainon Yu'os."

Para ayu i lahyan na taotao ni manmatata'choñg guihi na okso - ayu siha i manmakonsidedera ni este na tano' komu ruedan kareta - despues di gastadu mayute' - mansinañgañgani siha as Jesukristo, "Mandichosu hamyo ni manñalañg, sa' siempre en mana'fanhaspok."

Yan para ayu i lahyan na taotao ni manmatata'choñg guihi na okso - ayu siha i manmakonsidedera ni este na tano' komu latan gimen ni despues di magimen i sinahguan-ña machule' i basihu guatu gi dump - mansinañgañgani siha as Jesukristo, "Mandichosu hamyo ni mañgakati; sa' siempre en fañalek."

Pot los uttimu, para ayu siha i mansinañgañgani ni tano' ni este siha i manna'desganao na sinangan pa'go mansinangangani as Jesukristo, "…"Mandichosu hamyo ... iyon-miyu i rainon Yu'os."

Si yu'os ma'ase' ni atension-miyu yan adios asta otro Dameñggo. Si Yu'os en fambinendisi, i Tata +, yan i Lahi-ña +, yan i Espiritu Santo +. Amen.

KAO SIÑA TA GOFLI'E' I MATA'PAÑG?

February 18, 2001

I ebañghelio ni maproklama pa'go guini gi VII Dameñggo gi Otdinario na Tiempo, Añu C, machuchule' ginen i tinige' San Lucas, Kapitulu 6. Ilek-ña si Jesukristo, "Gofli'e' i inimigon-miyu."

13

Ta huñgok si Jesukristo ha sañgan este i sesso ta huñgok maripiti: "Gefli'e' i inimigon-miyu." Todos hit esta guaha nai ta huñgok este na tinago'. Lao ti meggai prumaktitika este. Lamayot patte giya hita ilek-ta na bonitu este na sinañgan-ña si Jesukristo lao manmaleffa ha' hit despues di manhuyoñg hit gi gima'yu'os. Ilek-ta, dichosu ayu i siña ha gofli'e' todu i taotao siha. Lao ta sen tuñgo' ha' na imposipble para ta gofli'e' todu i taotao siha. Pot enao na humalom gi un talañga este na sinañgan Jesukristo ya humahnanao huyoñg gi otro.

Huñggan manmalago' hit para ta fanmaolek na Mañgilisyanu. Lao manmalago' hit lokkue' na para ta fampraktiku. Sa' ta tuñgo' ha' na taya' taotao siña ha guaiya todu i taotao siha. Siña ha' buente taya' nai un sañgan gi pachot-mu, lao siguru yo' na guaha nai matto gi hinasso-mu: "Este i para ta gofli'e' todu i taotao siha kuentos pale' ha'. Bonitu masañgan gi putpitu. Bonitu para i famagu'on. Lao gi magahet imposipble para u macho'gue."

Pot ehemplo, hasso fan ayu na taotao i humatme i gima'-mu ya ha sakke i television. Ya ayu na taotao i ha puno' i ga'-mu guaka ya ha chule' i dos pietna ya ha na'mutoñg i pumalu? Ya ayu na atuñgo'-mu i inayao hao salappe'-mu ya ti malago' ha apasi? Hafa taimanu para ta guaiya este siha? Para hafa ta puni, gaige gi siniente-ta na ti ya-ta este siha na taotao. Imposipble para ta gofli'e' este siha.

I mas sesso ta huñgok na tinago'-ña si Jesukristo, es di sit, "Gefli'e' i inimigon-miyu." Lao este na tinago' lokkue' i mas ti makomprende na tinago' ni ha na'i hit i Saina. Sigun gi kuttura-ta yan gi manmapoksai-ta, i ginefli'e' gaige gi korason-ta. Taiguihi i lahi yañggen manguaiya palao'an. Taiguihi guinaiya-ña i nana para i famagu'on-ña, yan i guinaiya-ta para i amigu-ta siha. Yañggen este ha' kumeke ilek-ña i ginefli'e', entonses mandinanche ayu siha i umalok na imposipble para ta gofli'e' i inimigu-ta.

Sa' hafa na taiguini este? Sa' ti siña ta manda o sino ta tago' hafa i siniente-ta para u siente, kao para u guaiya o sino kao para u chatli'e' un taotao. Ti siña yo', ni ti siña hao, un cho'gue este. Siña ta chagi lao ti u facho'cho'.

Maila' ya ta usa este na ehemplo. Siakasu na ma'añao hao. Hahagu ha' na maisa gi halom guma', ya manhuñgok hao buruka gi otro kuatto. Kalang humalom i sakke. Un tutuhon luhan, i korason-mu ha tutuhon boñgboñg, i kannai-mu manlalaolao. Ma'añao hao. Guini na momento ti u facho'cho' para un tago' maisa hao para muñga ma'añao. Hokkok ha' siña un cho'gue para un suñgon i ma'añao-mu. Siña gumimen hao hanom-maneñgheñg para un lipa i ma'añao-mu. Lao i para un manda o sino para un tago' maisa hao para muñga ma'añao ti u facho'cho'. Siña un chagi lao ti u facho'cho'.

Ha tuñgo' ha' si Jesukristo este. Ya mas tomtom gue' ki hita. Anai ilek-ña, "Gefli'e' i inimigon-miyu", ti kumuekuentos gue' pot sinienten taotao. Ahe' ti ha tatago' hit para ta siente gi sensen-ta na ta guaiya ayu i muna'lamen hit. Imposipble este. Ya ti siña ha tago' hit si Jesukristo para ta cho'gue una kosa ni imposipble.

Ayu i ta siesiente gi tataotao-ta ti baba, ni tampoku ti maolek. Hokkok ha' kumeke ilek-ña na'magof pat ti na'magof na sinienten tataotao. Ahe' ti un mapremio sa' pot i mas yamu un taotao ki i otro taotao. Naturat este na guaha mas ya-ta unu ki otro. Kon todu i mañantos guaha mas yan-ñiha na taotao ki otro. Pues ti isao pot i guaha taotao mas ya-mu ki otro taotao. Hokkok ha' muna'mamaolek o sino muna'tatailayi i siniente yañggen maolek pat baba gaige gi hinasso-mu.

Estague' punto-ña guini si Jesukristo. Este i sinañgan-ña pa'go guini na ebañghelio siña ta translada gi aksion, "che'gue maolek para ayu siha i chumatli'e' hamyo; bendisi ayu siha i mumatdidisi hamyo yan tayuyuti ayu siha i mumattrarata hamyo." Estague' siha siña ta cho'gue. Siña mankariñosu hit ni otro taotao siha, ya ta sañgan mambonitu na kosas pot siha, yan ta tayuyuti siha, achokka' ti manguinaiya siha ni sinienten i tataotao-ta. Estague' na klasen guinaiya ha tatago' hit si Jesukristo para ta cho'gue. Era i para ta cho'gue manmaolek na cho'cho' para todu i taotao siha, kon todu ayu siha i ti manmaolek nu hita.

14

Gi taiguini ha' na manera nai siña ta kumple este na tinago'-ña i Saina. Lao ahe' ti ilek-ña i Saina para u libianu para ta cho'gue este.

Pot los uttimu, estague' fina'akomparasion ni siña ta usa para u mas klaru este na punton Jesukristo, "Gefli'e' i inimigon-miyu." Guaha dos bisinu-mu. Ayu i gaige gi sanlichan sen maolek nu hagu yan i famagu'on-mu pues sesso un kombida para i gima'-miyu yan guiya lokkue' sesso ha kombida hao yan i familia-mu para i gima'-ñiha para en fañocho. Lao ayu i bisinu gi sankattan mata'pañg yan taklalo' yan mampos finu. Kada un li'e' gue' nina'fonton siniente-mu. Taya' nai un kombida para i gima'-mu para en fañocho'. Ahe' ti manñañalañg siha. Manmaolek ha' i lina'la'-ñiha.

Un dia humanao hao para i bantalan giya Chalan Kanoa gi me'nan i Katedrat. Un li'e' unos kuantos famagu'on manata'yok ginen i bantalan halom gi tasi. Despues kalamle adeñg-ña unu gi famagu'on ya ume'essalao, "Help, help". Anai un atan ayu i ume'essalao un li'e' na lahen i bisinu-mu gi sankattan - ayu na bisinu i namaike, taklalo' yan mampos finu. Sin kuestion mangaloppe hao halom gi tasi ya un akudi i patgon. Annok guini na che'cho'-mu na un gofli'e' i inimigu-mu taiguihi i tinago'-ña si Jesukristo.

Si yu'os ma'ase' ni atension-miyu yan adios asta otro simana. Si Yu'os en fambinendisi, i Tata +, yan i Lahi-ña, yan i Espiritu Santo. Amen.

I OPOTTUNIDAD PARA UN RATU HA' August 26, 2001

Pa'go i XXI Damenggo gi Otdinario na tiempo. I Ebanghelio machuchule' ginen i tinige' San Lucas, Kapitulu 13:22-30.

Guaha nai ta hungok este na sinangan: "Un biahi ha' para bai faloffan guini na tano'. Pot enao na maseha hafa na maolek-cho'cho' ni para bai cho'gue, maseha para bai kariñosu ha', bai hu cho'gue pa'go. Munga yo' tinane', sa' ti bai faloffanggue ta'lo."

Este na sinangan ha na'fanhahasso hit na ti petmanente este na lina'la'. Ti kiekieto ha' i lina'la'. Todu i tiempo sisigi ha' mo'na. Ya gigon ha upos hit humahnanao ha'. Ti siña ta na'ta'lo tatte.

Este lokkue' ha sasangan pa'go na Ebanghelio. Gi tutuhon ilek-ña, "Humanao si Jesus mamanana'gue gi siuda yan gi sengsong siha." Despues ha sangan taiguini, "ya sigi ha' lumatguato giya Jerusalen." Ti este ha' na biahi nai humanao si Jesukristo ginen Galilea para Jerusalen. Dos, tres biahi ha cho'gue este anai sumesetmon gue' lao este na biahi espesiat. Este i uttimu na hinanao-ña. Este na hinanao-ña para asta i Ekso' Katbario, anai matai gue'. Ti u faloffan gue' ta'lo guini na chalan.

Guaha mamaisen, "Asaina, kao didide' ha' para u fanmasatba?" Ha oppe i Saina este na kuestion yan un estoria pot i estrecho na potta ni un dia para u mahuchom. Ya yanggen machom, ni ngai'an nai u mababa.

Hafa kumeke ilek-ña este na estoria yan sa' hafa na ha sangan i Saina este? Guaha hinasson-ñiha na este na estoria pot ayu na taotao siha i pot isao-ñiha ti manmalak i langet anai manmatai. Lao gi hinasso-ku este na estoria pot ayu na taotao siha i mana'falingu i opottunidad para macho'gue maolek guini na lina'la'. Dos punto malago' yo' para ta konsidera pot este.

I fine'na na punto ni malago' yo' para ta konsidera era debi di ta mana'fanhahasso bes-in-kuando na sen guaguan i opottunidad ni manmanana'i hit.

15

Kada unu giya hamyo ni humuhungok yo' mana'i opottunidad-ña para u cho'gue maolek ni lina'la'-ña. Lao ta tungo' ha' na ti todu i taotao gi tano' manmana'i ni este na opottunidad. Ti parehu na opottunidad manmanana'i todu i taotao siha. Guaha mana'i mas meggai na opottunidad ki otro.

Pot ehemplo, ayu siha na neni i manmapuno' gi tiyan nanan-ñiha taya' ni hafafa ha' na opottunidad manmana'i siha para u macho'gue maolek ni lina'la'-ñiha. Ti manmana'i siha ni este na chansa. Ayu siha lokkue' na neni i manmafañago drug-addict sa' pot si nanan-ñiha ma'usa i binenu, drugs. Nina'faninutet siempre titanos-ñiha yan mandebit tataotao-ñiha. Ti manmana'i siha opottunidad para u macho'gue maolek ni lina'la'-ñiha.

Lao maila' fan ya ta atan-maisa hit. Hita manmana'i opottunidad para ta cho'gue i maolek na cho'cho'. Taya' chetnot-ta maseha pot tataotao pat espiritu. Esta manmafana'gue hit ni doktrinan i Saina. Ta tungo' hafa maolek yan hafa baba. Yanggen hita pa'go para ta na'falingu este na opottunidad i para ta cho'gue i maolek pues i isao gaige enteramento giya hita. Hahasso na meggai na taotao manmalago' na u fanmana'i opottunidad-ñiha lao ti matto giya siha. Debi di ta hahasso este.

I segundo punto, debi di ta mana'fanhahasso na i opottunidad ni manmanana'i hit ti para u dinira apmam. Mafatto yan humahanao. Kalang i ora gi relos, kada sisenta minutos mato i ora ya ti siña un na'para. Kalang si Jesukristo ni maloffan dos tres biahi guihi na songsong siha despues maloffan gue' pot uttimu bes, ya ti u ta'lo tatte. Siempre matto i ha'ani anai u mahuchom i pettan opottunidad ya ti u mababa ta'lo.

Siguru yo' na lahyan na mannana yan mantata anai ma'atan tatte i lina'la'-ñiha ni nina'fanlastima ni lina'la'-ñiha ni madespetdisia. Ilek-ñiha, "i mohon ya hu na'pasensia yo' didide' ni famagu'on-hu. I mohon ya mas kariñosu yo' ni asagua-hu. I mohon ya hu gasta didide' mas tiempo-ku yan i famagu'on-hu anai mandidikike'." Lao ayu na opottunidad ti u fatto tatte ni ngai'an. Esta mandangkulo i famagu'on ya mahuchom i pettan opottunidad. Ti siña mababa di nuebu.

Guaha lokkue' famagu'on ni nina'fanlastima anai ma'atan tatte i lina'la'-ñiha. Mampos apretao i che'cho' pot i para u manafandangkulo i famagu'on-ñiha ya manmaleffa ti ma'atiendi i mañainan-ñiha gi inamko'-ñiha. Matungo' ha' i numeron telefon mañainan-ñiha lao apenanas o sino hassan nai mana'setbe. Ma'u'upos ha' i gima' mañainan-ñiha an para i che'cho' siha lao todu i tiempo maninalulula sa' kumeke atrasao. Pa'go na tiempo yanggen ma'agang ayu na telefon, otro manope. Yanggen maloffan guenao na guma', otro sumasaga. Manma'pos esta i mañaina para as Yu'os. Ya ni ngai'an na u ta'lo tatte este na opottunidad. Machom esta i petta.

Hafa para ta cho'gue ni este i malingu na opottunidad? Taibali para ta dakdak i petta ni machom esta. Ni si Yu'os ti siña ha baba di nuebu. Taisetbe para ta disimula i opottunidad ni malingo.

Yanggen matto ya ta despetdisia ya maloffan i opottunidad, tres kosas ha' siña ta cho'gue. Fine'na, ta ofresi si Yu'os ni linachi-ta. Ha prometi hit na todu tailayen bida-ta siempre ha asi'i. Segundo, ta konfesatñaihon i baban bida-ta. I mina'tres, ta cho'gue kuanto i siña na empeño ya munga na ta despetdisia ta'lo i opottunidad yanggen manmatto.

Pot los uttimu, malago' yo' bai ripiti ayu i ta sangan gi tutuhon. : "Un biahi ha' para bai faloffan guini na tano'. Pot enao na maseha hafa na maolek-cho'cho' ni para bai cho'gue, maseha para bai kariñosu ha', bai hu cho'gue pa'go. Munga yo' tinane', sa' ti bai faloffanggue ta'lo."

Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-ña, yan i Espiritu Santo. Amen.

16

I DISEHU-TA PARA TA FANIMPOTTANTE September 02, 2001

Pa'go i XXII Damenggo gi otdinario na tiempo, Añu C. I ebanghelio ni ta hungok maproklama pa'go machuchule' ginen tinige' San Lucas, Kapilutu 14:7-14.

Un dia makombida si Jesukristo para i gima' un Fariseo. Anai matto i oran chumocho, ha ripara i bidan i pumalu na kombiti. Ahe' ti manachonnek guatu gi lamasa lao kalan maninalulula para u mana'fanmata'chong gi onrao na siya. Para i taotao siha gi kuttura yan tiempon Jesukristo gof impottante este.

Mappot madisidi hayi mas impottante gi kombiti. Yanggen dangkulo na selebrasion, siempre manma'arekla este kon tiempo, ya taya' problema. Lao yanggen otdinario ha' na gupot, kada kombiti guiya para u disidi hafa puesto-ña gi kumunida yan manu nai para u fata'chong. Este tumututuhon manáchikkak, sin u fanáchonnek, para i yahululó' na ta'chong. Machocho'gue este kon respetu, lao gof annok na maninalulula guatu gi mas onrao na ta'chong.

Ha e'ega si Jesukristo ginen un banda este siha i maninalulula; ya anai manmata'chong todos, enao nai ha sangan i opinion-ña pot este. Gaige gi ebanghelio este i sinangan-ña pot este na asunto, ya siña ta usa para taimanu kondukta-ta gi gipot. Ha sangan si Jesukristo guini pot lina'la', ya estague' ilek-ña, "taya' setbe-ña para ta gasta tiempo-ta para ta fanannok komu impottante."

Estague' i primet punto ni malago' yo' ta atan un ratu. Ahe' ti ilek-ña si Jesukristo na isao para ta cho'gue mandángkulo na cho'cho' ya ginen enao na ta ganna na manimpottante hit.

En lugat di enao, ha sosoyo' hit para ta fanmatatnga chumo'gue mandangkulo na kosas. Ha gasta tiempo-ña fumana'gue i mankubatde na taotao na mangof impottante siha gi me'nan Yu'os. Todu i tiempo ha fanana'gue i dumalalalaki gue' para u mana'fan matatnga siha gi manmaolek na kosas. "Hamyo i asigan i tano'." Hamyo i kandet i tano'." Ha sangani ni este i peskadot, i taotao kontribusion, i mamopble na famalao'an, yan i kometsiante siha. Yanggen manasodda' hit yan este siha na taotao gi chalan siña ha' ti ta atiende siha. Lao si Jesukristo ha li'e' na manimpottante siha, ya pot enao na ha gasta tiempo-ña para u na'tungo' siha na sen magahet na manimpottante siha.

Pues maila' ya munga hit manlachi ni este na finana'gue-ña. Hunggan, si Jesukristo ha sosoyo' hit para ta cho'gue mandangkulo na cho'cho', ha sosoyo' hit para taya' u igi i klasen lina'la'-ta. Taya' si Jesukristo nai ha chomma' i mandisipulu-ña para munga manmatatnga chumo'gue i manmaolek. Gi magahet guaha obligasion-ta para ta fanmatatnga ya ta fanaiguihi i mas maolek na klasen taotao hit.

Estague' i segundo punto. Ti isao para ta diseha para ta fanimpottante, lao yanggen ta cho'gue i tailayi pot i para ta fanimpottante pues isao enao.

Meggai giya hita ti u estotba hit maseha manu nai ta fanmata'chong. Lao todu i tiempo gaige i disehu giya hita para ta fanmarekoknisa na manákkilo'. Guaha siha mandíkike' ta chocho'gue para ta fansigi hulo' gi lamasa.

Pot ehemplo, i para ta sanganñaihon i prohimu. Ta sanganñaihon i difekton i prohimu sa' para ta tampe i difekto-ta. Yanggen ti ta na'siña mansigi hit hulo' ni hita ha' na maisa pues ta halla papa' i otro.

Lao maila' ya ta po'lo gi korason-ta na ti u ta ganna i malago'-ta gi taiguini. Siempre mali'e' este insigidas ni taotao siha. Pues otro biahi yanggen para un sanganñaihon i prohimu, hasso ayu na momento anai hagu matata'chong ume'ékungok ni ayu i ha sanganñañahon i otro. Bai sangani hao na ti un nina'magof ni sinangan-ña. Meggaiña na biahi nai un tungo' mas pot i difekton i mañañangan ki i masasangan.

17

Ti siña ta na'tákkilo' maisa hit pot i ta sanganñaihon i prohimu. Todu i tiempo i átlibes masusésedi. Siempre gi sinienten i taotao siha ni mane'ékungok mana'sigi hao papa' gi lamasa.

Guaha nai ta hungok i manamko' ilek-ñiha, "Nangga ya maseha i kamyo un tinina." Ti siña ta tunan maisa hit. Taya' mas na'o'son ma'ékungok durante i bela ki ayu i ha tunan mamaisa gue'.

Pot los uttimu, maila' ya ta sangan na kada unu giya hita debi di ta cho'gue i manmappot, i manákkilo' yan i manonrao na cho'cho'. Po'lo ya i otro taotao u sinangan na mambonmochachu hit, na ta na'fonhahayan i manmappot na cho'cho', yan ta chocho'gue i manmaolek. Basta hit manchathinasso kao hafa manmasangangan-ta.

Si yu'os ma'ase' ni atension-miyu yan adios asta otro simana. Si Yu'os en fambinendisi, i Tata +, yan i Lahi-ña +, yan i Espiritu Santo +. Amen.

HA NA’FONHAHAYAN SI YU’OS I CHE’CHO’-ÑA

September 09, 2001

Pa’go i XXIII Damenggo gi otdinario na tiempo, añu C. I Ebanghelio machuchule’ ginen i tinige San Lucas 14:25-33.

Todos hit guaha nai ta cho’gue una kosa ya ti ta na’fonhayan. Ya gi kada ta upos ha estototba hinasso-ta. Ta tutuhon fuma’tinas o sino chumo’gue una kosa. Ya antes di u fonhayan ta sotta. Entonses gi kada ta upos ha na’hahasso hit na ti ta planuyi maolek o sino chaddek hit mano’son. Bula guini gi tano’ ni matutuhon mahatsa i gima’ ya ti monhayan, manhinalang ya mambasta maneskuela, manmama’tinas promesa ya ti makumple.

Estague’ ha sangan si Jesukristo gi pa’go na Ebanghelio. Ha sangan dos kadada na estoria. I unu pot un taotao ni ha katkula kuanto para ginasta para u hatsa i gima-ña para u na’siguru na nahong gue’ salape’ para u na’fonhayan. I otro pot un rai ni ha balua i sendalu-ña kao sufisiente para u ganna i gera. Klaru hafa kumeke ilek-ña este i dos na estoria. Ha sasangan si Jesukristo guini, na prisiso na u guaha maolek na planu. Gof na’mamahlao yanggen para un tutuhon humatsa i gima’-mu ya despues para un sotta sa’ ti nahong hao salape’. Mas tailayi yanggen un nasion para u deklara gera ya ha tungo’ ha’ na siempre mapedde gue’.

Estague’ na patte gi leksion gof klaru guini. Antes di un fangaloppe atan fine’na manu nai para un poddong. Gof hasuyi fine’na antes di un disidi para manu un hanague ni lina’la’-mu. Siguru na taya’ ni unu para u kinentra este. Lao ti gof klaru para ta aplika este na punto guini gi ta hungok na Ebanghelio. Ti gof klaru guini ta hungok na tinaitai hafa kumeke ilek-ña si Jesukristo ni tampoko ti ta tungo’ hayi na taotao ha keke sangan.

Dos punto malago’ yo’ ta mensiona. Estague’ i fine’na na punto.

Meggai mansisitmon hinasson-ñiha na si Jesukristo ha sangangani ayu siha i para u dinalalaki gue’ para u magef ripara antes di u makometen maisa siha giya guiya. Lao ti taiguini bida-ña si Jesukristo anai ha tancho’ i mandisipulu-ña. Franko gue’ ha sangan hafa para u mapadesi ni ayu siha i manhalom mandisipulu-ña. Klaru ha sangani siha na bula para mapadesi. Ya gi kada ha tancho’ siha kalan inalulula para u ma’aksepta insigidas i inagang-ña.

Ti siña hu hasso kao guaha si Jesukristo ni ilek-ña hanao para i gima’-miyu ya un gof hasuyi i inagang-hu. Un biahi anai ha agang si Jesukristo un taotao para u disipulu-ña ilek-ña i ma’agang nangga naya ya bai hafot si tata-hu. Ya ilek-ña si Jesukristo, "Po’lo i matai ya u hafot i matai-ña. Maila ya un proklama i

18

rainon Yu’os." Otro biahi, ayu i ma’agang mamaisen petmisu para u hanao para i gima’-ñiha para u despidi i familia-ña. Sinangani gue’ as Jesukristo: "Ayu i esta ha gogo’te i aladu ya sigi ha’ tumalak tatte ti chumilong yan i rainon Yu’os. (Lk 9)

Bula ehemplo gi Ebanghelio ayu i gotpe manma’agang para u fandisipulu. Ha li’e’ si Jesukristo si Pedro yan si Andres tumalalaya. Ilek-ña nu siha, "Tattiyi yo’, ya bai fa’peskadot taotao hamyo." Ti ilek-ña guini hanao naya arekla hamyo. Ilek-ña i Ebanghelio, "Insigidas ma’abandona i talayan-ñiha ya madalalaki gue’." (Mk1:18) Otro biahi, ha li’e’ Levi, i taotao kontribusion, matata’chong gi lamasa-ña. Ilek-ña si Jesukristo nu guiya, "Tattiyi yo’." Guini lokkue’ gotpe. Ilek-ña i Ebanghelio: "Ha sotta todu, kahulo’ gi Levi ya ha dalalaki gue’." (Lk 5:28)

Taiguini bida-ña si Jesukristo anai ha agang i fine’na na mandisipulu-ña. Ha ga’om korason-ñiha yan kon todu i hinasson-ñiha. Pues kalan mappot para ta sangan na ha faisen siha para u fanhanao para i gima’-ñiha ya para u magef hasuyi fine’na. Pues hafa mohon este i dos na estoria kumeke ilek-ña? Yanggen ti ha akonseseha siha para u magef hasuyi para u fandisipulu, hafa na mensahi gaige guini?

Estague’ i mina’ dos punto.

Otro mansisitmon ilek-ñiha na hokok ha’ si Jesukristo ha sasangan guini na i taotao siha para u mapo’lo todu i konfiansan-ñiha gi rainon Yu’os. Ha asigugura i mandisipulu-ña na si Yu’os siempre ha na’fonhayan i che’cho’ ni ha tutuhon. Ti u tutuhon i fundasion i raino-ña ya para u sotta ha’ sin u na’fonhayan. I kontrario-ña ni tailayi ti para u tapbla uttimo-ña. Siempre si Yu’os ha na’fonhayan i raino-ña. Siempre ha ganna i gera. Este na hinenggen-ña si Jesukristo muna’ matatnga gue’ anai sumesetmon. Este mina’ taya’ nai malingu animu-ña maseha guaha na biahi na kalan ti ma’atietiende i sinangan-ña. Taya’ nai luhan gue’ yanggen kalan metgot-ña i inimugu-ña. Kon todu ayu mismo na momento anai mamomokkat hulo’ gi Ekso Katbario gof siguru gue’ na siempre si Yu’os ha na’fonhayan i ha tutuhon na cho’cho’.

Este lokkue’ i rason na siña ha atan i taotao siha ya para u dimanda na guiya para u mana’ yahululo’ gi lina’la’-ñiha. Ilek-ña, "Hayi matto giya guahu sin u bira i tatalo’-ña kontra si tata-ña yan si nana-ña, kontra i asagua-ña yan famagu’on-ña, kontra i mañe’lu-ña, yan kontra guiya mismo, ti siña gue’ dumisipulu-hu." Sa’ hafa na siña ha dimanda este na klasi? Sa’ ha kombibida hit para ta dalalaki i finana’gue-ña ni ti siña kebra - era i rainon Yu’os.

Guaha un estoria pot si Jesukristo anai matto tatte gi langet. Matutuhon i mananghet mafaisen gue’ pot i che’cho’-ña gi tano’. Manmalago’ kumetungo’ kao ha na’fonhayan i che’cho’-ña guini gi tano’. Mansinangani siha na hunggan. Manmalago’ matungo’ hafa ha po’lo para u makontinua i che’cho’-ña. Manope gue’ na ha po’lo todu gi kannai i mandisipulu-ña. Mafaisen gue’ kao ha angokko na siempre makontinue i che’cho’-ña. Ilek-ña hunggan. Pues ilek-ñiha i mananghet: "Lao siakasu na ti macho’gue, siakasu na ma’abandona hao." Pues hafa? Pues sigun gi estoria ilek-ña si Jesukristo, "Yanggen ti manchaganna ham, pues manchamapedde ham. Taya’ otro planu-hu."

Unu ha’ defekto-ña este na estoria. Ni nungka na matto gi hinasso-ña si Jesukristo na siña ha’ mapedde gue’. Ahe’ ti kannai taotao nai ha po’lo. Ha po’lo gi ayu anai todu i tiempo ha popo’lo i inangokko-ña - gi kannai Yu’os. Ya gof siguru gue’ na siempre si Yu’os ha na’fonhayan todu i ha tutuhon na cho’cho’.

Si yu’os ma’ase’ ni atension-miyu yan adios asta otro simana. Si Yu’os en fambinendisi, i + Tata, yan i Lahi-ña, yan i Espiritu Santo. Amen.

19

MAKRITIKA SI JESUKRISTO September 16, 2001

I Ebanghelio ni maproklama pa’go guini gi XXIV Damenggo gi otdinario na tiempo, Añu C, machuchule’ ginen i tinige’ San Lucas, Kapitulu 15. Guiya este anai makritika si Jesukristo, "Este na taotao ha aksesepta ayu siha i mani’isao asta mañisiha mañocho!"

Maseha hayi malago’ para u cho’gue i maolek siempre makritika gue’. Yanggen ti un hongge este famaisen ha’ gi manma’elihi na manma’gas-ta. Mientras mas makkat i responsabilidat mas addet un makritika. Ya kon todu hagu yan guahu mañasaonao hit manmakritika. Pot este na maolekña ha’ ta cho’gue hafa kombieni yan dinanche ya po’lo ya ta fanmakritika sa’ ti siña ta na’fanmagof todu i taotao.

Kon todu si Jesukristo makritika gue’. Siña ta alok na guiya mas dangkulo makritika gue’. Guaha unos kuantos taotao ni makontra gue’ kuanto i siña asta maklaba gue’ gi kilu’os. Todu i lina’la’-ña ma’e’engulo’ gue’ para u masodda’ hafa nai siña makritika gue’.

Estague’ i Ebanghelio pot este na asunto. Este i mina’ 15 na kapitulu guini na Ebanghelio nai ha oppe si Jesukristo ayu siha i krumititika gue’. I escribas yan i Manfariseo ti yan-ñiha i manga’chong-ña si Jesukristo. Un dia mali’e’ tropan taotao gi uriya-ña ya meggai giya siha taotao kontribusion yan mani’isao. Entonses ha hungok si Jesukristo na mangogonggong ya, ilek-ñiñiha, "Este na taotao ha aksesepta ayu siha i mani’isao asta mañisiha mañocho!" Gi ineppe-ña pot i makrititika gue’ ha sangani siha ni estoria pot i malingu na kinilu, i malingu na salape’, yan i despetdisiao na patgon. Taiguini na ha oppe ayu siha. Ilek-ña nu siha, "Hamyo ti en komprende hayi si Yu’os. Sa’ yanggen en komprende pues siempre ti en kritika yo’ pot i hu chocho’gue este siha."

Makritika si Jesukristo sa’ ti makomprende hafa gaige gi korason Yu’os.

Ti makomprende na impottante todu i taotao siha para guiya. Klaru este na mensahi guini na Ebanghelio. Ayu i pastot ni ha espipiha i ga’-ña kinilu impottante para guiya. Ayu na palao’an i ha kekesodda’ i salape’-ña impottante para guiya. Ayu i tata ni ha nanangga yan mahahalang ni lahi-ña sa’ impottante para guiya. Ya taiguini ha’ si Yu’os. Manimpottante i taotao siha para guiya - todu i taotao.

I Manfariseo hokkok ha’ mali’e’ taotao kontribusion yan mani’isao. Lao si Yu’os ha lili’e’ siha komu famagu’on-ña ni manmalingu ya manisisita na u fanmasodda’. Estague’ i rason na matto si Jesukristo guini gi tano’, yan este i rason na ha risibi i mani’isao ya mañocho yan siha. Ha ayuyuda siha para u masodda’ i chalan tatte as Yu’os. Estague’ ti makomprende ni Manfariseo - era ti makomprende i guaiyayon na korason Yu’os - ti makomprende i sinientete-ña si Yu’os para i taotao siha. Ya fana’an na kon todu hita ti ta gogof komprende este trabiha. Guaha na biahi na ta na’fandaña’ unos kuanto taotao guini yan unos kuantos’ guihi ya ta konsidera komu problema. Guini i grupon kriminat, guihi i grupon probleman manhoben, ayu guatu i grupon probleman immigration yan labor pot i taotao hiyong.

Buente nisisario manmagrupo este siha na problema gi difirentes ofisinan gobietno para u matungo’ manu nai gaige na depattament i responsabilidat ni para u fanmanayuda. Lao ti siña ta cho’gue taiguini gi Gima’yu’os. Ti debi di ta atan un grupon taotao komu problema. Sa’ gi me’nan Yu’os ti ha na’fane’etnon un dangkulon linahyan taotao. Sino ki kada taotao tumotohge gi me’nan Yu’os komu un sasahnge yan espesiat na petsona. Ripara ha’ i estoria ni ta hongok - unu na pastot ha espipiha unu na kinilu, unu na palao’an ha espipiha unu na salape’, unu na tata ha nanangga unu na lahi-ña. Taiguini atatan-ña si Yu’os gi kada taotao guini gi tano’ - unu in unu. Kada unu espesiat yan impottante.

Estague’ ineppe-ña si Jesukristo ni ayu i krumititika gue’. Si Tata-ña ha gogof asiste ayu siha i manmakonsidedera na ti manimpottante. Siha i famagu’on ni manabak, ya matto gue’ para u konne’ siha tatte as Yu’os.

20

Estague’ otro ineppe para este na kuestion - era ayu i krumititika gue’ ti makomprende i che’cho’ Yu’os.

Ti gof klaru hafa i escribas yan i Manfariseo hinasson-ñiha bidada-ña si Yu’os. Siña ha’ buente gaige gi hinasso-ñiha na si Yu’os ha nana’i todu i atension-ña para ayu siha i manmaolek na taotao, ya sumasaga ha’ gue’ gi halom i templo todu i tiempo ha e’ekungok i atgumienton–ñiñiha i manmalate’ yan i manabogao.

Ti taiguini kinemprende-ña si Jesukristo pot si Yu’os. Si Jesukristo gaige gi hinasso-ña na si Yu’os guiya i pastot guihi hulo’ gi ekso, ha kekesodda’ i malingu na kinilu. Gaige gi hinasso-ña na si Yu’os kalan i palao’an ni ha gogo’te i eskoba, ya despasio ha baballe i satge asta ki ha sodda’ i salape’-ña ni malingu. Gaige gi hinasso-ña si Jesukristo na si Yu’os guiya i tata ni pumininiti, kumakasao ha’ani yan puengi, ha a’atan i chalan gi chago’ ha deseseha na u annok i lahi-ña guaguaguatu gi gima’-ñiha.

Yanggen ti ta komprende este na minagahet pues ni ngai’an nai siña ta komprende si Yu’os. Ahe’ ti makandadalu si Yu’os gi un chago’ tano’ o sino gi halom manu na sagradu na templo. Gaige si Yu’os gi anai mangaige i taotao siha, espesiatmente gi ayu siha i mampininiti, gi manlalalalo’, gi manmahalang, gi mankubatde yan gi ayu siha i manabak.

Ripara ha’ manu nai ta sosodda’ si Jesukristo durante i lina’la’-ña. Guaha na biahi nai matto gue’ gi templo yan gi synagoga. Guaha na biahi nai ta li’e’ gue’ mañisiha ha’ yan i mandisipulu-ña gi un sasahnge na lugat para u fanmanayuyot yan para u fandeskansa, lao mayot patte ha gasta tiempo-ña gi entre i taotao siha. Humanao gue’ para i fandanggo anai manmamagof korason-ñiha i taotao; estaba gue’ gi naftan anai mantririste i taotao siha. Makombida gue’ para i gima’ un Fariseo yan para i gima’ taotao kontribusion. Ha trata un palao’an chalan parehu yan un palao’an ni tunas.

Mamana’gue gue’ gi halom i Templo, yan mamana’gue gue’ gi kanton tasi. Ha kuentusi i manmalate’, yan kumombetsasion yan i famagu’on. Estague’ sinangan-ña pot este siha: "I Lahen i taotao matto para u espiha yan para u satba ayu i manabak."

Estague’ bisnes Yu’os, i para u guaiya yan para u sustieni i taotao siha. Ya yanggen para ta fanhita manmamokkat yan guiya debi di ta po’lo gi korason-ta yan ta go’te ni kannai-ta este siha na cho’cho’. Sen bonitu yanggen para u makritika i Gima’yu’os sa’ pot i ha asisiste yan ha adadahi todu klasen taotao, mamopble yan manriku, taotao tano’ yan taotao hiyong, manunas yan mani’isao?

Si yu’os ma’ase’ ni atension-miyu yan adios asta otro simana. Si Yu’os en fambinendisi, i Tata +, yan i Lahi-ña +, yan i Espiritu Santo +. Amen.

APLIKA I TINEMTOM GI RILIHION September 23, 2001

I ebanghelio ni maproklama pa'go guini gi XXV Damenggo gi otdinario na tiempo, Añu C, machuchule' ginen i tinige' San Lucas, Kapitulu 16:1-13. Guiya este anai ha sangani si Jesukristo i mandisipulu-ña, "Sa' i manga'tano' mas mananimosu ki i otro siha na manga'tano' yanggen mañgontrata yan i mamparehon-ñiha."

Guiya este na estoria i mas na'manman ni ha sangan si Jesukristo. Estague' un taotao ni para mana'basta gi che'cho'-ña. I rason na para mana'basta gue' sa' ti ha tungo' gumai-responsabilidat, ti siña ma'angokko, yan buente siña ha' ha pacha i salape' i amu-ña. Lao antes di u mana'basta ha baratura kumopbla ayu siha i dumidibi i amu-ña. Un taotao mandidibi siento medidan laña. Ha baratura gi balen sinkuenta. Otro na taotao mandidibi siento medidan trigu. Ha baratura gi balen ochenta. I rason na ha

21

cho'gue este era para u asegura i lina'la'-ña gi manmamamaila' na tiempo. Malago' gue' na u guaha obligasion-ñiha i manmandidibe nu guiya despues di mana'basta gue'.

Ripara ha' sa' nina'i gue' punto ni amu-ña pot este na bida-ña. Despues ha aplika si Jesukristo este na fina'akomparasion anai ilek-ña, "Sa' i manga'tano' mas mananimosu ki i otro siha na manga'tano' yanggen mangontrata yan i mamparehon-ñiha." Klaru guini na ahe' ti ha tutuna si Jesukristo este na digeron taotao. Hokkok ha ilek-ña na i famagu'on este na tano' mas mankabiloso ki i famagu'on i inina. Lao gi hinasso-ku ha sangangani hit si Jesukristo para ta aplika i tinemtom este na tano' gi rilihion. Ilek-ña, hagu yan guahu siña manmañule' leksion ginen este na digeron taotao. Este na taotao ha na'annok didide' tinemtom ni siña ta usa. Hafa este siha?

En primet lugat, ta li'e' i aksion-ña siha este na taotao na manchilong yan hafa malago'-ña.

Pot salape' na ha chocho'gue este. Salape' i mas yahululo' gi malago'-ña. I mas prisisu yan inalulula na malago'-ña era i para u na'siguru na nahong gue' mantension salape' para i manmamamaila' na tiempo. Ta sen tungo' ha' na ti dinanche este na klasen minalago'. Hokkok ha' ha prikukura i lina'la' este na tano'. Ahe' taya' difekto-ña i para u na'siguru na guaha salape'-ña para i manmamamaila' na tiempo. Todos hit siña ta pribiniyi salape' para i manmamamaila' na ha'ani gi lina'la'-ta. Lao yanggen ta na'tatkiloña i salape', ya este ha' prisisu-ta, ya nina'maya' todu i pumalu siha gi lina'la', ti dinanche enao. Kumeke ilek-ña na ha sakrifisia i mamprisisu para ayu i ti mangof prisisu.

Este na taotao estague' gaige gi korason-ña. Malago' gue' na u asegurao gi salape' na banda para i manmamamaila' na ha'anen i lina'la'-ña, ya listo gue' para u sakrifisia maseha hafa, pot i para u ganna enao. Matto i desgrasia giya guiya sa' para u mana'basta gi che'cho'-ña, lao chumilong i bida-ña yan i nisisidat-ña. Annok guini na tomtom gue' pot i kosas este na tano'.

Ha fanu'i hit guini si Jesukristo na mas manomtom este siha ki i manga' langet. Hunggan, mas maolek i malago'-ta ki ni siha. Hunggan ta nisisita salape' lao ti i salape' mas yahululo' gi malago'-ta. I mas takkilo' na malago'-ta era i para ta Fankilisyanu na lalahi yan famalao'an. Manmalago' hit na para u metgot karaktet-ta ya munga hit mañgontrata yan i isao. Manmalago' hit para ta fanyo'ase' yan kariñosu. Manmalago' hit na todu i hinasso-ta para si Yu'os yan para minaolek.

Estague' siha na minalago' yan disehu ha akonseseha hit i gima'yu'os. Mandadaña' hit pa'go guini sa' manmalago' hit para ta Fankilisyanu na lalahi yan famalao'an. Este ta sasangan yan este ta chocho'gue. Maila' pa'go ya ta faisen este na kuestion. Kuanto tiempo-ta ta gagasta para este siha na tinañgañga-ta? Kuanto biahi ta risisibi i sakramento? Kao ta e'ekungok i fino' Yu'os ni ha sasangan gi halom i korason-ta?

Siña ha' guaha na biahi nai ta diseseha una kosa ya ta fachuchu'i otra kosa? Ti a'annok este sa' guaha na biahi nai kalan ta chocho'gue' una kosa para i prohimu lao muchu mas pot hita na ta chocho'gue enao. Ha sangangani hit si Jesukristo na para ta aplika i tinemtom gi rilihion-ta. Yanggen manmalago' hit manmatto Luta pues debi di ta fanma'udai gi boti pat batkon aire ni para guatu Luta. Yanggen manmalago' hit para ta fanmaolek na Mangilisyanu pues debi di ta cho'gue ayu siha i chumilong yan i finana'guen Kilisyanu. Debi di ta cho'gue ayu na cho'cho' i para un nina'i ni enao na klasen karaktet.

Ha na'fakpo' si Jesukristo i sinangan-ña yan este siha na palabras: "Taya' taotao siña ha setbe dos na amu. Ti siña un na'en maisa hao para si Yu'os yan para i salape'." Este na taotao guini na fina'akomparasion ha sen komprende este. Salape' ha' mas yahululo' gi malago'-ña; entonses ha na'en maisa gue' enteramente para i salape'. Guaha guini leksion para hita. Yanggen minaolek Yu'os mas yahululo' gi malago'-ta; pues debi di ta na'en maisa hit enteramente para si Yu'os.

Si yu'os ma'ase' ni atension-miyu yan adios asta otro simana. Si Yu'os en fambinendisi, i Tata +, yan i Lahi-ña +, yan i Espiritu Santo +. Amen.

22

TI SIÑA HAO LA'LA' NA MAISA September 30, 2001

I Ebañghelio ni maproklama pa'go guini gi XXVI Dameñggo gi otdinario na tiempo, Añu C, machuchule' ginen i tinige' San Lucas, Kapitulu 16:19-31. Guiya este i ha sañgan si Jesukristo na fina'akomparasion pot i riku na taotao yan si Lazaro.

Ha sañgañgani hit este na Ebañghelio na ti siña hao la'la' na maisa. Gof annok este na punto giya New York despues di ayu i desgrasia ni masusedi guihi. Todu i taotao siha kalan mañe'lo mana'áyuda yan mana'ákudi yan manákonsuela unu yan otro. Pot dos na taotao ha sañgan este na Ebañghelio. Fine'na pot un taotao ni riku yan gefsaga lina'la'-ña, minagagagu seda, yan chumochocho' manmanñge' na putahi kada dia. I sigundo na taotao era popble, i na'an-ña si Lazaru, ni sesso ñalañg yan hammalañgu parehu yan meggai na taotao. Hokkok ha' nai siña gue' chumocho yañggen umegagao ya mana'i gue', ya guaha na biahi nai kebra ya taya' numa'i, ya ha diseseha kumanno' sipudera i ñgatnan ni popoddoñg ginen i lamasan i riku na taotao.

Pot los uttimu chamatai i dos. I pepble makonne' ni manañghet guatu gi as Abrahan ni kumeke ilek-ña sagan minagof. I riku mahafot gi sagan i manmatai. Matto dos na ginagao gi as Abrahan ginen i sagan i manmatai. I fine'na na ginagao, kao siña si Lazaro ha totche i kalulot-ña gi hanom ya u fatto ya u na'fresko i mamadedesi na hila'-ña. I sigundo kao siña si Lazaro humanao para i gima' tatan i riku para u abisa i sinko na mañe'lu-ña lalahi ya cha'-ñiha mamopoddoñg guini na desgrasia. Ni unu gi dos na ginagao-ña ma'ekuñgok - i fine'na pot imposipble yan i sigudno pot i taya' setbe-ña.

Hafa ha keke sañgani hit guini este na fina'akomparasion? Ha keke sañgani hit si Jesukristo kabales un minagahet na kada taotao ha nisisita otro taotao, pa'go guini yan gi manaihinekkok na tiempo.

En primet lugat, maila' ya ta tutuhon guini gi mas klaru na punto. Si Lazaro ha nisisita i riku na taotao.

Na'mase' i kondision i lina'la'-ña. Ñalañg gue'; malañgu gue'; mahalañg gue'. Ha nisisita neñgkanno'; ha nisisita amot; ha nisisita na u guaha amigu-ña. I mas kapas na taotao ni siña numa'i gue' ni este siha na nisisidat-ña era este i riku ni ini'ipos gue' kada dia gi chalan. Siña ha fahani gue' neñgkanno' yan amot. Hokkok ha' i para u gasta didide' tiempo-ña ya u kuentusi si Lazaro ya siempre magoñg mahalañg-ña. Lao ni unu gi este siha ha cho'gue. Sigi ha' si Lazaro gi pinepble-ña ya matai sin konsuelo gi pettan i riku na taotao, lao humahnanao ti matto ni hafa na ayudu yan konsuelo.

Siguru na guaha rason-ña i riku na taotao. Siña ha' mampos apretao i che'cho-ña? Ahe' ti obligasion-ña si Lazaro. Ni tampoko ti responsapble gue' ni probleman i pepble; pot enao na taya' obligasion-ña para u ayuda gue'. Guaha ha' depattamento para u fanmanayuda ni mamopble. Yañggen manmanespipiha hit eskusu pues siempre manmañodda' hit. Lao i minagahet guini, ti prisisu i riku ni este i pepble. Guiya ha' ha prikuran mamaisa; ya pot enao na taya' tiempo-ña , taya' interes-ña, yan ti malago' mangasta didide' para i probleman otro taotao, ni para ayu i gaige gi me'nan i gima'-ña.

Lao antes di ta kontinua umakusa este na taotao, maolek ta atan maisa i lina'la'-ta. Guaha siha taotao gi fi'on-ta ni manisisita i ayudu-ta. Desde i tiempon Jesukristo asta pa'go guaguaha mamopble yan manmalañgu. Siña ha' ti parehu inaddet-ña i probleman Lazaro yan i taotao siha gi fi'on-ta. Taya' mane'egagao gi pettan i gima'-ta. Taya' ta u'upos gi chalan manñalañg pat manmalañgu. Lao pot i ti ta lili'e' ti kumeke ilek-ña na taya' manñañalañg, yan ti ayu ha' obligasion-ta i mangaige gi uriya-ta.

Hita na taotague' meggai na biahi na ta nana'na' i problema-ta yan ayu siha i ti mambonitu. I mamopble mañasaga gi fina' lancherias, gi halom sadigani. Enao ha' nina'siñan-ñiha. Ti ta lili'e' siha, pot enao na ti ta hahasso siha. Ya pot ti sesso ta li'e' siha na guaha nai ilek-ta taya' popble gi fi'on-ta. Lao bai sañgani hamyo na ti dañgkulo Saipan, Tinian pat Luta, pues kumeke ilek-ña na manhihot ha' nai mañasaga este

23

siha i mamopble. Ahe' ti iya India pat Africa ni manchago na tano'. Lao yañggen ta taitai ya ta komprende kabales i sinangan Jesukristo, hagu yan guahu guaha responsabilidat-ta kada unu ni takkilo'ña ki i linderon un isla asta otro, ha u'upos i lindero kao hafa na klasen rasan taotao gue', yan hafa na estao kao takpapa' puesto-ña. Si Lazaro ha nisisita i riku na taotao.

II. Entonses maila' pa'go ya ta atan i sigundo na minagahet, ti gof klaru este na minagahet. I riku na taotao ha nisisita si Lazaro.

Buente este i riku na taotao ti ha tuñgo' na ha nisisita si Lazaro. Ya siguru na siempre chumalek gue' yañggen guaha sumañgani gue' na ha nisisita si Lazaro. Lao ha nisisita na u mayeñgyoñg kakagoñg-ña kosa ki siña ha komprende na ti para guiya ha' u prikuran mamaisa gue', lao para u komprende na guaha otro taotao siha guini gi tano' fuera di guiya.

Parehu ha' hagu yan guahu. Ta nisisita ayu na taotao siha i numisisita hit. Kada unu giya hita ta nisisita este siha na taotao para ta na'fañaonao siha para ta na'annok na manchachathinasso hit pot siha, yan para ta na'fañaonao siha gi ginefli'e'-ta, yan para ta gasta tiempo-ta pot siha, para ta na'chagi siha ni na'-ta, yan para ta gasta didide' salape'-ta pot siha. Taya' ni un taotao sen tailayi ha' ya i puti-ña ha' ha siesiente, i problema-ña ha' ha li'i'e', yan i lago'-ña ha' ha sasaosao'.

Entonses ayu na taotao siha i numisisi-ta i ayudu-ta ahe' ti problema-ta, sino ki opottunida este siha para hita. Yañggen ta atan maolek este ahe' ti puru ha' minappot sinoki bendision este siha para hita. Hasso este na siempre na'piniti para hagu yan guahu yañggen ni un taotao guini gi tano' numisisita hit. Yanggen taya' numisisita hao siempre hagu i mas miserapble na taotao. Ti siña hit manla'la' magof asta ki ta tutuhon muna'fanmañagi i taotao siha gi uriya-ta ni lina'la'-ta mismo, espesiatmente ayu siha i numisisita hit.

Pot los uttimu, guaha kantan manhoben ni ilek-ña, "People who need people are the luckiest people in the world." I mas suette na taotao guini gi tano' era ayu i numisisita otro taotao siha. Kumeke ilek-ña na hagu yan guahu i mas suette na taotao guini gi tano', sa' guaha siha taotao ni numisisita i ayudu-ta. Lao mas ki este - ta nisisita na para ta fanmanisisita.

Si yu'ós ma'ase' ni atension-miyu yan adios asta otro simana. Si Yu'os en fambinendisi, i Tata +, yan i Lahi-ña +, yan i Espiritu Santo +. Amen.

KAO I RILIHION MUNA'GUAGUAHA HINEÑGGE? October 07, 2001

I Ebañghelio ni ta huñgok maproklama pa'go gi XXVII Dameñggo gi Otdinario na Tiempo, añu C, machuchule' ginen i tinige' San Lucas, Kapitulu 17:5-10.

Ha tutuhon este na ebañghelio yan un rasonapble na ginagao. Kalañg tinayuyot este. Manmatto i manapostoles guatu gi as Jesukristo ya ilek-ñiha, "Asaina, na'lametgot i hinenggen-mami." Siguru na marialisa na impottante i hineñgge despues di mali'e' este gi lina'la'-ña si Jesukristo. Entonses manmalago' ni este na klasen hineñgge para i lina'la'-ñiha lokkue'.

Para u oppe este, dos bida-ña si Jesukristo. Fine'na, guaha sinañgan-ña pot i fuetsan i hineñgge. Ilek-ña, "Yañggen chamoddoñg i hineñggen-miyu yan i pipitas mustasa, siña en sañgani este na tronkon sycamore, 'Bo'ok hao ya un transplanta hao gi halom tasi' ya siempre inesge hao." Maila' ya ta komprende na ti kumuekuentos guini si Jesukristo pot abusion pat machamat. Hokkok ha' ha sasañgan klaru na i hineñgge siña ha na'posipble ayu i ilek-ta imposipble. Sen magahet este gi rilihion yan kon todu lokkue' gi otdinario na lina'la'-ta.

24

Despues ha sañgan un estoria ni tinutuhon ni un kuestion, despues ha oppe ha' i kuestion-ña, ya uttimo-ña ha aplika i sinañgan-ña. Estague' i kuestion: Kao u magof i ma'gas yañggen hokkok ha' i matago'-ña ha chocho'gue i tentago'-ña? Ta sen tuñgo' ha' na ahe'. Despues ha aplika i sinañgan-ña na kumeke ilek-ña i relasion-ta yan guiya. Guiya i ma'gas yan hita i tentago'. Despues ilek-ña, yañggen monhayan ta cho'gue i obligasion-ta ha' ya taya' mas, pues siempre ta sangan na manaibali hit na tentago'.

Maila' ya muñga hit manmaleffa na ha sañgan si Jesukristo este na fina'akomparasion pot i para u oppe i finaisen-ñiha i manapostoles kuestion, era i para u fanmana'i mas metgot na hineñgge. Ya kalañg ilelek-ña na ti u fatto i metgot na hineñgge pot i magagao o sino madiseha. Sino ki mafatto i metgot na hineñgge ginen i kantida na cho'cho' ni ta chocho'gue, pot i ta chocho'gue mas ki i manmatago'-ta. Mientras mas meggai ta cho'gue ni ti obligasion-ta mas metgot siempre hineñgge-ta. Yañggen empidasito ha' ta chocho'gue pues siempre empidasito ha' na hineñgge matto giya hita. Sa' hafa na para u fatto kantidan hineñgge yañggen i mas didide' ha' ta chocho'gue gi lina'la'-ta?

Lao hafa este siha kumeke ilek-ña para hagu yan guahu? En primet lugat ha sañgañgani hit na impottante i hineñgge gi lina'la'-ta.

I manapostoles matuñgo' na impottante i hineñgge gi lina'la'-ñiha; este i rason na manhanao guatu gi as Jesukristo para u mafaisen gue' para u na'lametgot i hineñggen-ñiha. Hita lokkue' ta nisisita este, sa' i hineñgge unu gi mas manimpottante para luma'la' maolek. Maolek ta po'lo gi hinasso-ta na i hineñgge ahe' ti pot rilihion ha'. I hineñgge sasaonao gi todu i lina'la'-ta. Sasaonao gi Santa Misa, gi konfesion, gi che'cho' i Gima'yu'os; lao sasaonao lokkue' gi bidada-ta gi gima'-ta, gi eskuela, yan gi anai manma'emplelea hit.

I hineñgge ni ta li'e' gi lina'la'-ña si Jesukristo sasaonao gi enteru i otdinario na lina'la'-ña kada dia. Sasaonao yañggen ta hoñggen maisa hit, yañggen ta hoñgge otro taotao, yañggen ta hoñgge si Yu'os. Estague' ta nisisita, sa' taya' ni hafa baliña para ta ganna todu i kosas yañggen taya' hineñgge. Ta nisisita hineñgge yañggen maneskuela hit sa' ti siña na para ta estudia todu i kosas siha sin ta hoñgge hafa esta manmonhayan manmaestudia ni otro taotao. Un nisisita hineñgge yañggen para un hatsa i gima'-mu. Yañggen ti engineer hao pues debi di un hoñgge i engineer na ti u basnak i gima' yañggen monhayan. I lahi yan i palao'an ni umaguaiya debi di u mahoñgge na i kasamiento nisisario yan siña ha' gatbo i dumaña'-ñiha i dos. Debi lokkue' i dos di u mahoñgge na siña ha' sen magof i lina'la'-ñiha. Yañggen para un bisnes debi di un hoñgge na un na'siña bumisnes, debi di un hoñgge na maolek i produkto ni para un bende, debi di un hoñgge gi para u fanmamahan, yan debi di un hoñgge i ekonomian i tano'.

Pot los uttimu, pa'go nai ta tuñgo' na, "Ahe' ti i rilihion umimbenta i hineñgge." I hineñgge, unu este na minagahet ni nisisario para i lina'la' todu i taotao achokka' ti manhoñgge as Yu'os. Todos hit numisisita na u guaha hineñgge gi kada unu giya hita. Enao na bonitu yan kombieni na ta fanhita yan i manapostoles manmanayuyot, "Asaina, na'lametgot i hineñggen-mami.

Si yu'os ma'ase' ni atension-miyu yan adios asta otro simana. Si Yu'os en fambinendisi i +Tata, yan i Lahi-ña, yan i Espiritu Santo. Amen.

AGRADESIMIENTO October 14, 2001

I Ebañghelio ni ta huñgok maproklama pa'go gi XXVIII Dameñggo gi Otdinario na Tiempo, añu C, machuchule' ginen i tinige' San Lucas, Kapitulu 17:11-19. Guiya este na Ebañghelio anai si Jesukristo ha na'fanhomlo' i dies na nasarinu.

Gi tiempon Jesukristo yañggen nina'yi i taotao ni chetnot nasarinu, na'mase' gue', sa' fuera di i pinadesi-ña pot i chetnot-ña mamadesi gue' lokkue' sa' taya' taotao umatotga para u arima gi fi'on-ña. Guihi na

25

tiempo, gigon masodda' na nina'yi i taotao ni este na chetnot, fuetsao debi di u huyong ginen i gima'-ñiha, debi di u suha ginen i familia-ña yan i manatuñgo'-ña, ya u saga guiguiya ha' na maisa gi halom tano'. Mina' taiguini este sa' masen tuñgo' na, fuera di taya' amot-ña, tanme este na chetnot yan lokkue' hinasson-ñiha na este na chetnot kastigon Yu'os pot i isao-ña i taotao. Entonses manma'a'atan este siha na ti debi di u fañasaonao gi inetnon taotao. Pot este na mantririste yan mampininite ya mane'etnon siha ha' yan siha para u fanakonsuela unu yan otro. Este pinadesen-ñiñiha este i dies na nasarinu ni manmatto guatu gi as Jesukristo manmangagagao ayudu. Este i dies na nasarinu, pot i mantinago' siha as Jesukristo, manhanao ma'espiha si pale'; ya mientras manhahanao mana'fanhomlo' siha.

Unu giya siha, lahi ginen Samaria, anai ha li'e' na mana'homlo' gue', ha bira gue' tatte ya dumimu papa' gi me'nan Jesukristo, ha nana'i gue' agradesimiento pot i mana'homlo' gue'. Entonses mamaisen si Jusukristo, "Na adda ti todu i dies mana'fanhomlo? Manmangge i otro nuebi? Ti manmasañgani hit hayi si Jesukristo ha faisen ni este na kuestion. Siña ha' buente ha faisen i mandisipulu-ña, o sino i Samaritano'; pat siña ha' buente ha fafaisen hagu yan guahu. Siña ha' malago' gue' para ta komprende na gof impottante gi lina'la'-ta para ta fanmanna'i agradesimiento.

Ta sen tungo' ha' na ahe' ti nina'baba siniente-ña si Jesukristo pot i ti mana'i gue' agradesimiento. Ti patgon gue' para u siente taiguini na klase. Lao nina'chathinasso gue' ni nuebi sa' nina'fandimamalas siha pot i ti matungo' manmanna'i agradesimiento. Parehu ha' yan i mañaina ni mafanana'gue i famagu'on-ñiha para u ma'alok, si yu'os ma'ase', thank you, yañggen guaha manmana'en-ñiha pat manmacho'guiyi hafa. Ahe' ti pot i para u mahungok, si yu'os ma'ase', sino ki para u masañgan, si yu'os ma'ase', ni famagu'on.

Mamparehu ha' hit todos, manamko' yan famagu'on. Todos hit yata manma'agradesi, lao mas prisisu para ta fanmanna'i agradesimiento ki para ta risibi agradesimiento. Este i ta sasañgan guini ahe' ti para ta tuñgo' ha' manmanna'i agradesimiento sino ki para ta fanagradesido na klasen taotao. Dedi di u machuchuda' gi lina'la'-ta na managradesido hit sino ni ngai'an nai ta fanaiguihi na klasen taotao ni depotsi manmafa'tinas hit. Gof hasso fan este un ratu. Hafa siña tumahgue i agradesimiento? Yañggen taya' agradesimiento gi lina'la'-ta, hafa guaha-ta?

Adahi sa' siña ha' buente guaha binibu o sino linalalo' gi sanhalom-ta. Este na klasen siniente mafatto gi ayu siha na taotao i hinasson-ñiha na puru ha' dimalas manmafatto para siha guini gi tano'. Ta sen komprende na taiguini sinienten-ñiha este i nasarinu - manmadulalak siha ginen i señgsoñg, ginen i familian-ñiha, yan manátuñgo'-ñiha, ya ahe' ti isao-ñiha este, hokkok ha' pot i mannasarinu siha. Siguru yo' na kada pueñgi manmahahalañg ni manguinaiyan-ñiha yan manatuñgo'-ñiha ya mafaisen mamaisa siha, "Sa' hafa na nina'yi yo' ni este na chetnot? Hafa bida-hu para bai mirese este siha?"

Siguru yo' na kon todu hagu yan guahu guaha nai matto este na siniente giya hita. Naturat este, lao debi di ta gof adahi hit yañggen matto este na siniente. Yñggen todu i tiempo baba siniente-ta sa' ilelek-ta na puru ha' baba manmafatto giya hita ginen este na tano', kombieni na ta ripara sa' siña ha' buente na gaige i problema giya hita, ahe' ti mafatto ginen i tano'. Siña ha' buente ta añgoñgokko na para ta fanmana'i mas ki depotsi para hita ginen este na tano'. Siña ha' buente na ta na'tatakkilo'-ña i direcho-ta ki i responsabilidat-ta.

Ginen hu huñgok un estoria pot un palao'an ni lalalo' gi ayu siha i manmachocho'cho' gi food stamps. Ha kopbla i taotao food stamps sa' hafa na meggaiña mana'iña si fulana ki guiya ya duru kumonkurahi gi halom ofisinan food stamps. Hinasso-ña na guaha diricho-ña para u mana'i food stamps; ya guaha dumiroga enao na direcho'-ña sa' meggai-ña mana'i-ña i otro ki guiya, pot enao na lalalo' gue'. Maila' fan ya ta analisa este na kausa. I salape' ni ma'u'usa gi food stamps ti finacho'cho'-ña sino ki puru este inapasen otro taotao siha gi tax. Ayu siha i manmachocho'cho' gi ofisinan food stamps ti guiya umapapasi. Gi magahet taya' direcho-ña para u mana'i, hokkok ha' pot miserikotdian Yu'os, o sino pot i na'mase' gue', na manana'i food stamps. Pot i meggaiña mana'i-ña i otro siguru guaha rason ya ti nisisario na u mana'tuñgo' gue' hafa este siha na rason.

26

Pot los uttimu, siguru yo' na guaha nai ti rasonapble ta ekspepekta ginen este na lina'la'. Guaha na biahi nai ta cho'gue che'cho' patgon ya ta dimamanda ginen este na lina'la' direcho ni ti iyo-ta. Meggai hu tuñgo' siha taotao ni duru manmacho'cho' para i familian-ñiha ya ha na'ma'a'ase' yo' sa' meggai nisisidat-ñiha. Este kumeke ilek-hu hagu yan guahu. Siempre mas maolek este na tano' para luma'la', ya siempre mas na'magof ta ekspirensia, ya siempre mas manmaolek hit na taotague' yañggen ta dimanda menos ginen otro ya ta fanmanna'i mas para i otro. Gi taiguini na siempre ta siente magof i lina'la'-ta ki para ta sigi ha' manhosguan sa' mas gefsaga i otro ki hita, mas brabu i otro ki hita.

Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-ña yan i Espiritu Santo. Amen.

POT TINAYUYOT October 21, 2001

I Ebañghelio ni ta huñgok maproklama pa'go guini gi XXIX Dameñggo gi Otdinario na Tiempo, añu C, machuchule' ginen i tinige' San Lucas, Kapitulu 18:1-8.

Guaha una kosa gi rilihion ni sesso ta cho'gue ya guaha na biahi nai fatta kinemprende. Guiya este era pot tinayuyot. Para u ayuda hit kumomprende este maila' ya ta ekuñgok este na estoria.

Este i halacha umannok gi un gaseta este na na'manman na estoria. Pot un hoben na ma'estra gi high school este na estoria. Gof malago' este na palao'an para u sen maolek na ma'estra. Lao mampos nina'mitbiobiosa ni unu gi estudiante, sa' mampos palacha' yan ga'umositan yan borikento este na patgon lahi.

Un oga'an, antes di u matutuhon i eskuela, estaba i ma'estra na mamañgge' gi lamasa ha u'usa i shorthand, ma'u'usa este i shorthand na klasen tinige' ni sekretaria sa' chaddek. Gotpe humalom gi kuatto este na patgon. Malak guatu gi lamasa ya ha faisen i ma'estra hafa ha tutuge'. Ilek-ña i ma'estra, "Mamañgge yo' un tinayuyot para si Yu'os. Umositanñaihon i patgon ya ilek-ña, "Kao ha tuñgo' si Yu'os tumaitai i shorthand? Ilek-ña i ma'estra, "Todu siña ha cho'gue si Yu'os, kon todu siña ha oppe este na tinayuyot-hu."

Ha dopbla i ma'estra i papet ya ha po'lo gi halom i lepblo-ña Biblia ya ha bira gue' ya ha tutuhon mañgge gi pisara. Mientras mamañgge i ma'estra, i estudiante ha laknos i papet ginen i Biblia ya ha po'lo gi halom lepblo-ña, lepblon eskuela.

Bente años maloffan, este na estudiante humalom gi sagan pine'lo gi gima'-ñiha. Ha sodda' un kahita anai mangaige siha i kosas-ña anai papatgon gue'. Ha baba un lepblo ya ha sodda' ayu na papet i ha chule' ginen i ma'estra-ña. Esta kalañg mamafnas i shorthand na tinige'. Ha baba i papet ya sigi ha adibina hafa mohon i ilelek-ña. Ha dopbla i papet ya ha po'lo gi halom i pottanmoneda-ña. Anai matto gue' gi ofisina, ha na'i i sekretaria ya ha faisen para u pula' gi otdinario na tinige'. Anai i sekretaria ha taitai kalañg nina'mamahlao. Ilek-ña, kalañg petsonat este na tinige'. Lao bai hu tuge' ya bai po'lo gi lamasa-mu antes di bai hanao lamo'na. Guihi na pueñgi ha taitai i tinayuyot.

Estague' ilek-ña i tinayuyot: "O Yu'os, cha'mo muna'dimamalas este na che'cho'-hu. Ti siña hu arekla i famagu'on mientras gagaige este na patgon. Pot fabot tulaika korason-ña. Guiya este na patgon i siña gof maolek yan siña gof tailayi."

Mampos inestotba este na taotao ni uttimu na sinañgan i ma'estra. Sa' guenao mismo na momento ha hahasso chumogue una kosa ni para u nina'tailayi gue' para todu i tetehnan gi lina'la'-ña. Ha dopbla i papet ya ha sahguan gi pottanmoneda-ña.

27

Gi sigiente simana ha taitai di nuebu unos kuanto biahi este na tinayuyot. Este na tinayuyot tumulaika ayu i ha hasusuyi para u cho'gue na tailayi. Unos kuanto simana maloffan ha espiha i ma'estra-ña ya ha sañgani gue' ni minagahet yan lokkue' tinilaika i lina'la'-ña enteramente.

Este na estoria ha na'hahasso hit dos na punto pot tinayuyut ni ta huñgok pa'go gi Ebañghelio. Fine'na, dañgkulo fuetsa-ña i tinayuyot. Sigundo, yañggen para ta ekspirensia i fuetsan-ña i tinayuyot, debi di ta petsigi ya muñga hit mampara manmanayuyot.

Maila' ya ta atan unu in unu este i dos punto. Fine'na, dañgkulo fuetsa-ña i tinayuyot. Siña ha tulaika hafa para u masusedi, yan siña ha tulaika i lina'la' taotao.

Guaha un dokto ilek-ña: "I tinayuyot i mas metgot na fuetsa ni gaige gi kannai-ta. I tinayuyot siña ha bira i hinasson taotao parehu yan i neñgkanno' ni ha nana'i minetgot i tataotao. Sen magahet i fuetsan tinayuyot parehu magahet-ña yan i para u dokko' i atdao agupa' gi ega'an.

Estague' i sigundo punto: Yañggen para ta ekspirensia i minetgot-ña i tinayuyot debi di ta petsigi ya muñga hit mampara. Pot ehemplo, en hahasso si Moises anai mananayuyot ha estitira kannai-ña hulo' ya yumayas. Anai yumayas ahe' ti pumara sino ki ha kontinua sa' ma'ayuda gue' ni dos taotao magogo'te i kannai-ña hulo'.

Ginen ha sañgani yo' un estudiante na pot i finanaguen nana-ña na ti pumara gue' manayuyot durante anai te'o'ok i problema-ña. Ilek-ña na kumontrata siha yan si nana-ña na kada oga'an para u fakmata i dos gi 6:00 para u fanayuyot sinko minutos kada kuat gi kuatton-ñiha. Despues umamotsa i dos ya i nana humanao macho'cho', ya i patgon humanao umeskuela. I patgon ha sañgan na inayuda gue' para u kontinua manayuyot sa' pot i ha tuñgo' na mientras mananayuyot gue' gi kuatto-ña si nana-ña lokkue' mananayuyot gi kuatto-ña.

Pot los uttimu, esta ta tuñgo' na metgot i tinayuyot. Lao yañggen para ta kusecha i minetgot-ña debi di ta fanmesñgon manmanayuyot ya muñga hit mampara. Ni tampoko ti debi di ta ekspekta insigidas hafa ta tatayuyot. Siempre ha' manmana'i hit ni ta tatayuyot gi manera yan tiempo ni malago'-ña si Yu'os.

Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-ña, yan i Espiritu Santo. Amen.

YAÑGGEN PARA TA NA'TUNAS I LINA'LA'-TA October 28, 2001

I Ebañghelio ni maproklama pa'go guini gi XXX Dameñggo gi otdinario na tiempo, Añu C, machuchule' ginen i tinige' San Lucas, Kapitulu 18. Guiya este i ha sañgan si Jesukristo na fina' akomparasion pot i dos lahi ni humanao para u fanayuyot gi templo.

Este na Ebañghelio i ta huñgok maproklama pa'go ha sañgañgani hit mas ki pot i para ta fanhumitde ha'. Ha sañgañgani, hagu yan guahu, na guaha taddoñg minalago'-ta para ta fanmakonsidera na mantunas hit. "Dos lahi humanao hulo' para i templo para u fanayuyot." Hayi para matayuyuti? Sa' hafa na humanao i dos? Guaha siha rason na manhahanao i taotao para i gima'yu'os - guaha ayu i pot kustumbre, guaha pot obligasion, guaha pot nisisidat. Lao gi entre todu este siha, i mas yahululo' na rason, sa' gaige gi korason todu i taotao i minalago' na para u fanmakonsidera na mantunas siha gi me'nan Yu'os. Taya' taotao malago' para u tailayi lina'la'-ña. Maseha taimanu lina'la'-ta, maseha hafa ta chocho'gue, manmalago' hit na u tunas i lina'la'-ta. Manmalago' hit na u aprueba si Yu'os i bidada-ta, yan para ta fanma'onra ni otro taotao, yan para ta alok na huñggan magahet maolek bidada-ta.

28

Ha sen tuñgo' si Jesukristo na gaige este na minalago' giya hita - i para ta fanmakonsidera na mantunas hit. Todu i taotao manmalago' ni este, kon todu i mangaige gi halom templo yan i mangaige gi sanhiyoñg. Yañggen ta tuñgo' na guaha bida-ta tailayi ti siña ha na'fanmaigo' hit gi pueñgi. Ta chocho'gue kaunto i siña para ta na'tunas i baban bida-ta. Guaha na taotao humahanao para i dokton ulu, ya meggai na biahi na maninayuda ginen i probleman-ñiha. Guaha ayu i manmachocho'cho' kuanto i siña para u fanmeleffa ni baban che'cho'-ñiha. Gi taiguini na taya' tiempon-ñiha para u mali'e' hafa siha na klasen taotao.

Este i dos lahi machagi i rilihion para u masatba i probleman-ñiha. Humanao i dos para i templo para u fanayuyot. I unu ti inayuda achokka' gaige gue' gi halom templo. Ha diñgu i templo parerehu ha' gue' yan antes. Ti matulaika i lina'la'-ña. Lao i otro humanao para i gima'-ña ha siesiente gi korason-ña na ma'asi'e' i isao-ña o sino mana'tunas i lina'la'-ña. Guiya este ha sodda' ayu i todos hit umaliligao - i para ta tuñgo' na esta mana'fangasgas hit, ya pa'go siña ta alok na mantunas hit. Este na desehu i mas taddoñg na desehu ni gaige gi korason kada unu giya hita.

Lao debi di ta gof adahi hit sa' guaha na biahi na ta usa i ti dinanche para ta na'maolek siniente-ta. Guaha na biahi na ta fa'rason i ta chocho'gue. Guaha na biahi na ilek-ta na ta chocho'gue hafa na ti dinanche sa' pot i guaha minaolek para u huyoñg. Este bidada-ña i botlacheru pat sino ayu i umu'usa i ice. Ha tuñgo' na guaha bisio-ña na ti siña inaksepta ni konsensian-ña komu maolek - entonses mama'tinas rason pot i para u maneska. Gumigimen gue' sa' magof ya malago' para u selebra, pat sino mumaneneska sa' tristi ya malago' para u magof. Mumaneneska sa' metbiosu ya ha nisisita na u trankilu, o sino mumaneneska sa' baba sinientete-ña ya malago' para u pasifiku. Lao para hafa ta puni, mumaneneska gue' sa' ti siña pumara. Mumaneneska gue' sa' malañgon-atkohot gue', lao ti siña ha atmiti na malañgon-atkohot gue' sa' na'mamahlao, entonses ha u'usa este siha na rason para u lipa i minamahlao.

Estague' unu mas takpapa' ni guaha nai ta usa para ta siente na tunas lina'la'-ta. Ayu i para ta alok na sen maolek bida-ta achokka' ti sen maolek. Estague' bida-ña este i Fariseo. Ilek-ña, "Umayuyunat yo' dos biahi gi simana. Mannana'i yo' limosna para i templo." Huñggan maolek este na bida-ña. Sin duda, ha cho'gue este siha yan guaha mas. Lao kinondena gue' as Jesukristo, ahe' ti pot i ti ha chocho'gue i minalago' Jesukristo, lao pot i kontento ha' gue' gi didide' na minaolek ni ha chocho'gue ya ti malago' para u umenta mas. Yañggen malago' hao para todu i tiempo un apruereba i bida-mu achokka' hafa, estague' para un cho'gue. Fama'tinas rilihion-mu ni ayu ha' siha i ti manmappot manmadalalaki ya siempre un kumple chumo'gue i didide'.

Estague' otro mas libianu para un cho'gue. "Hu nana'i hao grasia, O Yu'os, sa' ti parehu yo' yan i pumalu siha na taotao ni manhasupak, manfafá'baba, manadottério - pat taiguini i taotao kontribusion." Atan ha' fan i uriya-mu ya un li'e' ayu i mas tákpapa' moralidat-ña ki hagu; akompara hao yan guiya sa' siempre maolek-ña moralidat-mu ki guiya.

Kumeke ilek-hu, yañggen hagu ha' para un aprueban maisa hao, ti u nina'tunas i lina'la'-mu. Sa' ti mappot para ta fa'baban maisa hit ya ta na'atlibes i minagahet.

I otro punto, debi di ta fanma'asi'i ni baban bida-ta para ta fanunas. Este i taotao kontribusion tumohge gi chago' ya hokkok ha' ilek-ña, "O Yu'os, gaima'ase' nu guahu, ni i'isao." Guiya este mana'tunas sa' ha atmiti na i'isao gue'.

Yañggen para ta fanmadeklara na manunas hit, debi di u guaha inafa'maolek. Estague' kumeke ilek-ña inasi'i. Inasi'i ti kumeke ilek-ña na mafunas i lastron isao. Inafa'maolek, hokkok ha' kumeke ilek-ña na tuma'lo tatte i mayulañg na relasion hagu yan guahu pat hagu yan Yu'os. Estague' malago'-ña este i taotao kontribusion; malago' gue' para u tunas o sino para u afá'maolek yan si Yu'os.

Pot los uttimu, ginen hu huñgok un estoria pot un patgon ni ha hasñgon ha' ti umosge si nana-ña. Pot este na kalañg mumaneñgheñg i relasion-ña yan nana-ña. Ti ha tuñgo' hafa para u cho'gue lao i patgon malago' na para u ta'lo tatte i maolek na relasion-ña yan si nana-ña. Entonses ha na'gasgas yan ha arekla i kuatto-ña sin u matago'. Ha agañg si nana-ña para u li'e'. Chumalek si nana-ña lao gagaige ha' i

29

pininiti gi mata-ña. Humanao mamfe' flores i patgon ya ha na'i si nana-ña. Ilek-ña i nana, si yu'os ma'ase', lao gagaige ha' i pininiti gi mata-ña. Pot los uttimu ginen hihiyoñg gi gima' i patgon masahalom yan kala'o i gapot ilu-ña, aplacha' i fasu-ña, ha tugoñg si nana-ña ya ha toktok gue' ya ilek-ña, "Nana, mañotsot yo'." Chumalek i nana ya sumuha i pininiti ginen i ha'i-ña ya sen magof i dos.

Estague' para ta cho'gue yañggen añglo' i espiritu-ta. Ta alok, "O Yu'os, gaima'ase' nu guahu, ni i'isao." Estague' kumeke ilek-ña ma'asi'i - estague' kumeke ilek-ña inafa'maolek. "... este na taotao humanao guatu gi gima'-ña umamigu yan Yu'os", kon todu hita siña manaiguini.

Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-ña, yan i Espiritu Santo. Amen.

FANAÑGOKKO GI OTRO TAOTAO November 04, 2001

I Ebañghelio ni ta huñgok maproklama pa'go guini gi XXXI Dameñggo gi otdinario na tiempo, añu C, machuchule' ginen i tinige' San Lucas, Kapitulu 19:1-10. Guiya este na Ebañghelio anai ma'akusa si Jesukristo pot ha fa'amigu-ña si Zaqueo, i taotao kontribusion.

Ti suguru yo' hafa dinanche - Kao meggaiña na che'cho' kriminat manmasusesedi pa'go na tiempo ki antes, pat sino parehu ha' minegaiña pa'go yan antes lao pot i mas a'annok i che'cho' kriminat pa'go na tiempo sa' manmatutuge' gi gaseta yan mana'annok gi television? Antes anai taya' gaseta yan television tinataka' tiempo para ta huñgok hafa masusedi guini giya Saipan, pat Luta, pat Tinian. Lao pa'go ta lili'e' insigidas gi television yan ta tataitai gi gaseta i che'cho' kriminat guini gi tano'-ta.

Este siha na mala-bida ta e'ega' kada dia. Pot enao na estague' un kuestion ni siña ta faisen maisa hit: Komu Mangilisyanu, hafa sinientete-ta pot este siha? Ahe' ti hu fafaisen hamyo hafa bidada-ta para ta satba este siha na problema. Lao malago' yo' hu faisen hamyo kao guaha bidada-ña este siha na che'cho' kriminat kontra hita? Ripara ha' sa' ha afefekta i lina'la'-mu yan i lina'la'-hu este siha na che'cho' kriminat. Hagu manapapasi hao mas tax para u fanma'apasi i polisia, yan i kotte. Hagu mamadesi sa' masakenguan ni salape'-mu, yan i dandan-mu, yan i iyo-mu television. Hagu mamadesi sa' mana'lamen tataotao-mu. Siña ha' unu giya hita pa'go mismo na momento masakekenguan i kosas-ta gi gima'-ta. Lao guaha siña mas maliñgu-ta ki este siha i kosas. I mas tailayi ni siña masusedi giya hagu yan guahu era i para u faliñgu inañgokko'-ta gi otro taotao.

Muñga na u masusedi este giya hita. Pot no u masusedi este maolek ta kandalu ni atdaba i korason-ta yan hinasso-ta ya muñga na u faliñgu i inañgokko-ta gi otro taotao. Este i Ebañghelio ni ta hñgok maproklama pa'go klaru na si Jesukristo metgot inañgokko-ña gi otro taotao. Estaba na maloloffan si Jesukristo giya Jerico na siuda guaguaguato Jerusalen, lao sumugo' un ratu para u atiende un taotao ni ti ma'añgokko yan madespreresia. Ti hu tuñgo' kao guaha hineñgge-ña si Zaqueo as Yu'os. Lao hu tuñgo' na si Jesukristo guaha inañgokko-ña as Zaqueo, ya este na inañgokko-ña tumulaika un chattao na taotao-tax para un geftao na ayudanten i mamopble.

Ha tuñgo'ña si Jesukristo i hinasson taotao ki hagu yan guahu. Ha sen tuñgo' na dakon yan tailayi i korason taotao, lao taya' nai maliñgu inañgokko-ña gi taotao. Ya hagu yan guahu ta sen nisisita para u ina hit este na ehemplo-ña. Este na estorian Zaqueo ha sañgañgani hit, "fanañgokko gi otro taotao."

Fanañgokko gi otro taotao sa' ti todu enao binaba-ña. I taotao siha giya Jerico hokkok ha' lini'e'-ñiñiha as Zaqueo komu digeru na taotao-tax, ya huñggan magahet didide' mandinanche siha. Siguru na guaha na biahi na dumigeru gue'. Annok este gi ineppe-ña as Jesukristo. Lao hafa esta monhayan ha cho'gue i taotao yan hafa humuyoñg-ña lamitaha ha' enao gi minagahet. Lao ti kumeke ilek-ña na taya' otro minaolek siña ha cho'gue enao na taotao. Estague' i rason na taya' nai maliñgu inañgokko'-ña si

30

Jesukristo gi otro taotao. Si Jesukristo ha lili'e' i tailayi ni esta ha cho'gue i taotao lao ha lili'e ha' lokkue' hafa na minaolek siña ha cho'gue.

Si Zaqueo ti todu ayu binaba-ña ni malili'e' gue' ni taotao Jerico. Ni tampoko ti siña na hita para ta kondena i taotao Jerico na todu enao binaban-ñiha. Ti hu komprende hafa kumeke ilek-ña i Ebañghelio anai ha sañgan na, "Todu i taotao siha ni lumi'e' este matutuhon mangoñggoñg." Ti hu tuñgo' hafa este kumeke ilek-ña, lao siguru yo' na ti todu i taotao Jerico mansen tai konsiderasion ha' yan todu enao chinatli'e'-ñiha ni prohimu. Ti hu hoñgge na taiguini este na soñgsoñg chinatli'e'-ñiha, ni tampoko ti hu hoñgge na taiguini lokkue' binaba-ta ni taotao Sankattan na Marianas sa' pot i guaha siha manailayi manmasusesedi guini.

Ma'ase' si Yu'os ya muñga hit mamoddoñg gi ayu na klase i uma'alok na todu politisian mandakon, i polisia mampikaru, i kometsiante mandigeru yan taya' otro makonsidedera na siha ha' mafakikike'. Yañggen ha sañgan este i taotao, ahe' ti ha u'usa i ilu-ña sino ki guaha lalalolo'-ña ni politisian, ni polisia, pat i kometsiante. Sa' ta sen tuñgo' ha' na meggai politisian manonesto, polisia mandibotu, yan kometsiante ni mansen yo'ase'.

Maila' ya ta na'fakpo' este na kuentos-ta ya ta alok: Huñggan guaha nai manlachi ya ta cho'gue che'cho' kriminat. I linachen taotao sesso ta egga' gi television. Lao manmaleleffa hit na este siha na taotao i manmasasañgan na macho'gue che'cho' kriminat manmachocho'cho' duru para i familian-ñiha, ma'apapasi i diben-ñiha, yan i tax-ñiha, yan manmanlimomosna para masupotta i gima'yu'os-ñiha. Estague' i difirensia - i che'cho' kriminat ha' masasañgan gi television ya hassan na masasañgan pot i manmaolek siha na bidan i prohimu. Pues maila' ya hita ta na'balansa. Ti todu enao binaban-ñiha i taotao, parehu ha' unu pat katdumi. Hahasso na todu i kriminat siña ha' siha mañaonao komu famagu'on Yu'os. Hahasso lokkue' na mayot patte gi todu i taotao siha manmaolek yan manunas.

Si yu'os ma'ase' ni atension-miyu yan adios asta otro simana. Si Yu'os en fambinendisi, i Tata +, yan i Lahi-ña +, yan i Espiritu Santo +. Amen.

MAILA' YA TA FANONESTO November 11, 2001

I Ebañghelio ni ta huñgok maproklama pa'go gi XXXII Dameñggo gi otdinario na tiempo, añu C, machuchule' ginen i tinige' San Lucas, Kapitulu 20:27-38. Guiya este pot un bi'uda ni ha asagua siette na mañe'lo.

Este na Ebañghelio ha sañgañgani hit na ta nisisita na ta fanonesto yañggen mañguentos hit pot rilihion. Este ha' na manera nai siña guaha relasion-ta yan Yu'os. Si Yu'os ha tuñgo' hit kabales - ha tuñgo' hayi hit, ha tuñgo' hafa ta chocho'gue, yan sa' hafa na ta chocho'gue. Este i rason na kalañg ti komprendiyon este na Ebañghelio i ta huñgok maproklama. Guiya este pot un grupon taotao ni manma'a'agañg Saduceo ni manmatto gi as Jesukristo para u mafaisen gue' un kuestion pot resureksion. Na'manman sa' este na taotague ti mahoñgge pot i resureksion. Lao gi magahet ti manmanespipiha ineppe pot i kuestion-ñiha; hokkok ha' malago'-ñiha para u maprueba un punto. Manmalago' siha para u mana'mamahlao si Jesukristo yañggen ti siña ha oppe i kuestion-ñiha.

Lao manlachi siha. Ripara ha' sa' ti nina'bubu si Jesukristo ni kuestion-ñiha. Klaru ha oppe siha direktamente, lao ti ha cho'gue ni hafa para u tulaika i lina'la'-ñiha. Sa' i espirituat na probleman-ñiha ahe' ti pot i ti matuñgo' i ineppen i kuestion-ñiha; hokkok ha' pot i ti manonesto siha. Ti makomprende i minagahet sa' mahuchom i hinasson-ñiha.

Estague' un leksion ni siña ta chule' ginen i Sadeceo, era para ta fanonesto. Para ta fanonesto gi lina'la'-ta, para ta fanonesto yañggen mañguentos hit yan Yu'os, para ta fanonesto i mas prisisu. Taya' balen-

31

ñiha i pumalu yañggen ti manonesto hit. Ni si Jesukristo ti siña ha ayuda hit solu ta baba korason-ta para ta risibi i guinaiya-ña yan ta baba i hinasso-ta para ta aksepta i minagahet-ña. Pot enao na kombieni na ta fanonesto.

Maila' ya tatutuhon gi taiguini. Nihi ya ta fanonesta ya ta atmiti na meggai ti ta tuñgo' pot este na lina'la'. Estague' ti macho'gue ni Saduceo. Manmatto gi as Jesukristo, lao taya' bali-ña i finatton-ñiha. Mañguentos yan i Saina lao taya' probechon-ñiha, sa' ti manmatto siha para u maketuñgo' i minagahet. Esta manchetton siha gi klasen lina'la'-ñiha, yan mahuchom i hinasson-ñiha ya mana'siña manmatto gi me'nan Jesukristo sin u fanmamaisen onesto na kuestion. Manna'ma'se' siha.

Buente ni ñgai'an nai u guaha opottunidat-ta guini na lina'la' para ta fankombetsasion yan i Saina taiguihi anai lala'la' gue', lao hu diseseha na guaha siha manmaolek na kuesiton para ta faisen gue' pot este na lina'la'. Hu diseseha na ta atmiti na guaha siha ti ta tuñgo' pot este na lina'la', ya ta diseseha na ta faisen i kuestion-ta yañggen manmatto hit gi me'na-ña.

Ti na'mamahlao para ta atmiti na guaha siha ti ta tuñgo' pot este na lina'la'. En lugat unu este gi mambonitu na misterion este na lina'la'. Yañggen ta tuñgo' hafa para humuyoñgña todu i kinalamten este na tano' pues siempre mata'pañg i lina'la' sa' taya' sinisedi para u hoñgañg hit. Lao ayu na boninito i lina'la' sa' guaha ta nanañgga ni ti ta tuñgo' hafa para humuyoñg-ña.

Ginen ume'ega' ham television yan un amigu-hu pale' pot un estoria. Guiya esta ginen ha egga' este na estoria. Entonses durante anai ume'egga' ham sigi ha sañgani yo' hafa siha para u fanmasusedi. Pot i mamahlao ha' yo' na ti hu sañgani na mas yahu yañggen guahu mismo para bai ekspirensia ayu i para masusedi ni ti hu tuñgo'.

Si Yu'os mas tomtom ki este. Ha sen tuñgo' todu i estorian lina'la' desde i tutuhon asta i finakpo' lao ti ha sañgañgani hit kon tiempo hafa para u masusedi nu hagu yan guahu. Ha sotta ha' para hita ta ekspirensia ya ginen enao nai mas magof siempre siniente-ta. Grasias a dios na meggai ti ta tuñgo' pot este na lina'la' ya ginen enao na mas na'magof siniente-ta yañggen manmasusedi. Pues maila' ya ta atmiti na guaha siha ti ta tuñgo' pot este na lina'la'.

Estague' i otro punto. Maila' ya ta fanonesto ya ta fanmamaisen ni dinanche na kuestion.

Kalañg mabotlea i Saina ni Saduceo ni este na finaisen-ñiha na kuestion. Un palao'an bumi'uda ni siette na mañe'lo, pues para mafaisen gue', "Entonses hayi gai'ásagua gue' gi ha'anen resureksion?" Hafa na diferensia kao hayi gue' gai'ásagua? Hayi prisisu? Hafa este na kuestion ha sañgañgani hit pot pa'go na lina'la'?

Estague' un estoria ni masusedi gi seminario ya ni ñgai'an na u maleffa ayu na estudiante ni este na sinisedi. Dos na pisara estaba guenao ya ha tuge' i profesot i fine'na na kuestion i sensura gi unu yan i sigundo gi otro. Despues ha sañgani i estudiante na siha para ma'oppe i kuestion siha gi primet pisara ya i sigundo pisara para i sigiente na grupon estudiante. Despues di ha sañgan este i profesot ha diñgu kuatto. Un estudiante atrasao matto ya ti ha huñgok i esplikasion ya ha oppe kabales i kuestion siha lao ti ha pasa i sensura. Ha oppe i kuestion gi lachi na pisara.

Gi tutuhon magof i estudiante, lao despues ilek-ña na pa'go nai ha tuñgo' un impottante na leksion: Ti nahoñg para ta tuñgo' i dinanche na ineppe; debi lokkue' di ta faisen i dinanche na kuestion. Siña ha' dinanche todu i ineppe-mu ni kuestion lao ti un pasa i sensuran lina'la'. Manu nai siña mañgganna yo' meggai na salape'? Huñggan impottante este na kuestion, lao ti este mas yahululo'. Meggai na taotao ma'oppe este dinanche lao miserapble ti mapasa i sensuran lina'la'. Hafa taimanu para bai gosa kuanto i siña na minagof? Taya' binaba-ña mumagof. Lao ayu siha i minagof ha' mas mana'yahululo' ti mapasa i sensuran lina'la'.

32

Pot los uttimu, debi di ta potfia este na impottante na asunto ya ta faisen maisa hit ni este na kuesiton. Hayi yo'? Hafa na gaige yo' guini na tano'? Para manu yo' guatu? Estague' siha manimpottante na asunto. Este siha manimpottante na kuestion. Na'siriosu hao yan onesto ya un faisen maisa hao ni este siha, ya siempre un tutuhon chumogue' i maolek para i lina'la'-mu.

Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-ña yan i Espiritu Santo. Amen.

BASTA CHATHINASSO

November 18, 2001

I Ebañghélio ni ta huñgok maproklama pa'go gi XXXIII Dameñggo gi otdinario na tiempo, añu C, machuchule' ginen i tinige' San Lucas, Kapitulu 21. Guiya este na Ebañghelio anai ha predikta si Jesukristo i madestrosan i templo.

Este na Ebañghélio ha sañgani hit pot meggai na problema. Ha presenta gi me'na-ta i manna'luhan yan ayu siha i ti mansiguru hit pot i lina'la'. Si Jesukristo mismo sumañgan este siha, sa' ha prepapara i mandisipulu-ña para este siha na achaki yan pinadesi ni sen siguru na para u fanmasusedi.

Fine'na, ha profesia si Jesukristo i madestrosan i templo. Mansen inestotba i mandisipulu ni este. Siklo yan siklo esta desde ki tumacho i templo ya dañgkulo siknifikasion-ña este gi lina'la' i Manjudios. Este muna'á'annok i gumaigen Yu'os gi entalo'-ñiha. Para i mandisipulo i templo nai gaige i inañgokkon-ñiha komu nasion. Ya estague' na ilelek-ña si Jesukristo na enteru este siha para u fanmayulañg papa', ya ti este ha'. Ilek-ña lokkue' na para u ma'ekspirensia gera, yan linao, yan ha'ilas, yan pinetsigi. Despues gotpe durante este siha na profesia pot destrosu, ha na'i siha ni este na akonsehu: "Lao gof komprende este ya cha'-miyu fanchachathinasso..."

Sesso taiguini bida-ña si Jesukristo yañggen mamana'gue gue'. Ha sen tuñgo' na guaha na biahi nai makkat i lina'la', ya klaru ha sasañgan. Lao ha sen tuñgo' lokkue' na dañgkulo na dañu bidada-ña yañggen manchathinasso hit. Mas dañgkulo na dañu bidada-ña para i lina'la' i chathinasso ki todu i gera yan i linao mana'fandaña'. Pot este na ha prepapara si Jesukristo i mandisipulu-ña para u mafana' ha' i problema, yan kon todu i chathinasso.

Hita lokkue' ta nisisita este na leksion. Mamparehu hit ha' yan i mandisipulo mantaotao. Lahyan na taotao manmamaigo' an pueñgi ya manmakmamata ya gagaige ha' i chathinasson-ñiha. Hita lokkue' ta nisisita tumuñgo' taimanu para ta maneha i chathinasso. Estague' siha ha sañgañgani hit este na ebañghelio.

Fine'na, debi di ta batga hit gi inadahen Yu'os. Ilek-ña si Jesukristo ni mandisipulu-ña na ni unu gi gapot ulon-ñiha u dimalas. Hafa kumeke ilek-ña ni este? Kao ha prometi siha na ti para u fanchetnudan? Ahe'. Meggai gi ayu siha i humuñgok gue' manmakastiga, yan manmapresu, yan manmapuno' pot guiya.

Ahe', ti ha prometi si Jesukristo i taotao-ña para u famprinotehi ginen i achaki. Ha prometi siha para u nina'fanmetgot durante i achaki. Ni unu na gapot ulo u dimalas kumeke ilek-ña taya', ni sikiera finatai, u á'ñao hit yañggen manmanañgokko hit giya guiya. I taotao ni fitme hineñgge-ña metgotña gue' ki todu i probleman este na lina'la'. Pot enao na otro biahi yañggen chathinasso hao, hasso na si Yu'os ha adadahi hit kada unu.

Sigundo, debi di ta komprende na taya' bali-ña para ta fanchathinasso ni ayu siha i ti siña ta tulaika. Ti siña ta na'para i gera yan ti siña ta na'mahñao i linao. Ni ti todu i lina'la'-ta siña ta maneha. Guaha siha kosas manmafatto gi lina'la'-ta sin malago'-ta. Pues taya' bali-ña para ta fancháthinasso pot este siha. Para u na'fanmatan-bihu yan biha ha' hit este siha.

33

Taya' mas maolek ta cho'gue ta fanmanayuyot yañggen manmatto este siha: "Asaina, na'i yo' minatatñga para bai tulaika hafa siña hu tulaika, pinasensia para bai aksepta i ti siña hu tulaika, yan tinemtom para bai tuñgo' i difirensia."

Tetset, debi di ta fana' pa'go i probleman pa'go, ya po'lo ha' i probleman agupa' asta agupa'. Ha sañgani si Jesukristo i mandisipulu-ña na guaha giya siha para u fanmakotte gi me'nan manrai, yan maga'lahi, ya este nai ilek-ña, "... cha'-miyu fanchacháthinasso kao hafa para en sañgan, sa' guahu bai hu na'i hamyo ni palabras yan minalate'..." Kumeke ilek-ña nihi ya ta fana' i problema pa'go, pa'go; ya i probleman agupa', agupa'.

Pot los uttimu, ta akudi fine'na ayu i mas impottante na problema. Ha sañgani si Jesukristo i mandisipulu-ña na meggai na probleman-ñiha u fanmatto sa' pot guiya. Ilek-ña, "Todu siempre chumatli'e' hamyo pot guahu..." Este na sinañgan-ña i Saina para u faninayuda pot i probleman chathinasso; sa' mamaleffan ñaihon i nisisidat-ñiha pot i Saina.

Este na sinañgan siña ha ayuda kada unu giya hita. Gi hinasso-ku, meggai na probleman chathinasso manmafatto giya hita sa' pot i hita ha' ta hasson mamaisa. Siguru yo' na siempre manmagoñg meggai chathinasso-ta yañggen manmaleffan ñaihon hit ni hita mismo ya ta konsidera i nisisidat i prohimu. Yañggen ta cho'gue kuanto i siña na empeñu para ta kumple i minalago'-ña i Saina - para ta na'fañocho i manñalang, para ta konsuela i mantristi, para ta ekuñgok i problema-ña i pininiti - pues siempre manmaleffa hit ni chathinassoso-ta.

Ilek-ña si Jesukristo gi Setmon-ña gi Ekso, "Espiha fine'na i rainon Yu'os yan todu i tininas-ña." Yañggen ta cho'gue este na finana'gue-ña pues siempre todu i muna'fanchachathinasso hit manareklao gi sagan-ñiha.

Si yu'os ma'ase' ni atension-miyu yan adios asta otro simana. Si Yu'os en fambinendisi, i Tata, + yan i Lahi-ña, yan i + Espiritu Santo. + Amen.

CHA’MU YIYITE’ I SEPBLA July 04, 2002

I Ebanghelio ni maproklama pa’go guini gi XVIII Damenggo gi Otdinario na tiempo machuchule’ ginen i tinige’ San Mateo, Kapitulu 14:13-21. Guiya este na Ebanghelio anai ha na’fañocho gi Jesukristo i sinko mit na taotao. Para ta komprende i leksion guini na Ebanghelio maila’ ya ta ekungok este un ratu.

En hahasso gi unos kuantos años maloffan manmasangani hit na didide’ esta laña gaige gi tano’? Matto chiña gi manmasangani hit na esta ti apmam hokkok i laña gi tano. Durante ayu siha na ha’ani manmasangani hit munga madespetdisia i laña, i pitolio, i gasolina, etc. Entonses, i taotao siha matutuhon mampayon para mana’utas este siha. Matutuhon manmafa’tinas mandikike’ na kareta, manmafa’tinas makina ni nina’lala’la’ ni ininan i atdao, pat sino elektrisida ginen i tasi.

Lao pa’go na tiempo manmasangangani hit na bula laña gi tano’. Estaba manfifila hit para ta fanmamahan gasolina, lao pa’go mana’acha’ikak i manmambebende gasolina para ta fahan i gasolinan-ñiha en lugat di i gasolinan otro.

I difirensia gi antes yan pa’go era i presion gasolina. Pa’go na tiempo i kompanian gasolina mas baratu, meggai yan chaddek siña mafa’tinas. Lao puedi ha’ ti u matulaika i mambayon-ta muna’utas i gasolina. Puedi ti ta fana’lo tatte guihi na tiempo anai meggai ta despetdidisia mas ki i ta nisisita.

34

Este na Ebanghelio i ta hungok maproklama ha sangangani hit pot un tiempo anai taya’, ya despues abondansia. Estaba guenao sinko na pan yan dos pidason guihan. Yanggen ta akompara este yan i kantidan taotao ni manestaba guenao kalan mohon taya’. Lao ha bendisi si Jesukristo, ya ha ipe’, ya ha muttiplika; ya antes di u fonhayan, todos manhaspok. Ya anai manmonhayan mañocho, mana’bula dosse na kanastra ni ngatnan.

I mas na’manman ni masusedi guini na milagro ahe’ ti pot i ha muttiplika i pan yan i guihan. Lao pot i ha na’fanmarikohi i sepbla. Este i marikohen i sepbla siña ta komprende. Ni unu giya hita siña mama’tinas milagro para u muttiplika i pan yan i guihan, lao kada unu giya hita siña ta rikohi i sepbla.

Este na milagro anai ha na’fañocho si Jesukristo i sinko mit matuge' gi todu i kuatro na Ebanghelio. Ya todu i kuatro na ebanghelista sumangan na manmarekohi i sepbla. Pues siña ta alok na guaha guini ha keke sangani hit si Jesukristo. Mamparehu na kondision nai mangaige hit yan este na taotao siha gi estoria. Ginen i fuetsan Yu’os manmana’i siha abondansia na nengkanno’. Hita lokkue’ manmana’i hit abondansia na nengkanno’. Ahe’ ti mama’tinas si Yu’os milagro para u na’fañocho’ hit, lao sin imbatgo siña ta alok milagro. Ni unu giya hita siña muna’dokko i pigas pat i nappa. Ti hita pumo’lo i laña gi papa’ tano’. Ti hita fuma’tinas i atdao ni ha na'fanmamaipe hit. Si Yu’os chumocho’gue este siha. Hokkok ha’ para ta cho’gue para ta na’i si Yu’os ni ko’operasion-ta kosa ki siña u guaguaha ha’ este siha para usu-ta.

Estague’ bidan-ñiha i taotao siha guini na estoria. Kalan mohon si Jesukristo mento guini na dangkulon piknik. Ti ta tungo’ taimanu bida-ña para u na’fanhaspok ayu siha na taotao. Lao i taotao siha mana’i gue’ ni ko’operasion-ñiha ya todu mannahong mañocho.

Hita lokkue’ siña ta cho’gue taiguini. Sigun gi ayu siha i umestutudia i rikesan i tano’ ilek-ñiha na nahong guinaha-ña i tano’ para u kubre i nisisidat todu i taotao siha, lao debi di ta fanko’operatibu yan si Yu’os ya ta na’fanmañagi i pumalu ni guinaha-ta. Lao hinasso-ku achokka’ abundansia i tano’ guinaha, ti nahong para u fanmañagi i taotao siha yanggen ta despetdidisia meggai. Ti todos hit siña manla’la’ parehu yanggen guaha na taotao malago’ mas ki ha nisisita. Yanggen guaha hao mas ki un nisisita ya un despetdidisia i ti un nisisita, pues kumeke ilek-ña na guaha taotao siempre ti nahong para u la’la’. Yanggen para ta fanhita manla’la’ guini na tano, debi di ta fampayon ya munga madespetdisia i grasian Yu’os. Estague’ gof dinanche na sinangan i manamko’. Yanggen guaha sopbla nengkanno’ gi platu-ta ilek-ña si nana-ta "munga madespetdisia i grasian Yu’os." Ti siña na para ta sigi ha’ manmanyute’ kosas; ni ngai’an nai u na’hong i pumalu na taotao.

Fuera di kosas materiat yan nengkanno’, sasaonao guini espirituat. Baba para ta despetdisia maseha hafa, ahe’ ti pot i ta chulele’guan otro taotao ni para guiya, lao inefefekta i taotao ni despetdisiao. Hahasso na si Jesukristo tumago’ i taotao siha para u marikohi i sepbla. Ahe’ ti na’manman este; ti siña ta alok na si Jesukristo para u yute i bendision ni matto ginen as Tata-ña. Yanggen ha cho’gue este pues kalan ti ha agradesi i tinayuyot-ña agradesimiento.

Guaha nai un ripara kustumbre-ña i patgon ni matgradisidu yan ambiento sa’ pot taya’ nai guaha fatta-ña? Enao na patgon taya’ ha agradisi yan ti ha tungo’ hafa kumeke ilek-ña gaikosas. Sa’ hafa na para u adahi i kosas-ña siha? Todu i tiempo manlisto i nisisidat-ña siha. Todu i tiempo gagaige si nana-ña, si tata-ña yan i muchacha para i masetbe gue’ gigon guaha ha nisisita.

Guaha nai hu li’e’ un patgon ni ume’ega television. Anai ma’ho ha agang i muchacha para u chinili’e’ gimen-ña ginen i ice box. Malago’ chumocho, ha tago’ i muchacha para u nina’i fina’mames. Ti este umestotba yo’. Lao gi kada ha tago’ i muchacha ni un biahe ni ilek-ña, pot fabot, pat sino si yu’os ma’ase. Ya i mañaina-ña ti mafanana’gue este na patgon-ñiha para u guaha didide’ edukasion-ña yan respetu-ña i patgon-ñiha. Na’mase’.

Siguru yo’ na guaha un tungo’ taiguini na famagu’on ni manmasesetbe todu i nisisidat-ñiha kalan prinsipe. Siha este achokka’ u madespetdisia meggai ti u fanñalang. Lao ripara ha’ sa’ manñalang espiriton-ñiha achokka’ mandangkulo kalan famagugu’on ha’ siha.

35

Ti taiguenao si Jesukristo na patgon para as Yu’os Tata-ña, ya ti para u sedi i mandisipulu-ña, era hita, para ta fanaiguenao na klase. Ha na’siguguru na i mandisipulu-ña ti mandespetdisiao. Hita lokkue’ debi di ta fanaiguini, gi hita ha’ na maisa, gi familia-ta, yan gi sengsong-ta. Yanggen ti ta cho’gue taiguini pues ni ngai’an nai ta fanto’a gi espirituat na banda.

Pot los uttimu, ti ha sangani hit i Ebanghelio hafa macho’gue ni sepbla despues di manmarikohi. Lao siguru na manmachule’ para i gima’-ñiha para u fañocho ayu siha i manaigue guihi na inetnon. Siguru na enao intension-ña si Jesukristo. Ha hongge si Jesukristo na taya’ mas maolek para u ma’usa i sepbla ki para u mana’fanmañagi otro taotao. Guaha giya hita trabiha ti ta komprerende este. Ta u’usa yan ta gagasta i kosas este na tano’ mas ki i ta nisisita. Ta despetdidisia mas ki nisisidat un taotao para luma’la’. Siguru na ti nina’mamagof i Saina ni este. Ti malago’ i Saina para ta fanmandespetdisia, kosa ki siña ta na’fañagi i prohimu, kosa ki taya’ u ñalang, kosa ki ta famparehu yan guiya.

Si yu’os ma’ase ni atension-miyu yan adios as otro simana. Si Yu’os en fambinendisi, i + Tata, yan i Lahi-ña, yan i Espiritu Santo. Amen.

HAFA YAYAS-ANTI? July 07, 2002

Pa'go i XIV Damenggo gi Otdinario na tiempo, añu A. I Ebanghelio machuchule' ginen i tinige' San Mateo, kapitulu 11:25-30. Guiya este anai ilek-ña si Jesukristo, "I katga ni para bai po'lo gi hilo'-miyu ñahlalang." Para ta komprende este na sinangan-ña, maila' ya ta ekungok este un ratu.

Yanggen klaru i puengi falak huyong ya un talak hilo', ya siempre un li'e' miyon na puti'on. Ngaha' hulo' un ratu ya siempre un ripara na guaha gi entre ayu siha na puti'on mas ma'lak ki otro. Kalang mohon mas manlamlam ki otro. Parehu ha' yan i Biblia. Siña ta alok guaha sinangan mas lamlam, mas bonitu ki otro.

Unu gi este siha na sinangan ta hungok maproklama pa'go na Ebanghelio. Estaba si Jesukristo na ha kuentutusi un grupon taotao ni manmachocho'cho' duru yan ma'u'uma manmakkat na katga. Kalan mohon ha siesiente i yinayas-ñiha. Machocho'gue kuanto i nina'siñan-ñiha, lao kalan taya' adelanto. Nina'fanyayayas siha ni lina'la'. Ha sangani este siha na taotao: "Fanmamaila' giya guahu todos hamyo ni manyayas yan mankatgadu, ya guahu bai na'fandeskansa hamyo. Chile' i yugu-hu ya en ima gi apagan-miyu ya en fanmanungo' ginen guahu, sa' kariñosu yan humitde i korason-hu. I anten-miyu siempre u fanmañodda' deskansu. Sa' i yugu-hu ni para bai na'i hamyo ti mappot, ya i katga ni para bai po'lo gi hilo'-miyu ñahlalang." Este siha na palabras mas na'magof para u mahungok ni manyayas na taotao. Lao lastima sa' ti ta atietiende este siha na palabras.

I. Maila' ya ta tutuhon taiguini. Nihi ya ta atmiti na hita mantinitika' ni este na sinangan. Para hafa ta puni guaha na biahi na ta siente na ha na'fanyayayas hit i lina'la'. Ahe' ti pot i manmachocho'cho' ha' hit todu i dia ya manyayas hit gi uttimon i ha'ani. Guaha mas siriosu ki este. Guaha na biahi na mannge' siniente-ta yanggen manyayas hit. Yanggen duru hao macho'cho', despues matto hao gi gima'-miyu ya un tungo' na maolek bida-mu, un rialisa na un na'guahahayi i familia-mu ni nisisidat-ñiha, despues umo'mak hao ya mata'chong hao gi me'nan i television yan i familia-mu, mannge' enao na klasen yayas.

Otro klasi gaige gi hinasso-ña si Jesukristo. Kumuekuentos gue' pot yinayas ante, ayu na klasen yinayas ni ti siña nina'magong achokka' maigo' hao, pat sino humanao hao bumakasion. Guaha nai ta hungok i amigu-ta ha sangani hit na esta apmam di todu i tiempo yayayas ha' gue'. Humanao para i hospitat ya mariseta lao ilek-ña i dokto na taya' chetnot-ña.

Este na klasen yinayas gaige gi hinasso-ña si Jesukrislto - ayu na klasen yinayas ni mafatto gi titanos-ta yan gi espiritu-ta, ahe' ti i gigat-ta yan i te'lang-ta ha'. Ayu na klasen yinayas yanggen ilek-ña i taotao esta tinife' gue'.

36

II. Entonses, hafa para ta cho'gue? Guaha ha' na taotao siempre ilek-ña nu hita na'laduru ha' che'cho'-mu. Hunggan guaha na biahi na maolek este na akonsehu para unos kuantos taotao. Lao yanggen yayas sanhalom-ña i taotao ahe' ti este na akonsehu ha nisisita. Manguekuentos hit guini pot yinayas ni mas taddong. Kalan ta sangangani i taotao para guiya mismo u guaifi i layak i boti-ña. Ahe' ti ta sangangani gue' para u na'laduru che'cho'-ña. Ta sangangani gue' na ha nisisita nuebu na fuetsa.

Yanggen hokkok gasolina gi kareta-mu, kao para un chonnek, pat para un batsala; pat sino para un na'yiyi gasolina. Yanggen yayas tataotao-mu, deskansa didide', gimen hanom, chocho didide', ya un kontinua i che'cho'-mu. Lao hafa para u cho'gue i taotao yanggen i anti-ña yayas? Manu nai para u fañule' minetgot para u nina'i fuetsa ta'lo i lina'la'-ña?

III. Pot este na rason na ha kombibida hit si Jesukristo anai ilek-ña, "Fanmamaila' giya guahu ... uma i yugu-hu ... fanmanungo' ginen guahu ... ya i anten-miyu siempre manmañodda' deskansu."

Fino' Jesukristo este siha, ya kalan mohon ti fahongge para u sangan taiguini. Ha sangani i taotao siha ni manyayas, ni mankatgadu, maila' ya ta fanhita umuma i katga-ku. Gi tiempon Jesukristo yugu kumeke ilek-ña makkat na katga. Ga'ga' manmayuyugu para u mahalla i aladu yan i kareta. Ya estague' si Jesukristo na ha sangangani i manyayas na taotao na yangen ma'uma i yugu-ña ya ma'ayuda gue' humalla i katga-ña, u fanmañodda' deskansu. Kalan ti dinanche este na sinangan. Lao meggai na taotao siña mantestigu na sen magahet este na sinangan-ña i Saina.

I mas impottante gi sinangan-ña si Jesukristo anai ilek-ña, "fanmanungo' ginen guahu". Ahe' ti fabulas di chispas este; hokkok ha' ilelek-ña chagi tumungo' hafa hu keke sangan. Si Jesukristo mana'uma ni che'cho' Yu'os Tata, ya i katga-ña era i para u ayuda otro taotao siha umuma i katgan-ñiha. Ya pa'go estague' na ha sangangani hit na yanggen ta tungo' umuma ayu i katga-ña, siempre manmañodda' hit deskanso. Kalan ti mappot, no? Lao inayuda si Jesukristo, ya maninayuyuda otro taotao siha.

Ahe' ti fabulas rilihion este. Hokkok ha' kumeke ilek-ña na yanggen ta na'daña' i lina'la'-ta yan i che'cho' Yu'os, ha nana'i hit nuebu na rason para ta fanla'la'. Ya yanggen un tutuhon manayuda otro taotao ni katgan-ñiha, siempre un siente na ti gof makkat i katga-mu mismo, ya guaha na biahi na maleffa hao enteramente ni minakkat i katga-mu.

Ginen hu hungok un estoria pot i tutuhon i Alcoholic Anonymous (inetnon manmañotsot na mambotlacheru). Ti hu tungo' kao magahet este lao en fin estague' i hiningok-hu. Dos lahi marialisa na botlacheru siha. Maripara na siriosu este na probleman-ñiha para siha mismo yan i familian-ñiha ya debi di u para. Madisidi para u ma'ayuda otro mambotlacheru. Entonses humanao i dos ya matutuhon makuentusi otro mambotlacheru.

Despues di un añu umasodda' ta'lo ya kalan desganao i dos. Taya' ni unu gi asodda'-ñiha mampara manmaneska. Lao un añu maloffan ya ti mumaneska i dos sa' tinane' manayuda otro taotao. Mientras manayuyuda otro taotao, ma'ayudan mamaisa siha. Gi hinasso-ku estague' kumeke ilek-ña si Jesukristo anai ha sangan, "i yugu-hu ni para bai na'i hamyo ti mappot, ya i katga ni para bai po'lo gi hilo-miyu ñahlalang."

Pot los uttimu yanggen un siente na nina'yayayas hao ni lina'la', taya' mas maolek para u ñahlalang i katga-mu, tutuhon manayuda otro taotao ni katgan-ñiha. Meggai na taotao esta machogue' este ya maninayuda gi katgan-ñiha. Anai ma'uma i katgan i Saina ya matutuhon ma'ayuda si Jesukristo para u ayuda otro taotao, masodda' deskanso para i anten-ñiha.

Si yu'os ma'ase' ni atension-miyui yan adios asta otro simana. Si Yu'os en fambinendisi, i Tata, yan i + Lahi-ña, yan i Espiritu Santo. Amen.

37

TAIMANU USASA-TA NI MINAGHET? July 14, 2002

Pa'go i XV Damenggo gi Otdinario na tiempo, añu A. I Ebanghelio machuchule' ginen i tinige' San Mateo, kaputilu 13:1-9. Guiya este na Ebanghelio pot i mañañatpe simiya na lancheru. Maseha hafa ta fana'an este na fina'akomparasion, unu ha' kumeke ilek-ña, era taimanu usasa-ta ni minagahet.

Gi tiempon Jesukristo, yan kon todu pa'go gi mandikike' na lancherias, machocho'gue este ni kannai-ñiha i taotao. Siguru na meggai na biahi na ha li'e' si Jesukrsito macho'gue este. Ya ha ripara na kuatro kosas masusesedi ni granon simiya mientra masasatpe.

Guaha mamoddong gi chalan taotao gi linderu. Ya pot i mahettok, ti siña i hale' ha dulok i edda'; pues ti apmam mankinanno' ni paluma. Guaha simiya mamoddong gi halom acho' anai ñatata i edda'. Este siha na simiya madokko' chaddek. Lao ñatata nai mangaige i hale' siha ya anai mumaipe i ininan i semnak manmalayu ya manmatai. Otro simiya mamoddong gi halom kilitis. Mandokko este siha, lao uttimoña manniñikot ni kilitis. Pot los uttimu, guaha granon simiya mamoddong gi maolek na odda' ya meppa' tinekcha'-ñiha.

Estague' i estoria sigun gi sinangan i Saina; ya despues ginen este na ha esplika taimanu i taotao para u dalalaki i Ebanghelio. Yanggen ti ta gof ripara siña ha' ilek-ta na ha sasangan si Jesukristo guini pot kuatro difirentes na taotao. Lao siguru yo' na ti taiguini kumeke ilek-ña. Ni unu giya hita taiguini ta chocho'gue. Lao humahallom yo' na este na estoria era pot hagu yan pot guahu yan taimanu bidada-ta ni minaghaet ni manmaffato giya hita ginen as Yu'os. Bes in kuando, guaha nai ta li'e' este i kuatro na klasen odda' gi lina'la'-ta.

I. Maila' ya ta tutuhon gi edda' ni gaige gi chalan taotao gi linderu. Mahettok i edda' sa' sesso magacha', ya ti siña dinilok ni hale'. Sesso taiguini bida-ta ni minagahet. Ta huchom hinasso-ta ya ti ta sedi na u halom i minagahet gi korason-ta. Pot ehemplo, i dokto siña ha sangani hit hafa chetnot-ta ya siña ha amte antes di u mas addet, lao manma'añao hit tumungo' hafa chetnot-ta pues ti manali'e' hit yan i dokto. Yanggen manmalangu hit, taya' mas maolek para ta cho'gue ta fana' i minagahet kuanto i siña na chinaddek.

Parehu ha' este na i probleman moralidat yan espirituat. Kuantos tiempo ta puni na isao i para ta trata tailayi i taotao sa' pot i otro rasa-ña pat otro relihion-ña. Ta tungo' ha todu i tiempo na isao este lao ti manmalago' hit ta fana' i minagahet.

II. Maila' ya ta atan i mina' dos - ayu na simiya i mamoddong gi halom acho'. Ti taddong na odda' gaige gi hilo' acho'. Mandokko' insigidas i simiya ya ti siña masungon i minaipen i atdao. Ilek-ña si Jesukristo na este na taotague ayu i umaksepta i minaghet fine'na, lao ma'abandona anai maripara na ti meggai na taotao prumaktitika, ya debi di u guaha tinilaika gi lina'la'-ñiha yanggen para mapraktika este na minagahet. Lao manma'añao matulaika siha sa' siempre nina'fan chasaga.

III. I mina' tres, ayu i mamoddong gi halom kilitis. Manmanhale' insigida, mandokko', manla'la' un ratu; lao pot los uttimu manniñikok ni kilitis. Este ha represesenta ayu siha na minaghet ni manchinennek huyong ginen i lina'la'-ta ni otra kosas siha ni ti mampos manimpottante. Siña ta alok siha este na mañaina ayu i ti ma'aprobecha para u fanhihot yan i famagu'on-ñiha anai mandidikike'. Lao atrasao sa' mandangkulo i famagu'on esta.

IV. Pot los uttimu, guaha siha simiya manmoddong gi maolek na odda' ya meggai produkton-ñiha. Estague' debi di u cho'gue i minagahet ni mafatto ginen as Yu'os. I minagahet ni mafatto ginen as Yu'os, ahe' ti idea ha' gi ilu-ta; sino ki simiya ni matanme gi korason-ta. Ha po'lo si Yu'os este na minagahet gi korason-ta para u fanokcha' maolek. I lancheru siempre sinangani hao na ti siña hao mangosecha sin un

38

mapot. I kusecha, hunggan, nubenta-i-sinko-pot-siento depende gi atdao, gi edda', gi simiya, yan gi ichan. Lao gof impottante i sinko pot siente ni debi di u cho'gue i lancheru. Sin i che'cho' i lancheru, siempre taya' produkto.

Pues parehu este yan i lina'la'-mu yan i lina'la'-hu. Sesso si Yu'os ha satpe simiyan minagahet gi korason-ta. Lao ni ngai'an nai u guaha produkto solu manmappot hit didide' ya ta cho'gue i tareha-ta.

Pues maila' ya ta cho'gue pa'go na ha'ani ayu i magahet yan tunas. Ahe' ti manna'manman na cho'cho' sino ki hokkok ha' pot i manmagahet. Cho'cho' tat komu yine'ase, guinaiya, yan para ma'ayuda i na'mase'. Prikura este siha. Ripasa, yan riega ya siempre un li'e' na dumadangkulo. Taiguini para ta fana' i minagahet. Ya siña ha' nina'manman hao yanggen mandangkulo na kusecha manmatto giya hagu.

Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-ña, yan i Espiritu Santo. Amen.

MESKLAO I MAOLEK YAN I BABA July 21, 2002

Pa’go i XVI Damenggo gi otdinario na tiempo, añu A. I Ebanghelio machuchule’ ginen i tinige’ San Mateo Kapitulu 13:24-30. Guiya este na Ebanghelio pot i tinanom trigu yan i cha’guan.

Mangof na’manman i estoria siha ni ha u’usa si Jesukristo. Mankadada’ yan ti manmappot, lao mansen taddong na minagahet ha fanana’gue. Pot ehemplo este na Ebanghelio i ta hungok maproklama pa’go. Gi unos kuantos palabras ha sangan i Saina un minagahet pot i probleman este na lina’la’.

Estague’ i estoria. Un lancheru humanao para i gualo’ ya mananme trigu. Despues, gi tatalo’ puengi, un taotao ni chumatli’e’ gue’ matto gi et mismo gualo’ ya mananme cha’guan. Anai ha tutuhon manto’a i trigu, manannok lokkue’ i cha’guen gi entalo’-ñiha. Nina’fanmanman i tentago’ pot este ya mafaisen i lancheru para u maripasa. Lao mansinangani siha para u mapo’lo ha’ asta i tiempon kosecha; guenao nai u mamanoho i cha’guan ya u masongge ya i trigu u mapo’lo gi dipositu.

Anai ha usa si Jesukristo este na fina’akomparasion, ha sasangan pot i kinalamten i tano’. Ha sangangani hit na manlala’la’ hit guini na tano’ ni dumadaña’ i maolek yan i baba, ya para u sigi ha’ taiguini asta i hinekkok i tano’. Lao hu tungo’ lokkue’ na yanggen hu taitai este na estoria, hu lilie’ hao yan guahu. Este na estoria, ahe’ ti kalan bintana ni ta a’atan huyong i tano’, lao kalan espehos lokkue’ ni ta atan mamaisa hit.

Estague’ i primet punto ni malago’ yo’ ta sangan. Ti meggai na estoria siña ta usa para ta li’e’ klaro i lina’la’ taotao guini na tano’, ki este na estorian i trigu yan i cha’guan ni manchagigo mandokko gi gualo’. Para ta prueba este, hokkok ha’ para ta cho’gue era para ta atan i lina’la’ ni mangaige hit. Maila’ ta po’lonñaihon gi un banda todu i hinasso-ta ya ta atan maisa hit. Hafa ta li’e’ guenao? Todu klasen kosas – guaha maolek, guaha baba; guaha dinanche, guaha lache; guaha metgot guaha ti dange’. Ti guailaye ta dingu i gualo’-ta - i korason-ta, sa’ guenao manchachagigo mandokko’ i trigu yan i cha’guan.

Lamayot patte giya hita ta popo’lo na manmaolek hit na taotao. Ya hunggan, guaha minagahet-ña este, lao para hafa ta puni, guaha otro patte giya hita. Ti siña ta sangan gi publiku, ti na’banidosu, lao ta sen tungo’ na gaige. Guaha na biahi na sin rason manmata’pang hit, guaha na manchattao hit, guaha na manbenggatibu hit. Despues ilek-ta, hekkua dai hafa gumuaifi yo’ ya malingu hinasso-ku.

39

Guini nai ta lili’e’ na guaha dos patte giya hita. Gi halom kada korason gaige guenao ayu i siña mumaolek yan siña bumaba. Guaha nai ta hungok, "Sen maolek ayu na taotao mientras ti lalalalo’." Kada unu giya hita mas tumungo’ pot i maolek yan i baba na kustumbre-ta.

Yanggen un taitai i Biblia ya un espiha este na punto gi kada taotao siempre un sodda’. Guaha na biahi na mappot para ta hongge na pusipble este i dos kustumbre para u gaige gi un taotao gi et mismo tiempo. Pot ehemplo, gi un pahina ta hungok si Simon Pedro ilek-ña, "Asaina, bai dalalaki hao achokka’ para bai mapresu pat para bai matai. Guse’ña bai matai ki bai niega hao." Despues gi sigiente pahina ta taitai et mismo Simon Pedro ha na’mamaipe kannai-ña gi guafi ilek-ña, "Si Jesus, hayi enao, ti hu tungo’ hafa un sasangan." Despues chumatfino’ ya ha kontinua, "Bai sangani hao, taya’ nai hu li’e’ enao na taotao." Dumadaña’ i trigu yan i cha’guan guini gi gualo’ Simon Pedro.

Siña i taotao grasiosu yan gatbo. Siña ha’ lokkue’ i taotao mata’pang yan tailayi. Ginen hu taitai gi lepblo pot un zoo (ayu anai manmae’e’ga’ difirentes klasen ga’ga’) ni mapo’lo un tankat ni machom i tres banda, matuge’ gi sanhilo’: "I Mas Piligro na Ga’ga’ gi Tano." Yanggen umemberekeru i bisita ya tumalak halom, hokkok ha’ para u li’e’ i figura-ña gi espehos.

Estague’ siha i minagahet pot hita ni taotao. Manmatuge’ este siha papa’ gi estorian i tano’. Manmasangan este siha gi Biblia; yan ta sen tungo’ ginen i ekspirensian kada unu giya hita. Yanggen ta atan i tano’ ta lili’e’ na kumompitetensia i maolek yan i tailayi. Hita ilek-ta na manmaolek hit. Ayu i chumocho’gue i tailayi ilek-ta na mambaba. Lao yanggen ta gof atituyi ya ta atan todu i dos banda siempre ta li’e’ na guaha maolek yan guaha tailayi giya hita, yan guaha lokkue’ maolek yan guaha tailayi giya siha. Todos hit manmesklao. Kada korason taotao kalan un gualo’ ni guaha trigu yan kon todu cha’guan ni manchachala’la’ parehu.

Estague’ i mina’dos punto ni para ta sangan. Pa’go ni esta ta li’e’ este na minagahet, hafa para ta cho’gue? Pot lo menos: Ha sangangani hit si Jesukristo para ta na’fampasensia hit gi otro taotao yan kon todu hita mismo. Ahe’, ti para ta fanhanao ya ta funas todu i manailayi na taotao. Este malago’-ñiha i tentago para u macho’gue guihi gi gualo’, para u mabo’ok i cha’guan. Lao mansinangani siha ni lancheru para u fanmaleffa ni este na malago’-ñiha, sa’ piligru na u machahalle’ i trigu yan i cha’guan. Uma’achule’ este i trigu yan guaha na cha’guan, yan gof akkiot na mandodokko ya kalan imposible para un distinge unu kontra i otro. Yanggen para ta funas i manailayi na taotao, amanu nai para ta tutuhon yan ngai’an nai para ta famara. Estague’ i kuestion ni unu giya hita siña umoppe.

Pues estague’ para ta cho’gue, era i para ta fana’ i minagahet pot hita yan pot otro taotao siha. Ahe’, ti para ta alok na sen maolek ha’ i taotao, pat sino para ta alok na sen baba ha’ i taotao. Todos hit ni taotao mani’isao, este ti siña ta niega. Todos hit ni taotao siña mañantos; este debi di ta hongge.

Ha tungo’ña si Jesukristo ki hita i tailayi na bidada-ña i taotao. Ha tungo’ hafa i tailayi siña ha cho’gue. I tailayi klumaba gue’ gi kilu’os. Lao taya’ nai pumara i Saina ha hongge na i taotao siña mañotsot. Ya pot i hinenggen-ña ni este umaposta ni lina’la’-ña mismo. Pot enao na yanggen manmatenta hit para basta hit umangokko i taotao, hokkok ha’ para ta cho’gue, ta atan i kilu’os anai uma’akalaye’ i Saina. Taya’ nai malingu inangokko-ña ni taotao siha. Ha ayuyuda yo’ para bai sigi ha’ umangokko i taotao siha guini gi tano’. Lao sobre todu, ha ayuyuda yo’ umangokkon maisa yo’.

Si yu’os ma’ase’ ni atension-miyu yan adios asta otro simana. Si Yu’os en fambinendisi, i + Tata, yan i Lahi-ña, yan i Espiritu Santo. Amen.

40

TAYA’ DIBATDE GUINI GI TANO’ July 28, 2002

Pa’go i XVII Damenggo gi Otdinario na tiempo, añu A. I Ebanghelio machuchule’ ginen i tinige’ San Mateo, kapitulu 13:44-52. Guiya este na Ebanghelio anai si Jesukristo ha akompara i rainon i langet yan un guaguan na alahas ni mahafot gi fangualuan ya despues sinedda’ ni un taotao. Para ta komprende este na sinangan-ña i Saina, maila’ ya ta ekungok este un ratu.

Sesso ta hungok masangan na dibatde ha’ i ospitat giya Honolulu para i taotao Sankanttan na Marianas. Siña ha’ ti manapasi hao, lao guaha otro para u inapasi. Yanggen guaha iyo-mu health insurance siempre enao para u inapasi. Yanggen taya’, pues siempre hagu mismo pat sino i gobietnon Sankattan na Marianas para u inapasi. Lao kao magahet na guaha dibatde guini gi tano’? Ilek-ña i pa’a’, o sino i sinangan i Español, si Yu’os ha sangani todu i taotao este na mensahi: "Chule’, maseha hafa na kosas ni malago’-mu. Chule’, lao apasi." Sigun gi ekspirensia-ta gof klaru na ti magahet este na sinangan. Pot ehemplo ti todu i malago’-ta na kosas para ta risibi. Guaha siha mansen taddong na tinangan i korason-ta ya ni ngai’an na u fanmatto giya hita. Fuera di este, manmafatto gi lina’la’-ta ayu siha na kosas i ti ta tatanga na u fanmatto. Ya maseha ti manmalago’ hit siempre ha’ ta aksepta. Este na lina’la’ ha nana’i hit lokkue’ otra kosas siha ni manmatai ha’ hit papa’ ya ni nungka nai siña ta apasi. Lao gi talolo’ gi lina’la’-ta mangaige ayu siha na kosas i hita para ta ayek. Ya todu i ta ayek guini siha na kosas guaha presion-ñiha. Debi di ta apasi. Gi este na punto na hunggan magahet ayu i sinangan i Español. "Chule’, maseha hafa na kosas ni malago’-mu. Chule’, lao apasi.

Ha sangan si Jesukristo pot este na asunto gi lina’la’-ta gi pa’go na Ebanghelio. Ilek-ña, "I Rainon i langet siña ma’akompara yan un guaguan na alahas ni mahafot gi fangualu’an ya despues sinedda’ ni un taotao. Ha na’na’ di nuebu, ya gi minagof-ña humanao ya ha bende todu i guinaha-ña, ya ha fahan enao na gualo’." Este na klasen estoria sesso masusedi gi lugat duranten i tiempon Jesukristo. Taya’ guihi na tiempo banko o sino kahan-lulok anai siña mana’asigurao i alahas-ñiha. Pues sesso di manmahafot gi tano’. Ya guaha na biahi nai pot finatai o sino hafa na desgrasia ti machule’ tatte i alahas. Guaha na biahi na mesis o sino sakkan manmaloffan asta ki guaha manguaddok ya masuette sa’ ha sodda’. Estague’ masusedi guini na fina’akomparasion i Saina. Un taotao ni manalaladu guenao na gualo’ aksidente ha guaddok este i mahafot na alahas. Humanao este na taotao ya ha bende todu i guinaha-ña, pot i para u fahan este na rikesa.

Hafa punto-ña este na fina’akomparasion? I intension-ña guini i Saina, ahe’ ti para u fana’gue hit taimanu bumisnes. Ta sen tungo’ ha’ klaru na ti dinanche bida-ña este na taotao. Malago’ gue’ para u fahan este na tano’ sa’ ha tungo’ ha’ na mas guaguan ki i presio ni ma’ofresi gue’. Lao ahe’ ti este punto-ña i Saina. Yanggen malago’ hao para un tungo’ hafa taimanu bumisnes gasgas pues taitai i setmon-ña i Saina gi sabana. Este nai ha sangani hit na debi di ta fanonesto gi relasion-ta yan otro taotao. Guini nai ha sangangani hit i Saina na este na lina’la’ uma’chule’ yan i che’cho’ kometsiante gi bisnes. I taotao ni bumibisnes mamamahan kosas pot i para u bende yan mama’titinas kontrata. Taya’ dibatde gi bisnes. Yanggen guaha malago’-mu una kosa debi di un fahan o sino un tulaika yan otro guinaha-mu nai siña un chule’ ayu na malago’-mu. Parehu ha’ yan este na lina’la’.

Meggai hu tungo’ lalahi yan famalao’an ni mansen magof ni assaguan-ñiha. Mansen aguaiya siha yan taddong i inangokkon-ñiha kada unu. I gima’-ñiha kalan un dikike’ na langet guini gi tano’. Yanggen manyayas, i gima’-ñiha nai trankilu mandeskansa. Yanggen mampiniti, masosoda’ minagof gi gima’-ñiha. Yanggen mandesganao, masosodda’ guenao i minetgot-ñiha. Yanggen manmahalang, guenao nai manmakonsuesuela. Ni manu nai siña un sodda’ este na klasen ginefsaga. Lao ripara ha’ sa’ ti dibatde este siha. Este na lalahi yan famalao’an ni gumogosa este na klasen minagof gi taiguini na guma’, meggai mapunen mamaisa siha. Pot ehemplo, este na lalahi siha ti manlibre siha para u sigi ha’ manmama’sotteru ya para u sigi ha’ manmanespiha otro famalao’an. Kon todu este siha na famalao’an esta ti manlibre siha manmama’sottera para u fanmanaksepta otro lalahi. Este siha na lalahi yan

41

famalao’an esta madisidi para unu ha’ guinaiyan-ñiha. Siña ta alok na mafahan i minagof-ñiha ginen i mapunen maisa siha.

Taigue este na klasen minagof gi ayu siha na lalahi yan famalao’an i esta manassagua lao sigi ha’ manmanespiha otro tane’-ñiha. Ti trankilu i hinasson-ñiha. Ti chetton i guinayan-ñiha gi asaguan-ñiha sa’ guaha tumatane siha. Este na lalahi yan famalao’an ti u machogue’ todu i nina’siñan-ñiha para i familian-ñiha sa’ guaha umestototba konsensian-ñiha. Yanggen manyayas, ti siña masodda’ gi gima’-ñiha trankilu na deskanso. Yanggen mampiniti, mappot masosoda’ minagof gi gima’-ñiha. Yanggen mandesganao ti u masodda’ guenao i minetgot-ñiha. Yanggen manmahalang, mappot guenao manmakonsuela.

Pot los uttimu, maila fan ya ta gof ripara este na sinangan. Yanggen ti un sahguaniyi betsa-mu pues ni kuanto ya un cho’cho’ taya’ para un sodda’. Taya’ dibatde guini gi tano’.

Si yu’os ma’ase’ ni atension-miyu yan adios asta otro simana. Si Yu’os en fambinendisi, i + Tata, yan i Lahi-ña yan i Espiritu Santo. Amen.

ASUNSION MANA'KAHULO' SI SANTA MARIA GI LANGET

August 08, 2002

Ta selelebra pa’go i gipot Mana’kahulo’-ña si Santa Maria gi Langet, mas matungo’-ña, Asunsion. Desde hagas na tiempo, i taotao Susupe, guini giya Saipan, mayaya’ho komu patron-ñiha este i Asunsion. Entonses, siempre guaha lukao Santa Maria desde i Katedrat parao guatu gi social hall giya Susupe gi finakpo’ i Misan 6:00 gi ega’an. Depotsi Agosto 15 este na gupot lao pot i para kombinienten i taotao ta transfiere para Damenggo.

Anai si Santo Papa Pio XII ha deklara este na Dottrinan Gima'yu’os, Mana'kahulo' si Santa Maria gi Langet, estague' ilek-ña: "I Imaculada na Nanan Yu'os, i siempre bithen as Maria, anai mohayan i lina'la'-ña guini na tano', makonne' tataotao yan ante para i glorian i langet." Ripara ha' sa' gi sinangan-ña i Santo Papa ha ripiti Imaculada Concepcion, Nanan Yu'os, yan siempre bithen. Mana'kahulo' gue' gi langet si Santa Maria sa' ha kakatga este i tres na mandangkulon titulu. Maila' ya ta atituyi taddong unu guini gi tres, i Imaculada Concepcion.

"Hayi hao? Ilek-ña si Bernadita Soubirous ni palao'an ni umannok gi un fina'liyang gi un songsong giya Francia ni ma'a'agang Lourdes. Ya i palao'an manoppe, "Guahu i Imaculada Concepcion."

Enao na ineppe muna' bula problema-ña si Bernadita anai ha sangani i manma'gas i gima'yu'os pot i lini'e'-ña. Ilek-ñiha i manobispo yan i mamale' na i imaculada concepcion dottrinan gima'yu'os, ahe' ti na'an palao'an. Parehu yan i dottrinan i gima'yu'os, I Mana'kahulo'-ña gi langet - ya si Santa Maria debi di u tungo' i difirensia. Lao si Bernadita (ni ta o'onra gue' pa'go komu santa) ti malago' ha tulaika hafa hiningok-ña.

Lao hafa mohon este i imaculada concepcion kumeke ilek-ña?

Este kumeke ilek-ña na gi anai pa'go mama'taotao si Santa Maria gi halom tiyan nana-ña as Santa Isabel, ti inette gue' ni manchan i isao orihinat, ya pot enao na taigue gi as Santa Maria i inagang para u cho'gue i tailayi. Siña ta alok na i isao orihinat muna'fatto gi taotao siha ayu na klasen siniente i kalan mohon ha e'eppok hit para ta cho'gue i tailayi. Ayu na klasen siniente ni gaige giya hita ni kalan mohon

42

mumumu i tataotao yan i espiritu. Taiguihi i ha sangan si San Pablo na guaha nai ta cho'gue ayu i ti manmalago' hit na ta cho'gue.

Si Santa Maria mafañagu gue' libre ginen este i inagang para u cho'gue i tailayi, ti matto giya guiya ayu na siniente i kalan mumumu i maolek yan i tailayi. Taya' nai matto giya guiya ayu i para u ayek kao i malago'-ña pat i minalago' Yu'os para u cho'gue. Todu i tiempo i minalago' Yu'os ha' malago'-ña para u cho'gue. Enao mina' siña ta alok na si Santa Maria i mas prefekto gi todu siha i fina'tinas Yu'os, guiya i mas yahululo' yan i mas maolek na modelon taotao ni ha fa'tinas si Yu'os.

Lao ahe' ti kumeke ilek-ña este na taya' problema-ña si Santa Maria. Sa' patte gi taotao depotsi i para u guaha problema-ña, ya ahe' ti resuttan i isao orihinat i para u guaha problema-ña i taotao. Kumeke ilek-ña na achokka' ti matto gi as Santa Maria i isao orihinat debi ha' gue' di u cho'gue i che'cho'-ña yan i obligasion-ña siha, siña ha' gue' mamadesi putin nifen, pat manilek-ulu. Lao estague' nai mandifirensiao hit yan si Santa Maria. Todu i manmasusedi gi as Santa Maria dumadaña' yan i minalago' Yu'os. Lao hita ni manmafañagu yan i isao orihinat guaha nai ta cho'gue ayu i ti yaña si Yu'os.

Ahe' ti si Santa Maria dumisidi na ti para u mancha gue' ni isao orihinat. Ahe, ti guiya plumanuyi na para u mamapotge'ñaihon gi tiyan nana-ña sin i manchan isao orihinat. Ahe', ti ha disidi si Santa Maria antes di u mafañagu na para u bula gue' ni grasian Yu'os. Todu este siha disision Yu’os yan che'cho' Yu’os.

Pot los uttimu, ahe', ti kumeke ilek-ña na ti mama'tinas disision si Santa Maria. Hunggan, mama'tinas gue' disision. Estague' na'manman-ña na guiya umayek yan dumisidi para u santa. Guiya ha aksepta ginen otro para u masatba. Guiya ha ekungok yan ha osge todu i grasia na mana'i gue'. Si Adan yan Eban ti ma'aksepta i grasia; lahyan na mananghet ti ma'aksepta; hita lokkue' ti ta aksepta. I grasia manmanana'i hit lao hita lao kao ta aksepta pat ta richasa, ahe', ti manma'afuefuetsas hit. Ya meggai na biahi nai ta richasa. Estague' kumeke ilek-ña ayu na regalon Yu’os as Santa Maria i para u mamapotge'ñaihon gi tiyan Santa Ana sin isao orihinat.

Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-ña yan i Espiritu Santo. Amen.

I TI FAHONGGE NA BIDA-TA August 18, 2002

Pa'go i XX Damenggo gi Otdinario na Tiempo, Añu A. I Ebanghelio machuchule' ginen i tinige' San Mateo, kapitulu 15:21-28. Guiya este na Ebanghelio anai mamaisen ayudu un palao'an sa' malangu haga-ña, lao ti ineppe as Jesukristo. Siña ha’ ti ta komprende este lao siña manmañule’ hit leksion.

Guaha nai un ekspirensia na hinasso-mu na un sen tungo' este na taotao sa' gof umamigu hamyo, pues guaha ha cho'gue ya nina'sen manman hao? Hinasso-mu na un sen tungo' gue' sa' siña ha' un predikta hafa para u cho'gue yanggen guaha dangkulo achaki-ña. Despues un dia guaha masusedi ya nina'sen manman hao sa' ti fahongge o sino ti un nanangga na ayu chiña para u cho'gue.

Yanggen guaha nai masusedi este nu hagu pues siempre un komprende hafa siniente-ku anai hu hungok pot primet biahe este na Ebanghelio. Guiya este na estoria pot i patgon palao'an ni mana'homlo'. Guaha siha manmasusedi guini na milagron i Saina ni kalan otdinario ha'. Lao guaha patte ni kalan ti fahongge. Hasso este na Ebanghelio ni pa'go ta huhungok, ya siempre un tungo' hafa kumeke ilek-hu.

Manestaba si Jesukristo yan i mandisipulu-ña giya Fenicia na lugat, ni gaige gi kattan Galilea. Anai estaba guenao, matto un palao'an, taotao enao na lugat guatu gi as Jesukristo manespipiha ayudu para i

43

malangu na haga-ña, ya estague' i problema. Guini na momento, kalan mohon ha cho'gue si Jesukristo una kosa ni ti fahongge, sa' ti ta nanangga na taiguini para ineppe-ña ni este na palao'an.

I fine'na bida-ña ti ha atiende i finaisen i palao'an. Ilek-ña gi Ebanghelio, "Lao ti ineppe as Jesus." Para hafa ta puni kalan na'manman para u cho'gue este i Saina. Gi todu i Ebanghelio este ha' si Jesukristo nai mamatkilo' gi me'nan un taotao ni mamamaisen ayudu. Pot enao na humanao i palao'an para i mandisipulu; ya siha manmalak guatu gi as Jesukristo ya masangani gue' para u na'i hafa ginagagao-ña ya u ritira gue'. Guini nai manoppe i Saina, "I matago'-hu para ayu ha' siha i manmalingu na kinilu gi taotao Israel." Pot los uttimu dumimu papa' i palao'an gi adeng Jesukristo ya fehman ha faisen gue', "Asaina, ayuda yo'!" Pues ineppe gue' ni Saina ya ilek-ña, "Ti dinanche para ta chule' i nengkanno' ginen i famagu'on ya ta na'i i ga'lagu."

Hita ta tungo' na na'magof uttimo-ña este na estoria. Pot los uttimu, i Saina ha cho'gue hafa malago'-ña este na palao'an yan ha tuna i taddong na hinengge-ña. Lao taimanu para ta esplika este na problema, i kalan ti guiya guini i Saina. Hafa rason-ña i Saina na ni sikira u oppe i palao'an? Hafa kumeke ilek-ña para u fanmana'i i famagu'on ni na' ga'lago?

Siguru yo' na guiya este i mas na'manman na kuentos i Saina, lao pa'go na ha'ani ahe' ti para ta ketungo' sa' hafa na taiguini sinangan-ña si Jesukristo. Ni guahu ti gof siguru yo' hafa guini i Saina ha keke sangan. Pues maila' ya ta po'lo este para otro biahi lao maila' ya ta usa este na sinisedi para ta eksaminan maisa hit en lugat di para ta eksamina i Saina. Guiya si Jesukristo ta popo'lo sen takkilo'. Taya' defekto giya guiya. Ya hunggan siña ta sangan taiguini. Lao hagu yan guahu kao ta ekspepekta i mas maolek na kustumbre-ta? Kao para ta aksepta gi lina'la'-ta ayu i ti yata gi lina'la'-ña? Mientras ta hahasso este maila' ya ta estudia este na estoria.

I. Maila' ya ta tutuhon gi anai matto i palao'an gi as Jesukristo mamamaisen ayudu ya ti ineppe gue'. Kalan ha estotba hit didide' este. Kalan matto gi siniente-ta na ti taiguini si Jesukristo na klasen taotao - na para ti u atiende un taotao ni guaha nisisidat-ña. Ti hu komprende sa' hafa na mamatkilo ha' i Saina lao maila' ya ta po'lo ha’ este gi un banda.

Estague' malago' yo' para ta diskuti pa'go. Sa' hafa na guaha na biahi na ti ta atiende un taotao ni guaha nisisidat-ña ya matto giya hita. Ta ekspepekta i Saina na debi di u atiende este i palao'an. Ha na'baba siniente-ta anai ta li'e' na ti ha atiende i palao'an. Ya hagu yan guahu? Kao siña un sangan na todu i tiempo un atietiende i gainisisidat yanggen matto giya hagu? Kao guaha direcho-ta para ta dimanda ginen i Saina ayu i hita mismo ti ta chocho'gue? Munga hit manchathinasso pot si Jesukristo. Guiya mas meggai che'chocho'-ña para otro taotao ki hita. Estague' maolek ta cho'gue, ta bisita i malangu na amigu-ta, ya ta na'i didide' salape'-ña ayu i matitek magagu-ña.

II. Maila' pa'go ya ta atan ayu na patte gi Ebanghelio anai ilek-ña si Jesukristo ni mandisipulu-ña, "I matago'-hu para ayu ha' siha i manmalingu na kinilu gi taotao Israel." Guini lokkue' kalan guaha sinangan-ña i Saina ni ha estotba hit. Kalan mohon si Jesukristo ha fabobot mas i taotao Israel ki otro rasan taotao. Kalan mohon ilelek-ña i Saina na ti malago' gue' ha ayuda i palao'an sa' ti Judios gue'. Estague' ta'lo, ti hu tungo' hafa gaige gi hinasso-ña i Saina. Lao gof siguru yo' na ahe' ti ume'eklasi i Saina. Guiya i Saina prumotetehi todu rasan taotao. Estague' i rason na maklaba gue' gi kilu'os ni mismo achataotao-ña.

Munga hit manchathinasso pot i Saina kao ume’eklase gue’. Todu i tiempo ha trarata todu parehu. Lao maolek ta atan maisa i aksion-ta pot este na punto. Ume’eklase hao yanggen ti un trarata parehu i taotao siha. Ta ekspepekta si Jesukristo na u trata parehu todu i taotao, lao kao ta ekspepekta na hita lokkue’ debi di ta trata parehu todu i taotao?

III. Estague' i mina' tres punto. Dumimu papa' i palao'an gi me'nan i Saina ya ilek-ña, "Asaina, ayuda yo'!" Manoppe i Saina, "Ti dinanche para ta chule' i nengkanno' ginen i famagu'on ya ta na'i i ga'lagu." Guiya este i mas na'manman guini na Ebanghelio. Kalan mohon kuentos disatento este lao ta tungo' ha' na ni

44

nungka na disatento i Saina, espesiatmente para este i pepble na palao'an. Ni este ti hu gof komprende hafa siknifikasion-ña na sinangan-ña.

Lao po'lo gi un banda este na problema pot si Jesukristo ya maila' ya hita ta atan maisa hit. Bula gi uriya-ta mandisatento yan mambastos lina'la'-ñiha na taotao. Ekungok ha' yanggen manmakuentusi i taotao hiyong - kalan manmabotlelea - pat sino yanggen manmagotpea i muchacha gi gima'. Yanggen ñatata hinasso-ña i taotao pues ma'te titanos-ña. Todu i tiempo ta fanana'gue i famagu'on-ta para u fanrespetao, para u ma'alok - si yu'os ma'ase' - yanggen guaha chumoguiyi siha fabot. Lao kao guaha nai un ripara hagu mismo yanggen nina’lalalo’ hao ni otro taotao. Guaha na biahi na manhuyong gi pachot-mu ti fahongge na palabras. Este siha para ta suheta, ayu i ta chocho’gue ni kalan ti fahongge.

Si yu’os ma’ase’ ni atension-miyu yan adios asta otro simana. Si Yu’os en fambinendisi, i + Tata, yan i Lahi-ña, yan i Espiritu Santo. Amen.

HAYI HAO GI MAGAHET? August 25, 2002

Pa'go i XXI Damenggo gi Otdinario na tiempo, añu A. I Ebanghelio machuchule' ginen i tinige' San Mateo, kapitulu 16:13-20. Para ta komprende este na Ebanghelio maila' ya ta ekungok este un ratu.

Guaha un huegu ni sesso mahugando ni Americano yanggen mangupot. Guiya este na huegu anai mafafaisen hao kuestion: Yanggen siña hao umottro taotao fuera di hagu, hayi para malago'-mu hao?

Este na kuestion gof interesante sa' ha na'a'annok hafa hit na klasen taotao. Guaha malago' para u riku sa' pot i mampos luluhan ni dibi-ña. Guaha malago' para u bonita sa' ti mankontento ni figuran matan-ñiha. Otro manmalago' ni kustumbren i bisinu sa' manmata'pang kustumbren-ñiha.

Guaha dos na minagahet o rason ni gaige gi kada taotao ya pot enao na manhugagando ni este na klasen huegu. I fine'na na minagahet, sa' pot i taya' nai mansatesfecho hit kabales ni kondision-ta. Kada unu giya hita ta tungo' hafa defekto-ta ni ti ta guaiya. I segundo rason, kada unu giya hita ta lili'e' kualidat gi lina'la' otro taotao ni ta guaiya, ya ha na'fanmalalago' hit.

Lao guaha mina'tres na rason gi este na minagahet na a'annok na sen taya' baliña este na huegu. Estague' ayu na punto, ni ngai'an na u fatto giya hita ayu i ta malagu'i' gi otro taotao. Todu i tiempo gi kada manmakmata hit, hita ha' na maisa ta sosodda' gi hilo' katre, achokka' kuanto malago'-ta na para ta fanotro taotao.

Ti baba i para ta tungo' na guaha giya hita mismo na kualidat ti ta guaiya. Ya guaha lokkue' minaolek-ña i para ta guaiya kualidat gi otro taotao. Lao ti siña na para ta tulaikan maisa hit ya para ta fanmama'otro taotao ni ta diseseha. Hokkok ha' siña ta cho'gue era i para ta ketungo' hayi hit na klasen taotao ya ta cho'gue kuanto i siña para ta fanhuyong taiguenao.

Gi pa'go na Ebanghelio, ilek-ña si Jesus as Simon, o sino San Pedro, "Hagu acho' hao." Lao yanggen un atan maolek hayi si Simon, kaiha parehu gue' yan acho'. Sesso ha tulaika hinasso-ña, impitosu yan mahettok ilu-ña. Guse'ña ta agang gue', "Hagu atgidon hao." Lao si Jesukristo ha atan halom taddong ya guaha mas lini'e'-ña gi as Simon, ya enao na ilek-ña "Hagu acho' hao" - mahettok kalan acho', fitme kalan acho', metgot kalan acho'.

Todu i tiempo taiguini bidada-ña si Jesukristo ni taotao. Taya' nai ha akompara i unu yan otro taotao. Todu i tiempo ha fanunu'i i unu hayi na klasen taotao gue' ya ha ayuyuda gue' para u huyong taiguenao. Taya' nai ilek-ña ni taotao para u na'keparehu gue' yan i otro taotao. Todu i tiempo ha lalaknos ginen i

45

taotao mismo i minaolek ni esta gaige giya guiya mismo. Si Jesukristo dumiskukubre yan ha lalaknos yan ha na'dadangkulo i minaolek taotao ni esta gaige guenao.

Na'magof este para hita. Taya' mas na'piniti na sinisedi i para u malago' i taotao na u fama'otro taotao ni ti guiya. Hafa mohon ya ilek-ña si Jesukristo as Simon, "Debi di un fama'acho'." Siempre nina'desganao si Simon, sa' kumeke ilek-ña na ahe' trabiha ti acho' gue'. Siempre sigi ha adibina taimanu gue' para u fama'acho'. Ya posipble na matai ha' gue' papa' sin u gacha este na malago'-ña.

Gi familia guaha na biahi na ilek-ña i nana, hafa ihu na ti siña hao parehu yan este i che'lu-mu? Gi hinasso-ku ti dinanche este i para un ekspekta na para u parehu i dos patgon. I nana debi di u atan taddong halom hafa na maolek na kualidat gaige gi este i lalache na patgon ya u abiba yan u sangani i lahi-ña ni este na kualidat kosa ki siña i patgon ha li'e' ya u adelanta este na kualidat gi lina'la'-ña.

Ilek-ñiha i dokton ulu, yanggen sigi ha' di un sangani i patgon ni baba-ña pues siempre baba humuyong-ña. Lao yanggen sigi ha' di un sangani gue' ni minaolek-ña siempre maolek uttimo-ña. Hunggan, sesso ha tulaika hinasso-ña si Simon, impitosu yan mahettok ilu-ña. Lao gaige lokkue' gi sanhalom-ña na kalan uma'atok i acho' ya enao ha potfia si Jesukristo para u laknos ginen as Simon. Maseha apmam na tiempo dinira gue' para u mahettok hinengge-ña as Jesukristo lao uttimo-ña enao humuyong-ña, acho'.

Pues yanggen manmalago' hit para ta ketungo' hayi hit na taotao ya taimanu para ta fanaiguenao - para ta diskubre ayu i maolek na kualidat ni esta gaige gi sanhalom-ta ya para ta kriansa enao na kualidat - pues hunggan siña ta cho'gue enao. Todos hit siña ta cho'gue este yanggen ha ayuda hit i Saina.

Pues maila' ya ta ekungok este i otro na klasen huegu. Gi tutuhon este na setmon ta mensiona pot ayu na huegu: Yanggen siña hao umottro taotao fuera di hagu, hayi para malago'-mu hao? Este na huegu siña ha' ha na'fañalek hit, lao imposipble na para u masusedi. Estague' mas maolek na kuestion ta faisen: Hayi hao gi magahet? Gof hasuyi antes di un oppe este.

Yanggen ta faisen si Simon hayi hao gi magahet siempre manoppe, guaha na biahi na hu tulaika hinasso-ku, guaha na impitosu yo', yan mahettok ilu-hu. Ya hunggan magahet guaha nai taiguini gue'. Lao dinanche bida-ña si Jesukristo anai ilek-ña hagu acho' hao. Anai ha hungok este si Simon, hagu acho' hao, ha cho'gue kuanto siña na impeñu i para u huyong taiguenao, ya despues di dos mit años enao ha' matungo'-ña si Simon, guiya i acho'. Gi hilo' este na acho' nai ha kahat si Jesukristo i gima'yu'os-ña.

Lao hagu, hayi hao? Munga maoppe este na kuestion insigidas asta ki un gof hasuyi yan un gasta didide' tiempo yan ayu i mas tumungo' hayi hao ya hinengge hao, era si Jesukristo. Siempre inayuda hao para un diskubre yan para un adelanta hayi hao yan uttimoña para un huyong taiguenao.

Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-ña, yan i Espiritu Santo. Amen.

SIÑA HA’ MARIPITI I KILU’OS September 02, 2002

Este na Ebanghelio ni ta hungok maproklama pa’go guini gi XXII Damenggo gi Otdinario na Tiempo machuchule’ ginen i tinige’ San Mateo, kapitulu 16. Para ta komprende siknifikasion-ña este na Ebanghelio maila’ ya ta ekungok este un ratu.

Gi todu siha i estorian difirentes na relihion ni manma’establesi guini gi hilo’ tano’ taya’ parehu-ña anai maklaba si Jesukristo gi kilu’os. Taya’ fundadot ni ha establesi un dangkulo na relihion ya boluntatmente

46

ha sakrifision maisa i lina’la’-ña yan gotpe i finatai-ña. Ta tataitai gi Biblia na matai naturat si Moises anai siento-benti años idat-ña. Si Buddha matai gue’ gi fi’on i estudiante-ña anai ochenta años gue’. Si Confucius mas di sitenta años anai matai gue’ gi hilo’ katre-ña. Si Mahammed matai gue’ gi kannai i mas kirida-ña na asagua-ña anai sisenta i sinko idat-ña. Si Jesukristo ha’, anai hohoben, ha ayek i chalan ni ha tungo’ ha’ na siempre gotpe yan mahatot para finatai-ña.

Este na Ebanghelio ni maproklama pa’go na Damenggo ha sangani hit pot este. Ha sangani si Jesukristo i mandisipulu-ña na "debi du u hanao para Jerusalen para u famadesi makkat gi kannai i manamko’, yan i manma’gas i mamale’, yan i eskribas, yan para u mapuno’." Ha sangan este guihi na lugat ni ma’a’agang Cesarea Filipo. Gaige este na lugat gi punta gi sankattan gi Tasen Galilea, mas ki sien miyas desde Jerusalen. Siña ha’ sumaga gue’ guenao na lugat sa’ taya’ hafa numanangga gue’ guihi. Hita ta tungo’ ha’ hafa uttimo-ña, maklaba gue’ gi kilu’os.

Lao ti este ha’ uttimoña este na estoria. I kilu’os humuyong mas dangkulo kumeke ilek-ña ki estoria ha’. I antigu na Mangilisyanu mago’te i kilu’os komo siñat i hinenggen-ñiha. Ya kalan na’manman este na u mago’te i kulu’os komo siñat hinenggen-ñiha, sa’ gi tutuhon kalan manmassa’ siha ni kilu’os. Anai si Jesukristo ha sangani i mandisipulu-ña para manu gue’ yan hafa para u masusedi nu guiya, manembeste ya umessalao si Pedro: "Ma’estro, si Yu’os ti u petmiti na u masusedi este giya hagu." Para si Pedro yan i pumalu na mandisipulu ti siña makomprende na i Messias ni nina’hanao Yu’os para u matai gi kilu’os. Ti este gaige gi hinasson-ñiha. Lao este masusedi. Ayu i mayaya’ho Ma’estro yan Saina matai gi kilu’os.

Despues di manmasusedi este siha, i mandisipulu ma’atan tatte ya matutuhon makomprende hafa masusedi. Ha sakrifikan maisa gue’ si Jesukristo pot siha yan pot todu i taotao siha guini gi tano’. Ahe’ ti obligao para u cho’gue este. Siña ha’ ha letke ya ti u matai. Lao boluntariamente ha pokati guatu i chalan para i kilu’os. Este i rason na i gima’yu’os ha ayek i kilu’os para siñat-ña. I kilu’os ha siknififika mas ki komprendiyon na klasen ginefli’e’ desdi i tutuhon i tano’. Este ha’ na klasen ginefli’e’ siña sumatba i tano’ ginen i isao yan i tinailayi.

Un taotao ni ti obligao na u cho’gue una kosa ya ha aksepta para guiya u padesi para ayu siha na taotao ni taya’ direcho-ñiha para u fanmacho’guiyi. Estague’ fundamenton i ki’lu’os. Gof naturat este gi lina’la’ espirituat parehu ha’ na naturat na yanggen guaha poddong pues siempre u hanaópapa’. Ayu i manle’an na taotao siña mali’e’ este. Pot ehemplo si Pale’ Damian humanao para I isla giya Molokai giya Hawaii. I rason na humanao guatu guihi si Pale’, era pot i para u asiste ayu siha i mannina’ye chetnot nasarinu, ya manmadestiladu guatu guenao na isla anai taya’ siña umayuda siha, yan taya’ siña ma’angokko’. Taya’ umafuetsa gue’ para u hanao guatu guihi. Taya’ direchon-ñiha i manmalangu na u fatto guatu guihi si Pale’ para u faninasiste. Hokkok ha’ humanao guatu sa’ bumoluntario gue’. Ya anai ha asisiste siha, nina’ye gue’ ni chetnot nasarinu, ya tres años despues matai gue’ anai trabiha hoben, tat komu kuarenta i ocho años. Ha espehos gue’ si Pale’ Damian gi as Jesukristo gi Ekso Katbario. Gi taiguni ha’ nai siña manmassatba hit ginen todu i tailayi guini gi tano.’

Sesso ta hungok este na palabra i "satbasion" ya guaha na ilek-ta na palabran halom gima’yu’os ha’. Lao lache este na hinasso. Todu i mandangkulo siha na disision ni ta fa’titinas siña ta alok na "satbasion" enao. Ta sasatba i problema-ta siha yanggen dinanche na disision ta fa’tinas. Enao mina’ maneskuekuela hit yan enao mina’ guaha ma’estro yan ma’estra para ta fanmasatba ya munga hit maniknorante. Hafa na guaguaha ospitat yan mediku siha? Pot i para ta fanmasatba ginen chenot-ta. Hafa na guaguaha kotte yan hues? Pot i para ta fanmasatba ginen i ti manunas. Este na palabra i "Satbasion" ahe’ ti ayu ha’ kumeke ilek-ña yanggen manmatto hit gi langet despues di i finatai-ta. Ta nisisita na ta fanmasatba ginen i isao-ta yan ginen este i applacha’ na lina’la’. Ta nisisita na ta fanmasatba ginen i probleman sosiat ni ti siña ha na’i hit gasgas na lina’la’.

Ya amanu nai para ta sodda’ este na satbasion? Ta sosodda’ este na satbasion gi ayu siha na taotao i maseha ti obligasion-ñiha para u macho’gue una kosa, lao macho’gue ha’ en fin pot i otro taotao. Ha cho’gue este si Jesukristo pot todu i taotao gi ayu na klasen lina’la’ i ha na’annok yan gi finatai-ña.

47

Gi manmaloffan na siklo yan siklo siha, i ma’estro yan ma’estran teologia machagi para u ma’esplika i fundamento-ña i kilu’os. Taya’ ni unu siña umesplika sen kabales. I manapostoles ti machagi para u ma’esplika. Ni ti macho’gue ni hafa para u ma’analisa. Hokkok ha’ bidan-ñiha maproklama yan mana’annok i agradesimienton-ñiha. Gi katta-ña si San Pablo para i taotao Galatas ha tuge’ un kadada’ na sinangan-ña hafa i kilu’os kumeke ilek-ña para guiya petsonatmente. Ilek-ña: "Este na lina’la’ anai lala’la’ yo’ pa’go, guahu lala’la’ yo’ gi hinengge gi Lahen Yu’os, ni ha guaiya yo’ ya ha na’enñaihon i lina’la’-ña pot guahu." Siña ta alok na este i mas taddong na kinemprende pot i kilu’os ni siña ta tungo’. "I Lahen Yu’os ha guaiya yo’ ya ha na’enñaihon i lina’la’-ña pot guahu." Guaha ta’lo otro punto ni debi di ta diskuti para u kabales este na sinangan-ta.

Ti siña para ta sangan na i kilu’os masusedi gi un biahi ha’ na tiempo, era gi anai maklaba gue’, ya hokkok ha’ guenao. Si Jesukristo ti ha na’fakpo’ i kilu’os giya guiya ha’. Gaige gi intension-ña para u makontinua ni mandisipulu-ña. Maila’ ya ta ekungok i sinangan-ña. Sesso ta hungok: "Yanggen guaha malago’ tumattiyi yo’, debi di u niegan maisa gue’, ya u uma i kilu’os-ña ya u dalalaki yo’," Ayu i ha cho’gue para enteru i tano’, hita pa’go para ta cho’gue i tareha-ta didide’.

Para si Jesukristro i kilu’os kumeke ilek-ña i finatai-ña. Meggai gi tumattiyi gue’ finatai lokkue’ uttimon-ñiha. Para hagu yan guahu, pa’go na tiempo yan guini na lugat, este kumeke ilek-ña i klasen lina’la’ ni ta chocho’gue. Hita ha’ na maisa siña chumo’gue ayu na cho’cho’ i ti manmatago’ hit para ta cho’gue para ayu na taotao i taya’ direcho-ña na para ta cho’guiyi gue’. Kada patgon gi gima’ yan gi eskuela siña ha cho’gue mas ki i debi di u cho’gue. Hita ni manamko’ lokkue’ siña ta cho’gue mas ki i obligasion-ta ha’. Este na che’cho’ espirituat gaige gi kada unu giya hita. Ti guailayi na para ta nangga un espesiat na momento pot i para ta cho’gue i na’manman na sakrifisio. Siña ta cho’gue este pa’go mismo na ha’ani. Nihi ya ta cho’gue ayu i ti obligasion-ta para ayu na taotao i taya’ direcho-ña para ta cho’guiyi gue’.

Estague’ i fudamenton i kilu’os gi mas sinsiyu na manera. Yanggen ta atan i kilu’os gi taiguini na manera pues siempre ta li’e’ na ahe’ ti masusedi lokkue’ pa’go mismo na momento. Hunggan, espesiat ayu i bida-ña si Jesukristo gi kilu’os giya Katbario. Sa’ taya’ otro ni masudedi ni ha tulaika meggai na korason taotao. Lao i fundamentoña ti hokkok ha’ gi Ekso Katbario. Hita lokkue’ siña mañaonao. Siña ta cho’gue ayu i ha cho’gue. Kumeke ilek-ña na siña ha’ maripiti i kilu’os.

Si yu’os ma’ase’ ni atension-miyu yan adios asta otro simana. Si Yu’os en fambinendisi i Tata i + Lahiña, + yan i Espiritu Santo. Amen.

TAIMANU LUMA'LA' YAN OTRO TAOTAO September 08, 2002

I Ebanghelio ni ta hungok maproklama pa'go guini gi XXIII Damenggo gi Otdinario na Tiempo, añu A, machuchule' ginen i tinige' San Mateo, kapitulu 18:15-20. Ha fanana'gue hit si Jesukristo taimanu luma'la' yan otro taotao.

Gof praktiku este na Ebanghelio i ta hungok maproklama pa'go para taimanu luma'la' yan otro taotao. Lao hunggan magahet, sen mappot. Taya' mas tumungo' este ki si Jesukristo na sen mappot este.

Guiya mismo guaha problema-ña yan i familia-ña. Ginen un biahi hinasso-ñiha na umatmariao gue'. Gumuaha problema-ña yan i manga'chong-ña. Guaha na biahi nai manatgumiento hayi mas impottante entre siha. Pot los uttimu unu giya siha trinaiduti gue'; otro ilek-ña na ti tiningo' gue; ya todu i pumalu ma'abondona gue'. Gumuaha lokkue' problema-ña gi sinagoga. Estague' i rilihion ni mapraktitika gi tiempo-ña. Ha chagi para u saonao yan para u praktika, lao masospecha na ti manhongge gue', entonses madulalak gue' ginen i inetnon-ñiha.

48

Ti kumeke ilek-ña na esta ti siña gue' luma'la' yan otro. Hokkok ha kumeke ilek-ña na ha sen tungo' na impottante yan ha komprende na mappot luma'la' yan otro taotao. Guaha na biahi na imposipble. Lao si Jesukristo ni nungka na u po'lo gi un banda i impottante na punto ya u cho'gue i ti dinanche pot no u guaha atboroto, ya hita lokkue' debi di ta dalalaki este. Lao ha fanana'gue hit guini taimanu luma'la' gi pas yan otro taotao.

I fine'na na punto, taimanu luma'la' yan otro taotao, debi di ta fanákuentusi unu yan otro.

Ilek-ña si Jesukristo, yanggen guaha umisague hao debi di un hanao guatu gi umisague' hao ya en diskuti i problema na dos. Cha'mu numununok i problema gi korason-mu, pat sino un esangani ni hayi, lao hanao para ayu i umisague' hao ya guiya un kuentusi. Kumeke ilek-hu, munga lumayo' ya un apatta hao ginen guiya sin en kuentos na dos. Yanggen un kuentusi gue' kana' ha' siguguru na umafa'maolek hamyo. Lao yanggen un suhayi gue', sin un kuentusi gue', ni ngai'an nai en akomprende yan ni ngai'an nai en satba i probleman-miyu na dos.

Hafa u masusedi yanggen un nunok gi korason-mu i problema. Pot ehemplo nina'piniti i palao'an ni asagua-ña, lao ha nunok ha' gi korason-ña, taya' ni hafa ha sangan. Despues masusedi ta'lo otro biahi, ya mamatkilo' ha' ta'lo. Sigi este maripiti, ya di kada biahi ha nunok ha' gi korason-ña. Uttimo-ña siempre umessalao i palao'an ya ha sangan ayu siha i esta maleffa i lahi.

Gi Biblia, ilek-ña si San Santiago, "Munga na u machom i atdao gi linalalo'-mu." Kumeke ilek-ña este na munga manunok i lalalo'-mu. Yanggen i asagua-mu, o sino i che'lu-mu, pat i amigu-mu muna'piniti hao, espiha gue', diskuti i problema na dos. Ya kana' sen siguru na siempre umakomprende hamyo ya magong i piniti-mu. Munga layo' ya un famatkilo ha'.

I sigundo na punto, na'onesto hao. Ilek-ña si Jesukristo, "fa'nu'i gue' ni linachi-ña." Mappot este para ta cho'gue. Solu taddong i umatungo'-miyu nai siña un cho'gue este. Lao debi di ta cho'gue este. Gi minagahet debi di ta rialisa na kada unu giya hita guaha difekto-ta; ya guaha na biahe na ti ta tungo' enao na difekto-ta. Siña ha' na ta na'puputi otro taotao ya ti ta tungo'. Yanggen taiguihi hit pues che'cho' yine'ase' bidada-ña i amigu-ta yanggen ha tanchu'i hit ni difekto-ta. Ha nana'i hit este opottunida para ta fanmangagao despensasion pot i linachi-ta yan ta korehi i bida-ta.

I para ta fanonesto i mas mappot gi entre i managuaiya. Manma'añao hit para ta hungok na ti manmaguaiya hit, pot enao na ta nana'na' i magahet na siniente-ta ginen i guinaiya-ta. I mañaina machocho'gue este gi famagu'on-ñiha. Machocho'gue este ni manaságua. Siempre mas metgot i umaguaiyan-miyu yanggen humanao hao guatu ya onesto en deskuti i difirensian-miyu na dos. Ilek-ña si Jesukristo, "Yanggen inekungok hao, pues un ganna i korason i che'lu-mu." Kumeke ilek-ña este na yanggen onesto hao siña un satba i umatungo'-miyu.

I mina'tres na punto, munga mana'na' ni hafa. Ilek-ña i Saina yanggen ti umafa'maolek hamyo despues di kumuentos hamyo chagi kumonne' otro taotao; ya yanggen ni este ti matto i kinemprende, pues rifieri i problema guatu gi gima'yu'os.

Ahe' ti kumeke ilek-ña este na para ta fangahulo' gi me'nan taotao gi Misan Damenggo ya ta sangan i problema. Kalan che'cho' patgon este. Lao hokkok ha' kumeke ilek-ña para ta nangga otro opottunida anai siña hit manguentos ya ta fanakomprende. Siña manmanespiha hit akonsehu ya ta ekungok sa' siña ha' na hita nai gaige i linachi.

Pot los uttimu, i mina'kuatro na punto, munga hit chumatli'e' este na taotao. Ilek-ña i Saina na yanggen taya' ni unu gi este siha umayuda i problema pues, "trata gue' komu paganu pat taotao kontribusion." Lao taimanu para ta trata un taotao komu paganu pat taotao kontribusion? Ta dalalaki hafa bida-ña si Jesukristo. Ha guaiya siha, ha fa'amigu siha, ya ha kombida siha para u fañaonao gi rainon Yu'os. Ripara ha' sa' este na Ebanghelio i ta tataitai pa'go tinige' un taotao kontribusion ni sinangani as Jesukristo, "Dalalaki yo'."

49

Pot los uttimu, taimanu para ta fanla'la' yan otro taotao? Debi di ta fanmappot didide' para ta fanla'la' yan otro taotao. Debi di ta fanguentos yan siha yan debi di ta fanonesto. Debi di ta trata siha taimanu ha' trata-ña si Jesukristo ni mampaganu yan i taotao kontribusion.

Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-ña, yan i Espiritu Santo. Amen.

TAIMANU MANASI’I? September 15, 2002

Ebanghelio ni ta hungok maproklama pa’go guini gi XXIV Damenggo gi Otdinario na tiempo, añu A, machuchule’ ginen i tinige’ San Mateo, kapitulu 18:21-35. Guiya este na Ebanghelio anai mamaisen si San Pedro kuanto biahi para u fanasi’i.

Taya’ mas mappot siña ta cho’gue ki para ta asi’i otro taotao. Lao obligao para ta tungo’ taimanu chumo’gue este. Este na tano’ nai mañasaga hit, i lina’la’-ta yan i guinaha-ta manmesklao yan i lina’la’ yan i guinahan otro taotao. Hafa ha cho’gue un taotao ha afefekta otro taotao siha. Enao mina’ mientras manlala’la’ hit guini gi tano’ siempre guaha na biahi nai ta na’puti otro taotao.

Hafa para ta cho’gue yanggen masusedi este? Ti meggai siña ta cho’gue. Gi magahet dos ha’ siña ta cho’gue. Siña ta asi’i, ya ta maleffanñaihon; o sino siña ta nunok gi korason-ta, ya ta bengga. Unu gi este i dos ha’ siña ta cho’gue. Taya’ mina’ tres.

Gi Ebanghelio ni ta hungok maproklama pa’go, ha chagi si San Pedro para u késodda’ i mina’tres. Ha hungok ya ha komprende un patte ha’ gi finana’guen i Saina pot manasi’i, ya ha kékecho’gue este. Lao gaige gi hinasso-ña na ti para todu i tiempo para ta sigi ha’ manmanasi’i. Pot este na malak guatu gi as Jesukristo ya ha faisen gue’, "Asaina, kuanto biahi i che’lu-hu para u isague yo’ ya debi di bai asi’i gue’? Siette biahi?" Hinasso-ña na sen meggai este i siette biahi.

Anai ha faisen si San Pedro este na kuestion-ña hokkok ha’ malago’-ña hafa praktiku para u cho’gue. Ahe’ ti ha kéketungo’ pot i para u tuge’ papa’ gi lepblon-ña. Hokkok ha’ malago’-ña para u késodda’ gi korason-ña para u asi’i i umisague gue’. Ti un biahi ha’ na inisague’ gue’; ya gaige gi hinasso-ña si San Pedro hafa u cho’gue yanggen ti pumara este na taotao inisague gue’. Hafa para u cho’gue despues di inasague gue’ siette biahi. Siguru na debi di u para umasi’i’ gue’ despues di siette biahi.

En hingok ha’ hafa ineppe-ña i Saina, "Ahe’, ti siette biahi, sino ki sitenta biahi mamuttiplika yan siette." Despues ha na’tinatiyi ni fina’akomparasion pot i tentago’ ni ha didibi i rai dangkulo na kantida. Ya pot i ti siña ha apasi, mangagao mina’ase’; ya i rai ha despensa gue’ ni todu i dibi-ña. Despues et mismo tentago’ humanao huyong ya ha sodda’ otro tentago’ ni dumidibi gue’ didide’, ya ha na’mapresu gue’ sa’ ti siña inapasi. Anai ha hungok este i rai, ha kansela i mina’ase’-ña ni este na tentago’ ya ha na’mapresu gue’ lokkue’.

Despues ha na’fakpo i sinangan-ña i Saina ya ilek-ña, "Taiguennao ha’ para trata-ña si Tata gi langet nu hamyo yanggen ti kada unu giya hamyo en asi’i i che’lon-miyu ginen i korason-miyu." Matka maolek este na palabras, "ginen i korason-miyu", sa’ gaige guini i punton i leksion ni ha kékefana’gue’ hit i Saina. Ha sasangan guini si Jesukristo na para ta asi’i i prohimu ginen i korason-ta, ahe’ ti para ta alok ha’ basta, ti yahu atborotu, lao lalalalo’ hao ha’. Munga mabengga, lao asi’i yan funas i linalalo’ ginen i korason-mu. Lao taimanu para ta cho’gue este? Siña ta konsidera guini este na punto.

Debi di ta hasso na esta si Yu’os ha asi’i hit ni isao-ta, ya siempre ha asi’i ha’ hit ta’lo sa’ manhappodong hit gi isao. Estague’ siknifikasion-ña i rai ni ha kansela i diben i tentago’-ña. Ha sangangani hit si

50

Jesukristo na esta si Yu’os ha despensa hit ni dibi-ta ni ti siña ta apasi. Ya hunggan magahet ta nisisita mana’fanmanhasso ni este. Meggai giya hita ta gof komprende hafa kumeke ilek-ña para ta fanma’asi’i. Gi kada ha asi’i hit si Yu’os tumatacho guenao i Ekso Katbario ni ginen enao na matto i inasi’i para hita. Kumeke ilek-ña na siriosu i isao-ta sa’ Katbario umasi’i. Sen guaguan gi me’nan Yu’os i lina’la’-ta; ya pot i guaguan i lina’la’-ta enao mina’ guaguan apas i isao-ta.

Gi kada manmanasi’i hit ta siesiente puti gi korason-ta sa’ mafatto i inasi’i ginen i korason-ta ni manguaiya. Ya parehu este gi as Yu’os. Sa’ si Yu’os ha guaiya hit mas ki ni hayi. Pot enao na gi kada ha asi’i hit, guaguan enao na bida-ña. Ti siña un asi’i i un guaiya na taotao sin un apasi ni pinadesi-mu, parehu ha’ yan si Yu’os. Pot este na rason na i kilu’os i siñat i hinengge-ta.

Esta si Yu’os ha asi’i hit ni dangkulon dibi-ta ginen i dangkulon pinadesi-ña. Ya gi kada ha asi’i hit, ha siesiente puti. Yanggen ta hasso maolek este, siña ha ayuda hit para ta fanlisto mas umasi’i ayu siha i umisague’ hit.

Ahe’ ti siette biahi ha’, lao sitenta biahi mamuttiplika yan siette biahi. Baba i korason-mu. Chagi bumisita i che’lu-mu ni esta apmam ti kumuentos hamyo sa’ umana’pinitiyi hamyo. Hokkok ha’ para un alok, despensa yo’ che’lu-hu yanggen hu’ isague’ hao. Bai sangani hao na siempre un siente un sen dangkulo na minagof gi korason-mu.

Si yu’os ma’ase ni atension-miyu, yan adios asta otro simana. Si Yu’os fambinendisi, i Tata, yan i + Lahi-ña, yan i Espiritu Santo Amen.

KAO DIGERU I LINA'LA'? September 22, 2002

Pa'go i XXV Damenggo gi Otdinario na tiempo, Añu A. I Ebanghelio ni ta hungok maproklama pa'go machuchule' ginen i tinige' San Mateo, kapitulu 20:1-16a. Para ta komprende mas kabales este na Ebanghelio maila' ya ta ekungok este un ratu.

Gi Ebanghelio pa'go, ha sangan si Jesukristo un estoria pot unos kuantos taotao ni ilek-ñiha na digeru este na lina'la' para siha. Sesso ta hungok este pa'go na tiempo, ya guaha na biahe na ilek-ta na hunggan magahet. Ilek-ta ti debi i neni di u ñalang, lao meggai manmatai ñañalang. Ti debi i famagu'on di u fanmapoksai gi gima' ni bula plaitu yan chinatli'e', lao meggai ta lili'e'. Guaha nai ta li'e' familia mayulang gima'-ñiha ginen i linao pat pakyo'. Guaha nai matto ti amtiyon na chetnot gi un hoben na taotao. Hunggan ta komprende ha' na guaha na taotao ilek-ñiha na digeru este na lina'la' para siha.

Lao ti este siha na taotao gaige gi hinasso-ku pa'go na momento. Hita na taotague, gaige gi hinasso-ku, hita ni siña ta alok na gefsaga lina'la'-ta, lao guaha na biahi na ta siente na ha digeruyi hit este na lina'la'. Hafa siña ta alok pot este?

Siña ta sodda' i ineppen este na kuestion yanggen ta espiha sa' hafa na manmasusesedi este siha. Ginen mamanu magi este siha? Hafa na mafatto este na hinasso giya hita na ha digeruruyi hit este na lina'la'?

Este na baban siniente mafatto giya hita ginen unos kuantos rason - siña ha' pot i mampos apretao i che'cho' ya manyayas hit, siña ha' pot i guaha mahalang-ta, siña ha' pot i kalan manyafai i tataotao-ta. Lao este siha na siniente chaddek matto yan chaddek lokkue' ma'pos.

Lao mas siriosu este na siniente gi este na taotao siha i ta hungok gi Ebanghelio. Matto este na baban sinienten-ñiha gi estesiha i fine’na manmacho’cho sa' ma'akompara siha yan i pumalu. Siha masungon

51

todo i dia i maipen somnak ya manma'apasi suetdon un dia. Ya ayu i uttimu manmatto manmacho'cho' una ora ha' ya manmana'i siha lokkue' suetdon un dia. Ayu siha i fine’na manmancho’cho’ hinasson-ñiha na ti dinanche' manmatratan-ñiha ya nina'baba sinienten-ñiha. Manakonfotma para u fanma'apasi ni este na kantida ya manma'apasi siha. Lao matto gi hinasson-ñiha na manmadigeruyi siha. Sa' hafa? Sa' manma'apasi parehu yan ayu i manmacho'cho' didide' ha'.

Sesso masusedi este i para ma'akompara siha i taotao yan otro taotao. Hassan na u akompara gue' i taotao ni guaha yan ayu na taotao i taya'. Todu i tiempo ayu i didide' ha' guinaha-ña ha akompapara gue' yan ayu i meggai. Ya ginen este nai mafatto i siniente na manmadigeruruyi siha, nos pot i manisisita mas, lao pot i menos manmana'i-ñiha ki i otro.

Kalan naturat na debi di ta akompara hit yan otro ni guaha mas. Lao kalan mohon mas kombieni na ta akompara hit yan i otro ni didide' guinaha-ña pat takpapa' puesto-ña. Hafa mohon yanggen este na taotao siha i ta hungok gi Ebanghelio ma'akompara siha yan i taotao ni taya' empleao-ñiha, ayu siha i manhanao para i gima'-ñiha sin didide' na suetdo sa' ti manmañodda' cho'cho'? Este na akomparasion guaha benefisio. Siempre matto gi siniente-ñiha para u ma'agradesi i didide' na guinaha-ñiha yan u ma'asi'i ayu siha i mantaya'. Hahasso ayu na taotao i umalok, "lalalo' yo' sa' taya' sapatos-hu, asta ki umasodda' ham yan i taotao ni taya' adeng-ña."

Lao kana' ha' todu i tiempo ta akompapara hit yan ayu i guaha mas. Ripara sa' mansatesfecho ha' hit ni didide' na guinaha-ta asta ki manasodda' hit yan otro taotao ni guaha mas ki hita. Gigon masusedi este insigidas ha na'baba siniente-ta ya ta tutuhon mangonggong ya ilek-ta ha digeruyi hit este na lina'la'. Ripara sa' yanggen ti ta tulaika este na siniente-ta siempre taya' minagof gi lina'la'-ta. Ayu i fine'na manmatto manmacho'cho' manhanao para i gima'-ñiha mantriristi. Lao hafa taimanu para ta amte este na siniente-ta?

Debi di ta atan di nuebu i lina'la'-ta. Debi di ta ripasa ya ta li'e' yan ta tufong i manmaolek na guinaha-ta yan bendision ni manmaffato giya hita. Ta hahasso di nuebu ayu i umalok, "lalalo yo' sa' taya' sapatos-hu, asta ki umasodda' ham yan i taotao ni taya' adeng-ña."

Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-ña, yan i Espiritu Santo. Amen.

I SINETSOT YAN I MAOLEK NA AKSION September 29, 2002

Ebanghelio ni ta hungok maproklama pa'go, guini gi XXVI Damenggo gi otdinario na tiempo, machuchule' ginen i tinige' San Mateo, kapitulu 21:28-32. Guiya este pot i tata ni ha tago' i dos lahi-ña para u facho'cho' gi gualo'.

Kada unu giya hita guaha nai ta cho'gue ti maolek. Guaha nai ta cho'gue ayu i ti kombieni o sino, para hafa ta puni, guaha nai ta cho'gue i tailayi. Pat sino guaha nai ti ta cho'gue i obligasion-ta para as Yu’os pat i familia-ta. Yanggen ta hasso tatte ayu i tailayi ni ta cho'gue, pat sino i obligasion-ta ni ti ta cho'gue, guaha nai ta deseha na i ya siña mohon maripiti di nuebu i lina'la'-ta. Ilek-ta na pa'go na biahi siempre ta cho'gue ayu i maolek ha'. Ta prometi na para ta na'fampasensia hit en lugat di taklalo'. Ta sangan i mambonito na palabras en lugat di i chatfino'. Ta cho'gue i maolek en lugat di i tailayi. Ta kumple i obligasion-ta en lugat di ta fangago'. Lao para hafa di ta hahasso este siha sa' ti siña ta na'ta'lo tatte este siha na aksion ni esta manmonhayan ta cho'gue pot i para ta na'fanunas. I lina'la'-ta kalan i relos ni sigi ha' mo'na kada sigundo, kada minuto, kada ora, kada dia, kada simana, kada mes kada sakkan. Ti siña ta na'para. Lao hafa siña ta cho'gue ni ayu siha i ti manmaolek na aksion ni esta monhayan ta cho'gue?

52

Ha sangan si Jesukristo un estoria pa'go gi Ebanghelio pot este na asunto. Un biahi guaha un tata ni ha tago' i dos lahi-ña para u facho'cho' gi gualo'. I amko' na lahi-ña ilek-ña, hunggan tata-hu sen magof yo' humanao para bai facho'cho'. Lao ni sikiera u desnek gi lancho. Pues ti macho'cho'. I otro lahi-ña ilek-ña munga gue'. Lao despues mumañotsot ni sinangan-ña. Entonses ha tulaika i hinasso-ña ya humanao para i lancho ya macho'cho'. Este i segundo na lahi-ña yata para ta dalalaki. Parehu este na patgon yan kada unu giya hita ni guaha ta hahasso ti maolek bida-ta. Lao este na patgon ha cho'gue una kosa para u na'tunas i linachi-ña.

Ti meggai giya hita chumocho'gue este. Guaha giya hita ilek-ta ahe' ti grabi ayu i bida-hu. Para hafa di u estotba yo'. Ilek-ta isao dikike' ha' ayu. Lao guaha na taotao siha mangogof inestotba ni este siha na klasen asunto. Nina'fansesen mamahlao yan nina'fansesen baba siniente-ñiha. Ya ilek-ñiha nahong ha' ni este para u nina'tunas i linachen-ñiha.

Lao achokka' kuanto binaba-ña siniente-mu ti u nina'tunas ayu i lina'chi-mu. Pues kumeke ilek-ña na un gagasta ha' dibatdi i tiempo-mu. Lao hafa para ta cho'gue ni este na baban siniente-ta yanggen para u guaha probecho-ta?

Estague' i fine'na na punto ni debi di ta cho'gue: debi di ta atmiti i linachi-ta, yan ta aksepta na manresponsapble hit ni linachi-ta.

Todos hit ni esta guaha idat-ta esta meggai linachi-ta, ya siguru yo' na guaha unos kuanto mansiriosu. Siña ha' buente na taya' nai annok i litratu-ta gi gaseta pot i ta cho'gue hafa na che'cho' kriminat. Maseha taya' nai ta cho'gue hafa na che'cho kriminat lao esta guaha nai ta cho'gue hafa na tinailayi. Pot ehemplo guaha nai ti manonesto hit ni familia-ta. Guaha nai ti ta atiendi ayu na taotao i manespipiha ayudu. Guaha na ta chule' bintaha gi prohimu.

Ti este siha i mas tailayi ni ta cho'gue. Siña ha' buente i mas tailayi na bida-ta era ayu i debi di ta cho'gue ya ti ta cho'gue. Pot ehemplo ayu anai ta li'e' un taotao na ha nisisita konsuelo ya ti ta gasta didide' tiempo-ta para ta konsuela gue' sa' pot i maninalulula hit. Pat sino malangu i amigu-ta ya ti manmatto hit manmambisita. Ayu na biahi anai siña ha' ta gasta mas tiempo-ta para i famaguo'on-ta lao ilek-ta na manyayas hit.

Siguru yo' na guaha esta ta na'fampiniti taotao siha guini gi tano'. Siña ha' ta alok, "Ahe', taya'." Lao kao u ayuda hit yanggen ta dagen maisa hit, achokka' ta tungo' ha' gi korason-ta na hunggan? Siña ha' buente ta achaka otro taotao ni este na problema. Lao taya' probecho para hita. Yanggen ta achaka otro taotao, pues siempre ta ripiti ha' ta'lo enao na problema-ta. I mas maolek ni siña ta cho'gue era i para ta fana' i linachi-ta, ya ta atmiti yan ta aksepta na manresponsable hit ni linachi-ta. Este nai siña guaha probecho-ta ginen i linachi-ta.

Estague' mina'dos na punto ni siña ta cho'gue: debi di ta tulaika i klasen lina'la'-ta.

Ripara ha' hafa si Jesukristo ha sangan pot i segundo na patgon: "Lao despues mumañotsot ya humanao." Dos kosas este ha sangangani hit. Fine'na, ha eskpirensia sinetsot gi korason-ña. Segundo, mamokkat ni dos addeng-ña ya humanao para u facho'cho'. Todu este i dos na punto presisu yanggen para u guaha adelanto gi lina'la'-ta. I sinetsot gof presisu yanggen para u guaha adelanto gi lina'la'-ta. I sinetsot gof presisu, lao un patte ha' este yanggen manmalago' hit para ta na'dinanche i baban bida-ta. Yanggen para ta fanmañotsot ha' sin ta cho'gue una kosa ni para u nina'dinanche i linache-ta, pues ta gagasta ha' tiempo-ta dibatde.

Siguru yo' na esta mañotsot hao pot i un trata tailayi i asagua-mu. Guaha na biahi nai un chatfinu'i gue sin isao. Pat sino guaha na biahi nai kalan mampos ginimen-mu ya un usa desparati giya guiya. O sino guaha nai kalan mamborokento i famagu'on ya un esalague siha. Siña ha un tulaika este siha. Lao ti nahong ni para un alok ha' "Despensa yo'." Nisisario na un cho'gue mampraktiku siha na aksion, tat komu

53

na'tungo' i asagua-mu na un agradesi todu siha i bidada-ña para i familia. Yanggen malago' hao para un na'annok na un guiaya i famagu'on-mu pues gasta mas tiempo-mu yan siha.

Kalan che'cho' langa' yanggen sigi ha' di ta alok manmañotsot hit ya sigi ha' ta ripiti i baban bida-ta. Lao yanggen ilek-ta na manmañotsot hit ya despues ta na'tinatiyi ni un praktiku na aksion na magahet na manmañotsot hit pues enao nai siempre guaha adelanto gi lina'la'-ta. Yanggen ti ta cho'gue este pues siempre mamparehu ha' hit otro simana, otro mes, yan otro sakkan; taya' tinilaika, mannamamaike' ha' hit, o sino manmatata'pang ha' hit.

Pot los uttimu, este i segundo na patgon guini na estoria dumisatento gi as tata-ña, yan ti malago' ha cho'gue i responsabilidat-ña. Anai mafaisen gue' para u facho'cho' gi gualo'-ñiha, manimbeste ya ilek-ña, munga gue'. Baba este na bida-ña. Lao despues mumañotsot ya humanao para i gualo' ya macho'cho'. Mamparehu ha' hit yan este na patgon. Ti nisisario na ta sigi ha' rumipiti i linachi-ta siha sa' hokkok na' bidada-ta i manmañotsot, ya ti ta chocho'gue hafa na praktiku na aksion para u nina'tunas i linachi-ta. Hahasso na todos hit guaha tailayi bida-ta ya manmañotsot hit esta. Lao yanggen ti ta cho'gue hafa na aksion para ta na'tunas, pues taya' probecho para hit.

Si yu’os ma'ase ni atension-miyu yan adios asta otro simana. Si Yu’os en fambinendisi, i Tata, yan i +Lahi-ña, yan i Espiritu Santo. Amen.

MATTO I KOBRANSAN ATKILON October 06, 2002

I Ebanghelio ni ta hungok maproklama pa'go guini gi XXVII Damenggo gi Otdinario na Tiempo, machuchule' ginen i tinige' San Mateo, kapitulu 21:33-43.

Guini na Ebanghelio siña ta alok na ha sasangan si Jesukristo na matto i notisia para u fanhuyong i taotao Israel gi gima' ni manmanatkikila. Ha sangani si Jesukristo i Manjudios para u ma'apasi si Yu’os ni atkilon o sino u falingu i sagan-ñiha gi raino-ña.

Matto este na notisia giya siha guini na fina'akomparasion. Pot un lancheru este ni guaha gualo'-ña ubas, ni ha prepara kabales para u guaha meppa' na kusecha, ya despues ha na'ma'atkila. Kumontrata yan i para u fanatkila na para u ninana'i ni patte-ña yanggen matto i tiempo.

Ginen un tiempo taiguini lokkue' machocho'gue guini gi isla-ta. Un taotao guaha gualo'-ña. Otro taotao sumasaga yan manananom guenao na gualo'. Yanggen sakkan i tinanom guaha para patte-ña i gaigualo'. Todu i dos guaha probechon-ñiha.

Estague' este i ha sasangan si Jesukristo. I gaigualo' ha na'ma'atkila i gualo'-ña anai mangaige i tinanom ubas. Lao guaha ti dinanche masusedi gi tiempon kusecha. Gi tiempon kusecha i gaigualo' ha na'fanhanao i tentago'-ña para u marekohi i patte-ña ubas lao i manmanatkikila' ti manmalago' manmana'i i tentago'. En lugat, manma'aña i tentago'-ña ya taya' mana'i-ña ni sikiera didide' na ubas. Entonses, i gaigualo' ha na'hanao i mismo lahi-ña, hinasso-ña na siempre marespeta yan ma'ekungok gue'. Lao i manmanatkikila mafutot para u mapuno' gue' sa' hinasson-ñiha na siempre iyon-ñiha i irensia-ña. Pot los uttimu, hokkok pasensia-ña i gaigualo' ya ha cho'gue i unu ha' ni siña ha cho'gue: ha chule' tatte i gualo'-ña ya ha na'ma'atkila ni otro taotao siha.

Meggai giya hita ta komprende este na klasen lancheru. Lao achokka' taya' nai ta li'e' este na klasen lancheru, ti ta achaka i gaigualo' ni bida-ña. Ta tungo' lokkue' hafa kumeke ilek-ña yanggen matto i tiempo para ma'apasen i atkilon o sino dibi. Meggai giya hita ta apapasi i banko pot i kareta-ta, pot i gima'-ta, yan i tenda pot i trastes ni ta fiha yan ta apapasi pot mes. Maseha didide' pat sino dangkulo na

54

dibi, debi di ta apasi yanggen matto i tiempo. Yanggen ti ta apasi pues siempre manma'amot hit ni kareta pat sino manmadulalak hit ginen i gima' ya dangkulo malingu-ta.

Hafa si Jesukristo ha sangangani hit guini na fina'akomparasion?

En primet lugat, ha na'fanmanhahasso hit ni estao nai mangaige hit guini gi tano'. Todos hit manlancheru ni manmanatkikila gualo'. Taya' ni una kosa iyo-ta. Manmana'i hit ni guinaha-ta para ta usa un ratu. Todu este siha na guinaha iyon Yu’os. Ta sen hongge este gi korason-ta. Lao guaha na biahi na ti taiguini i lina'la'-ta. Sigun gi lina'la'-ta guaha na biahi na kalan mohon iyo-ta todu i kosas-ta para todu i manaihinekkok na tiempo. Ta gagasta enteramente i tiempo-ta para ta na'mas meggai guinaha-ta. Ta totoktok i guinaha-ta kalan iyo-ta para todu i tiempo, en lugat di para ta komprende na mana'fan inkatgao ha' hit ni este siha para un ratu, ahe' ti iyo-ta para todu i tiempo.

En hahasso ayu na estoria-ña si Jesukristo pot un riku na lancheru ni meggai yan manmeppa kusecha-ña guihi na sakkan ya ti omlat gi soko' o sino dipositu. Entonses, manhatsa mas dangkulo na depositu ya ilek-ña, "Despasiuyi ha' pa'go ya un gosan maisa hao, kanu'i yan maneskayi!" Lao ilek-ña si Yu’os nu guiya "Tonto hao! Pa'go mismo na puengi u fakpo' i lina'la'-mu; pues hayi para u inaprobecha todu siha i guinaha-mu?"

Todos hit debi di ta oppe este na kuestion. Una kosa gof siguru, ti para u apmam na tiempo para iyo-ta i kosas siha. Siña ha' ta na'i i famagu'on-ta, lao ni siha ti para u apmam para iyon-ñiha enao. Hokkok ha' bidada-ta, manmanatkikila hit guini na tano'. Si Yu’os ha' dueñu ni todu i kosas siha. Yanggen ti siña ta komprende este pues hita ha' ta fa'baban mamaisa hit.

I otro punto ni gaige guini na fina'akomparasion era debi di ta apasi i atkilon o sino siempre malingu i kontrata.

Ha sangani si Jesukristo i manma'gas mamale' yan i manamko' na Manjudios, "Pot este na rason na bai sangani hamyo, na en fanma'amot ni Rainon Yu’os ya u fanmana'i ayu siha na taotao ni siña muna'gai produkto." Kumeke ilek-ña, usa maolek pat sino siempre u falingu. Estague' i fundamenton este na lina'la'. Siña ta li'e' este gi maseha hafa na klasen cho'cho'. Atan ha' i tataotao-mu. Yanggen taya' ehetsisio pues siempre malangu tataotao-mu. Ripara ha' yanggen mapaddet adeng-mu sa' mahlok, despues di mapula' i paddet un tutuhon ta'lo umeyak mamokkat.

Yanggen taya' nai mamokkat hao una miya ti un na'siña chumo'gue insigidas. Siña ha' pot i inamko'-mu, lao mas pot i ti un chocho'gue ehetsisio. Lao para ayu siha i chumocho'gue ehetsisio ti mappot manmalagu dos pat tres miyas.

Parehu ha' lokkue yanggen taya' nai manmanayuyot hit. Siempre manmaleffa hit taimanu manayuyot. Yanggen ti ta guassan yan ti ta atiendi i gualo', yan ti ta apasi i atkilon pues siempre manma'amot hit ya u mana'i ayu i siña muna'guaha kusecha'.

Maila' ya ta ripasa hafa ta sangan pot este na asunto. Taya' iyo-ta ha' na maisa. Hokkok ha' manmanatkikila' hit na lancheru. Todu iyo-ña si Yu’os. Manresponsable hit giya guiya hafa ta cho'gue ni ayu i manmana'i-ta.

Regulat mafatto giya hita i kobransan i atkilon. Debi de ta apasi ayu i ta usa. Kada pribilehu gina'chuchungi ni responsabilidat. Yanggen ti ta usa, pues siempre manma'amot hit.

Si yu’os ma'ase ni atension-miyu yan adios asta otro simana. Si Yu’os en fambinendisi, i Tata, yan i + Lahi-ña, yan i Espiritu Santo. Amen.

55

I MAGAGON FANDANGGO October 13, 2002

Pa'go i XXVIII Damenggo gi Otdinario na Tiempo. I Gima'yu’os ha nana'i hit ni Ebanghelio sigun gi tinige' San Mateo, kapitulu 22:1-14. Ilek-ña na debi di ta fanmatto gi fandanggo sigun gi minalago' Yu’os, ahe' ti sigun gi minalago'-ta.

Estague' un estoria ni siña ta usa para u binaba este na kuentos-hu. Para u matakpangi lahi-ña i amigu-hu. Esta mana'tungo si pale' ya para i Sabalu gi oran alas 3:00 despues di talo'ani. Manmatto i familia, i bisinu, yan i manatungo' ya duru manmacho'gue i fina'tinas. I asagua-ña esta ha patte huyong i imbitasion ilelek-ña para u matutuhon i gipot gi oran alas 6:00 gi pupuengi.

Guenao na talo'ani matutuhon ma'anunsia na mamamaila' i pakyo. Ha tutuhon uchan matmo yan lumala duru guinaife-ña i manglo'. Anai matto i oran kombiti unos kuantos ha' na taotao manestaba guenao, ayu ha' i mas manhihot na parientes yan manatungo', yan ayu ha' i mas mambatbaru.

Nina'sen baba siniente-ña i amigu-hu, ahe' ti pot i manglo' yan i ichan, sino ki, pot i ti manmatto ayu siha i manmakombida. Ha disimula i piniti-ña ya ilek-ña na ha komprende ha' hafa na ti manmatto, sa' pot i baba i tiempo.

Anai matto yo' gi oran alas 6:00 para bai bendisi i lamasa ya hu ripara na kalan triristi i amigu-hu, ilek-hu nu guiya: "Cha'mu nina'triristi, amigu. Bula siempre soblan nengkanno'. Po'lo ya ta balutani didide' i mañe'lu-ta ni manmaprereso ya ta na'i guatu." Insigidas chumalekñaihon, ya ilek-ña, "Magahet, no?"

Maila pa'go ya ta atituyi este na fina'akomparasion ni ha usa si Jesukristo guini na Ebanghelio. Parehu yan pumalu siha ni ha usa si Jesukristo na fina'akomparasion, este lokkue' guaha tres eskalera kumeke ilek-ña.

I fine'na na eskalera, ayu i sinangan ni palabras ni ha usa. Pot ehemplo guini na fina'akomparasion, i rai ha fandangguyi i lahi-ña. Anai ti manmatto i manmakombida, manespiha gi chalan para tahguen-ñiha. Este ha' sinangan-ña i palabras ni ha usa.

I segundo na eskalera, hafa intension-ña si Jesukristo para u fana'gue i taotao siha ginen i estoria-ña. Pot ehemplo, hafa intension-ña si Jesukristo para u representa i fandanggo? Hayi malago'-ña para u representa i rai? Hayi ayu siha i manmakombida ya ti manmatto? Hayi ayu siha i manmakombida para tahguen i ti manmatto?

Despues di ta estudia este na fina'akomparasion ta li'e' na i rai ha represesenta si Yu’os. I gipot fandanggo ha represesenta i rainon Yu’os. Pa'go i manmakombida para i fandanggo era i Maninayek Yu’os na Rasan Taotao, ni fuma'tinas i kontrata yan si Yu’os, era i Manjudios. Ayu siha i manma'agang para tahguen i manmakombida ya ti manmatto, era ayu siha i mani'isao yan i ti Manjudios gi tiempon Jesukristo. Este siha na taotao marisibi si Jesukristo despues di marichasa gue' ni Maninayek Yu’os na Rasan Taotao.

Entonses este i segundo na eskalera, era ayu i intension-ña si Jesukristo para u fana'gue i taotao siha ginen i estoria ni ha sangan. Estague' unu na punto ni ha keke fana'gue hit: i rainon Yu’os mababa pa'go para todu i taotao siha. Ahe', ti para i Manjudios ha', sino ki para todu i taotao siha. Nuebu este na finana'gue para i Manjudios gi tiempon Jesukristo.

56

Pot los uttimo, estague' i tetset na eskalera. Guiya este i praktiku, o sino i petsonat, na finana'gue para hita ni manlala'la' pa'go guini na sakkan gi 2002. Hafa taimanu para ta aplika gi praktiku na manera yan petsonat gi lina'la'-ta este na fina'akomparasion?

Gaige i ineppe para este na kuestion gi uttimon este na fina'akomparasion. Ha sangani hit pot ayu na taotao i makombida para u fanahgue gi gipot ya pot los uttimu guiya mismo dinilalak ni rai huyong ginen i gipot sa' pot i ti minagagagon fandanggo gue'. Sigun gi estoria matto este na taotao gi fandanggo yan i applacha' trahi-ña, binahahake ha' gue' despues di ha na'gasgas i sagan buliku.

Hafa rason-ña si Jesukristo na ha na'fakpo' i estoria-ña yan este na sinisedi? Hayi ha represesenta este na kuchinon taotao?

Este na taotao ha represesenta ayu na kombiti i ha aksepta i imbitasion i rai para u fanahgue gi gipot lao para u cho'gue i malago'-ña ha', ahe' ti i minalago' i rai. Este na petsona ha represesenta ayu siha na taotao i ti malago' madalalaki i kustumbren i tano', na debi di u mamuda yanggen para u annok gi me'nan i rai.

Estague' nai siña ta sodda' hafa kumeke ilek-ña este na fina'akomparasion para hita pa'go na tiempo. Todos hit esta manmakombida as Yu’os para i fandanggon i rainon i langet. Manmakombida hit para ta fanmanahgue. Ha kombida hit si Yu’os para ta fanmata'chong gi gipot i taihinekkok na lina'la' yan i Lahi-ña as Jesukristo.

Lao esta ha na'klaru si Yu’os na yanggen ta aksepta i imbitasion-ña, pues debi di ta dalalaki sigun i minalago'-ña, ahe' ti i malago'-ta. Lao hafa este kumeke ilek-ña?

Kumeke ilek-ña este na debi di ta fanminagagon fandanggo. Lao hafa este i magagon fandanggo? Hafa kumeke ilek-ña si Jesukristo este i magagon fandanggo?

Gaige i ineppe para este na kuestion gi otro fina'akomparasion: ayu i Dia di Huisio na fina'akomparasion ni tumattitiyi este na estoria-ña. Todos hit sesso ta hungok pot i Dia di Huisio. Estague' ha sangan para u masusedi gi uttimon i tano'.

Todu i taotao siha desde i tutuhon i tano' para u fanohgi komu dos grupu gi me'nan i rai i tano' yan i langet, era si Jesukristo. Un grupu para u fanohgi gi agapa-ña; i otro gi akague-ña. I rai siempre ha sangani ayu siha i mangaige gi agapa'-ña:

"Fanmamaila', sa' mambinendisi hamyo as Tata-hu! Maila ya en risibi i raino ni maprepara para hamyo desde ki anai mafa'tinas i tano'. Anai ñalang yo' en na'chocho' yo', ma'ho yo' ya en na'gimen yo': estrangheru yo' ya en risibi yo' gi gima'-miyu, kesnuda yo' ya en na'minagagu yo'; malangu yo' ya en asiste yo', mapresu yo' ya en bisita yo'.

Para ayu siha i mangaige gi akague-ña, otro klasi sinangan-ña i rai: "Ritira hamyo ginen guahu. [Sa' ti en che'gue este siha para guahu.]"

Entonses i magagon fandanggo ni ha sangan si Jesukristo pa'go guini na fina'akomparasion era i ginefli'e' na atension ni ta nana'i otro taotao siha, espesiatmente i mamopble ni mangaige gi uriya-ta. I magagon fandanggo ha siknififika i setbisio siha ni ta nana'i i prohimu, maseha hafa na rasan taotao gue', maseha hafa na relihion ha profefesa, maseha ginen manu gue' magi, maseha pot i isao-ña na taiguini gue'. Kon tat ki ha nisisita i ayudu-ta ya ta ayuda gue' pues manminagagago hit ni magagon fandanggo.

Pues bai na'fakpo' este na kuentos-hu ya bai ripiti ta'lo na todos hit esta manmakombida para i fandanggo gi langet. Lao ha sangangani hit lokkue' na debi di ta fanmatto yan i magagon fandanggo ni manmabotda manmaolek na cho'cho'. Debi lokkue' di ta fanmatto manminagagago magagon fandanggo

57

ni manmabotda ni setbisio-ta para otro taotao, espesiatmente i mamopble. Debi de ta fanmatto manminagagago ni magagon fandanggon ni manmabotda mandangkulo na lettran guinaiya.

Si yu’os ma'ase, ni atension-miyu yan adios asta otro simana. Si Yu’os en fambinendisi, i Tata, yan i + Lahi-ña, yan i Espiritu Santo. Amen

MANTENSION I GIMA'YU’OS October 20, 2002

Pa'go i XXIX Damenggo gi Otdinario na Tiempo, Añu A. I Ebanghelio machuchule' ginen i tinige' San Mateo, kapitulu 22:15-21. Guiya este na Ebanghelio pot i ma'apasen kontribusion yan mantension.

Kuestion tutuhon-ña este na Ebanghelio. Matto gi as Jesukristo un taotao ya ha faisen gue', "Kao kombieni na u ma'apasi i kontribusion para i emperadot pat ahe'?" Este na taotao i mamaisen kuestion sasaonao gi inetnon fariseo, ya ripara ha' i kuestion-ña sa' maseha hafa ilek-ña si Jesukristo siempre goddon gue'. Yanggen ilek-ña, "Hunggan, debi di u ma'apasi", siempre manlalalo' i Manjudios sa'machatli'e' i sisteman Roma kontribusion. Yanggen ilek-ña, "Ahe', ti debi", siempre ma'aresta ni sendalon Roma sa' mamanana'gue para u fanrebulasion.

Ha ripara ha' si Jesukristo i baban intension-ñiha entonses ilek-ña hayi mañuñule' salape'. Mana'i gue' un granon salape', ya despues manfinaisen siha, "Hayi gai'imahen yan hayi gaina'an este?" Manmanoppe siha, "Imahen Caesar." Despues ha na'i siha tatte ni salape' ya ilek-ña, "Entonses, na'i si Caesar ni iyo-ña, yan na'i si Yu’os ni iyon Yu’os."

En li'e' hafa bida-ña si Jesukristo? Ha chule' este na mappot kuestion ya ha usa para u fana'gue siha leksion pot ma'apasen kontribusion yan mantension para i gima'yu’os. Dos na ineppe ha fa'tinas ginen i un kuestion. Ha rekoknisa na guaha i siudadano responsabilidat-ña para i mantension i gobietnamento. Despues ha na'fanmanhasso siha ni ayu i mas takkilo' na responsabilidat, i mantension i gima'yu’os, "... na'i si Yu’os ni iyon Yu’os."

Ahe' ti ta kuestiotiona na guaha responsabilidat-ta para ta apasi i tax, o sino i kontribusion. Ta tungo' ha' na debi di u guaha tax. Lao hafa gaige gi hinasso-ta pot i sigundo patte guini na ineppe-ña si Jesukristo? Hafa ayu i para ta "... na'i si Yu’os ni iyon Yu’os?" Maila' ya ta fanfranko sumangan. Maila'ya ta faisen ayu na kuestion i guaha taotao mafafaisen maisa siha, "Sa' hafa na para bai fanlimosna para i gima'yu’os. Sa' hafa na para bai na'i i gima'yu’os palu gi suetdo-ku? Siña ta atan este na kuestion taiguini. Maila'ya ta tutuhon gi mas ti mappot.

Estague'i finana'gue ginen i Santa Biblia. Ilek-ña si Jesukristo, "... na'i si Yu’os ni iyon Yu’os." Guaha otro siha kumeke ilek-ña este, lao hafa este ha sasangan pot salape'? Gaige gi Antigu Testamento matuge'"tithing", kumeke ilek-ña "dies pot siento". Sesso ma’usa este pot responsabilidat gi gima'yu’os, "dies pot siento". I Manjudios machuchule' guatu gi templo "dies pot siento" gi ginanan-ñiha ya "manana'i si Yu’os". Lao menos ma’usasa-ña este i "dies pot siento" gi Nuebu Testamento. Lao en fin gaige na matuge' guenao. Un biahi ha' si Jesukristo ha sangan pot "dies pot siento" anai ha onra i manfariseo pot i manmannana'i siha "dies pot siento". Gi Ebanghelion San Mateo, kapitulu 23, ilek-ña si Jesus nu siha, "Manmanapapasi hamyo "dies pot siento". Ya hunggan magahet obligasion-miyu para en che'gue enao."

Lao guaha mas metgot na ehemplo pot mantension i gima'yu’os gi Nuebu Testamento. Estaba si Jesukristo gi halom i templo un dia ya ha onra un bi'uda pot i ha upos i responsabilidat-ña para mantension i templo. Dos sentimos ha' limosna-ña. Lao ilek-ña i Saina, "Mas meggai nina'i-ña ki todu i pumalu, sa' ha limosnan-ñaihon todu i guinaha-ña." Gi hinasso-ku ha sangangani hit si Jesukristo para ta akompara i responsabilidat-ta pot limosna gi kuanto ta popo'lo para hita, ki kuanto ta limosnan-ñañaihon.

58

Estague'otro punto. Debi di ta suppotta i gima'yu’os. Guaha na taotao siha sin hafa na malisia makuestiotiona este. Guaha un taotao umalok, "Didide' ha' limosnana-ku para i gima'yu’os sa' gi hinasso-ku ti mamprisisu i programa yan i che'cho'ni machocho'gue gi Gima'yu’os.

Hafa hinasso-mu pot este? Kao debi di un suppotta i Gima'yu’os? Guaha nai hu hungok ha sangan un taotao na munga gue' manlimosna sa' nina'bubu gue' as pale'. Siguru yo' na taya' mas tumungo' ki guahu na i mamale' yan i hetmana mantaotao siha yan guaha na biahi na manlachi lokkue'. Hunggan hu sen tungo' na guaha na biahi nai ti in praktika kabales todu i ha dimamanda hit si Jesukristo. Lao hu sen tungo' lokkue' na i Gima'yu’os ha' na maisa gi maseha hafa na kumunida ha na'yahuhululo' i karaktet i taotao.

Kao guaha otro mas impottante ki i karaktet i taotao? Kao ayu mas impottante para u lachai i eskuela-ña i taotao? Kao mas impottante para un lachai i eskuela-mu ki para un na'maolek karaktet-mu? Pa'go na tiempo mas dangkulo na problema manmafattto ginen i taotao siha ni malachai eskuelan-ñiha lao fatta maolek na karaktet gi lina'la'-ñiha. Piligru i taotao ni ha lachai eskuela-ña ya taya' metgot na direksion gi karaktet-ña.

Pat sino i bisnes mas impottante gaige gi hinasso-mu? Kao mas impottane maprikura i bisnes ki i maolek na karaktet? Faisen fan i mannana'ayao salape' gi banko pot este. Yanggen tomtom na bankeru gue', parehu ha' presisu gue' ni kuanto siña un apasi yan kao maolek karaktet-mu. Enao mina' manmafafaisen i para u fanayao salape' rekomendasion ginen otro taoao hafa na klasen karaktet gaige giya siha. Mas meggai na bisnes mambrok pot i fatta karaktet-ña i taotao ki pot i ti nahong kapitat. Estague' bisnes-ña i Gima'yu’os, yan i mas impottante na cho'cho' gi tano'. Para u ma'agang i taotao siha tatte as Yu’os. Para u makondusi i taotao siha guatu gi as Yu’os. Para mafotma gi taotao siha ayu na karaktet ni gaigi gi as Jesukristo.

Hunggan guaha nai manmatompo' yan manmatomba hit. Lao debi di ta na'i kuanto i siña na supottasion i Gima'yu’os. Sa' i Gima'yu’os fumofotma i karaktet gi taotao siha. Lao ti este i mas impottante na rason na debi di ta fanmanlimosna. Achokka' taya' matuge' programan Gima'yu’os, debi ha' di ta fanmanlismona. Ya estague'i rason.

Pot los uttimu, debi di ta fanmanlismona sa' ta nisisita na ta fanmanlimosna. Ilek-ña si Jesukristo, " ... na'i si Yu’os ni iyon Yu’os." Taya' ha nisisita si Yu’os. Hokkok ha' na ha sangan si Jesukristo este sa' pot i ta nisisita na ta fanmanlimosna. Debi di ta fanmanlimosna pot no ta fanambiento. Anai ilek-ña i Nuebu Testamento "i guinaiya para salape' enao i hale' todu i tinailayi" ahe' ti ha sasangan pot kriminat siha. Ha sasangan pot hagu yan guahu. Todos hit gaige i disehu giya hita para u bula salape'-ta kosa ki siña ta fahan i malago'-ta. Ya yanggen ha na'fanambiento hit i salape'-ta pues kalan kanset na chetnot enao. Ha kakanno' todu i manmaolek yan i mambonitu ginen hita.

Si yu’os ma'ase'ni atension-miyu yan adios asta otro simana. Si Yu’os en fambinendisi, i Tata, yan i + Lahi-ña, yan i Espiritu Santo. Amen.

I TRES NA ESKALERAN GUINAIYA October 27, 2002

Ebañghelio ni maproklama pa'go guini gi XXX Dameñggo gi Otdinario na Tiempo machuchule' ginen i tinige' San Mateo, kapitulu 22:34-40. Guiya este na Ebañghelio anai ilek-ña si Jesukristo: "Gofli'e' i prohimu-mu taiguihi i un gofli'e' hao mismo." Para ta komprende este maila' ya ta ekuñgok este na estoria un ratu.

Siguru na guaha esta nai en egga' ayu na movie i "Fiddler on the Roof". Guiya este na movie pot un popble na Judios giya Rusia ni na'an-ña si Tevye, i asagua-ña si Golde, yan guaha sinko hagan-ñiha.

59

I mas amko' na hagan-ñiha mañguaiya gi un sastre, un taotao ni manlalakse magagu. Nina'baba siniente-ñiha i dos umasagua sa' sigun gi kustumbre guaha para u inayiki hayi para asagua-ña i patgon. Lao despues di makonsidera maolek, si Tevye and Golde masedi i hagan-ñiha na u aságua i sastre.

Ti apmam despues di este, i mina'dos na hagan-ñiha manguaiya un lahi ni ha abandona i hineñggen i Manjudios, ya pot este na kalan guaha didide' problema. Nina'baba lokkue' siniente-ñiha i dos umaságua. Lao despues di makonsidera maolek, i tata ha aksepta i guinaiyan i haga-ña, lao i nana ti malago' ha akspeta.

Si Tevye ha chagi kuanto i siña para u na'komprende i asagua-ña. Ilek-ña, "Golde, asagua-hu, maolek este na taotao. Kalan fafatta didide' ilu-ña, lao ya-hu gue' na taotao. Fuera di este, ha guaiya i haga-ta, yan guinaiya ni haga-ta."

Despues si Tevye ha atan-manñge' i asagua-ña ya ilek-ña, "Golde, kao un guaiya yo'?" Manoppe si Golde, "Un faisen yo', kao hu guaiya hao? Todu este siha i manmaloffan na sakkan, hu na'gasgagasi hao ni gima'-mu, hu fa'tinanasi hao ni na'-mu, hu fa'gasisiyi hao ni magagu-mu. Ya para un faisen yo', kao hu guaiya hao?

Lao ti satisfecho si Tevye ni este na ineppen i asagua-ña. Pues ha faisen gue' ta'lo, "Lao, Golde, kao un guaiya yo'?"

Manoppe ta'lo si Golde ya ilek-ña, "Un faisen yo', kao hu guaiya hao? Todu este siha i manmaloffan na sakkan, humihita mamokkat, humihita kumombetsasion, humihita ñalañg, humihita maigo'. Ya para un faisen yo, kao hu guaiya hao? Yañggen ti este siha guinaiya, pues hafa mohon guinaiya?

Buente guaha esta un ekspirensia gi familia-mu este na estorian Tevye yan Golde. Bonitu i kombetsasion este i dos umaságua para pa'go na Ebañghelio. Guini na Ebañghelio ha sañgani hit si Jesukristo pot guinaiya yan ayu na klasen guinaiya i debi di ta guaiya si Yu’os yan kada unu giya hita. Ilek-ña si Jesukristo:

"Gofli'e' i Saina i Yu'os-mu yan todu i korason-mu, yan todu i anti-mu, yan todu i hinasso-mu ... Gofli'e' i prohimu-mu taiguihi i un gofli'e' hao mismo."

Anai ilek-ña si Jesukristo, "Gofli'e' i Saina i Yu'os-mu yan todu i korason-mu," kumeke ilek-ña na guaha difirentes eskaleran guinaiya. Malago' yo' ta diskuti tres na eskalera.

I primet gi eskaleran guinaiya era i koyentura o sino i fondon i guinaiya. Guiya este na guinaiya i ta huñgok si Golde yan si Tevye masañgan. I primet na eskalera gi guinaiya era i para u fiet i dos ni umaguaiya yan para u daña' yan u asuppotta i dos gi lina'la'-ñiha. Prisisu este para u siña kabales i guinaiya.

I segundo gi eskaleran guinaiya mafanana'an i kabesan i guinaiya. Mas tatkilo' este ki i primet na eskalera. Guini na eskalera ti satisfecho i dos umaguaiya na para u fiet ha' i dos ni umaguaiya yan para u daña' yan u asuppotta ha' i dos gi lina'la'-ñiha. I dos umaguaiya malago' para u macho'gue mas ki este siha para unu yan otro. I manguaiya ha espipiha kuanto i siña na empeñu para u cho'gue hafa siha para u na'magof i guinaiya-ña.

I mina'tres gi eskalera gi guinaiya ayu i kalan inatgimat na klasen guinaiya. Guiya este i mas yahululo' na eskalera gi guinaiya. Guini na eskalera ha chocho'gue i manguaiya ayu siha na cho'cho' i siña ma'alok ti fahoñgge na che'cho'. I manguaiya ha chocho'gue ayu siha na cho'cho' i ti siña makomprende ni otdinario na taotao.

60

Pot ehemplo i nana ni ti ha tuñgo' numañgu ya ha yute' gue' gi taddoñg na tasi para u akudi i patgon-ña ni mamatmos. I fumañagu enao na patgon ha' siña kumomprende este. Estague' otro na ehemplo. I lahi ni ha despensa i asagua-ña despues di fina'baba gue'. Para i chatmanguaiya ti komprendiyon este. Estague' otro na ehemplo. I palao'an ni ha susuñgon ha' i asagua-ña ni botlacheru.

Para i pumalu siha na taotao ilek-ñiha basta yute' enao na baban palao'an. Otro siha ma'alok, hafa na un susuñgon ha' enao na tailahen lahi? Lao para hagu ni manguaiya ilek-mu po'lo ha' sa' asagua-hu gue'. Lao gi magahet un dalalalaki i tinago' Jesukristo ni ilek-ña para un fanguaiya, "yan todu i korason-mu, yan todu i anti-mu, yan todu i hinasso-mu."

I mas propio na ehemplo pot este i mina'tres na eskalera gi guinaiya era si Jesukristo mismo. Ha sañgan si San Pablo pot i ginefli'e' Jesukristo, ilek-ña,

"[Si Jesukristo] ha basihan maisa gue' ... ha na'humitde gue', obidiente ha aksepta kon todu i finatai, i finatai gi kilu’os!" (Phi 2:6-8)

Para i taotao siha ni ti manmanguaiya yan todu i korason-ñiha, yan todu i anten-ñiha, yan todu i hinasson-ñiha, mappot makomprende este na guinaiyan Jesukristo.

Guini na Ebañghelio ha tatago' hit si Jesukristo para ta fanmanguaiya taiguihi i guinaiya-ña, ahe' ti i primet pat i sigundo na eskalera, sino ki i mina'tres. Para ta fanmanguaiya yan todu i korason-ta, yan todu i anti-ta, yan todu i hinasso-ta.

Este na klasen guinaiya, kalan sagu, siña mantinanme todu i taotao siha gi uriya-ta ya u ta fanáguaiya unu yan otro.

Si yu’os ma'ase' ni atension-miyu yan adios asta otro simana. Si Yu'os en fambinendisi, i Tata, + yan i Lahi-–a, yan i Espiritu Santo. Amen.

HAFA MAOLEK NA RILIHION? November 03, 2002

Pa'go i XXXI Dameñggo gi Otdinario na tiempo. I Ebañghelio machuchule' ginen i tinige' San Mateo, kapitulu 23:1-12. Guiya este na Ebañghelio anai ha sañgani si Jesukristo i mandisipulu-ña pot i eskribas yan Fariseo, "dalalaki todu i mantinago' hamyo. Lao cha'-miyu dalalalaki ehemplon-ñiha." Para ta komprende este maila' ya ta ekuñgok este un ratu.

Guaha nai un ripara i rilihion Kilisyanu na ma'akompapara yan gera. Ta huhuñgok este gi kantan gima'yu’os, tat komu i "Atan Jesukristo" anai ilelek-ta "... lao yañggen pinto-mu na in fanmatai hami, pot hagu na in chida' todu i haga'-mami..." Gi "Tatan-mami" ta tataitai "...na'fanlibre ham gi inimigon-mami..." Ginen este na ta faisen mamaisa' hit - Hayi i inimigu-ta? Yañggen magahet na mangegera hit pues hafa na batida ta u’usa? Manu nai gaige i kontrario?

Siña ha' matto gi hinasso-ta na i kontrario era ayu siha i ti manmanhoñgge as Yu’os. Sa' ilek-ta na i hineñgge-ta as Yu’os mumumu kontra ayu siha i ti manmanhoñgge. Lao yañggen ta taitai maolek i Nuebu Testamento siempre ta sodda' na manlachi hit. Huñggan ta li'e' gi lina'la' Jesukristo na guaha siha kumontra gue'. Lao gi lina'la'-ña si Jesukristo taya' nai umakontra yan ni hayi ni ti manhoñgge gi as Yu’os, puru ha' manmanhoñgge. I akontra-ña siha ahe' ti ayu i ti manmanhoñgge. I akontra-ña era ayu siha i prumaktitika i ti dinanche na rilihion.

61

Gof klaru este pa'go guini na Ebañghelio ni ta huñgok. Estague' na ha sañgani si Jesukristo i mandisipulu-ña para u ma'adahi siha ni eskribas yan Fariseo. Hahasso na este siha na taotao manmanhoñgge as Yu’os. Los de mas siha manma'gas gi rilihion i Manjudios. Lao ha li'e' si Jesukristo giya siha na ti dinanche fana'guen-ñiñiha ni rilihion ni matto ginen as Yu’os, enao mina' ha sañgani i mandisipulu-ña para u ma'adahi siha.

Buenu, mientras ta hahasso este siha siempre matto otro kuesition - Hafa na difirensia i lache yan i dinanche na rilihion? Estague' malago' yo' para ta diskuti pa'go.

En primet lugat, debi di ta komprende na ahe' ti lachi i doktrina ni finana'guen-ñiñiha i eskribas yan Fariseo. Ahe' ti ha achaka si Jesukristo siha pot doktrina. Ripara ha' sa' kalan ha aprueba si Jesukristo i finana'guen-ñiñiha. Ha sañgani i mandisipulu-ña "dalalaki todu i mantinago' hamyo." Despues ha ta'luyi ya ilek-ña, "Lao cha'-miyu dalalalaki ehemplon-ñiha." Kumeke ilek-ña, ha aprueba i doktrinan i rilihion-ñiha lao ti ha aprueba i bidan-ñiñiha. Ti ha aprueba si Jesukristo hafa bida-ña i rilihion-ñiha nu siha.

Ahe' ti ilelek-hu na ti prisisu na u maolek i doktrina sa' huñggan prisisu. Yan ni si Jesukristo ti enao ilek-ña. Lao kao maolek pat ti maolek i doktrina guini ha sasañgan i Saina. Si Jesukristo ilelek-ña na siña ha' maolek i doktrinan rilihion ya gi et mismo tiempo ti maolek ma’usa-ña i rilihion ni miembron enao na rilihion.

Ha li'e' si Jesukristo este gi eskribas yan Fariseo. Ha fanu'i siha ni linachen-ñiha. Ilek-ña, "Todu i bidan-ñiñiha manmachocho'gue para u fanmali'e'...Gof yan-ñiha i onrao na ta'choñg gi gipot yan i yamo'nana na siya gi synagoga." Este siha na lalahi ti ma’usa maolek i rilihion ya nina'fambanidosu yan mannamaiki. Hinasson-ñiha na mas manmaolek siha ki otro taotao. Ya bai sañgani hamyo mañe'lu-hu na yañggen nina'banidosu i taotao ni rilihion-ña este un siñat na lumachi i rilihion.

Mas klaru sinañgan-ña si Jesukristo pot este anai ha sañgan pot i Fariseo yan i taotao konribusion ni humanao para u fanayuyot i dos gi templo. I Fariseo malak mo'na ya ha tutuhon umanunsia i manmaolek siha na bida-ña. Pa'go i taotao kontribusion malak i rinkon ya ha tutuhon humasso i isao-ña siha ya mangagagao na uma'asi'i. Ripara ha' sa' yañggen maolek i rilihion ha na'humihitde i taotao. Lao yañggen baba ha na'banidodosu gue'. Yañggen un tutuhon sumiente na maolekña hao ki i otro taotao matka papa', sa' enao na momento na ha tutuhon tumailayi i rilihion-mu.

Este i ta sasañgan na punto ahe' ti pot i para ta na'fanmaolek manma'atan-ta gi me'nan taotao. Kritikat este na punto. I banida ni mafatto ginen i ti dinanche na mapraktikan i rilihion piligru para este na tano'. Siempre este siha na taotao mapotfia para u macho'gue kuanto i siña para u madalalaki i minalago'-ñiha ni otro taotao. Siempre humuyong taiguini: Ilek-ñiha na pot i mandinanche siha ya hita manlachi, yan pot i manmaolekña siha ki hita pues gaige si Yu’os gi bandan-ñiha. Entonses ilek-ñiha na guaha autoridat-ñiha ginen as Yu’os para ta fanmakorihi. Este numa'i siha direcho para ta cho'gue i minalago'-ñiha.

Este gaige gi hinasson-ñiha i taotao ni klumaba si Jesukristo gi kilu’os. Este gaige gi hinasson-ñiha i Nazi giya Alemania durante i Geran Dos anai manmapetsigi i Judios yan otro nasion. Este gaige gi hinasson-ñiha ayu na taotao siha i humohoño' papa' i manestrangheru. Taya' mas tailayi na hinasson taotao ki ayu i para u alok na gaige si Yu’os gi banda-ña kontra otro taotao siha.

Pot los uttimu, hafa hu keke sangan guini na ahe' taigue si Yu’os gi banda-ta kontra otro taotao. I che'cho'-ta guini gi tano' ahe' ti para ta lasu ya para ta maneha i otro taotao. Lao para ta setbe siha. Ilek-ña si Jesukristo, "I mas takkilo' entre hamyo guiya para u setbe i pumalu." Estague' maolek na rilihion. Ya yanggen ta tutuhon manmaleffa ni este pues ha tutuhon bumaba i rilihion.

Si yu’os ma'ase' ni atension-miyu yan adios asta otro simana. Si Yu’os en fambinendisi, i Tata, yan i Lahi-ña, + yan i Espiritu Santo. Amen.

62

APROBECHA I MINAGOF November 10, 2002

Pa'go i XXXII Damenggo gi Otdinario na tiempo. I Ebanghelio machuchule' ginen i tinige' San Mateo, kapitulu 25:1-13. Guiya este na Ebanghelio anai ilek-ña si Jesukristo, "I rainon Yu’os siña ma'akompara yan dies na dama." Dama guini kumeke ilek-ña ayu i famalao'an ni guma'chuchungi i nobia gi ha'anen kasamiento. Para ta komprende este, maila' ya ta ekungok este un ratu.

Siriosu i kasamiento, enao mina' yanggen para u ássagua i taotao debi di u konsidera maolek. Yanggen para u kometen maisa siha i dos taotao para todu i lina'la'-ñiha debi di u makonsidera maolek yan u maprepara siha. Lao yanggen monhayan mafa'tinas i disision yan i preparasion-ñiha pues debi di u fanmagof ya u maselebra gi ha'anen fandanggo. I flores gi attat, i kanta siha, i chininan nobia, i sakon i nobio yan i kombiti siha, siknifikasion este na manmamagof siha.

Mas annok este na espiriton minagof gi fandanggo gi Antigu Testamento. Este siha na fandanggo dinidira un simana ya guaha nai mas, mangugupot, mambabaila, manmaneneska binu, yan otro klasen minagof. Kumeke ilek-ña na yanggen manfandanggo i Manjudios gi tiempon Jesukristo todu i tiempo bibu. Gi mandikike' na songsong siha taya' otro fina' minagof ki i fandanggo. I taotao siha masesen nangga i ha'anen fandanggo ya makontinunua i gipot unos kuantos dias despues di i fandanggo.

Enao mina' sesso si Jesukristo ha usa i fandanggo para u akompara yan i rainon Yu’os. Unu gi este siha na fina'akomparasion era i Ebanghelio ni ta hungok maproklama pa'go. Guiya este pot i dies na dama ni depotsi para siha u tinaggam i nobio yan para u makonne' gue' para i fandanggo. Yanggen macho'gue este pues siempre manmangingilili fallot mientras mangakanta yan mambabaila para i fandanggo. Guini na fina'akomparasion umatrasao fatto-ña i nobio; entonses mas anakko' na tiempo para u fañiñila' ha' i fallot. Anai matto pot fin i nobio, guaha na fallot esta para u fanmatai ha' sa' hokkok laña. Lao ti problema este para i sinko gi entre i dies na dama sa' manmañuñule' otro fraskiton laña. Lao i otro sinko manmaleffa. Manmamaisen para u fanmampresta didide' laña ginen ayu i manmañuñule' fraskito lao ti manmana'i. Uniku remedio macho'gue, manhanao para u fanmamahan. Anai manmatto tatte manmadingu esta siha ya esta matutuhon i fandanggo. Makandalu i petta ginen i sanhalom ya mankebra siha gi sanhiyong.

Este na fina'akomparasion guaha nai ta hungok masangan na ha siknififika i segundo na finatton Jesukristo. Ya i sinko na dama ni manhalom gi fandanggo ha siknififika ayu siha i manhalom i langet, pa'go i sinko ni ti manhalom ha siknififika i manmayogua sasalaguan. Hunggan siña ha' ta usa taiguini. Lao ti hokkok ha' ni este ma'usa-ña este na fina'akomparasion. Hafa ya ta usa taimanu ha' usa-ña si Jesukristo na ha akompara i rainon Yu’os yan i dies na dama, sinko giya siha ni manmañuñule' otro fraskiton laña manhalom gi fandanggo, ya i otro sinko ni didide' ha' na laña chinile'-ñiñiha mandimalas.

Gi hinasso-ku maolek este na akomparasion yan este na lina'la' anai manlala'la' hit. Guaha na taotao manmañuñule' mas ki i manisisita na pribension ya pot enao na achokka mamakkat i lina'la' masosodda' ha' minagof. Manmafatto siha gi gipot ya siña masodda' minagof gi lina'la'-ñiha. Ya guaha otro taotao siha ti masosodda' minagof-ñiha achokka mangaige siha gi halom gupot. Pues maila' ya ta usa este na fina'akomparasion gi taiguini. Si Jesukristo ha kombibida hit para i gipot yan ha sosoyo' hit na para ta aprobecha manmagof gi este na lina'la'.

Yanggen ilek-mu na fabulas di chispas ha' este, o sino ti gof dinanche gi taiguini ma'usa-ña este na fina'akomparasion, pues maila' ya ta atan i lina'la' Jesukristo ni sumangani hit pot este na fina'akomparasion. Hafa na klasen lahi gue'?

Ahe' ti fabulas di chispas lina'la'-ña si Jesukristo. Ahe' ti minagof babarias ha e'ega'ga'. Gof siriosu si Jesukristo ni matago'-ña as Tata-ña. Taddong ha kometen maisa gue' pot i obligasion-ña ya taya' siña

63

tumulaika. Lao ti nina'muyo' gue'. Ha gosa lina'la'-ña si Jesukristo. Hinasso-ku na ti lache para ta alok na magof gue' saonao gi gipot este na lina'la'. Hahasso na makondena gue' ni ayu siha i ilek-ñiñiha na manrilihiosu siha. Mampos ha gosa i lina'la'-ña. En hahasso anai masangani gue' na chumochocho yan mumaneneska yan i taotao kontribusion? Ha sangani siha na anai matto si Juan ya umayuyunat ilek-ñiha na atmariao gue'. Pa'go anai matto i lahen i taotao ya mali'e' gue' chumochocho yan mumaneneska ilek-ñiha na botlacheru gue'.

Taitai i Nuebu Testamento ya siempre un sodda' meggai na biahi ilek-ña si Jesukristo, "Cha'miyu fanma'a'añao", "munga manchathinasso", "na'fanmagof hamyo". Gi Uttimu Sena ha sangani i mandisipulu-ña: "Hu sangangani hamyo ni este siha kosa ki u iyon-miyu i minagof-hu ya u kabales i minagof-miyu." Esta para u matai ha' guini na momento ya kumuekuentos ha' gue' pot minagof. Siña ta alok mangingilili ha' gue' otro fraskiton laña, ya achokka mamadedesi gue', sisiña ha' gue' humalom gi gipot. Ha tungo' si Jesukristo taimanu sumilebra i lina'la'.

Impottante este na punto para i lina'la'-mu yan i lina'la'-hu. Sa' ti siña hit manmatto gi yahululo' gi che'cho'-ta pat sino gi relasion-ta yan taotao sin para ta nanangga na para ta fanmagof.

I lahi ni kana' ha pupuno' gue' macho'cho', ha chocho'gue enao sa' magof gue' yanggen ha na'fanguaha i familia-ña. I lahi ni mamadedesi sa' ha suhahayi i tentasion mamagof gue' sa' guinaiya ni asagua-ña. Taya' cho'cho' o sino obligasion u dinira apmam yanggen puru ha' cho'cho' ya taya' i taotao ha nanangga minagof, o sino puru ha' obligasion ya taya ha nanangga probecho.

Ta suhahayi i tentasion, achokka kalan yata para ta cho'gue, sa' manmanangongokko hit na guaha premio para ayu siha i manfi'et ni tinago' i Saina. Yanggen un na'suha i ta nanangga na premio pues taya' kumeke ilek-ña na para ta suhayi i tentasion.

Pot los uttimu, sin u fatta respetu, guahu bai sangan na si Jesukristo ha sosoyo' hit para ta fanmagof. Guiya mismo mumagof anai lala'la' gue'. Lao taimanu cho'gue-ña ni este? I minagof-ña mafatto ginen i taddong na hinengge-ña as Tata-ña. Ha sen hongge na ni ngai'an nai u diningu as Tata-ña ya este tumulaika i lina'la'-ña kalan fandanggo. Ha soyo' i mandisipulu-ña, ya pa'go ha sosoyo' hit na ta aprobecha ya ta fanmagof guini na lina'la'.

Si Yu’os ma'ase' ni atension-miyu yan adios asta otro simana. Si Yu’os en fambinendisi, i Tata, yan i + Lahi-ña, yan i Espiritu Santo. Amen.

----------

SI YU’OS MA'ASE' NI GINEFTAO-MIYU

Gi ma'pos na simana ta selebra i Tolo Santos yan i Ha'anen Animas. Ta hahasso i mañantos gi langet yan i manna'mase' na benditas giya potgatorio. Sumen bonitu yan areklao i simenteyu siha guini gi Diosesis. Ta nana'i dangkulo na agradesimiento si Mr Ramon S. Tenorio pot i ha guaguassan yan ha na'gagasgas i Simenteyon Bithen de Carmen todu i sakkan ginen i minagof-ña ya siempre ha' ta na'mgof gue' lokkue' ginen i limosnan-miyu para i simenteyu. Espesiat na si yu’os ma’ase’ para si Mayor Juan B. Tudela yan i Ofisinan Munisipat pot i dangkulon che’cho’-ñiha gi simenteyu. Ta nana’i lokkue’ agradesimento si Mrs. Gregoria yan Ignatia Cabrera pot i nina’en-ñiha PA system: speakers / amplifier. Dangkulo na si Yu’os ma'ase' para i pumalu siha lokkue' ni manmanayuda para mana’gasgas yan mana’asentado i simenteyu. Annok lokkue' na mansen magof hamyo ginen i limosnan-miyu para i mantension i Simenteyon Bithen de Carmen giya Chalan Kanoa. Si yu’os ma'ase'.

64

HAYI MATATÑGA? November 17, 2002

Ebanghelio para XXXIII na Damenggo gi otdinario na tiempo, machuchule' ginen i tinige' San Mateo, Kapitulu 25:14-30. Ilek-ña este na Ebanghelio na si Yu’os para u gagao hit kuenta pot i talentu ni ha na'i hit.

Kada mes matutuge' gi Reader's Digest magazine pot lina'la' manmatatnga na taotao. Siña ha’ esta un taitai este na estoria lao sin imbatgo malago’ yo’ hu ripiti. Gi Mayu na mes gi 1987 ma'imprenta lina'la' tres na taotao ni makonsidera na manmatatnga.

Si Bob Wieland unu guini gi matatnga na taotao ni matuge' estoria-ña. Anai humanao si Bob para Vietnam gi 1969 sais pie lineka'-ña yan 200 libras minakat-ña. Unos kuantos años despues anai matto tatte ginen Vietnam enao ha' i tres piet lineka'-ña yan 87 libras minakat-ña.

Despues di kasi enao i 20 años yan pa'go anai 40 años idat-ña saonao gue' umachikak giya New York ya ha na'fonhayan 26 miyas na destansia. Ha usa i kannai-ña para u na'ta'yok mo'na i tataotao-ña kalan taiguihi yanggen mangaloppe i kairo.

Estague' otro na estorian un matatnga na taotao. Si John Penne, un ritirao na kometsiante. Chagigo yan i asagua-ña nina'aye ni kanset na chetnot. Matai i asagua-ña lao guiya si John ti matai sa' kalan dumespasio kalamten-ña i chetnot.

Unos kuantos biahi gi simana debi di u hanao para i ospitat para u ma'amte. Sesso ha ripara na guaha manmalangu numanangga i bus para ma'udai-ñiha. Guaha na biahi nai chata'an pat sino mampos manengheng gi lugat anai mananangga i bus ya meggai giya siha manamko' ni manmamadedesi.

Humanao si John para i ofisinan i American Cancer Society ya ilek-ña, "Na'i yo' un kareta yan didide' salape' para gasolina ya bai boluntario komokonne' este siha i manmalangu para i ospitat ginen i gima'-ñiha." Esta dies años di ha chocho'gue este si John.

I uttimo na estoria-ta si Bubba Smith, un matatnga na taotao. Pot i sen maolek gue' na hihigando football mafaisen gue' para u kuekuentos gi television para u mafahan i setbesa. Gi 1985 makombida gue' ni Michigan State University, anai umeskuela gue', para u ma'onra. Sen magof gue' ha aksepta ya guiya yamo'nana gi likao para guatu gi eskuela-ña.

Anai guaguaguatu ha hungok i manhoben siha ginen un banda mane'essalao, "Tastes great!" Ya i otro banda mano'oppe, "Less filling!" Gof annok na meggai na manhoben ma'e'ekungok i fino'-ña. Guihi na pupuengi mampos baba siniente-ña sa' ha li'e' ayu siha mismo na manhoben durante i meeting na mambulachu.

Guihi mismo na momento mama'tinas disision. Para u para kumuentos gi television pot setbesa. Ilek-ña, "Guiya bumebende i famagu'on ni setbesa." Malingu gue' dangkulo na kantidan salape' pot este na disision-ña. Lao ti nina'lastima si Bubba ni este sa' ilek-ña na guaha mas impottante ki salape'.

Este na estorian Bob Wieland yan John Penne yan Bubba Smith klaru ha fa'nunu'i hit pot i sinangan Jesukristo gi pa'go na Ebanghelio. Nihi ya ta atan i fina'akomparasion ni ha usa si Jesukristo.

Un taotao humanao pumasehu chago'. Antes di u hanao, ha na'i i tentago'-ña siha salape' para u mana'fanganna ganansia durante i tumaigue-ña. I unu ha na'i meggai, ya i otro didide'. I primet na taotao maolek na kantida fina'tinas-ña; i segundo lokkue'. Lao i mina'tres taya' fina'tinas-ña.

65

Hayi este siha si Jesukristo kumeke ilek-ña? Hayi ayu na taotao i humanao para u pasehu? Hayi i tentago' siha? Hafa ha siknififika i salape'?

I taotao ni humanao pumasehu chago' era si Jesukristo, ni kamahulo' gi langet despues di resureksion-ña. Para u fatto tatte gi uttimon i tano'. I tentago' ha siknififika kada unu giya hita. I salape' ha siknififika i talento ni ha na'i si Yu’os kada unu giya hita. Durante i tumaigue'-ña ha ekspepekta si Jesukristo para ta usa i talento ni ha na'i hit para ta abiba yan para ta chalapon i raino-ña.

Ripara este na fina'akomparasion sa' ayu i mas didide' mana'i-ña na salape', o sino talento, ti ha cho'gue ni hafa para u guaha probecho i mana'i gue' na talento. Siña ha' buente hinasso-ña na pot i guiya mas didide' mana'i-ña na siña ha' madespensa gue'.

Gof diferensiao este na taotao yan ayu i ginen Vietnam, yan i nina'ye kanset guini gi estoria-ta. Siha este i dos siña ta alok achokka' taya' u macho'gue durante i lina'la'-ñiha sa' maninutet siha. Lao en lugat di taiguini, siha i dos animosu machocho'gue kuanto i siña ni talento ni tetehnan giya siha. Ya pot este na meggai na taotao mampinacha lina'la'-ñiha ni esorian-ñiha.

Pa'go maila' ya ta atan si Bubba Smith. Kalan atlibes este na kausa. Parehu gue' yan ayu i primet na taotao guini gi fina'akomparasion ni mana'i ni mas dangkulo na kantidan salape'. Mina' ilek-ta na matatnga si Bubba sa' nina'chathinasso gue' ni manera nai ha u'usa i talento ni mana'i gue'. Anai ha ripara na ti maolek usasa-ña ni talento ni gaige giya guiya ha na'matatnga gue' ya mama'tinas disision para u korihi i linachi-ña.

Siña ha' si Bubba ilek-ña ahe' ti isao-hu na mambulacho ayu siha na manhoben. Mambulacho siha sa' pot i mangada hinasson-ñiha. O sino siña ha' ilek-ña lokkue', "Yanggen ti guahu chumo'gue este na advertisement gi television pues siempre otro u chinegue'. Pues maolek-ña na guahu bai ma'apasi ni $100,000 gi sakkan pot este. Sa' manlimomosna ha' yo' para i manna'mase'."

Lao ti este bida-ña si Bubba. Ilek-ña na debi di u tulaika i palabras-ña ni ha konsidera na mas impottante ki salape' yan fama.

Ta konsidedera na manmatatnga este i tres na lalahi gi estoria-ta sa' siha mantestitigu pot i finana'guen Jesukristo ni ta hungok pa'go na Ebanghelio.

Yanggen ta ripara na mana'guaha probecho ni talento ni manmana'i siha achokka' maninutet, hita lokkue' siña ta faisen maisa hit: Taimanu usasa-ta ni talento ni ha na'i hit si Yu’os? Gof aproposito este na kuestion pa'go guini gi uttimon i kalendarion i Gima'yu’os.

Gi segundo na tinaitai ha sangani hit si San Pablo sa' hafa na aproposito este na kuestion. Ilek-ña, "Hafañe'los... hamyo mismo en sen tungo' na i Ha'anen i Saina para u fatto taiguihi i sakke ni mafatto an puengi. Pot enao na cha'-miyu fanmamaigo'..., lao maila' ya ta na'fanmaga'an hit."

Kumeke ilek-ña na para ta fanmagagao kuenta pot hafa bida-ta ni talento ni manmana'i hit. Ya siña ha' na ti u apmam ayu na ha'ani fatto-ña.

Si yu’os ma'ase' ni atension-miyu, yan adios asta otro simna. Si Yu'os en fambinendisi, i Tata, yan i + Lahi-ña, yan i Espiritu Santo. Amen.

66

HAYI POPBLE? November 24, 2002

Pa’go i Uttimu Damenggo gi Otdinario na tiempo. Pa’go lokkue’ i gipot Kristo Rai. Otro Damenggo i Primet Damengon Adbiento. I Ebanghelio machuchule’ ginen i tinige’ San Mateo, Kapitulu 25:31-46. Para ta komprende este na Ebanghelio, maila’ ya ta ekungok este un ratu.

Kao guaha nai en ripara yanggen en hingok pat en taitai i fina’akomparasion ni ha u’usa si Jesukristo na kalan mohon mañasaonao hit gi sinangan-ña? Yanggen ta taitai i fina’akomparasion kalan mohon ta lili’e’ hit gi espehos. Lao i imahen ni ta a’atan ti todu i tiempo gof parehu yan hita. Guaha na biahi na kalan maya’ lao sin imbatgo guaha achulele’-ta gi sinangan-ña. Ya pot enao na ilek-ta, "Nangga sa’ pot guahu este na estoria."

Mientras ta hahasso este, maila’ ya ta atan di nuebu este na Ebanghelio i pa’go ta huhungok maproklama. Ha sangan si Jesukristo na para u ta’lo magi ginen i langet matata’chong gi hilo’ un tronu ya mana’fandaña’ gi me’na-ña todu i taotao siha. Despues para u masepara i taotao siha gi dos grupu, un grupu gi akague-ña ya i otro gi agapa’-ña. Ayu i mangaige gi agapa’-ña manmasangani para u fanhalom gi rainon i langet sa’ ma’ayuda si Jesukristo gi nisisidat-ña. Nina’fanmanman siha ni este ya manmamaisen ngai’an nai macho’gue este na manmaolek cho’cho’ nu guiya. Mansinangani siha as Jesukristo na anai ma’ayuda i manna’ma’se’, guiya ayu i ma’ayuyuda.

Despues i taotao siha ni manestaba gi akague mahungok otro klasi. Ti mana’fanhalom siha gi rainon i langet sa’ ti mahungok anai manmagagao siha ni mamopble gi nisisidat-ñiha. Siha lokkue’ nina’fanmanman anai mahungok este ya manmalago matungo’ ngai’an nai manginagao siha as Jesukristo ya machatague gue’. Ya mansinangani siha as Jesukristo na anai machatague’ i mamopble guiya machatague’.

I. Estague’ i estoria ni ha sangan si Jesukristo. Maila’ pa’go ya bai faisen hao un kuestion. Manu nai gaige hao guini na estoria? Hafa na klasen taotao pat sino manu na grupon taotao nai gaige hao? Kao sasaonao hao yan ayu siha i manayudante gi agapa o sino gaige hao gi akague?

Ti gof siguru yo’, lao sigun gi siniente-ku lamayot patte giya hita ti mansiguru manu na banda nai mangaige hit, lao mantotoka hit gi ambos banda. Hunggan guaha na biahi nai manmanayuda hit ni pepble. Manmanna’i hit para siha. Manmanlimosna hit para i Gima’Yu’os, ya manma’ayuyuda i mamopble ni este na limosna. Ta kombibida i mamopble para i gipot-ta. Guaha na manmambisita hit gi ospitat. Ta apapasi i kontribusion-ta ya manma’ayuyuda i mamopble ginen este na salape’.

Todos hit guaha nai ta cho’gue este siha yan mas. Lao ta sen tungo’ ha’ lokkue’ na guaha nai ti ta atiende i pepble yanggen matto giya hita mangagagao ayudu. Guaha nai ta li’e’ i prohimu ni ha nisisita ayudu lao manmama’tinas hit eskusu pot no ta ayuda gue’.

Entonses, gi minagahet ti siña sen kabales ta alok na mangaige hit gi agapa’ o sino sen kabales mangaige hit gi akague. Siña ta alok na gaige un adeng-ta gi agapa’ yan gaige i otro gi akague. Guaha na biahi na manchattao hit; yan otro biahi mangeftao hit. Guaha na biahi na mansen ayudante hit ni otro taotao siha. Otro biahi ti mangof ayudante hit sa’ pot i meggai lokkue’ problema-ta. Pues siña ta alok na buente i talo’ gi entre i agapa’ yan i akague nai ta fanohge, gi entalo’ i manchattao yan i mangeftao. Guaha giya hita buente manotohge mas ha’ para i agapa’ o sino mas ha’ para i akague’. Lao todos hit mangaige gi dos banda, ya taya’ ni unu giya hita siña umalok na gaige gue’ enteramente gi agapa’ o sino enteramente gi akague.

Yaki taiguini este, siña ta faisen maisa hit, lao hafa kumeke ilek-ña este na fina’akomparasion. Hafa ha keke sangan guini si Jesukristo? Hafa malago’-ña para ta cho’gue? Hafa taimanu para ta korihi i lina’la’-

67

ta? Siña ta alok maila’ ya ta na’fanmafnot katsones-ta ya ta fanhanao huyong para ta ayuda todu i guaha nisisidat-ñiha. Hunggan sen maolek este na disision-ta, lao siguru yo’ na ti u dinira apmam siempre mano’son hit. Lao yanggen manfi’et hit ya ti mano’son hit hafa para humuyong-ta? Siempre ilek-ta na hita mas manmaolek na taotao gi tano’ sa’ todu i tiempo manlisto hit para ta ayuda i manna’mase’. Siempre ha na’fambanidosu hit ya uttimoña ni si Yu’os ti ta nisisita.

Hinasso-ku na debi di ta fana’lo tatte ya tataitai di nuebu este na fina’akomparasion, sa’ ti ta ripara i impottante na punto. Pot i gof ti mappot i mensahi na ta upos ha’ ya ti ta li’e’. Gi magahet, ahe’ ti dos grupon taotao ha’ gaige gi estoria; manestaba guihi tres. I manayudante na taotao, i ti manmalago’ manmanayuda, yan i numisisita manma’ayuda. Este i uttimu na grupu ti ta ripara; ya kalan na’manman na ti para ta ripara sa’ este na grupu si Jesukristo ha aidentifika gue’ yan siha. Ilek-ña yanggen en ayuda siha, guahu ayu i en ayuyuda, yanggen ti en atiende siha, guahu ayu i ti en atiende.

Gi hinasso-ku, este i impottante na punto guini na fina’akomparasion. Si Jesukristo ha po’lo gue’ gi bandan i mamopble guini gi tano’ ya ilek-ña, "Gaige yo’ guini na sumasaga. Estague’ siha taotao-hu. Iyon-ñiha yo’ yan iyo-ku siha." En ripara i siknifikasion-ña este? Ahe’ ti ha adahi ha’ yan ha ayuda ha’ si Jesukristo i mamopble, lao ha aidentifika gue’ yan i mamopble. Ahe’ ti otro grupu i mamopble ni manapattao ginen guiya, guiya yan i mamopble i mina’tres na grupu. Siha este ilek-ña si Jesukristo mañe’lu-ña. Anai manñalang siha, guiya ñañalang. Anai mantristi siha, guiya triristi. I nisisidat-ñiha, nisisidat-ña. Klaru ha sangan este, "Anai ñalang yo’ en na’chocho’ yo’," sa’ ha popo’lo na gaige gue’ gi entre i mamopble.

Para hafa ta puni, mañe’lu-hu, mangaige hit lokkue’ guini na grupu. Ahe’ ti mangaige i mamopble guihi guatu. Ahe’ ti mangaige guihi guatu i mamopble ya hita guini magi umayuyuda siha. Todos hit mañasaonao guini na grupu; un familia ha’ siha yan hita. Todos hit guaha nisisidat-ta.

Pot los uttimu, ni unu giya hita taya’ nisisidat-ña. Guahu hu nisisita i ayudu-mu, yan hagu un nisisita i ayudu-hu. Todos hit mañasaonao guini na grupu. Ayu ha’ taotao hiyong i ti malago’ saonao, lao achokka’ ilek-ña na ti saonao gue’, hunggan saonao ha’ gue’. Ta nisisita unu yan otro, achokka’ ti malago’ hao un atmiti.

Lao hayi ayu i pepble? Guahu; hagu; yan todu i taotao siha manchacha popble ha’ hit. Pa’go na ha’ani hu ayuda hao, lao agupa hu nisisita i ayudu-mu. Todos hit manmiembron un familia, mana’aguaiya unu yan otro, ta na’fanmañañagi otro taotao ni guinaha-ta, yan ta sangangani otro taotao siha ni nisisidat-ta. Yanggen ta komprende este ya ta tutuhon prumaktika nai siña ta alok na hunggan si Jesukristo guiya rai gi korason-ta.

Si yu’os ma’ase’ ni atension-miyu yan adios asta otro simana. Si Yu’os en fambinendisi, i Tata, yan i + Lahi-ña, yan i Espiritu Santo. Amen.

KAO NA'MA'ÑAO I PARA FINATTON JESUKRISTO? December 01, 2002

Pa'go i Primet Damenggon Adbiento. I Ebanghelio machuchule’ ginen i tinige’ San Marcos 13:33-37. Kada sakkan ta hungok este i Adbiento na palabra ma'esplika na kumeke ilek-ña "finatto". Ta u'usa para ta esplika i finatton Jesukrito gi tano'. Todos hit tumungo' este sa' kada sakkan ta selelebra i Pasgua. Lao guaha na biahi na ti ta ripara na tres na finatton Jesukristo este i ta sasangan. Hunggan ta sen tungo' i primet finatto-ña gi pasgua yan lokkue' ta tungo' ha' na para u fatto ta'lo gi uttimon i tano'.

Yanggen ta mensiona Adbiento insigidas ta hasso i finatto-ña si Jesukristo gi Pasgua. Este na ha'ani nai mangugupot hit ta selelebra i mafañagu-ña komu neni, ni finañagu as Santa Maria. Guiya este i mas na'magof na gupot gi sakkan ni ta selelebra. Lao durante i sakkan ta huhungok lokkue' gi setmon pot i

68

para u fatto ta'lo si Jesukristo gi uttimon i tano', ni guiya mismo ha prometi. Guiya este i ta a'agang i Segundo na Finatto-ña.

Klaru matuge' gi Santa Biblia este i dos na fiantto-ña. Esta para dos mit años desde ki maselelebra i mafañagu-ña. Lao yanggen para ta fampara guini ya taya' mas, pues kalan ta na'suha i ta ekspirerensia kada dia gi lina'la'-ta pot si Jesukristo. Debi di ta baba hinasso-ta ya ta li'e' unu ta'lo na finatto-ña. Debi di ta rekoknisa, ahe' ti i mafañagu-ña ha' gi maloffan na tiempo yan ahe ti i para finatto-ña gi uttimon i tano', sinoki kon todu i finatoto-ña kada dia gi lina'la'-ta.

Gi hinasso-ku estague' kumeke ilek-ña este na Ebanghelio. Ha sangan si Jesukristo pot un taotao ni ha prepapara gue' para u hanao pumasehu. Lao antes di u hanao, ha na'faninkatgao i tentago'-ña ni gima'-ña. Kada unu ha na'i espesiat responsabilidat-ña yan este na sinangan-ña: "Ti en tiñgo' ñgai'an nai para u fatto i ma'gas i gima', kao gi lemlem taotao, kao tatalo' pueñgi, kao yañggen mano'o' i gayu siha, kao gi dinekko' i atdao. Cha'-miyu sesedi na u fatto gotpe ya en fanginacha' manmamaigo'." Despues ha ta'luyi ya ilek-ña, "Hafa hu sañgani hamyo, hu sasañgan para todos: "Na'fanlisto hamyo!"

Entonses, hafa i mensahi guini na fina'akomparasion? Hafa i Saina ha sangangani hit pot este na lina'la'? Yanggen chaddek ta taitai este ta li'e' siempre na kumuekuentos si Jesukristo guini pot i segundo na finatto-ña gi uttimon i tano'; ya hunggan dinanche ha' lokkue' enao. Lao yanggen este ha' kumeke ilek-ña ya taya' otro, pues guaha dos problema-ta guini na fina'akomparasion. I fine'na na problema kalan mohon ti fotmat i hinenggen-ta, sa' kalan hit ayu i ti manresponsapble na famagu'on ni manhugagando ya gotpe mampara para u macho'gue i manmatago'-ñiha sa' esta para u fatto si tata yan si nana ya trabiha ti mana'fonhahayan i tareha-ñiha. Lao todos hit ha' tumungo' na mas fotmat ki este i hinengge-ta as Jesukristo.

I otro problema - yanggen hokkok ha' kumeke ilek-ña este na fina'akomparasion era pot i segundo o sino i uttimu na finatto-ña, pues kalan huegu i hinenggen Kilisyanu para i manmofo'na na Mangilisyanu. Kalan mohon ha sangani si Jesukristo i taotao-ña para u manangga i finatto-ña ya humahnanao ha' ti matto. Pues gi hinasso-ku debi di ta atan sa' guaha mas kumeke ilek-ña fuera di este i dos na finatto-ña. Gi kinemprende-ku siguru ha keke baba hinasso-ta i Saina na mafatto gue' giya hita lokkue' gi todu i manmasusesedi yan ta ekspirerensia gi lina'la'-ta kada dia. Ta siesiente ha' na gagaige gue' todu i tiempo gi uriya-ta; ya debi di ta espiha gue', ahe' ti guihi hulo' gi halom mapagahes agupa', lao ta espiha gue' gi chalan Luta, Tinian yan Saipan pa'go na ha'ani.

Buente i mas prisisu para ta cho'gue era i para ta tutuhon pumo'lo gi hinasso-ta na este i finatto-ña ahe' ti aminasu, sino ki promesa. Anai ilek-ña cha'miyu "fanginacha' manmamaigo'" ahe' ti ha espapanta hit sino ki para ta fanmagof manmannangga. Sa' ahe' ti polisman ta nanangga para u aresta hit. Amigu-ta gue' ni ha tungo'ña hayi hit ki hita mismo, ni ha sen guaiya hit mas ki ta miresi.

Ripara hafa bidan-ñiha i taotao siha gi tiempo-ña anai tuma'lo tatte giya siha despues di apmam taigue' gue'. Matto un biahi gi gima' Martha yan Maria anai manlulutu despues di i finatai i che'lon-ñiha. Guaha sumangani si Martha na mamamaila' gue'. Esta siña mali'e' gue' cha'go papa' gi chalan; si Martha ti siña ha nangga gi halom guma' sino ki humnao papa' para u taggam gue'. Si Maria sumaga ha' gi halom guma'. Anai ha hungok na esta matto, mangaloppe ya humanao guatu gi uriyan i Saina. Hokkok ha' piniti-ña pot i attrasao matto si Jesukristo. Otro biahi mana'adulalak i famagu'on guatu giya guiya. I manapostoles macho'gue kuanto i siña para u mana'para lao ilek-ña sotta i famagu'on ya u fanmatto magi giya guahu.

Maila' ya bai na'fakpo este na kuentos-hu gi taiguini. Anai lala'la' i Saina mana'achikak i taotao siha guatu giya guiya. Ya sa' hafa na para ta fanma'añao? Kao guaha tinilaika giya guiya? Ni nungka. Guiya parerehu ha' gue' nigap yan pa'go yan para todu i tiempo. Pat kao sen ti mamparehu hit yan ayu siha na taotao gi tiempon Jesukristo? Siguru yo' na hunggan mamparehu ha' hit. Hokkok ha' sa' siha masodda' gi as Jesukristo un fiet na amigu ni fumana'gue siha hafa kumeke ilek-ña guinaiya yan manasi'i. Yanggen ta komprende este pues siempre ta li'e' i finatto-ña komu promesa, ahe' ti espanto.

69

Si yu’os ma'ase' ni atension-miyu yan adios asta otro simana. Si Yu’os en fambinendisi, i + Tata, yan i Lahi-ña, yan i Espiritu Santo. Amen.

MAILA' YA TA FANA' I ISAO-TA December 08, 2002

Pa'go i II Damenggon Adbiento, Añu B. I Ebanghelio machuchule' ginen i tinige' San Marcos, kapitulu 1:1-8. Guiya este na ebanghelio anai ilek-ña si San Juan Bautista, "'Na'listo i chalan i Saina."

Guaha unu che'cho'-ña si San Juan Bautista ha na'sen takkilo', era i para u prepara i taotao siha para i finatton i Kristo. Patte guenao na preparasion era i para u na'sen annok na chatpa'go i isao-ñiha i taotao. Ya hunggan meggai na taotao mali'e' este na dangkulon minagahet. Matutuhon manmañotsot yan makonfesatñaihon i isao-ñiha. Marialisa na yanggen para u guaha relasion-ñiha yan i Kristo debi di u mana'fangasgas korason-ñiha yan u guaha tinilaika gi lina'la'-ñiha.

Este na takkilo' mensahi ni ha proklama si San Juan guihi na tiempo babali ha' pa'go na tiempo. Yanggen para u fatto si Jesukristo guini na tano' anai manlala'la' hit yan para u sodda' areklao na lugat pa'go gi tiempo-ta, pues debi di hagu yan guahu ta fana' yan ta arekla i isao-ta. Lao para hafa ta puni, ti yata chumo'gue este. Ti la'yiyi manñge' para ta fana' i isao-ta, ya yanggen siña ga'otta ha' lumetki este na ekspirensia. Unu ha' nai siña ta letki este, era i para ta fanmandagi, sa' todu i tiempo sasaonao i isao gi lina'la'-ta. Este na palabras i isao, ahe' ti i Biblia ha' nai gaige. Ahe' ti i mamprofetas ha' sumangan. Ahe' ti i gima'yu'os fuma'tinas este na palabra.

Sen magahet na hunggan guaha isao guini gi tano'. Yanggen guaha duda-mu pues cha'mu espipiha gi Biblia, munga ma'espiha gi lepblon relihion, hokkok ha' para un cho'gue, atan i lina'la' taotao. Taitai i gaseta siha. Mas meggai na isao manmasasangan gi gaseta siha kada dia ki todu i siña ha sangan si pale' gi setmon-ña. Fata'chong ha' gi me'nan television gi 6:00 gi pupuengi ya un ekungok i gaseteru. Ripara ha' sa' kada dia manmamamahan i taotao atdaba yan seladura para u makandalu gima'-ñiha. Guaha manana'yi teking lulok bintanan-ñiha. Yanggen hu faisen hao manu nai gaige i yaben kareta-mu siempre ilek-mu gaige gi betsa-mu. Ya hu tungo' yan un tungo' sa' hafa. Sa' i manmama'titinas kareta masen tungo' na sen magahet na guaha isao guini gi tano'. Kumeke ilek-ña siña ha' masake kareta-mu.

Anai tumotohge si San Juan guihi gi kanton Saddok Jordan ya ha agang i taotao siha para u fanmañotsot ni isao-ñiha, hunggan masen tungo' hafa kumeke ilek-ña. Ha sen danche i sinangan-ña. Sen magahet na guaha isao guini na lina'la' ya debi di ta fana', sa' enao ha' nai siña mansiriosu hit para ta fana' si Jesukristo.

Este i pa'go monhahayan ta sangan na klasen isao guiya este siha i ti mappot ta li'e' na klasen isao. Meggai giya hita ilek-ta na taya' nai ta cho'gue este siha na klasen isao. Taya' nai manmañakke hit karetan taotao ya ni ngai'an buente nai ta chogue este. Taya' nai manmanhatme hit tenda pat gima' otro taotao. Ya buente ni ngai'an nai ta cho'gue este. Taya' nai ta na'lamen i prohimu ya para ta fanma'aresta ya para u annok i na'an-ta gi gaseta.

Yanggen ta atan este siha i esta ta sangan na isao siña ha' ilek-ta ahe' ti mañasaonao hit gi probleman isao, ya kalan hit mangaige gi chago' ta a'atan ayu siha i mani'isao guihi guatu. Lao yanggen matto si Jesukristo, ti siña ta sangan taiguini. Guiya ha a'atan i ti a'annok na hale' i bidada-ta ya ha sosodda' gi sanhalom-ta ayu i tumututuhon i isao siha. Ha kombibida hit para ta fanhita yan guiya umatan i halom korason-ta yan i halom titanos-ta ya ha fanunu'i hit na este na lugat anai matutuhon i isao siha.

Anai lala'la' si Jesukristo ti meggai fino'-ña pot i isao i sensen, lao meggai ha sangan pot isao gi espiritu. Ahe' ti pot ti prisisu gue' ni ayu i mas a'annok na isao. Hokkok ha' na ha cho'gue taiguini sa' pot malago' para u ataka i problema en lugat di i resuttan i problema. Ya ha sen tungo' na gaige i probleman isao gi

70

halom korason taotao. Guaha na taotao ha na'a'annok i lache-ña sa' pot i ha chocho'gue manchatpa'go na cho'cho' yan ha kokontra i lai i tano' siha. Otro taotao ti gogof annok isao-ña sa' ha chocho'gue kalan respetao na cho'cho' yan kalan ti ha kokontra i lai. Lao todos hit guaha nai mambasnak guini na isao. Guaha defekto gi sanhalom-ta na ta chatlili'e' yan ta na'puputi otro taotao, yan ta abubusa otro taotao yan guaha na biahi na hita mismo.

Meggai guini hu sangan na klasen isao siha ya kalan mohon taya' mamaolekña i taotao siha; lao debi di ta li'e' este siha kosa ki siña ta tutuhon manmanangokko ta'lo. Estague' kumeke ilek-ña i finatton i Kristo, era i para ta fana' yan ta li'e' na hunggan sen magahet na guaha problema-ta ya ginen i ayudu-ña siña ta na'tunas i problema-ta. Hayi giya hita pa'go na ha'ani siña sumangan na ti ha nisisita este na klasen ayudu? Guaha giya hita manisao sekretu ya ginen enao na isao na ti siña hit manafa'maolek yan i bisinu-ta yan i manatungo'-ta. Maila' ya ta atmiti na kada unu giya hita mañasaonao, maseha didide', guini na problema, ya todos hit ta sen tungo' ha' este.

Si yu'os ma'ase' ni atension-miyu, yan adios asta otro simna. Si Yu'os en fambinendisi, i Tata, yan i + Lahi-ña, yan i Espiritu Santo. Amen.

I AMKO' NI NGUMANGAYO December 15, 2002

Pa’go i III Damenggon Adbiento. I Ebanghelio machuchule’ ginen i tinige’ San Juan 1:6-8, 19-28. Guini na Ebanghelio ta hungok si San Juan Bautista ha sangan,

"Guahu 'un bos gi disietto, ume'essalao:

Na'tunas i chalan i Saina!' "

Para ta komprende maolek este na sinangan-ña maila' ya ta ekungok este na estoria. Estaba giya New Guinea un amko' na taotao. Ma'emplelea gue' gi hospitat mision para u ngayu para i kusina. Todu i atungo'-ña ma'a'agang gue' i Ngumangayu' sa' guiya chumuchule' guatu i hayu para i feggon.

Kada dia yanggen monhayan gue' ngumayu humahanao tenga para ayu na lugat anai i manmalangu mananangga i dokto para u fanriniseta ya ha taitatayi siha ginen i Ebanghelio. Kada guaha lugat-ña siempre gaige guini para u chalapon i hinengge-ña as Jesukristo gi entre este siha i manmasasa'pet.

Lao un dia gotpe ha' guaha masusedi. Ha tutuhon mumaya' fanatan-ña. Fine'na, ilek-ña na buente temporario este ya siempre ha' magong, lao ti magong.

Entonses humanao para u ali'e' yan i dokto. Despues di ha riseta i mata-ña, i dokto ha toktok guatu i amko' ya ilek-ña, "Despensa amigu sa' guaha ti maolek na notisia para bai sangani hao. Kumeke bachet hao, ya taya' amot-ña."

Nina'desganao este i ngumangayo ni este na sinangan i dokto ya ilek-ña, "Esta yo' amko'. Ya para bai bachet yan para taya' setbe-ku lokkue'?"

Gi sigiente dia ti matto macho'cho'. Ti matto ha' ta'lo gi agupa'-ña. Malingon hanom gue'.

Unos kuantos dias maloffan, un patgon ni ha chulili'e' na'-ña i amko' ha sangani i dokto na gaige gi otro punta gi isla guiguiya ha' na maisa.

71

Entonses humanao i dokto para u espiha i amko'. Anai umasodda' i dos ilek-ña i dokto, "Hafa bidada-mu guini?" Manoppe i amko', "Desde ki un sangani yo' na para bai bachet duru hu taitai yan hu dememomoria i mas manimpottante na patte gi Ebanghelio. Esta hu dememoria ayu na patte i mafañagu-ña si Jesukristo yan unos kuantos na milagro ni ha cho'gue, yan i ha sangan na fina'akomparasion, yan kon todu i finatai-ña yan i luma'la'-ña ta'lo.

"Hu ripipiti este siha gi me'nan i patgon para bai na'siguru na dinanche hafa hu sasangan. Na'i yo' un simana ta'lo, dokto, ya siempre matto yo' tatte gi hospitat para bai kuentusi i manmalangu siha pot si Jesukristo.

Gof umafakcha' este na estoria yan i tinaitai siha ni ta hungok maproklama pa'go na Damenggo.

Gi primet na tinaitai ilek-ña i profeta as Isaias:

"I espiriton i Saina as Yu'os gaige gi hilo'-hu,

sa' esta ha ayek yo';

Esta ha na'hanao yo' para bai chuli'e' maolek na notisia

ayu siha i manakpapa'."

Este i mismo na espiriton i Saina matto gi este na amko' anai matakpangi yan makonfitma gue'. Ya ha siente na ma'agang gue' para u chuli'e' maolek na notisia ayu siha i manakpapa' yan i manmamadedesi.

Umafakcha' lokkue' este na estoria yan i segundo na tinaitai, anai ha sangan si San Pablo na,

"Cha'-miyu ñiñikot i Espiritu."

Este na amko' ahe' ti ha ñukot i Espiritu. Achokka anai ha tungo' na para u bachet ha cho'gue kuanto i siña na empeño para u sigi ha' kumuentos i Espiritu ginen guiya para i taotao siha.

Pot los uttimu umafakcha' lokkue' este na estoria yan i Ebanghelio ni ta hahasso i setmon San Juan Bautista.

Anai hohoben ha' gue' humanao si San Juan para i disietto para u estudia i Fino' Yu'os. Despues humuyong ginen i disietto para u setmuni i taotao siha pot i Fino' Yu'os ya ilek-ña,

"Guahu 'un bos gi disietto, ume'essalao:

Na'tunas i chalan i Saina!' "

Gi estoria-ta, este i amko' lokkue' humanao para i disietto para u dememoria yan para u kontempla i Fino' Yu'os. Guiya lokkue' humuyong ginen i disietto anai matto tatte gi hospitat para u kuentusi i manmalangu pot si Jesuskristo.

Este i dos na estoria, si San Juan yan i amko', estorian tiempon Adbiento este. Guini gi estorian-ñiha i dos, madeskubre i Kristo sa' pot i ma'kontempla i Fino' Yu'os gi korason-ñiha. Estorian dos na taotao este ni despues di madeskubre i Kristo machalapon gi otro taotao siha.

72

Maila' fan pa'go ya ta eksaminan maisa hit hafa bidada-ta. Debi di ta cho'gue lokkue' hafa bidan-ñiha si San Juan yan este i amko'.

Hahasso na esta gaige i espiriton i Saina giya hita lokkue'. Esta hit manma'oleos yan mana'fanhanao para ta chuli'e' maolek na notisia i manakpapa'.

Anai manmatakpangi hit yan anai ta risibi i konfitmasion manmatago' hit lokkue' para ta cho'gue hafa bidan-ñiha este i dos. Hita lokkue' debi di ta dingu i disietto gi lina'la'-ta ya ta proklama i Fino' Yu'os gi otro taotao siha.

Lao hafa na klasen cho'cho' ha tatago' hit para ta cho'gue?

Tres klasen cho'cho' siña ta cho'gue.

Fine'na, siña ta proklama i Kristo gi gima'-ta, gi familia-ta. Ta na'beste i Belen pat i Niño gi sala gi gima'-ta kosa ki munga hit manmaleffa ni mamamaila' na gupot.

Segundo, ta planuyi para ta asiste i Misan Aguinaldo ni para matutuhon agupa’. Megai na taotao manhohosme Misan Aguinaldo kalang regalon-ñiha ni Niño Jesus.

Tetset, bonito ta espiha hayi na atungo'-ta ni ti ha hahasso humosme Misan Pasgua ya ta kombida gue' para ta fanhita guatu gi gima'yu'os. Pi'ot yanggen taya' ma'udai-ña ta ofresi gue' para ta konne' para i Misa. Ilek-ñiha na i mas manmagof na Mangatoliku era ayu siha i ginen manatsado gi gima'yu'os ya mana'lo tatte. Ilek-ñiha lokkue' na mayoria ni manatsado mana'lo tatte gi gima'yu'os sa' pot i guaha atungo', pat amigon-ñiha kumombida siha. Pues maila' ya ta aprobecha este na tiempon Pasgua ya ta fanmangombida ni manatsado para i Misan Pasgua.

Pues nihi ya munga hit numangga na para si Pale' ha' na maisa u fangombida. Nihi ya ta fana'ayuda unu yan otro. Yanggen todos hit manmangombida pues siempre mas meggai ni manatsado na Mangatoliku mana'lo tatte gi mapraktikan i hinenggen-ñiha.

Pot los uttimu, hahasso i tinaitai siha ginen i Santa Biblia yan i estoria-ña este i amko' ni ta hungok pa'go. Puru este siha imbitasion para ta fañaonao komu manmiembro gi taotao Adbiento.

Imbitasion este siha para ta komprende na gaige i Kristo gi sanhalom-ta yan para ta sangani otro taotao siha na gaige lokkue' i Kristo giya siha.

Imbitasion este siha para ta fanmama' un ma'lak na kandet guini gi hemhom na tano', parehu yan si Juan Bautista yan i amko'.

Si Jesukristo mismo kumombibida hit ginen este siha na tinaitai ni ta hungok gi Misa. Hita pa'go la'mon kao para ta dalalaki.

Si yu'os ma'ase' ni atension-miyu yan adios asta otro simana. Si Yu'os en fambinendisi, i Tata, yan i + Lahi-ña, yan i Espiritu Santo. Amen.

----------

POT FABOT TAYUYUTI I ANTEN PALE’ ROGER – Todos esta tumungo’ na matai si Pale’ Roger P.T. Tenorio. Dangkulo malingu-ña i Diosesis Chalan Kanoa pot i finatai-ña. Espesiat si Pale’ Roger para guahu pot este siha na rason. Humami gi eskuela yan si tata-ña as Jose A. Tenorio. Guahu tumutuhon gue’ gi preparasion-ña para pale’ yan hu dirihi mo’na i eskuela-ña. Guahu umotdena gue’ Pale’. Bula titulo yan responsabilidat ha kakatga, tat komu Chancellor, Judicial-Vicar, Superintendent of Catholic

73

Schools, Pastot Kristo Rai, Spiritual Director of Christian Mothers, yan guaha ta’lo otro siha. Lao este siha na che’cho’-ña siempre guaha otro siha manma’apunta para u chine’gue. Una kosa ni ti siña ta apunta ni hayi para u tinahgue si Pale’ Roger: era i a’gang na chalek-ña ni todos hit ha na’fanmamagof. Pot fabot hahasso gi tinayuyot-miyu para u ma’ase’ i Saina ni anti-ña, yan cha’miyu fanmaleleffa ni manhoben na mañe’lu-ña. I enteru-ña si Pale’ para i Sabalu, Desiembre 14, 2002 gi oran 11:00 gi ega’an, gi Katedrat Bithen de Carmen. Na’i gue’ taihinekok na deskanso, O Asaina.

KANNAT I GRASIAN YU'OS December 22, 2002

Pa'go i IV Damenggon Adbiento. I Ebangelio machuchule' ginen i tinige' San Lucas, kapitulu unu. Guiya este na Ebangelio anai matto i Atkanghet as Gabriel ya ha faisen si Santa Maria kao magof gue' para u nanan Jesukristo. Anai ilek-ña si Santa Maria, "U macho'gue giya guahu taimanu ha' i sinangan-mu" humuyong gue' mama'kannat i grasian Yu’os para hita.

Para ta komprende i siknifikasion-ña este maila' ya ta ekungok un ratu este na estoria. Gi 1987 guaha un estoria umannok gi gaseta. Pot un palao'an este ni na'an-ña si Anne Donahue. Magradua gue' gi Georgetown University ya bumoluntario para u facho'cho' gi Covenant House giya New York.

Este i Covenant House matutuhon pot i para u mana'fanliheng ayu siha na manhoben ni manmalagu ginen i gima'-ñiha ya mabebende siha pot i para u fañocho. Kada puengi gi oran alas 10:00 si Anne yan otro boluntario makatga gi karetan cho'cho' gi Covenant House unos kuantos galon chokolati na gimen yan inafuyot nengkanno. Mapenta gi este na karetan cho'cho' i figuran paluma, i matkan i Covenant House.

Dos oras kada puengi lumililiko' este na kareta. Lumililiko' gi chalan i siuda anai mangaige este siha na manhoben i bumebende siha. Lumililiko' ya manmanana'i na'-ñiha yan gimen-ñiha este siha na famagu'on ni manlalaoya gi chalan.

Siña ha' mamaisen hao, lao kao hafa para probecho-ña este i ha chocho'gue si Anne?

Si Anne mismo ha oppe este na kuestion: "Manhahanao ham guatu guihi gi chalan sa' in tingo' ha' na este siha na manhoben ti matungo' hafa Covenant House yan meggai taya' nai mahungok pot este.

Ilek-ña si Anne, guaha ta'lo otro rason na manhahanao ham huyong gi chalan. Manmlago' ham para u na'tungo' ayu siha na famagu'on na guaha taotao interesao nu siha. Ahe' si Anne ti para u famahan o sino para u fambende.

Gi anai pa'go ha tutuhon este na cho'cho' nina'sen baba siniente-ña si Anne. Ha kuestiona "hafa na klasen Yu’os para u sedi na para u fanmamadesi este siha na famagu'on?" Lao depsues ilek-ña, "Pot los uttimu hu komprende ... ahe' ti para u tunok papa' si Yu’os ya para u fanu'i este siha na famagu'on ni guinaiya-ña. Ahe' ti si Yu'os, sino ki ginen hita nai debi di ta na'annok i ginefli'e' Yu'os."

Bonitu este na estorian Anne. Pi'ot este i uttimu dos na sinangan-ña.

Finena', ilek-ña, "ti para u tunok papa' si Yu’os ya para u fanu'i este siha na famagu'on ni guinaiya-ña."

Hunggan magahet gof dinanche gue'. Esta si Yu’os ha cho'gue este gi anai ha na'hanao i Niño Jesus. Estague' kumeke ilek-ña tiempon Adbiento. I para ta prepara para ta selebra este na tatkilo' na misterio.

74

Segundo, "ginen hita nai debi di ta na'annok i ginefli'e' Yu’os." Gof dinanache ha' ta'lo si Anne ni este na sinangan-ña. Anai kumahulo' si Jesukristo gi langet, despues di luma'la' ta'lo, ha tago' hit para ta kontinua i che'cho'-ña.

Taimanu ha' na ha cho'gue si Yu’os i che'cho'-ña ginen as Jesukristo anai matto guini gi tano', taiguenao ha' lokkue' na ha tago' hit si Jesukristo para ta cho'gue i che'cho' Tata-ña guini gi lina'la'-ta. Hita para kannat grasian Yu’os para otro taotao siha taimanu ha' na si Jesukristo kannat grasian Yu’os.

Estague' bidada-ña si Anne mientras ha susugon i karetan Covenant House luchan-kattan guihi siha na chalan giya New York. Guiya kannat grasian Yu’os para este siha na famagu'on.

Ha chocho'gue si Anne ayu i ha cho'gue si Santa Maria ni ta hungok mataitai gi Ebanghelio. Ilek-ña hunggan anai kinembida gue' as Yu’os para guiya kannat grasian Yu’os para i taotao siha pa'go na tiempo.

Ayu i ha cho'gue si Anne yan ayu i ha cho'gue si Santa Maria, hita lokkue' debi di ta cho'gue.

Guaha na beses na manmaleffa hit na yanggen para u mafañagu di nuebu si Jesukristo guini gi tano' pues debi di u mafañagu gue' ginen hita.

Guaha na beses na manmaleffa hit na si Yu’os esta ha faisen hit para ta fanmanoppe taiguihi i ineppe-ña si Santa Maria anai ilek-ña: "Guahu i tentago' i Saina. Umafa'tinas giya guahu taimanu i sinangan-mu."

Sigun gi kustumbre-ta kalang gupot famagu'on este i Pasgua. Estague i tiempo anai ta fanana'gue i famagu'on-ta ni este i tatkilo' na misterio na si Jesukristo muna'fatto si Yu’os papa' guini gi tano'.

Lao ti siña na para ta fampara guini. Yanggen mampara hit guini pues lamitaha ha' gi estorian Pasgua ta sangani i famagu'on.

Debi di ta na'fonhayan. Debi di ta fana'gue siha sa' hafa si Yu’os na ha na'fatto Jesukristo guini gi tano'. Era pot i para u fana'gue hit na hita lokkue' debi di ta fana'gue otro taotao siha pot si Yu’os.

Estague' i mas tatkilo' na leksion guini gi tano'. I rason na este i mas tatkilo' na leksion sa' pot si Jesukristo hit fumana'gue ni este ginen i finatto-ña guini gi tano'.

Este na leksion ha tatago' hit na debi di ta na'fatto si Yu’os gi otro taotao siha, taimanu ha na si Jesukristo muna'fatto si Yu’os giya hita.

Este na leksion ha tatago' hit para ta na'fatto si Yu’os gi otro taotao siha taimanu ha' bida-ña si Santa Maria na ha na'fatto si Yu’os giya hita gi ineppe-ña ni anghet ni ta hungok gi ebanghelio pa'go.

Este na leksion debi di ta ripipiti kada sakkan guini gi tiempon Adbiento yan ta fanana'gue i famagu'on-ta.

Este na leksion lokkue' siempre manmana'i hit ginen otro taotao siha pa'go na Pasgua, kosa ki hita lokkue' u ta tungo' manmanna'i otro taotao siha.

Estague' bida-ña si Anne Donahue kada puengi guihi gi chalan gi siuda giya New York. Estague' bida-ña si Jesukristo guini gi tano'. Estague' debi di ta cho'gue guini gi tano'.

Pot los uttimu, yanggen ti ta komprende este na leksion ya ti ta fana'gue i famagu'on, pues siempre maloffan ha' sin probecho para hita este na gupot i ta prepapara para ta selebra.

75

Si yu’os ma'ase' ni atension-mu yan adios asta otro simana. Si Yu’os en fambinendisi, i + Tata, yan i + Lahi-ña, yan i + Espiritu Santo. Amen.

----------

I SANTOS LISAYU – I Santo Papa as Juan Pablo II gi tinige’-ña APOSTOLIC LETTER ROSARIUM VIRGINIS MARIAE pot i Lisayon Santa Maria gi Oktubre 16, 2002 ha onra kuanto i siña este na debosion para si Santa Maria. Guiya lokkue’ si Santo Papa dangkulo debosion-ña ni Santos Lisayu. Pues pot i para u mas gatbo este na debosion guaha ha umentayi mas misterio. Gi pa’go ta hahasso kinse (15) na misterio gi kada ta tayuyot i Lisayu: sinko misterion minagof, Lunes yan Huebes; sinko misterion piniti, Mattes yan Bietnes; yan sinko misterion mina’lak, Mietkoles, Sabalu yan Damenggo.

I Santo Papa malago’ na u guaha sinko ta’lo na misterio. Este na misterio ha fana’an Misterion Inina: I fine’na misterio, I matakpange-ña si Jesukristo giya Jordan; I segundo na misterio, anai ha na’matungo’ gue’ gi fandanggo giya Cana; I tetset na misterio, anai ha proklama i Rainon Yu’os; I mina’ kuatro na misterio, I Transfigurasion-ña; I mina’ sinko na misterio, anai ha establesi i Eukaristia. Este i Misterion Inina para u masangan gi Huebes na ha’ani. Pot este na i misterion minagof gi Huebes para masangan o sino mamuebi guatu gi Sabalu na ha’ani. Ha sosoyo’ hit i Santo Papa para ta na’fandibotu hit tumayuyot i Santos Lisayu yanggen siña kada dia. Ha fafaisen lokkue’ enteru i tano’ para ma deklara desde Oktubre 2002 asta Oktubre 2003 komu Añu Santos Lisayu.

SAGRADA FAMILIA December 29, 2002

Pa'go guini gi Damenggo despues di i Pasguan Noche Buena ta selelebra i gipot i Sagrada Familia. P'ago lokkue' i uttimu na Damenggo gi sakkan antes di i nuebu na Sakkan, yan Siklo, yan Millennium. Para ta komprende i siknifikasin-ña este na gupot maila' ya ta ekungok este na estoria un ratu.

Guaha un palao'an ni mamangge estoria ya maimprerenta gi mas di 900 na gaseta giya America. Lahyan na taotao ni tumataitai i tinige'-ña makattatayi gue'. Estague' unu na katta ni ha risisibi diario ginen unu na nana.

Ilek-ña este na nana, "Achokka' ilek-ña i kotte na taya' remediu-ña i lahi-hu, guahu ilelek-hu na hunggan guaguaha ha' remediu-ña. Lahi-hu gue', ya taimanu para bai disatiende gue'? Hu tayuyuyuti gue'; hu tatañgse gue'; hu akonseseha gue' para u na'i animu. Ya mas ki este siha, hu guaiya gue'."

Estague' otro katta ni tinige' un patgon palao'an ni 12 años idat-ña: "Guahu esta kalan un nana yo'. Yanggen humanao para u facho'cho' si nana-hu gi restaurant guahu pumupulan i tres mandikike' na mañe'lu-hu lalahi yan famalao'an.

"Hu kokonne' siha para i kemmon. Hu sasaosao gui'eñg-ñiha. Hu na'fañesena siha. Hu na'fanmamaigo' siha. Hu chocho'gue todu i che'cho' un nana.

"Lao en lugat di bai mana'i agradesimiento, machatli'e' yo' ni mañe'lu-hu. Guaha na biahi nai hu diseha na maolek-ña matai. Guaha na biahi nai hu hasso malagu ginen i gima'-mami, lao ti hu tuñgo' manu yo' guatu yan hafa para bai cho'gue.

"Yañggen dañgkulo yo', ni ngai'an nai bai hu nana. Este i mas hu chatli'e' na cho'cho' gi tano'."

Parehu na leksion gaige gi este i dos na ehemplo. Todu este i dos mappot. Mappot para numana yan mappot para pumatgon gi familia.

76

Guini na ebañghelio i ta huhuñgok maproklama pa'go na ha'ani ta sodda' na kon todu i Sagrada Familia guaha lokkue' probleman-ñiha.

Pot ehemplo gof dangkulo piniten-ñiha si Santa Maria yan si San Jose anai mahungok hafa para u masusedi ni patgon yanggen dangkulo. Ilek-ña si Simeon, "Inayek este na patgon as Yu'os para i pineddong yan kinahulo' meggai giya Israel; u fama'un siñat gue' ginen as Yu'os ni meggai na taotao u kinentra, ya guiya u nina'fanannok todu i sikretu na hinasso. Ya i piniti-mu kalang un malaktos na sapble, u yinamak i korason-mu."

"(Si Santa Maria) ti ha komprende kabales hafa sinañgan-ña si Simeon ... (Entonses) ha nunok ha' este siha gi korason-ña.

Chamappot ha' pueston-ñiha si Santa Maria yan si San Jose.

Durante i ritiro (o sino ehetsision ante) para i mantata siha ilek-ña si Pale' gi setmon-ña, si San Jose guiya i prefekto na modelu para todos i mantata.

Despues di i setmon-ña si Pale' matto guatu giya guiya un tata ya ilek-ña: "Kon respeto, Pale', lao ni ñgai'an nai siña un akompara si San Jose yan hami ni manotdinario na tata.

En primet lugat guiya santos gue'. Segundo, taya' isao-ña i asagua-ña. Tetset, i lahi-ña Lahen Yu'os gue'. Guahu ti la'yiyi tunas yo', i asagua-hu ti gof santos, ya i patgon-hu ti Lahen Yu'os gue'."

Manoppe si Pale' ya ilek-ña: "Huñggan magahet este na sanañgan-mu, lao maila' ya bai hu faisen hao una kosa. "Kao mumapotge i asagua-mu antes di en assagua na dos, ya ti un tuñgo' hayi tata-ña i patgon? Kao guaha nai maliñgu i lahi-mu tres dias ya ti un tuñgo' amanu nai gaige gue'.? Kao umasagua hao ya ti siña un pacha i asagua-mu? Todu este i tres manmasusedi gi as San Jose." Klaru i punto guini. Kumeke ilek-ña na kon todu i mas santos na familia matto ha' lokkue' i pinadesi yan problema giya siha.

Estague' pa'go na manmatto hit gi un impottante na punto: Ti isao i para un famadesi. Gi magahet siña mama' bendision este i pinadesi yañggen ta aksepta gi dinanche na manera. Siña ha ayuda hit para ta fanmas hihot gi as Yu'us. Meggai na taotao siha ni manatsado ginen as Yu'os ya mana'lo tatte anai matto i achaken-ñiha o sino i pinadesen-ñiha.

Ti todu i tiempo ha na'susuha si Yu'os i pinadesi-ta siha. Lao todu i tiempo ha nana'i hit ni ayudu para ta suñgon i pinadesi-ta. Ni tampoku ti todu i tiempo ha na'susuha si Yu'os i hemhom ni tumatampe i hineñgge-ta. Lao todu i tiempo ha na'ani hit ni grasia-ña para ta sigi ha' manmamokkat gi halom homhom.

Ya pot uttimu, ti todu i tiempo ha na'mamagoñg si Yu'os i piniti-ta siha. Lao todu i tiempo ha u'usa este siha na piniti para u na'fanhihot hit guatu giya guiya ni muna'fanhuyoñg hit.

Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-ña, yan i Espiritu Santo. Amen.

KALAN ASERU SI JESUKRISTO January 05, 2003

Pa'go ha' manhahalom hit gi sakkan dos mit. Pa'go i primet Damenggo gi nuebu na sakkan, nuebu na siklo yan nuebu na mit años. Pa'go i Damenggon Epifania, o sino mas matungo'-ña Damenggon Tres Reyes, anai manmatto ginen sanhaya tres na lalahi ni umestutudia i kinalamten i puti'on (Mt. 2:1-12). Para ta komprende i siknifikasion-ña este na gupot maila' ya ta ekungok este un ratu.

77

Ayu siha i manmamangge lepblo pot lina'la' taotao yanñiha tumuge' hafa masusedi anai papatgon i taotao ya umannok enao i masusedi despues di dumangkulo gue'. Este na Ebanghelio i ta hungok maproklama pa'go ha sangan ayu i masusedi gi as Jesukristo gi anai papatgon gue' ya umannok enao despues di dumangkulo gue'. Unos kuantos lalahi ni umestutudia i kinalamten i puti'on siha manmatto ginen sanhaya ma'espipiha i nuebu na rai ni mafañagu. Un puti'on umayuda siha para u masodda' este na patgon gi un dikike' na songsong giya Belen ya mandimu papa' gi me'nan i Kristo.

Ti ta tungo' hayi este siha na lalahi. Hokkok ha' manmasangani hit na ti taotao tano' sino ki taotao hiyong siha ya kumeke ilek-ña lokkue' na ti parehu relihion-ñiha. I mangaigen este na lalahi i ti Manjudios ha sangangani hit na si Jesukristo ti para i Manjudios ha' para u setmuni. Taiguini masusedi esta gi maloffan na dos mit años.

Si Jesukristo ni ta a'agang Satbadot yan Saina, Judios gue'. Finañagu as Santa Maria, Judios gue'. Dumangkulo gue' gi gima' Judios. Manestudia gue' gi sinagogan Judios. Mafanague' gue' ni biblian Manjudios. Manadora gue' gi templon Manjudios. Ha dalalaki i gipot i rilihon Manjudios. Guihi na puengi antes di u matai ha selebra i Gipot Manjudios Pasgua yan i Manjudios na manapostoles.

Munga hit manmaleffa na Judios si Jesukristo. Lao iyon todu i taotao gue'. Todu rasan taotao gi todu i tano' mandidimu gi me'na-ña, taimanu ha' na gi antigu na tiempo mandimu gi me'na-ña giya Belen i taotao ni ginen sanhaya. Taimanu para ta esplika este? Gof na'manman na ayu i mafañagu popble para uttimoña u sen takkilo', taimanu na un taotao ni ha gasta tiempo-ña komu katpenteru para uttimoña u dirihi i lina'la' taotao siha gi tano'?

Taiguini nai siña ta oppe este na kuestion. Si Jesukristo kalan aseru gue', ha hahala i taotao guatu giya guiya. Mafañagu gue' komu Judios, luma'la' komu Judios, matai komu Judios - ha kumple kabales i rilihion i Manjudios. Lao siña lokkue' ta alok na guiya iyon enteru i taotao. Difirentes taotao siha matattitiyi gue' sa' masiesiente na maninayuyuda i lina'la'-ñiha. Gi hinasso-ku estague' dos punto na manhinahala i taotao guatu giya guiya.

Fine'na, i finana'gue-ña si Jesukristo pot si Yu'os. Gi hinenggen i Manjudios, ya mapoksai si Jesukristo guini na hinengge, ilek-ña na unu ha' na Yu'os guaha, taya' mas, ya guiya fuma'tinas todu i kosas siha. Lao i Manjudios ilek-ñiha na para siha ha' si Yu'os, ti siña i ti Manjudios. I escribas yan Fariseo ilek-ñiha na i templo ha' giya Jerusalen nai gaige si Yu'os.

Lao ti konfotme si Jesukristo ni este. Ilek-ña na si Yu'os ti siña mapongle gi halom templo ha'. Hunggan gaige gue' gi halom templo yan kon todu gi sanhiyong i templo. Guiya umadadahi todu i nina'huyong-ña gi todu i lugat. Guiya Yu'os i Manisraelitas lao guiya Yu'os i ti Manisraelitas lokkue' ya "pot i guinaiya-ña na ha na'enñaihon i uniku Lahi-ña kosa ki maseha hayi ni manhongge giya guiya ti u matai lao u gailina'la' taihinekkok."

Segundo, ha trata si Jesukristo i taotao siha komu sagradu. Ha na'takkilo'ña i lina'la' taotao ki ni hafa.

Todu rilihion guaha sagradu para siha. Ya enao na rilihion dinitetmimina kao maolek pat ti maolek sigun gi hafa sagradu para siha. Sagradu i lai para i eskribas yan i Fariseo gi tiempon Jesukristo, espesiatmente i lai pot i Sabalu na ha'ani. Taya' siña macho'gue gi Sabalu ni para u kinentra este i sagradu na ha'ani. Lao otro hinasso-ña si Jesukristo pot este. Hunggan ha respeta este na lai lao ti hokkok ha' guenao chiña. Ilek-ña i Saina, yanggen ha gof nisisita i taotao ayudu gi Sabalu na ha'ani siña ha' macho'cho' hao para un ayuda gue'.

Estague' un estoria ginen i Nuebu Testamento. Un dia i eskribas yan i Fariseo makoni'e' gue' guatu un palao'an ni magacha umadotterio. Masangani gue' na sigun gi tinago' Moises debi di u mafaggas gue' acho'. Ilek-ñiha i eskribas yan Fariseo na debi di u maprotehi na sagradu i lai. Lao mas prisisu si Jesukristo na sagradu i lina'la' taotao. Kadada' ineppe-ña lao ha na'faninkibokao hinasson i umakukusa i palao'an. Despues ha na'hanao i palao'an sin u mana'lamen.

78

Este i rason na machatli'e' gue' ni mamale' i templo. Ti parehu hafa sagradu para guiya yan hafa sagradu para i mamale'. I mamale' ma'aplilika i lai achokka' para u pinino' i taotao. Lao si Jesukristo ha aplilika i lai para minaolek i taotao. Para guiya sagradu i lina'la' taotao. Pot este na sesso masangan na guiya i "amigon i mani'isao." I chumatli'e' gue' hinasson-ñiha na ma'insusuta gue' ni este, lao si Jesukristo ilek-ña na onro este i para u ma'agang gue' "amigon i mani'isao." Desde i finatai-ña asta pa'go taotao siha ginen difirentes nasion yan lenguahi manhinahala guatu gi as Jesukristo. Maripara na ti mappot gue' maguaiya, sa' mali'e' na esta manguinaiya siha fine'na. Estague' i rason na kalan aseru gue', ha hahala i taotao siha guatu giya guiya.

Matutuhon este gi anai manmatto i lalahi ginen sanhayan. Ya ti u fakpo' asta ki mandaña' hit manganta ni uttimu na Alleluia gi langet.

Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-ña, yan i Espiritu Santo. Amen.

HA TUTUHON SI JESUKRISTO I PUBLIKU NA MINISTRO-ÑA

January 12, 2003

Gi maloffan na tres simana i tinaitai siha ni ma'usa gi Santa Misa ni manmachuchule' ginen i Santa Biblia, masañgan pot i mafañagu-ña i Niño Jesus yan i tiempo ni ha gasta giya Nazaret antes di u tutuhon i publiku na ministro-ña. Makpo este i silensio yan taya' atboroto na lina'la'-ña gi anai matakpañgi.

Anai ha presenta gue' si Jesukristo para u tinakpañgi as San Juan, este nai ha siñala i tutuhon i publiku na ministro-ña para i taotao Israel, ya i taotao Israel ha represesenta hit lokkue' todos. Despues di matakpañge gue' humanao para i disietto para u tinienta as Satanas. Despues di humuyoñg ginen i disietto, ha agañg i mandisipulu-ña ya ha tutuhon sumetmon pot i Maolek na Notisian i satbasion. Sigun gi ha tuge' gi ebañghelio-ña si San Marcos, i matakpañgen i Saina tumutuhon i publiku na ministro-ña, yan lokkue' ha sañgan hayi si Jesukristo yan hafa i relasion-ña yan si Yu’os Tata.

Anai kokokoyoñg si Jesukristo ginen i Saddok Jordan despues di matakpange-ña, ha li'e' na mababa i lañget ya tumunok papa' i Espiritu Santo gi hilo-ña gi figuran paluma. Hoñgga i bos Yu’os Tata ginen i lañget, ilek-ña, "Hagu i hu guaiya na Lahi-hu. Hagu nai gaige i minagof-hu." Ilek-ña si San Marcos este na ekspirensian Jesukristo, era anai tumunok i Espiritu Santo yan i bos ni hoñgga ginen i lañget, ahe' ti para todu i taotao u lini'e'. Si Jesukristo ha' umekspirensia este siha, lao malago' si San Marcos para u na'fanmanuñgo' hit. I bos ni hoñgga ginen i lañget muna'annok i relasion-ña si Jesuskristo yan si Yu’os Tata. Este i relasion Yu’os Tata yan Yu’os Lahi-ña yan i relasion-ñiha yan i tano' era i mas impottante gi ebañghelion San Marcos.

Gof klaru gi fine'na na tinaitai gi Misa ayu i sinañgan-ña si San Marcos pot i bautismon Jesukristo. Si Isaias ha sañgan guini pot i Mesias na guiya i tentago' Yu’os, guiya i inayek-ña ni muna'mamagof gue'. I che'cho' i Mesias, ni sesso ha sañgan si Isaias era para u establesi i hustisia.

Pot i Mañgilisyanu hit na mampayon hit sumañgan na espirituat i naturan i Mesias ni gaige gi as Jesukristo. Ta tuñgo' ha' na i rainon Yu’os ti rainon este na tano' lao todu i manmatakpañgi mansiudadanon este na raino. Lao para i Manjudios ni humuñgok si Isaias ti este kumeke ilek-ña. Ni tampoku ti este kumeke ilek-ña para ayu siha i humuñgok i setmon Jesukristo ya hinasson-ñiha na guiya i mesias.

I mesias na palabra kumeke ilek-ña ayu i ma'oleos yan parehu ha' lokkue' este na palabra kumeke ilek-ña yan i rai. Para i taotao Israel, unu ha' magahet na rai --- era si Yu’os. I taotao Israel ahe' ti matrata

79

komu prefekto rai si Saul, yan si David, yan i manattate siha na manrai. Ti mamparehu i Manjudios yan otro nasion siha ni mapo'lo todu i inañgokkon-ñiha gi rai-ñiha. Lao para i Manjudios este siha i manma'a'agañg rai, siha abogadon i taotao gi relasion-ñiha yan si Yu’os. Ya pot si Yu’os pumalai siha ni oleos, o sino i laña, enao mina' ginen as Yu’os i autoridat-ñiha gi taotao. Pot este na debi lokkue' di u fampasensia yan u fankaritatibu gi taotao siha parehu yan si Yu’os. Mannina'i as Yu’os autoridat ahe' ti para u fanmahoño' i taotao siha lao para u fanmasetbe. Este na setbision-ñiha ha emprarasa lokkue i para u mana'guaha hustisia gi entre i taotao Israel.

I rai tumatacho lokkue' komu representanten i taotao siha gi me'nan Yu’os. Guiya, siña ta alok tumatacho pot i nasion. Gi kada biahi na ha cho'gue manmaolek na fina'tinas, mafatto i bendision gi taotao siha. Gi kada biahi na ha bira gue' i rai ginen as Yu’os ya ha cho'gue i tailayi, i nasion masa'pet.

Pot los uttimu, i mesias guiya i magahet na rai para i Manisraelitas. Guiya ma'ayek para u kuentusi i taotao siha ni autoridat Yu’os yan para u representa i taotao siha gi me'nan Yu’os. Guiya para u na'annok i hustisia, yan guiya muna'a'annok i minagahet yañggen homhom sa' bula linachi. Guini na ebañghelio ni manmana'i hit para pa'go guini gi gipot i matakpañgen i Saina ha sañgan pot i natura-ña si Jesukristo. Ha sañgan na si Jesukristo guiya i mesias --- guiya i mapalai ni laña, o sino ma'oleos, giya i magahet na rai.

Si yu'os ma'ase' ni atension-miyu yan adios asta otro simana. Si Yu’os en fambinendisi i + Tata, yan i Lahi-ña, yan i Espiritu Santo. Amen.

I PRIMET MANDISIPULU January 19, 2003

Este na Ebanghelio i maproklama pa'go guini gi Segundo na Damenggo gi Otdinario na Tiempo, machuchule' ginen i tinige' San Juan 1:35-42. Guiya este na Ebanghelio anai si San Juan ha li'e' si Jesukristo maloloffan gi chalan ya ilek-ña, "Atan ha'! Ayogue' i Kinilon Yu’os!"

Ta li'e' guini ta'lo si San Juan ha tanchu'e' otro taotao i mandisipulu-ña fuera di guiya. Siguru na ha tungo' ha' si San Juan na yanggen ha kuentusi i mandisipulu-ña pot minaolek otro taotao siña ha' madingu gue' ya manhanao mañaonao komu disipulon otro, ya hunggan estague' masusedi. Ahe', ti hosguan si San Juan pot si Jesukristo. Matto gue' para u na'fanhihot i taotao siha gi as Jesukristo, ahe' ti para u na'fanhihot giya guiya mismo. Sigun gi ekspirensian taotao, makkat para ta fanhanao guatu gi segundo na eskalera despues di ta gosa hit gi primet eskalera. Lao para si San Juan, gigon umannok si Jesukristo gi pupbliku ha tutuhon muna'fanhanao i taotao siha guatu giya guiya.

Entonses i dos na disipulon Juan manhanao madalalaki si Jesukristo. Siguru na mamahlao este i dos para u mapresenta siha direktamente gi as Jesukristo para u masangani gue' na malago' i dos sumanao komu disipulu. Pot enao na madalalaki ha' gue' lao lachago' tatte. Lao guini nai ha cho'gue una kosa si Jesukristo ni sesso ha cho'gue. Ha bira gue' ya ha kuentusi siha. Kumeke ilek-ña na malago' i Saina para u ayuda siha ya para u fanasodda' gi lamitaha karera, ahe' ti siha ha' para u fanhanao guatu giya guiya, lao guiya i Saina para u hanao lokkue' guatu giya siha. Guiya i Saina bumaba i petta para u halom este i dos.

Estague' nai a'annok na si Yu’os tumututuhon yanggen para ta fanali'e' yan guiya. Todu i tiempo si Yu’os fine'na tumututuhon i manali'e'-ta. Yanggen ha tutuhon mumalago' i taotao umali'e' yan Yu’os, esta si Yu’os gaige gi fi'on-ña. Ahe', ti ha sotta ha' si Yu’os i taotao para u sigi ha' umespiha si Yu’os asta ki ha sodda'; si Yu’os lokkue' ha hananague guatu i taotao para u asodda' i dos. Taimanu ha' na ilek-ña si San Agustin, i taotao ti siña ha tutuhon umespiha si Yu’os yanggen ti esta sinedda' gue' as Yu’os. Yanggen ta tutuhon umespiha si Yu’os, ahe' ti uma'atok si Yu’os kosa ki mappot para ta sodda' gue'; lao gaige gue' guenao na tumotohge, ha nanangga hit, ya despues humuyong ya ha taggam hit gi chalan.

80

Ha tutuhon si Jesukristo umespiha hafa nisisidat-ñiha este i dos na disipulon Juan anai ha faisen si Andres yan i otro disipulu otdinario na kuestion. "Hayi en aliligao?" Sesso este na kuestion mafaisen gi tiempon i Saina. Matutungo hafa i taotao puesto-ña yanggen mahungok hayi ha espipiha.

Maolek yanggen bes in kuanto ta faisen maisa hit: "Hayi ta aliligao? Hafa ta keke sodda'? Hafa malago'-ta para ta gosa guini gi tano'?

Guaha giya hita umespipiha para u gefsaga lina'la'-ña. Para u petmanente yan maolek na empleo para u trankilu lina'la'-ña. Ahe', ti baba para ta espiha este siha, lao guaha mas impottante para ta ega'ga' ni mas bula probecho.

Guaha giya hita umespipiha para u takkilo' puesto-ña kosa ki u metgot gi pupbliku. Guaha giya hita umespipiha i pas, kosa ki u pas i lina'la'-ña yan u fampas yan si Yu’os. Este na klasi si Jesukristo ha' siña numa'i hit.

Pot los uttimu, anai manoppe si Andres ha faisen si Jesukristo amanu nai sumasaga gue'. Ineppe gue' as Jesukristo ilek-ña: "Maila' ya en li'e'." Kustumbren i ma'estron i Manjudios para u ma'agang i estudianten-ñiha para i gima'-ñiha yanggen guaha kuestion finaisen-ñiha. Yanggen malago' hao un komprende i kuestion pues maila' ya un li'e'. Fatto ya ta hita umestudia este na problema. Anai ilek-ña si Jesus" "Maila ya en li'e'!" ha kombida i dos para u fanguentos yan para u fambinabayi ni hinasson-ñiha ni guiya ha' si Jesukristo siña bumaba.

Si yu’os ma’ase’ ni atension-miyu yan adios asta otro simana. Si Yu’os en fambinendisi i + Tata, yan i Lahi-ña, yan i Espiritu Santo. Amen.

I SANTOS LISAYU – I Santo Papa as Juan Pablo II gi tinige’-ña APOSTOLIC LETTER ROSARIUM VIRGINIS MARIAE, pot i Lisayon Santa Maria, gi Oktubre 16, 2002 ha onra kuanto i siña este na debosion para si Santa Maria. Guiya lokkue’ si Santo Papa dangkulo debosion-ña ni Santos Lisayu. Pues pot i para u mas gatbo este na debosion guaha ha umentayi mas misterio. Gi pa’go ta hahasso kinse (15) na misterio gi kada ta tayuyot i Lisayu: sinko misterion minagof, gi Lunes yan Huebes; sinko misterion piniti, gi Mattes yan Bietnes; yan sinko misterion mina’lak, Mietkoles, Sabalu yan Damenggo.

I Santo Papa malago’ na u guaha sinko ta’lo na misterio. Este na misterio ha fana’an Misterion Inina:

I fine’na misterio, I matakpange-ña si Jesukristo giya Jordan;

I segundo na misterio, anai ha na’matungo’ gue’ gi fandanggo giya Cana;

I tetset na misterio, anai ha proklama i Rainon Yu’os;

I mina’ kuatro na misterio, I Transfigurasion-ña;

I mina’ sinko na misterio, anai ha establesi i Eukaristia.

Este i Misterion Inina para u masangan gi Huebes na ha’ani. Pot este na i misterion minagof gi Huebes para masangan o sino mamuebi guatu gi Sabalu na ha’ani. Ha sosoyo’ hit i Santo Papa para ta na’fandibotu hit tumayuyot i Santos Lisayu yanggen siña kada dia. Ha fafaisen lokkue’ enteru i tano’ para ma deklara desde Oktubre 2002 asta Oktubre 2003 komu Añu Santos Lisayu.

81

I INAGANG YU’OS January 26, 2003

Este na Ebanghelio i maproklama pa'go guini gi Segundo na Damenggo gi Otdinario na Tiempo, machuchule' ginen i tinige' San Juan 1:35-42. Guiya este na Ebanghelio anai si San Juan ha li'e' si Jesukristo maloloffan gi chalan ya ilek-ña, "Atan ha'! Ayogue' i Kinilon Yu’os!"

Ta li'e' guini ta'lo si San Juan ha tanchu'e' otro taotao i mandisipulu-ña fuera di guiya. Siguru na ha tungo' ha' si San Juan na yanggen ha kuentusi i mandisipulu-ña pot minaolek otro taotao siña ha' madingu gue' ya manhanao mañaonao komu disipulon otro, ya hunggan estague' masusedi. Ahe', ti hosguan si San Juan pot si Jesukristo. Matto gue' para u na'fanhihot i taotao siha gi as Jesukristo, ahe' ti para u na'fanhihot giya guiya mismo. Sigun gi ekspirensian taotao, makkat para ta fanhanao guatu gi segundo na eskalera despues di ta gosa hit gi primet eskalera. Lao para si San Juan, gigon umannok si Jesukristo gi pupbliku ha tutuhon muna'fanhanao i taotao siha guatu giya guiya.

uini gi III na Damenggo gi Otdinario na Tiempo, i fine'na na tinaitai ni maproklama gi Misa pa'go era pot i profeta as Jonas anai tinago' as Yu’os para u setmuni i taotao Nineveh para u fanmañotsot ni isao-ñiha. Ha hungok si Jonas i inagang Yu’os ya ha cho'gue i matago-ña ya masatba iya Nineveh.

I ebanghelio ni maproklama machuchule' ginen i tinige' San Marcos. Guini si Jesukristo ha agang si Santiago yan i che'lu-ña as Juan para u fañaonao komu mandisipulu ya masotta si tatan-ñiha yan i chenchulu ya madalalaki gue'.

Estague' un estoria ni siña ta usa para ta komprende mas este siha na tinaitai ni ta hungok maproklama gi Misa pa'go.

Anai 15 años idat-ña si Margaret Mehren saonao gue' gi inetnon manhoben gi Nazi giya Alemania.

Despues di i gera nai ha li'e' si Margaret taimanu tinailaye-ña bidan–ñiha i Nazi gi concentration camps. Enao nai ha komprende na tailayi si Hitler ni hinassso-ña na maolek gue' na taotao. Pues ilek-ña na ti para u fanhongge ta'lo fino' taotao.

Anai malingu konfiansa-ña gi taotao nai ha tutuhon lokkue' manhongge na debi di u guaha Yu’os. Entonses un dia, pot primet biahi, manayuyot gue' gi as Yu’os ilek-ña, "Yu’os, yanggen magahet na gaige hao, pues na'i yo' fan un siñat."

Guini na momento estaba gi fi'on-ña i Santa Biblia. Ha chule' ya ha tutuhon tumaitai, lao guini gi primet biahi na ha taitai taya' ayudu matto giya guiya. Un puengi ha taitai ta'lo i Biblia ya guini na biahi nai matto i ayudu. Estague' ha tuge' guenao na ha'ani:

"Guaha masusedi giya guahu anai hu taitai i sinangan Jesukristo. Hu siente na kalang gaige gue' mohon gi fi'on-hu! ... Maseha ti hu li'e' gue' lao hu gof siente na tumotohge gue' gi uriya-hu".

"Mas magahet i gumaige-ña si Jesukristo gi uriya-hu ki i lamasa, yan i lepblo siha, yan i flores gi halom kuatto. Esta ti guaguahu ha' na maisa. Esta i lina'la'-hu guaha kumeke ilek-ña."

Despues di unos kuantos años, anai 21 añu idat-ña, humalom si Margaret gi inetnon i Hetmanan Franciscano. Esta 25 años na hetmana gue' ya pa'go misionera gue' ma'estra giya Africa.

82

Sen klaru guini gi estorian Margaret Mehren na asta pa'go si Yu’os ha a'agang hit kada unu, taimanu ha' anai ha agang si Jonas gi tiempon Antigu na Testamento yan anai ha agang si Santiago yan si Juan gi tiempon Nuebu na Testamento ni ta huhungok ma proklama pa'go gi Ebanghelio.

Yanggen manguentos hit pot i mamprofeta ni maninagan Yu’os yan i mandisipulu ni maninagang as Jesukristo ilelek-ta na este i bokasion-ñiha. Ya hunggan magahet sa' este na palabra i bokasion ginen i fino' Latin ni kumeke ilek-ña "para ma'agang."

Ilelek-ta inagang un hobensito as Yu’os para u pale' pat sino para u hetmana. Hunggan magahet, sen dinanche este.

Estague' un estoria para ki siña ta komprende mas pot bokasion. Ha sangan estoria-ña si Pale' Anthony de Mello, Jesuitas gue' ginen India. Anai hohoben gue' ha siente na ina'agang gue' as Yu’os para u pale'.

Anai ha faisen si tata–ña na malago' gue' pumale', ti sinedi gue' as tata-ña. Tres ha' siha na mañe'lo ya guiya ha' si Anthony na lahi. Pues guiya ma'a'ngongoko para u gaifamagu'on para u kinatga i na'an i familia.

Despues di 14 años gumaipatgon ta'lo si nana-ña. Anai makonne' si nana-ña para i hospitat malago si Anthony 4 miyas desde i gima'-ñiha asta i hospitat.

Anai matto gi hospitat ha faisen si tata-ña kao lahi pat palao'an i che'lu-ña. Anai ilek-ña i tata na lahi, pues ilek-ña si Anthony pa'go nai siña yo' pumale'.

Anai 16 años idat-ña humalom gi seminario giya Bombay, giya India ya pot i lepblo siha ni tinige'-ña meggai na taotao tumungo' gue' gi todu i tano' siha.

Ahe' ti manhoben ha' manina'agang as Yu’os para u fanhalom mamale'. Pa'go na tiempo ayu i manla'amko' la'yiyi manina'agang as Yu’os.

Guaha lokkue' famalao'an, manhoben yan ayu siha i esta monhayan i kolehio, mangaige gi kombenton i Mercedarias maprepapara siha para u fanhalom hetmana.

Si Yu’os ha a'agang lalahi yan famalao'an para i setbisio-ña. Ha a'agang lokkue' i manhoben yan kon todu i ayu i esta guaha idat-ñiha.

Gi presente guaha tres na lalahi gi seminario manmanestutudia para mamale’ guini gi Diocesis Chalan Kanoa. Si Rev. Mr. Ryan Jimenez, diakunu, siempre ma’otdena gue’ pale’ gi Junio na mes pa’go na sakkan. Si Mr. Charlito Borja lokkue’ siempre ma’otdena gue’ diakunu yan pale’ pa’go na sakkan. Si Mr. Jesse Reyes para u fonhayan i kolehio pa’go na sakkan yan para u tutuhon i theology. Pot fabot hahasse este siha gi tinayuyot-miyu.

Estague' na manmatto hit pa'go gi praktiku na ma'aplikan este i ta sasangan gi lina'la'-ta. Hagu ni saina, kao guaha nai un kuentusi i famagu'on-mu na u fanmanayuyot para u faninina as Yu’os yanggen maplanunuyi hafa para u macho'gue ni lina'la'-ñiha? Kao mananayuyot hao para u guaha gi famagu'on-mu humasso para u pale' pat sino para u hetmana?

Hagu ni humuhungok yo', sotteru pat sottera, kao mananayuyot hao para un dinikta as Yu’os para un ayek hafa para un cho'gue ni lina'la'-mu? Pat sino kao malago' hao un setbe si Yu’os gi otro ministro siha ni guaha gi kada gima'yu’os, tat komu kantora pat kantot, para techa pat manaitai durante i Misa, pat sino para manrekohen limosna.

83

Estague' unos kuantos idea ni manmatto ginen este i tinaitai siha ni ta hungok maprokalama pa'go gi Misa. Estague' unos kuantos idea ni siña ta konsidera pa'go mientras ta hahasso este siha i tinaitai ginen i Santa Biblia. Hunggan, si Yu’os ha a'agang i taotao siha para i setbision-ña pa'go na tiempo lokkue' parehu ha' yan gi antigu na tiempo. Ya si Yu’os ha a'agang lalahi yan famalao'an, manhoben yan manamko'.

Si yu’os ma'ase' ni atension-miyu yan adios asta otro simana. Si Yu’os en fambinendisi, i + Tata, yan i + Lahi-ña, yan i + Espiritu Santo. Amen.

MAPRESENTAN I SAINA February 02, 2003

Pa'go i gipot Mapresentasion i Saina, anai mapresenta i Niño Jesus gi templo. Anai tanonores yo' gi gima'Yu’os giya Chalan Kanoa guaha sen bonitu na seremonias ha chocho'gue si Pale' Tardio. Hamyo ni mancha idat-hu siempre en hahasso este. Kada Sabalu gi ega'an despues di makanta i Salve Regina siempre humanao si Pale' yan dos tanores para i pettan gima'Yu’os anai manmannanangga i mannana siha ni esta manmatakpangi i nenen-ñiha. Mantinaggam as Pale' mahohogue i patgon-ñiha, despues di masonge i danges-ñiha mankinembida as Pale' halom para i attat. Guenao nai guaha espesiat na bendision para i mannana yan i nenen-ñiha. Gi uttimon este na seremonias ha go'te si Pale' i estola, ayu na magagon Misa i uma'akalaye' gi aga'ga' pale', ya ha tampe kada patgon. Ma'a'agang este na seremonias MA'INA. I kustumbre guihi na tiempo ti debi i nana na u huyong gi gima' despues di mañagu asta ki makumple este na seremonias.

Guihi na tiempo machocho'gue este sa' madalalalaki i gipot ni ta selelebra pa'go gi Febreru 2. Si San Lucas ha sangani hit gi Ebanghelio, kapitulu 2, pot este na seremonias. Despues di ha kumple si Santa Maria i ha'anen i para mana'gasgas gue', sigun gi lai, guiya yan si San Jose makonne' i patgon para Jerusalen para u mapresenta gue' gi Saina, sa' gaige gi lai na todu patgon lahi debi u manafañantos gi Saina. Gaige lokkue' gi lai na debi di u ma'ofresi sakrifisio, ya manofresi i dos un pat paluma. Estaba giya Jerusalen guenao na tiempo un santos na taotao ni na'an-ña si Simeon. Tunas yan debotu gue', ha nanangga i finatton i Mesias. Estaba giya guiya i Espiritu Santo; ya sinangani gue' ni Espiritu na ti u matai asta ki ha li'e' i Kristo, i Saina. Estaba gue' gi templo anai matto i mañainan Jesukristo para u macho'gue este na seremonias. Ha hoggue si Simeon i patgon ya ha tuna i Saina ilelek-ña: "Pa'go sa' esta un kumple i promesa-mu, O Asaina, siña un konne' mahgogong i tentago'-mu. Sa' i mata-hu mismo lumi'e' i nana'libre ginen hagu, ni un prepara gi me'nan todu i taotao: Un kandet para u inina i chalan-mu para i mampaganu yan para u faninenra i taotao-mu Manisraelitas."

Guiya i Saina mismo sumangan na guiya i kandet i tano': "Guaha i kandet i tano'. Ayu i dumalalalaki yo' ti mamomokkat gi halom homhom lao siempre gaige giya guiya i kandet i lina'la'." (Jn 8:12)

Este na gupot, i Mapresentan i Saina, gupot i Kandet i tano'. Enao ta ta bendidisi i danges, ni ha siknififika i kandet. Ta popo'lo gi attat yan manlulukao hit, ta chuchule' para i gima'-ta, para u representa i Kristo, ni guiya i Kanet i tano'. Ta selelebra este gi Febreru 2 para u na'hahasso hit ta'lo na sen magahet na si Santa Maria ha hoggue i kandet i tano' gi sensen-ña halom gi templo.

Pot los uttimu, pa'go guini gi gipot i Saina komu Kandet i tano', maila' ya ta falague gue', ya ta na'ngaha' hulo' i ilu-ta ya ta fanmanayuyot kuanto i siña para u na'fatto gi kada unu giya hita i Kandet-ña kosa ki siña ta li'e' maolek na dangkulo na piligru nai mangaige hit. Ta gagao i Saina para u na'li'e' hit kabales ni hustisia para todu i taotao. Na debi di ta direchon otro taotao, achokka' taotao hiyong gue'. Debi di munga hit chumule'guan otro taotao ni kosas-ña sin ta faisen gue'. Sobre todu este siha ta gagao i Saina ni ininan i Kandet-ña para ta komprende na debi di ta respeta i lina'la'-ta yan i lina'la' otro taotao sa' sagradu.

84

Si yu’os ma’ase’ ni atension-miyu yan adios asta otro simana. Si Yu’os en fambinendisi i + Tata, yan i Lahi-ña, yan i Espiritu Santo. Amen.

HAFA TAIMANU MANAYUYOT? February 09, 2003

Pa'go i V Damenggo gi Otdinario na tiempo, Añu B. I Ebanghelio machuchule' ginen i tinige' San Marcos, kapitulu 1. Este na ebanghelio i pa'go ta huhungok maproklama era anai estaba si Jesukristo giya Capernaum. Ha na'fanhomlo' meggai na manmalangu kon todu i suegra-ña si San Pedro.

Ha sangani hit si San Marcos guini na Ebanghelio na gi sigiente oga'an taftaf duru di manayuyot si Jesukristo. Maila' ya ta gasta didie' tiempo-ta pa'go ya ta fanguentos pot tinayuyot. Estague' un estoria ni siña ta usa para ta komprende mas hafa taimanu manayuyot.

Ginen umegga' yo' gi TV un programa ni ha fana'gue yo' un taddong na leksion. Durante este na programa guaha un patte guihi anai estaba un lahi yan un palao'an na matata'chong gi sala gi halom un ofisina. Kalang mohon estrangheru i dos, ya ti umatungo'.

Despues di la'apman na mata'chong i dos silensio i lahi ha tutuhon kumombetsasion. Despues di matutuhon i kombetsasion-ñiha i dos guahu hu deskubre, yan madeskubre lokkue' ni mane'ega' TV, na bula na punto na uma'achule' este i dos taotao ni kalang mohon estrangheru.

Todu i dos mafañagu giya Manchester giya Englatera. Todu i dos guaha unu hagan-ñiha ni na'an-ña si Alice. Todu i dos matulaika gima'-ñiha ya sumasaga pa'go giya London, gi Bromfield na chalan. Ekungok este, todu i dos sumasaga gi mina'sinko bibienda gi apartment. Ya estague' mas muna'manman yo' yan i mane'ega' TV. Todu i dos sumasaga gi et mismo kuatto gi et mismo apartment.

Este i dos taotao era dos umaságua.

Ha na'chalek yo' este na programa. Lao anai pumara yo' chumalek nai hu gacha' hafa i programa ha keke sangani yo' na punto. Kumeke ilek-ña na i dos umaságua ni estaba guihi gi sala gi ofisina ti taddong umatungo'-ñiha i dos. Sumupen-tatano' ha' i tiningo'-ñiha unu yan otro. Sumisiha i dos gi gima' sa' umásagua i dos, lao i lahi ñatata tiningo'-ña pot i asagua-ña palao'an, yan i palao'an ñatata lokkue' tiningo'-ña pot i asagua-ña lahi. Hunggan, i lahi ha tungo' i na'an yan i figuran i mata-ña i palao'an yan i palao'an lokkue' ha tungo' i na'an yan i figuran i mata-ña i lahi.

Lao ni unu gi dos tumungo' hafa na klasen taotao, yan hayi na klasen taotao, i asagua-ña. Ti taddong i umatungo'-ñiha i dos. Kalang mama'ya ha'. Pues kalang estrangheru i dos unu yan otro.

Este i dos taotao ni umásagua lao ti taddong i umatungo'-ñiha parehu yan unos kuantos na Mangilisyanu ni ti taddong tiningo'-ñiha pot si Jesukristo. Meggai na Mangilisyanu pa'go na tiempo mamparehu yan este na lahi yan este na palao'an. I relasion-ñiha yan si Jesukristo ahe' ti taddong sinoki sumupen-tatano' ha'. Ti matungo' taddong hayi si Jesukristo.

Gi aksion-ñiha yan gi che'cho'-ñiha kalang mohon mansen dibotu. Makakana' kilu'us oru yan milaya yan eskapulario gi aga'ga'-ñiha. Manhohosme Misa kada Damenggo yan makukumple i tinago' Yu'os siha. Lao gi minagahet ti taddong i kinemprenden-ñiha pot si Jesukristo. Lao sa' hafa na taiguini este? Sa' hafa na ti taddong tiningo'-ñiha as Jesukristo? Sa' hafa na ti petsonat i relasion-ñiha yan si Jesukristo?

Pot ehemplo, sa' hafa na ti parehu i relasion-ñiha meggai na taotao yan si Jesukristo yan i relasion-ña si Jesukristo yan si Tata-ña?

85

Unu na rason na taiguini este, sa' ti machocho'gue ayu i ha cho'gue si Jesukristo ni ta hungok pa'go guini na Ebanghelio. Ti magagasta tiempon-ñiha para u fankombetsasion yan si Jesukristo taiguihi i sesso bida-ña si Jesukristo ni kumombetsasiosion yan si Tata-ña.

Kumeke ilek-hu ti magagasta tiempon-ñiha gi tinayuyot, taiguihi i ta li'e' ha cho'gue si Jesukristo gi Ebanghelio ni ta hungok pa'go. Ilek-ña si San Marcos gi ebanghelio: "Taftaf gi sigiente oga'an kumahulo' (si Jesus), ya humanao para un sasahnge na lugat gi disietto; ya guenao nai duru manayuyot." (Lk 1:35)

Maila' ya ta estudia un ratu hafa kumeke ilek-ña tinayuyot. Maila' ya ta tutuhon yan este na estoria. Un estudiante gi high school ha tuge' este na ekspirensia-ña: "Un puengi despues di humugando yo' basketball, humanao yo' para bai gimen hanom. Despues di masahalom yo' mannge' siniente-ku anai hu gimen i hanom-manengheng. Pues umasson yo' gi hilo' cha'guan para bai deskansanñaihon.

"Guaguahu ha' na maisa guenao pues matto este na hinasso gi ilu-hu. Ta nisisita hanom para ta gimen. Lao ginen manu magi i hanom? Entre guahu ha' ilek-hu, ginen i mapagahes. Lao ginen manu i mapagahes? Guahu ha' ta'lo hu oppe i finaisen-hu, ginen i umidon i saddok yan i tasi. Sigi ha' gi taiguini na manera mo'na hu fafaisen i kuestion yan guahu ha' ta'lo umo'ope.

Sigi ha' mo'na taiguini manmafatto gi hinasso-ku asta ki ti siña mañodda' yo' rason fuera di bai alok si Yu’os fuma'tinas. "Este nai pumara yo' manhasso un ratu ya tumalak hilo' ha' yo' gi langet ya manman yo' hu konsidedera hafa mohon taimanu figura-ña si Yu’os. "Despues hu tutuhon kumuentusi si Yu’os gi palabras-hu ha' na maisa. Despues di este kahulo' yo' ya humanao yo' para i gima'-mami."

Este na ekspirensia-ña este na patgon ha fanana'gue hit tres na klasen tinayuyot ni siña ta usa yanggen manmanayuyot hit gi as Jesukristo: meditasion, kombetsasion, yan kontemplasion.

Maila' ya ta tutuhon gi primet na klasen tinayuyot era, i meditasion. Meditasion kumeke ilek-ña tinayuyot gi halom i hinasso-ta ha'. Ahe', ti para ta usa i labios-ta sino ki para ta hasso ha' pot si Yu’os gi ilu-ta. Parehu yan i bida-ña este na estudiante. Ta hasso unu na idea. Pot ehemplo, ta tutuhon humasso hafa mohon na klasen taotao si Jesukristo, hafa pusision-ña? Hokkok ha' kumeke ilek-ña meditasion i para ta chule' un idea pot si Yu’os ya ta sigi ha' munakilulok gi ilu-ta. Estague' meditasion.

Estague' pa'go i mina'dos na klasen tinayuyot, era i kombetsasion. Siña ilek-ta lokkue' na guiya este i tinayuyot korason. Para ta fankombetsasion gi korason-ta yan si Jesukristo taiguihi i bida-ña este na estudiante. Ta fankombetsasion yan si Jesukristo taiguihi yanggen mankombetsasion hit yan i mas yata na atungo'-ta. Hokkok ha' kumeke ilek-ña kombetsaion i para ta fanguentos yan si Jesukristo ginen i korason-ta.

Estague' pa'go i mina'tres na klasen tinayuyot, era i kontemplasion. Siña ta alok na guiya este i tinayuyot i ante. Este na klasen tinayuyot ahe' ti para ta hasso ni hafa ya ti para ta sangan lokkue' ni hafa. Hokkok ha' i para ta po'lo na mangaige hit gi fi'on Jesukristo manhihita yan guiya, taiguihi bida-ña este na estudiante anai tumalak hilo' gi langet ya mamanman ha'. Kumeke ilek-ña na para ta aprobecha i gumaigen Jesukristo gi fi'on-ta, ta atan gue' mientras ha a'atan hit.

Meggai giya hita guaha tinayuyot siha ta dimimoria desde ki anai mandikike' hit, tat komu i Asaina Jesukristo, Tatan-mami, Si Yu’os un ginegue, Maria. Hafa este na klasen tinayuyot. Maolek ha' este siha na tinayuyot ta usa yanggen guaha minappot para ta usa unu gi este i tres na tinayuyot ni pa'go monhahayan ta esplika. Lao mas bula probecho yanggen ta usa unu gi este i tres ni monhayan esta ta sangan.

Pot los uttimu maila' ya ta ripasa este i tres na klasen tinayuyot: meditasion - tinayuyot hinasso; kombetsasion - tinayuyot korason; kontemplasion - tinayuyot ante. Todu este i tres mana'ahatme unu yan otro ya pot este na mappot para ta alok tinayuyot meditasion ha' ta cho'gue, o sino tinayuyot

86

kontemplasion ha' ta tayuyot. Nihi ya ta tutuhon prumaktika este i tres na klasen tinayuyot kosa ki siña u taddong i tiningo'-ta yan u petsonat i relasion-ta yan si Jesukristo.

Si yu’os ma’ase’ ni atension-miyu yan adios asta otro simana. Si Yu’os en fambinendisi, i + Tata, yan i Lahi-ña, yan i Espiritu Santo. Amen.

I YO'ASE' NA MARINE February 16, 2003

Pa'go i VI Damenggo gi Otdinario na tiempo, Añu B. I Ebanghelio machuchule' ginen i tinige' San Marcos 1. Guiya este na Ebanghelio anai ha na'homlo' si Jesukristo i nasarinu.

Para ta komprende mas maolek este na Ebanghelio maila' ya ta ekungok un ratu este na estoria. Unos kuantos años maloffan guaha un taotao lalangu gi chalan gi talolo' giya New York na siuda. Ti apmam matto i ambulance ya makonne' gue' para i hospitat. Guihi gi hospitat i malangu sigi ha' di ha agang i lahi-ña.

Unu gi emfetmera ha sodda' un matitek na katta gi pottan muneda-ña. Gaige guenao matuge' na i lahi-ña marine, sendalu, gaige giya North Carolina.

Guenao na puengi matto un marine gi hospitat. Insigidas kinenne' gue' ni emfetmera guatu gi kattren i amko'.

Madulok bula na amot i amko' pues kalang bulachu ilu-ña. Pot enao na i emfetmera ha ripiti dos, tres biahi, "Estague' i lahi-mu! Estague' i lahi-mu!"

Pot los uttimu ha baba mata-ña i amko'. Lao maya' pues ti ha gof li'e' i mata-ña lao ha li'e' kabales i chininan marine. Guenao na momento i marine ha go'te kon respetu kannai-ña i amko'.

Tulanoche mata'chong gi fi'on i katre este na marine. Kada birada ha hulos kannai i amko' yan ha konsuesuela gue'.

Dos, tres biahi mafaisen gue' ni emfetmera para u deskasa pat u chocho didide'. Lao ti malago'.

Gi chatanmak, matai i amko'.

Anai ilek-ña i emfetmera sen piniti yo' pot i finatai tata-mu, ilek-ña i marine, "Lao hayi ayu na amko'?"

Manoppe i emfetmera, "Na adda' ti si tata-mu ayu?" Manoppe i marine, "Ahe'. Taya' nai hu li'e' gue'."

Ilek-ña i emfetmera, "Ya sa' hafa na taya' ni hafa ilek-mu?"

Manoppe i marine, "Malago' ha' yo' hu sangan lao pot i mampos malangu i amko' ya ti ha tungo' na ti lahi-ña yo', ayu na mamatkilo ha' yo'. Fuera di enao hu li'e' na kumeke matai gue' esta ya ha nisisita i lahi-ña gi fi'on-ña. Pot enao ha hu disidi para bai po'lo yo' komu lahi-ña."

Dos rason na yahu este na estoria.

87

Fine'na, annok guini na estoria i mina'ase' ni ha fanu'i si Jesukristo i taotao ni nasarinu gi ta hungok maproklama gi Ebanghelio pa'go. Ilek-ña si San Marcos na anai ha li'e' si Jesukristo i nasarinu na taotao, nina'ma'ase' gue', ya ha estira huyong i kannai-ña, yan ha na'homlo' gue'.

Estague' mismo bida-ña este na marine. Anai ha li'e' este na amko', nina'piniti gue' ya ha estira huyong i kannai-ña, ya ha go'te kannai i amko' ni kumeke matai.

Entonses este na estoria ha sangani hit na este i bida-ña este na marine parehu ha' yan i bida-ña si Jesukristo anai nina'ma'ase' ni nasarinu.

Estague' i segundo rason na sen bonitu este na estoria. Ha sungon ha' este na marine mamadesi pot i para u na'annok i mina'ase'-ña.

Maskeseha sen yayas gue' sa' ti nahong maigo', ha sungon ha bumela guenao ha gogo'te kannai este i amko' tulanoche.

Ha cho'gue ayu i sesso ha cho'gue si Jesukristo gi Ebanghelio. Pot ehemplo, ilek-ña si San Marcos na gi un okasion bulan taotao manmatto giya guiya ya ti siña gue' chumocho'.

Maseha bula atborotu-ña taya' nai malingu mina'ase'-ña i Saina ni ayu siha na taotao i numisisita ayudu-ña. Ha sungon ha' todu i minappot pot siha.

Estague' pa'go i praktiku na punto. Taimanu para ta aplika gi lina'la'-ta este i ha cho'gue i marine gi estoria-ta yan i ha cho'gue si Jesuskristo gi Ebanghelio.

Fine'na na punto, todu este i dos na estoria ha fafaisen hit para ta atan maolek hafa na klasen mina'ase' ta fanunu'i i taotao siha gi fi'on-ta. Taimanu ta fanunu'i i taotao siha ni mina'ase'-ta? Kao ta konsidederan mamaisa na hita siña ta cho'gue taimanu bida-ña este na marine.

Estague' i segundo na punto. Todu este i dos na estoria ha fafaisen hit para ta atan kao manmagof hit para ta sungon i minappot ni ha dimamanda yanggen para ta fanyo'ase'. Hahasso na guaha na biahi nai dangkulo para ta sakrifika gi lina'la'-ta.

Estague' un estoria ni siña ta komprende hafa este kumeke ilek-ña. Ginen hu taitai gi gaseta pot este na sinisedi. Guaha un patgon ni ma'u'udai gi bus eskuela ha pañot i crayon ya gotgan gue'. Debi di u makonne' chaddek para i hospitat. I driver ha na'para i bus sa' despasio ha' siña ha falaguyi. Ha faisen i taotao ni chaddek sidan-ña lao ti malago' sa' siempre atrasao gue' para i che'cho'-ña.

Anai matto gi hospitat i patgon, ilek-ña i dokto na esta atrasao sa' esta apmam di pumara humagong.

Estague' un taotao ni ti malago' ha sakrifika gue' didide' pot i para u na'annok i mina'ase'-ña. Ya pot este na dangkulon piniti matto gi mañainan este na patgon.

Entonses i estorian este na marine yan i estorian Jesukristo ha kombibida hit para ta cho'gue dos kosas: Fine'na, para ta eksamina hafa na klasen mina'ase' gaige giya hita. Segundo, para ta eksamina kao manlisto hit para ta sakrifikan maisa hit yanggen matto i okasion para ta na'annok i mina'ase'-ta.

Si yu'os ma'ase' ni atension-miyu yan adios asta otro simana. Si Yu'os en fambinendisi i + Tata, yan i Lahi-ña, yan i Espiritu Santo. Amen.

88

KONFESION DESPUES DI RITIRO February 23, 2003

Pa'go i VII Damenggo gi Otdinario na tiempo. I Ebaghelio machuchule' ginen i tinige' San Marcos, kapitulu 2. Guiya este na Ebanghelio anai ha asi'i' si Jesukristo i paralitiku ni isao-ña siha. Para ta komprende i siknifikasion-ña este na Ebanghelio maila' ya ta ekukngok este na estoria un ratu.

Un patgon lahi gi high school saonao gi ritiro o sino ehetsision ante. Gi uttimu ha'ani ha disidi para u cho'gue una kosa ni ha'gas ha letki anakko' na tiempo. Ha disidi para u risibi i sakramenton konfesion.

Ha konfesatñaihon todu i isao-ña sin u puni ni hafa. Ha baba korason-ña ya ha konfesatñaihon todu i siña ha hasso na isao-ña. Nina' manman i patgon anai ti ha mensiona si pale' ni hafa pot i isao-ña. Hokkok ha' sinangani gue' as pale’ pot i dangkulon guinaiyan Yu'os nu guiya.

Guaha masusedi nu este na patgon despues, ya ha tutuge' gi iyo-ña diary. Guaha na taotao ha tutuge' papa' gi fina' lepblo i manimpottante ni masusedi giya guiya. Estague' ma'a'agang diary.

Ilek-ña gi diary: "Anai humuyong yo' ginen i kapiya ñumahlalang siniente-ku ya hu ripara na sumen bonitu i ha'ani guihi na talo'ani...Pot primet biahi mañiente korason-hu ya hu agradesi gi uriya-hu i glorian Yu'os ni mana'annok gi fina'tinas-ña mambonitu na kosas siha.

Sigi ha' di mamokkat yo' mo'na ya pot los uttimu, sin bai ripara, matto yo' gi fina' okso. Enao nai umasson yo' papa' gi hilo' cha'guan, hu estira kannai-hu ya tumalak hilo' yo' gi langet. Ti hu hasso kuantos tiempo umasson yo' guenao, lao una kosa ni ngai'an nai bai maleffa. Hu gof siente na gaige si Yu'os gi uriya-hu."

Este i ha siente gi korason-ña este na estudiante, apropositu siña ta usa para ta tutuhon sumangan hafa ha sangangani hit este na Ebanghelio i pa'go ta huhungok.

Estague' ha keke sangani hit este na Ebanghelio yanggen ha asi'i' hit si Yu'os ni isao-ta. Kon kariño ha sangani hit i primet na tinaitai anai ha sangani si Yu'os i taotao Israel ginen i pachot Isaias: "Un na'katgadu yo' ni isao-mu, yan un na'yayas yo' ni chatfinatinas-mu. Lao hu funas i linachi-mu; ya maleffa yo' ni isao-mu."

Este na finana'gue, pot inasi'i', mas klaru ha sangan si Jesukristo gi Ebanghelio, anai ilek-ña ni taotao ni paralitiku: "Manma'asi'i' i isao-mu siha...Tohge hulo'...ya un famokkat ta'lo."

Este na palabra i asi'i', o sino manasi'i' pat ma'asi'i', annok 150 biahi gi Eskrituras. Ginen este na a'annok na lamayot patte gi Eskrituras pot inasi'i'. Hunggan, i guinaiyan Yu'os i mas yahululo', lao inasi'i sumigugundo.

Gi todu i finana'gue-ña si Jesukristo sasaonao siempre i manasisi'i'. Ta sosodda' gi Tatan-mami anai ilek-ña si Jesukristo para ta baba korason-ta para u asi'i' hit si Yu'os, taimanu ha' yanggen ta asi'i' i prohimu-ta.

Ta tataitai lokkue' gi malingu na kinilu, yan gi malingu na pidason salape' na fina'akomparasion yan prinsipatmente gi despetdisiao na patgon. Gi todu este siha na fina'akomparasion ha sangangani hit si Jesukristo na gof manasi'i' si Yu'os. Ta tataitai lokkue' gi Eskrituras anai si San Pedro ha faisen i Saina kuanto biahi para u fanasi'i' kao siete biahi? Ilek-ña i Saina setenta biahi mamuttiplika yan siete biahi.

89

Ahe' ti hokkok ha' bida-ña i Saina para u fana'gue hit ni este siha. Guiya mismo ha praktika este i para manasi'i'. Ha asi'i' i paralitiku na taotao. Ha asi'i' i palao'an ni umadotteterio. Ha asi'i' i mañotsot na sakke. Ha asi'i' i kumastiga yan pumuno' gue'.

Estague' pa'go i praktiku na mensahi ni gaige guini na tinaitai ginen i Eskritura. Siña ta alok taiguini. Fine'na, mas si Yu'os malago' para u asi'i' hit ki para ta gagao gue' inasi'i'. Segundo, yanggen ha asi'i' hit si Yu'os pues debi di ta asi'i' otro taotao.

Hafa ha kombibida hit este na Ebanghelio para ta cho'gue? Dos kosas ha sosoyo' hit para ta cho'gue. Fine'na, ha kombibida hit para ta dalalaki ehemplo-ña este na estudiante. Ha kombidida hit para ta baba korason-ta ya ta risibi i Sakramenton Konfesion. Segundo, ha kombibida hit si Jesukristo para ta cho'gue ayu i ha cho'gue gi lina'la'-ña. Para ta asi'i' ayu i umisague' hit. Estague' i praktiku na mensahi ni gaige guini na Ebanghelio. Estague' i imbitasion ginen i tinaitai siha ginen i Eskrituras. Estague' ta selelebra yanggen mandaña' hit gi Santa Eukaristia o sino Santa Misa.

Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-ña yan i Espiritu Santo. Amen.

NA'MAMAHLAO I MAOLEK PARA I TAILAYI March 02, 2003

Pa'go i VIII Damenggo gi Otdinario na Tiempo, Añu B. I Ebanghelio machuchule' ginen i tinige' San Marcos Kapitulu 2:18-22. Guiya este na Ebanghelio anai makuestiona si Jesukristo ni Manfariseo: "Sa' hafa na manayuyunat i mandisipulon Juan Bautista yan i mandisipulon i Manfariseo, ya i mandisipulu-mu ahe'?"

Anai makuestiona si Jesukristo guini, annok na nina'fan mamahlao siha nu guiya. Guaha siha taotao gi tiempo-ña manma'añao nu guiya sa' maninatataka siha ya siempre malingu i espesiat na pueston-ñiha yan oron-ñiha gi me'nan taotao. I pumalu siha nina'fan ma'añao sa' si Jesukristo ha atataka i isao-ñiha. Entonses nina'fan chachathinasso, nina'fan luluhan yan maninestototba konsensian-ñiha anai mali'e' i minagahet. Lao mas la'yiyi, sa' ha na'fanmanli'e' siha hayi na klasen taotao siha ya ti yan-ñiha i lini'e'-ñiha pot siha mismo. Gi et mismo tiempo, mali'e' na espesiat si Jesukristo ya manma'añao nu guiya lao taya' siña nai para ma'ataka gue'. Entonses ma'ataka i mandisipulu-ña pot i para mabotlea gue', ya kalan machonnek gue' yan i mandisipulu-ña huyong, pot no u fañaonao gi inetnon i Manfariseo, sa' siempre mantinilaika siha. Pot enao na manmasangan tailayi pot siha lao ilek-ña si Jesukristo, "Manmatuna hamyo yanggen manmakalumnia yan manmasangan todu klasen tinailayi kontra hamyo sa' pot guahu." Ha na'fanmatatnga yan ha na'fanmetgot yan mannina'i trankilidat i mandisipulu ni taya' siña umamot siha. Lao ti gotpe mannina'i siha ni este. Mannina'i siha ni este despues di anai hinasson-ñiha i maninimigu na manmanganna siha. Manmana'i ni este siha despues di maklaba gue' gi kilu'os. Manmana'i ni este siha despues di i resureksion.

Este na sinisedi, anai hinasson-ñiha na mana'mamahlao si Jesukristo, masusedi antes di i resureksion. Masusedi este anai hinasson-ñiha i inimigon i Saina na siña ha' buente manmanganna siha yanggen ti mana'fañaonao i mandisipulu gi inetnon-ñiha. Lao masusesede ha' este asta pa'go. Esta dos mit años hita ni Mangatoliko mañasaonao guini gi relihion i manmatatnga na manmattet yan ayu siha i manmamadesi pot si Jesukristo.

Este ha' i halacha, kuatro na Hetman Americana, unu na’an-ña si Sister Beatrice, manhanao para El Salvador para u fanmamana'gue ni mamopble pot si Jesukristo. Yanggen para u fanmafana'gue i mamopble pot si Jesukristo debi fine'na di u fanmafanague taimanu mangge yan mataitai i lepblo yan mana'gasgas maisa siha. Este siha na Hetmana na'mamahlao para unos kuantos taotao sa' maninafuetsa siha para u ma’atan-maisa i lina'la'-ñiha yan hafa taimanu tratan-ñiñiha ni mamopble.

90

Maproklama ni Hetmana pot si Jesukristo, ya ta tungo' ha' na si Jesukristo todu i tiempo na'mamahlao para i manailayi. Entonses un puengi anai manhahanao tatte i Hetmana para i kombenton-ñiha despues di manmambisita ni mamopble gi sengsong, manmataggam ni sendalu. Manmaestani yan manma'ataka yan manmapuno'. I Archobispo ha kondena este na tailayen cho'cho'. Ilek-ña maseha hayi ni umaña i mamopble ha eskandalilisa si Jesukristo. Guiya lokkue' este i Archobispo na'mamahlao para este siha i manailayi na taotao; ya manma'añao nu guiya. Un oga'an ha selelebra i Santa Misa gi kapiya gi hospitat. Anai ha hatsa hulo' i Kalis ni ha sasahguan i Haga' i Saina, mapaki gue', ya matai.

Anai manmatto i Nazis, Aleman, gi un songsong ya madisidi para u mana'fanma'añao i taotao nu siha, manmarekohi 128 na lalahi yan famagu'on-lalahi. Manmapongle siha gi halom un dangkulo na guma' ya para u masongge. Manhuyong i Hetmana siha ya ma'ofresen maisa para siha u fanmapuno ya u mana'fanlibre i lalahi. Manmakonne' i Hetmana ni Nazis guatu gi halom tano' ya manmapuno'. Despues di i gera, anai maguaddok i naftan-ñiha masodda' guenao to'lang un pagon-lahi ni 12 años idat-ña. Taya' tumungo' hafa bidada-ña enao guenao. Lao ilek-ñiha na este na patgon malago guatu para u na'fanlibre i Hetmana. Na'mamahlao este para i Nazis. Estague' i manailayi na sendalu manlisto para u mapuno' i manai'isao na Hetmana yan estague' un matatnga na patgon ni 12 años ha' idat-ña humanao guatu para u chagi sumatba i Hetmana. I manailayi todu i tiempo machatli'e' i manmatatnga. Malili'e' maisa siha ya ma'akompapara na siha i mandangge. Kumeke ilek-ña na na'mamahlao para siha i manmatatnga.

Hagu lokkue' ni un dalalalaki si Jesukristo, na'mamahlao hao para unos kuantos taotao. Yanggen mali'e' hao ni bisinu na matto hao ginen i Misan Damenggo, na'mamahlao hao para ayu i ti makakaikai siha para u fanhosme Misa. Yanggen manlimosna hao dangkulo na katida para i Catholic Charities Appeal, na'mamahlao hao para ayu i ha miskinunuyi si Yu'os. Yanggen fiet hao ni asagua-mu, na'mamahlao hao para ayu i inapuntan gui'eng-ña ha dalalalaki. Yanggen un apapasi i dibi-mu, na'mamahlao hao para ayu i dumigegeru. Yanggen ilek-mu na isao i para u mapuno' i neni gi tiyan nana-ña, na'mamahlao hao para ayu i ha hongge i abortion.

Hafañe'los, mangaige hit gi gimayu'os ayu i manmatatnga. Manhihita yan i mas matatnga na taotao desde i tutuhon i tano'. Na'mamahlao gue' para i manailayi na taotao siha ya pot enao na manmalago' para u machonnek gue' huyong, ya anai ti macho'cho' enao, mapuno' gue. Lao gaige gue' gi halom kada unu giya hita ya manma'añao i manailayi sa' matungo' ha' na siempre manmapedde siha. Lao hita mangagaige ha' hit ya siempre hita manmanganna. Guaha na biahi na makkat para ta fanmaolek. Nisisita na un matatnga para u fanmamahlao otro taotao nu hagu. Ahe' ti manmanhuhusga hit guini, ni ti ta kakasi siha. Lao, parehu yan ayu na taotao siha ni manma'ataka i mandisipulu sa' pot i ti manayuyunat, ti manmalago' matulaika i lina'la'-ñiha achokka' este para u nina'fanmagof yan u nina'fan maolek siha na taotao. Entonses, pot lo menos, mamparehu hit yan si Jesukristo; manna'mamahlao hit para ayu siha i ti manmalago' mali'e' i minagahet hayi siha. Hita manna'mamahlao, yan hita lokkue' i Maolek na Notisia.

Si yu'os ma'ase' ni atension-miyu yan adios asta otro simana. Si Yu'os en fambinenisi, i + Tata, yan i Lahi-ña, yan i Espiritu Santo. Amen.

I Lahen i ti Manhongge as Yu’os March 09, 2003

Maolek este i tiempon Kuaresma ta usa para ta na'mas taddong i sinetsot yan i hinengge-ta. I Ebanghelio ni ta hungok maproklama pa'go guini gi Primet Damenggon Kuaresma machuchule' ginen i tinige' San Marcos 1:12-15. Ha sangan guini na para ta prepara hit sa' esta matto i dinanche na tiempo ya para ta tulaika i lina'la'-ta.

Para ta komprende maolek este na Ebanghelio maila' ya ta usa este na ehemplo. Todos hit tumungo' na gi eskuelan publiku ti siña mataitai i Biblia yan ti siña manmanayuyot as Yu’os. Estague' i rason na tumaiguini este.

91

Gi Mayu na mes gi 1980 na sakkan annok un estoria gi Time magazine. Estague' i na'an-ña este na estoria, "Mumanhongge i Lahen i ti Manhongge." Este na estoria ha sangan i makombietten William J. Murray III..

Este i Murray na na'an mamta' gi todu i tano' gi 1963 na sakkan anai papatgon ha' si William. Guenao na sakkan humanao para i kotte giya Maryland, si William yan si nana-ña as Madalyn Murray O'Hair, para u makontra yan u mana'para i tinayuyot yan i mataitai i Santa Biblia gi eskuelan pupbliku.

Matto este na kausa gi U.S. Supreme Court ya manganna ya desde ayu na tiempo ti siña guaha tinayuyot yan ti siña mataitai i Biblia gi eskuelan pupbliku.

Anai dumangkulo si William ha kontinua kumontra si Yu’os gi tinige'-ña siha ni manma'emprerenta gi gaseta yan magazine. Lao despues makombiette i prohimu.

Sigun i matuge' na estoria gi Time magazine ilek-ña na patte gi rason na makombiette si William sa' pot i chachathinasso gue' hafa uttimoña para u masusedi ni tano' yan hita guini gi hilo' tano'. Ilek-ña, yanggen para ta satba este na tano' anai mañasaga hit pues debi di u ta po'lo hinengge-ta gi mas takkilo' yan mas bula fuetsa-ña na petsona ki hita.

Ginen este na matto i hinengge-ña si Murray gi as Yu’os sa' pot i chachathinasso gue' hafa para u masusedi ni tano'. Ti parehu i rason na mumanhongge gue' as Yu’os yan i rason na mumanhongge gue' gi as Jesukristo. Estague' ha sangan gi lepblo ni ha tuge' hafa taimanu na mumanhongge gue' as Jesukristo.

Matto i hinengge-ña as Jesukristo ginen i novel o sino estorian kadokado’ na lepblo ni ha taitai pot i lina'la' un taotao ni na'an-ña si Lucanus gi antigu na tiempon i Manromano.

Guini na lepblo ha sangan na si Lucanus ha chatli'e' yan ha kokontra i relihion, parehu yan si William. Lao este na chinatli'e' matulaika para guinaiya anai si Lucanus ha komprende hayi si Jesukristo.

Anao dumangkulo si Lucanus makombiette gue' ya guiya tumuge' i Ebaghelio sigun gi tinige' San Lucas.

Este na estoria tumulaika si William anai ha taitai i lepblo.

Un puengi manguifi si William pot i Biblia. Gof metgot este na guinifi-ña ya asta yinahu gue' ya ti siña tuma'lo tatte gi maigo'-ña.

Tat fue minetgot-ña este na guinifi-ña asta kahulo' gue' ya humanao para un tienda ni mabababa tulanoche.

Ha sodda guenao mabebende i Biblia. Mamahan unu ya humanao tatte para i gima'-ña ya ha tutuhon tumaitai i Ebanghelio sigun gi tinige' San Lucas. Este nai ha ekspirensia hayi si Jesukristo. Ayu na puengi matulaika lina'la'-ña si William para todu i tiempo.

Despues di makombiette gue' mangge un katta para u ma'imprenta gi gaseta. Guini na katta nai ha gagao i taotao Baltimore, Maryland despensasion pot i bida-ña gi U.S. Supreme Court na mana'probidu i Biblia yan i tinayuyot gi eskuelan pupbliku gi todu iya America. Estague' ilek-ña gi katta:

"Hu a'atan tatte mas di 33 años gi lina'la'-hu ni hu despetdisia sin hinengge gi as Yu’os. "Mananayuyot yo' na u ayuda yo' i Saina para bai korehi, maseha didide', i linachi siha ni hu kumeti anai taya' hinengge-ku gi as Yu’os."

92

Estague' un estorian taotao ni lala'la' ha' trabiha ni siña ta usa para ta li'e' klaru hafa si Jesukristo ha sangani hit guini na Ebanghelio:

"Matto esta i dinanche na tiempo, ya esta hihot i Rainon Yu’os! Tulaika i lina'la'-miyu yan fanmanhongge gi maolek na notisia!" (Lk 1:15)

Estague' bida-ña si William. Despues di 33 años di ha kontra si Yu’os pot fin mumanhongge gi Ebanghelio, ya ha hongge si Jesukristo komu Saina-ña.

Este i bida-ña si William ha sosoyo' hit este na Ebanghelio para ta cho'gue pa'go guini gi fine'na na Damenggon Kuaresma.

Ahe' ti ha tatago' hit para ta fanmanhongge gi as Yu’os sa' gagaige ha' i hinengge-ta nu guiya. Ni tampoku ti ha fafaisen hit para ta fanmangge katta para i gaseta para ta fanmangagao despensasion.

Lao hunggan ha fafaisen hit para ta tulaika i lina'la'-ta sa' guaha na biahi nai ti si Jesukristo yahululo'. Guaha na biahi nai guiya sumigugundo ya i isao primero. Yan ha fafaisen hit lokkue' para ta taitai i Santa Biblia, i Ebanghelion San Marcos. Guaha ha' gi fino' Chamorro ni este na Ebanghelio.

Entonses este na Ebanghelio ha a'agang hit para ta na'santos i lina'la'-ta guini na tiempon Kuaresma.

Lao hafa kumeke ilek-ña este?

Desde i antigu na tiempo este i Kuaresma tiempon grasia para i Mangilisyanu ya meggai tumulalaika i klasen lina'la'-ñiha. Ha ofreresi hit si Jesukristo kada unu ni este na grasia pa'go na Kuaresma.

Estague' pa'go na manmatto hit gi praktiku na kuestion. Taimanu para ta dalalaki este na inagang-ña si Jesukristo nu hita?

Meggai na klasi nai siña ta dalalaki este na inagang-ña i Saina. Lao maila' ya ta konsidera este i dos ha'.

I fine'na na punto, ha a'agang hit i Saina para ta cho'gue ayu i ha cho'gue si William. Chule' i Biblia ya un taitai desde i tutuhon i Ebanghelio sigun gi tinige' San Marcos.

Siña un na'fonhayan tumaitai este na Ebanghelio durante este na Kuaresma yanggen un taitai lamitaha gi kapitulu kada puengi.

I segundo na putno, ha a'agang hit i Saina para ta cho'gue ayu i machocho'gue ni Mangilisyanu, para ta risibi i sakramenton konfesion antes di u fakpo' este na kuaresma. Hahasso na todu i gima’yu’os mana’guaguaha konfesion. Guaguaha konfesion gi Katedrat antes di i Misan Damenggo yan lokkue' siempre guaha konfesion durante i Come Back to Life.

Yanggen ta risibi este na sakramento pues ta chocho'gue hafa ha faisen hit si Jesukristo para ta cho'gue pa'go guini na Ebanghelio. Para ta na'annok na manmañotsot hit yan manmanhongge hit gi Ebanghelio.

Pot los uttimu, kumeke ilek-ña este na para ta sangan na manmañotsot hit ni isao-ta siha, yan para ta sangan lokkue' na manmanhongge hit na malago' si Jesukristo para u asi'i hit ni isao-ta siha ya para ta tutuhon un nuebu na lina'la', libre ginen i isao.

Estague' i imbitasion-ña i Ebanghelio para hita pa'go guini gi fine'na na Damenggon Kuaresma:

* Un imbitasion este i para ta cho'gue ayu i ha cho'gue si William.

93

* Un imbitasion este para ta ta fanmangagao inasi'i ginen i isao-ta siha ya para ta tutuhon un nuebu na lina'la' ya para guiya si Jesukristo u talo' gi lina'la'-ta.

Si yu’os ma’ase’ ni atension-miyu yan adios asta otro simana. Si Yu’os en fambinendisi i + Tata, yan i Lahi-ña, yan i Espiritu Santo. Amen..

MANNGE' NA SINIENTE March 16, 2003

Mangaige hit pa'go guini gi II Damenggon Kuaresma. I Ebanghelio ni pa'go ta huhungok maproklama era i transfiguration o sino anai matulaika figura-ña si Jesukristo gi me'nan i mandisipulu-ña. Maila' ya ta usa este na ehemplo para ta komprende mas kabales i siknifikasion este na Ebanghelio.

Ginen ha sangani yo' un palao'an pot un otdinario ni masusedi nu guiya lao yinengyong i yahalulom gi korason-ña. Ilek-ña, un oga'an Sabalu estaba gue' gi kusina manaflilito hineksa para amotsan-ñiha. Ma'lak ininana-ña i atdao halom gi bentana, ya i tres na famagu'on-ña manestaba gi sala mañachalek yan mankombetsasiosion yan manhugagando yan si tatan-ñiha.

Mientras ha plalanta i platu yan i kichala gi lamasa para u fanamotsa matto giya guiya un mannge' na sinienten guinaiya yan minagof pot i familia-ña. Ha tutuhon mumisen lago' i mata-ña ya kalang mañuñukot gue' ya ti siña kumuentos.

I psychologists ilek-ñiha na kada unu giya hita mafatto este i mannge' na siniente. Ayu na momento este anai ta cho'gue un otdinario na aksion ya ta ekspirensia un ratu sen tatkilo' na siknifikasion. Ayu na momento este anai kalang mohon manina ma'lak si Yu'os gi uriya-ta ya ta ekspirensia gi sanhalom-ta i langet.

Siña ta usa este i mannge' na siniente para ta komprende didide' hafa ma'eskpirensia ni mandisipulu, si Pedro, si Santiago yan si Juan ni ta hungok mataitai pa'go guini gi Ebanghelio. Ma'ekspirensia un mannge' na siniente.

Guihi gi unos kuantos minutos, diferensiao lini'e'-ñiha i mandisipulu as Jesukristo. Guihi na momento, mali'e' si Jesukristo binalutan ni mina'lak Yu'os. Unos kuantos minutos mali'e' un tano' ni tatkilo'ña ki este anai mañasaga hit. Unos kuantos minutos mali'e' hayi si Jesukristo depotsi anai matulaika i figura-ña: mali'e' gue' komu i ma'lak yan gatbo na Lahen Yu'os.

Estague' un kuestion ni siña ta faisen pa'go. Sa' hafa na manmana'i hit ni este i Transfigurasion Jesukristo na Ebanghelio guini gi tiempon Kuaresma anai mampinitetensia hit?

Sa' hafa na ti maproklalama este gi tiempon Pasgua? Siña ta oppe este na kuestion gi taiguini na manera. Mina' taiguini este sa' masusedi i Transfigurasion despues ha' di monhayan i Saina ha sangani i mandisipulu-ña na debi di u hanao para Jerusalen para u famadesi yan para u matai.

Anai si Pedro ha hungok si Jesukristo ha sangan este, umessalao a'gang yan ilek-ña, "Si Yu'os ti u sedi este, Asaina. Ti debi di u masusedi este nu hagu!"

Despues ilek-ña si Jesukristo as Pedro: "Ritira hao ginen guahu, Satanas! Estotbo hao gi me'na-hu, sa' i hinassoso-mu hinasson taotao ha', ahe' ti hinasson Yu'os!" (Mt 16:22-23)

Si Pedro, si Santiago, yan si Juan manisisita manma'abiba korason-ñiha despues di este i makkat na sinangan-ña si Jesukristo.

94

Este lokkue' na i Gima'yu'os ha nana'i hit ni este i Transfigurasion na Ebanghelio guini gi tiempon Kuaresma. Malago' i Gima'yu'os para u abiba korason-ta antes di ta fana' i minasa'pet i Saina gi Bietnes Santo.

Malago' i Gima'yu'os para u na'fanmetgot hit para ta fana' i pinadesi yan i finatai i Saina gi kilu'os.

Estague' ta'lo otro rason na manmana'i hit ni Transfigurasion na Ebanghelio guini gi tiempon Kuaresma. Manmana'i hit ni este na Ebanghelio sa' pot i Transfigurasion yan i agonias gi hatdin masusedi gi hilo' okso. I agonias gi hatdin masusedi gi Ekso' Olibas. I Transfigurasion masusedi gi Ekso' Tabor. Todu i dos masusedi parehu na tiempo. Puengi nai masusedi este i dos. Gi todu i dos na okasion malingu maigo'-ñiha i manapostoles mientras mananayuyot si Jesukristo. Pot los uttimu, todu i dos na sinisedi manestaba este i tres na manapostoles: Si Pedro, si Santiago yan si Juan.

Lao hafa relasion-ñiha este i dos na sinisedi, i unu giya Olibas yan i otro giya Tabor? Giya Tabor i tres na manapostoles, gi un momento anai masiente na kalang manmakahat siha guatu gi langet, mali'e' manina ma'lak i yini'usan-ña si Jesukristo ni taya' nai mali'e' antes di este.

Guihi giya Olibas et mismo tres na manapostoles mali'e' umagonias si Jesukristo ya umannok na sen magahet na taotao gue' lokkue'.

Kombieni yan nisisario todu este i dos, ayu i masusedi gi Ekso Tabor anai umannok i yini'usan-ña, yan ayu i masusedi gi Ekso Olibas anai umagonias gue' ya umannok na taotao gue' kabales. Este nai umannok hayi gue' si Jesukristo depotsi. Guiya sen Yu'os yan sen taotao.

Maila' pa'go ya ta atan hafa este i masusedi gi dos na okso kumeke ilek-ña para hita. Mamparehu hit yan si Jesukristo, guaha dos patte giya hita. Todos hit guaha patte giya hita komu taotao yan guaha patte giya hita komu yini'usan.

Todos hit famagu'on Adan pues mantaotao hit yan todos hit famagu'on Yu'os pues manyini'usan hit.

Mamparehu ha' hit yan si Jesukristo gi Ekso Tabor guaha nai ta ekspirensia mannge' na siniente yanggen ha balutan hit i mina'lak Yu'os. Guini na momento ta siente na kalang matata'chong si Yu'os gi fi'on-ta.

Lao mamparehu ha' hit lokkue' yan si Jesukristo gi Ekso Olibas, guaha na biahi nai ta ekspirensia i agonias, sa' famagu'on Adan hit, ya tenga guaha nai ha na'maya' i mina'lak Yu'os. Guaha nai ta siente na ha abandona hit si Yu'us o sino guaha nai ta kuestiona kao guaha Yu'os.

Yanggen matto este i dos na momento, i mannge' na siniente yan i agonias, debi di ta hahasso i masusedi gi dos na okso, Okso Tabor yan Okso Olibas. Debi di ta rialisa na ha ekspirensia si Jesukristo todu este i dos na momento gi lina'la'-ña.

Debi lokkue' di ta realisa otro punto. Gi todu i dos na momento gi lina'la'-ña, anai umagonias gue', hafa ha cho'gue si Jesukristo? Manayuyot gue'. Yanggen manayuyot gue' anai manmasusedi este siha gi lina'la'-ña, pues kombieni na hita lokkue' ta fanmanayuyot yanggen manmatto este siha na momento gi lina'la'-ta.

Pot los uttimu, yanggen ta cho'gue este i ha cho'gue si Jesukritso gi Transfigurasion-ña pues siempre hita lokkue' ta hungok ayu i ha sangan si Yu'os Tata, "Estague' i hu gofli'e' na patgon-hu." Ya siempre lokkue' mamparehu hit yan si Jesukristo ta ekspirensia ayu i ha ekspirensia anai umagonias gue' gi hatdin: manmatto i mananghet para u makonsuela gue'.

95

Si yu'os ma'ase' ni atension-miyu yan adios asta otro simana. Si Yu'os en fambinendisi, i + Tata, yan i Lahi-ña, yan i Espiritu Santo. Amen.

MUMON DOS UMAGUAIYA March 23, 2003

Pa’go i III Damenggon Kuaresma, Añu B. I Ebanghelio ni ta hungok maproklama pa'go machuchule' ginen i tinige' San Juan 4:5-42. Guiya este na Ebanghelio anai estaba si Jesukristo gi templo ya ha dulalak ayu siha i manmambebende yan i manmanulalaika salape'.

Para ta komprende i leksion guini na Ebanghleio maila' ya ta usa este na sinangan.

Masangan ni manamko' na yanggen mumu i dos umaguaiya, "kalang i pagyo gi tasi; gi yahululo' ha' nai gaige i napu, lao gaige i kurienten guinaiya gi fondo". Sen bonitu yan sen magahet este na kuentos manamko'.

Ma'imprenta gi lapidan un taotao ni mamangge lepblo, si Robert Frost, este siha na palabras: "Guahu mumon dos umaguaiya yo' yan i tano'." Guiya mismo si Robert Frost umayek este na palabras. Kumeke ilek-ña si Frost na mumon dos umaguaiya gue' yan si Yu'os. Ya para hafa ta pune, masusesedi este gi kada unu giya hita. Meggai na biahi nai manmumon dos managuaiya hit yan i tano' yan si Yu'os sa' pot i tinailayi siha ni ta sosodda' gi lina'la'-ta. Sa' hafa na gigon makpo' un gera gi tano' matutuhon otro ta'lo? Sa' hafa na bula chinatli'e'? Sa' hafa na ti siña pumara i minalangu gi entre i taotao siha? Sa' hafa na bula mampininiti yan mantriristi? Sa' hafa na guaha finatai? Sa' hafa na bula difekto-ña este i tano' ni mangaige hit?

Guaha na biahi nai baba sinientete-ta sa' bula difekto-ña este na tano' anai mangaige hit. Lao yanggen siakasu na ha fa'tinas si Yu'os un tano' ni taya' difekto-ña, kao siña manla'la' hit guenao? Siempre ta sodda' na ti siña mañaga hit guenao sa' ti nahong minaolek-ta para ta fañaga guenao na tano'. Lao manmafa'tinas hit yan didide' difekto ya manmapo'lo hit guini na tano' ni guaha didide' difekto-ña. Pot enao na yanggen manlalalo' hit, o sino manmumu hit yan este i fina'tinas Yu'os na tano', maila' ya ta fanmumon taiguihi i dos umaguaiya, "gi yahululo' ha' nai gaige i napu, lao gaige i kurienten guinaiya gi fondo". Munga hit chumatli'e' este na tano', yan i taotao siha, sa' regalon Yu'os este nu hita.

Gi unos kuantos años maloffan matto dangkulon tinilaika guini gi tano' yan kon todu iya Marianas, ya nina'fanande' i manhoben ya magogosa todu este siha i tinilaika ni manmasusesedi. Ya durante este na tinilaika, a'gang bos-ñiha i mansesetmon yan manmanakonseseha ni ta huhungok, para ta a'go' o sino ta tulaika i klasen lina'la'-ta, --- ya para ta bira hit guatu gi espirituat. Lao achokka sen a'gang i bos-ñiha i mañesetmon yan i manmanakonseseha, mas a'gang ayu siha i mane'esalao para tinailayi.

Guaha un ma'estron musiku ni mapresu pot politika. Despues di masotta binisita gue' ni un gaseteru ya finaisen kuestion siha pot i ekspirensia-ña gi presu. Pot los uttimu finaisen gue', hafa hinasso-ña mas bonitu na musiku para guiya. Anai mapreresu hao hafa na musiku mas un diseseha para un hungok? Hafa mas sesso matto gi hinasso-mu na klasen musiku? Despues di manhasso taddong ilek-ña i ma'estro, yan tutuho' i lago' i mata-ña, "I mas bonitu na musiku gi tano' era i sonidon i bos otro taotao."

Bebengbeng i talanga-ta ni burukan i manambiento. Bebengbeng i talanga-ta ni burukan i machatli'e' otro rasan taotao. Bebengbeng i talanga-ta ni burukan i taya' moralidat-ñiha. Bebengbeng i talanga-ta ni burukan i taotao siha ni parake siha kao umana'tailayi este na tano' para i mantinatte-ta na famagu'on. Bebengbeng i talanga-ta i burukan taotao ni ilek-ñiha na taya' yu'os.

96

Pot enao na i mas bonitu na musiku ni siña ta hungok pa'go guini na momento era i sonidon i bos otro taotao --- era i sonidon i bos Kilisyanu ni ha na'fanmanhahasso hit ni lina'la' espirituat yan moralidat.

I mas bonitu na musiku ni siña ta hungok pa'go guini na momento era i sonidon i bos-mu komu Kilisyanu mientras ki un chocho'gue i mumon dos umaguaiya yan i taotao siha gi tano' ni manmaleffa na iyon Yu'os este na tano'. Ya kumeke ilek-ña este na i mas bonitu na bos pa'go guini gi tano' era ayu i bos ni dumalalalaki si Jesukristo.

Pot ehemplo, ta hungok gi Ebaghelio i leksion na a'gang bos-ña si Jesukristo ni mumu gue' ni mumon dos umaguaiya yan i taotao siha gi tano' anai estaba gue'.

A'gang si Jesukrito ha kontra ayu siha i fuma'gaga'ga' otro taotao siha. Estaba gue' na tumotohge gi templo anai manmafatto i taotao siha para u fanmanadora as Yu'os. Manmatto i manotdinario na taotao, i lancheru, i peskadot yan i pastores ginen todu i sengsong siha guatu gi Sagradu na Siuda para gi Sagradu na Templo --- manmatto ginen chago’ yan meggai na minappot. Lahyan mansen popble, ti nanahong kinanno'-ñiha.

Atan ha' i manma'gas i templo hafa bidan-ñiñiha. Machocho'gue kuanto i siña para u fanmachule' i tetehnan na salape' este i mamopble. Madimamanda na u matulaika i salape'-ñiha para ayu ha' i gaige gi templo na salape' para ma'apasi i kontribusion i templo. Sa' pot i para u fanmakopbla ganansia. Madimamanda na u fanmakonne' guatu i ga'ga' para masakrifisio, lao ayu ha' i gaige gi uriyan i templo siña akseptable pot i para u fanmafahan i ga'-ñiha. Kumeke ilek-ña na manmadigiruruyi i mamopble siha.

Pot este na umentalo' si Jesukristo ya mama'tinas un kuatta, ya ha tutuhon dulalak i ga'ga' siha huyong yan ha na'fanatlibes i lamasan i manmanulalaika salape' ya ha chalapon i salape'-ñiha. Ya ilek-ña, "Basta mafa'metkao i gima' Tata-hu!". Imperao si Jesukristo. Lalalo' si Jesukristo. Lao debi di ta komprende na i guinaiya muna'taiguini si Jesukristo. Pot i guinaiya-ña ni mamopble ni manmafagaga'ga' na ha cho'gue este.

Fuera di este, anai ha kondena este na che'cho'-ñiha ha aksepta na siempre makondena gue' lokkue'. Ya hunggan magahet, sa' ilek-ñiha i umestutudia i biblia na pot este la'yiyi na bida-ña si Jesukisto na i manma'gas i Manjudios mapotfia para u mapuno' gue' pot i para u maprotehi i ganansia ni machuchule' ginen i mamopble gi templo. Ti i pueston-ñiha ha' maninataka as Jesukristo, na kon todu i pottamonendan-ñiha. Ripara ha' guini giya Marianas yanggen guaha masangan para u maprotehi i mamopble na taotao hiyong. Ayu siha i manmanemplelea ni dumigeruruyi los pobres mas mana’gang kumokontra.

Yanggen para ta fanmakuenta na Mangilisyanu hit pues obligasion-ta para ta na'annok i mina'ase'-ta ni manmamadedesi yan i manmachata'atan. Lao guaha na biahi nai obligasion-ta komu Mangilisyanu para ta kontra ayu siha na taotao i muna'fanmamadedesi i mamopble. Guaha na biahi na obligasion-ta komu Mangilisyanu para ta fanessalao "Munga! Basta!" kontra ayu siha i muna'fanmamadedesi i mamopble yan i taotao hiyong ni manmafa'gaga'ga'. Yanggen ta cho'gue este siempre baba manmasangan pot hita yan siempre guaha para ta padesi. Lao ti ilek-ña si Jesukristo na libiano i lina'la' Kilisyanu.

Este i tano' ha nisisita na u sigi ha' guaha mumon dos umaguaiya anai i mas a'gang na bos ha na'a'annok i magahet na ginefli'e' Kilisyanu yan i lina'la' espirituat ni ta nisisita para u annok i diknidat kada taotao ni gaige guini gi tano' Yu'os --- era todos i famagu'on Yu's.

Si yu’os ma’ase’ ni atension-miyu yan adios asta otro simana. Si Yu's en fambinendisi, i + Tata, yan i Lahi-ña, yan i Espiritu Santo. Amen.

97

KAO GAIBALI YO’ GUINI NA TANO’? March 30, 2003

I Ebanghelio ni manmana’i hit para pa’go guini gi IV Damenggon Kuaresma machuchule’ ginen i tinige’ San Juan 3:14-21. Guini na Ebanghelio nai ta hungok si Jesukristo ha sangan, "Sa’ pot ha sen guaiya si Yu’os i tano’ na ha entrega i uniku na Lahi-ña, kosa ki ayu i manhongge giya guiya ti u matai, en lugat para u la’la’ taihinekkok" (Jn 3:16).

Para ta komprende este na Ebanghelio maila’ ya ta oppe este na kuestion. Yanggen siakasu na siña hao mamaisen unu ha’ na kuestion pot i lina’la’-mu, yan gof siguru hao na para un mana’i ni dinanche na ineppe, hafa mohon na kuestion para un faisen? Hafa ayu i mas yahululo’ ni malago’-mu para un tungo’? Siguru na ti parehu malago’-mu yan i malago’-hu na kuestion para ta faisen. Ayu i guaha dangkulon problema-ña siempre ha faisen pot i achaki-ña. Pot ehemplo, kao u dinira otro sakkan i kasamiento-mu sa’ pot i kalan guaguaha didide’ yinaoyao, pat sino hafa siña un cho’gue para un satba i umasagua-mu? Siña ha’ malago’ hao un ketungo’ kao para u homlo’ i patgon-mu ginen este i chetnot-ña? Kao u mahatsa suetdo-mu ya u mas gefsaga i lina’la’ i familia-mu?

Lao kalan manmanguiguifi hit ni este siha na kuestion. Ta sen tungo’ ha’ na taya’ tumungo’ hafa para u fanmasusedi gi manmamamaila’ na tiempo. Ya taya’ siña sumangani hit sin duda hafa para u masusedi nu hita. Lao yanggen siakasu na guaha taotao siña sumangani hit klaru sin duda hafa para u masusedi nu hita siguru na estague’ para ta faisen na kuestion: "Kao gaibali yo’ guini na tano’?" Siguru yo’ na kada unu giya hita malago’ para u tungo’ kao gaibali gue’ guini na tano’. Yanggen ta atan este na dangkulon lugat anai gaige este i tano’, yan i atdao, yan i pilan yan i puti’on siha, guaha nai ta faisen este na kuestion, kao magahet na interesao si Yu’os nu guahu? Kao magahet na ha tungo’ hayi hao pat hayi yo’, yan kao magahet na ha adadahi si Yu’os hafa para u masusedi nu hagu yan guahu?

Guini na Ebanghelio ni pa’go ta huhungok maproklama, si Jesukristo ha oppe hunggan este na kuestion. Ilek-ña: "Sa’ pot ha sen guaiya si Yu’os i tano’ na ha entrega i uniku na Lahi-ña, kosa ki ayu i manhongge giya guiya ti u matai, en lugat para u la’la’ taihinekkok." Ripara ha’ sa’ ilek-ña si Jesukristo "ha sen guaiya si Yu’os i tano’ " (ni kumeke ilek-ña todu i taotao) yan lokkue’ ilek-ña "...kosa ki ayu i manhongge" (ni kumeke ilek-ña kada unu giya hita).

Sen bonitu magahet yanggen ta hongge este. Lao para hafa ta pune, ti la’yiyi libiano para ta hongge este. Meggai ni ta lili’e’ gi uriya-ta ni kinekentra este para ta hongge. Pot ehemplo mampos lahyan na taotao mangaige guini gi tano’ para si Yu’os u guaiya kada unu. Hahasso na kasi enao i sinko biyon na taotao mangaige guini gi tano’. Kao magahet na siña si Yu’os ha adahi i nisisidat kada unu?

Estague’ ta’lo otro problema ni kalan ha kokontra i hinengge-ta as Yu’os. Mampos meggai probleman pinadesi guini gi tano’. Yanggen magahet na ha guaiya hit todos si Yu’os, yan yanggen magahet na guaha bali-ta guini na tano’, sa’ hafa na bula pinadesi? Hunggan siña ta achaka palu gi pinadesi pot i isao taotao ha’ mismo. Pot ehemplo, ayu i bomb ni pakpak gi metkao ni ha puno’ meggai na taotao. Ahe’ ti iran Yu’os ayu sino ki fina’tinas taotao i bomb yan i taotao muna’pakpak, ahe’ ti si Yu’os. Meggai na pinadesi manmafatto gi taotao siha sa’ pot i maniknorante, yan pot i isao-ñiha ha’, yan pot i ti manmalago’ manmanosge. Lao para hafa ta pune mamapot ha’ para ta komprende sa’ hafa na manmasusesedi este siha.

Guaha otro rason ni muna’fafatto i pinadesi gi taotao siha ni ti manresponsapble hit. Pot ehemplo ti taotao muna’guaguaha linao, yan pakyo, yan dilubio, yan ha’ilas. Hunggan magahet na guaha siha na problema guini gi tano’ fina’tinas taotao. Lao meggai lokkue’ na problema ti fina’tinas taotao sino ki iran tano’ pat sino guaha nai ilek-ta iran Yu’os. Ti siña lokkue’ ta alok todu i tiempo na kastigon isao este siha.

98

Yanggen ta konsidera este siha na problema ni mangaige gi tano’, kao siña magahet ta alok na guaha bali-ta guini na tano’? Hunggan, ilek-ña si Jesukristo. Lao hafa gaige gi hinasso-ña si Jesukristo anai ha sangan hunggan guaha bali-ta guini gi tano’? I rason na malago’ yo’ hu ketungo’ hafa gaige gi hinasso-ña si Jesukristo pot este na punto, era sa’ pot i hu nisisita este na klasen hinengge yan buente kon todu hagu lokkue’ malago’ hao un ketungo’.

Ti libiano na matto gi as Jesukristo este na hinengge giya guiya. Gaige este na ineppe gi tutuhon este na Ebanghelio i ta hungok pa’go anai ilek-ña si Jesukristo: "Taimanu ha’ anai si Moises ha kahat hulo’ i bronse na button kulepbla gi haligi gi disietto, taiguennao ha’ lokkue’ i Lahen i Taotao debi di u makahat hulo’."

Hafa este kumeke ilek-ña? Anai ha sangan este si Jesukristo, ha anunsia i finatai-ña gi kilu’os. Ha tungo’ ha’ na para u maklaba gi kilu’os. Ha tungo’ ha’ lokkue’ na esta ti abmam. Lao achokka’ atborotatao hinasso-ña pot i mamamaila’ na finatai-ña, sin embatgo ha sangan lokkue’ pot i guinaiyan Yu’os ni todu i taotao siha guini gi tano’.

Ta agradesi este na sinangan-ña si Jesukristo. Ya pot este na sinangan-ña na ha na’mas manmanguaiya hit nu guiya. Ha na’fanmamanman yan ha na’fanmalalago’ hit ni este na metgot hinengge-ña ni sumostieni gue’ si Jesukristo. Lao kalan mohon ti siña ta dalalaki este na hinengge-ña sa’ meggai ta lili’e’ yan ta huhungok gi uriya-ta ni kumokontra este na klasen hinengge.

Ni i Santa Biblia ti ha na’i hit klaru na ineppe pot este. Lao hunggan, ha konsuela hit sa’ ta taitai gi Santa Biblia na kon todu si Jesukristo ha li’e’ yan ha hungok gi uriya-ña meggai ni kumokontra este na klasen hinengge. Lao en fin ha hongge si Jesukristo na "si Yu’os ha sen guaiya i taotao siha guini na tano’. Ti libiano para u hongge si Jesukristo este, ni ti libiano para hita lokkue’. Lao ta li’e’ gi as Jesuskristo na hunggan posipble este na klasen hinengge. Pues estague’ na manmatto hit ta’lo gi primet na kuestion. Taimanu na matto este na hinengge gi as Jesukristo, na guaha bali-ta guini gi tano’?

Gi hinasso-ku matto este na hinengge gi as Jesukristo sa’ pot i maguaiya gue’ anai didikike’ gue’. Ti siña manmanguaiya hit otro solu esta guaha gumuaiya hit. Suette si Jesukristo ni este sa’ maguaiya gue’ kabales as Santa Maria yan San Jose desde i dinikike’-ña. Maseha mandangkulo na pinadesi matto giya guiya lao metgot gue’ sa’ maguaiya gue’ kabales anai papatgon gue’. Este i maguaiya-ña anai papatgon muna’metgot gue’ gi dumangkulo-ña para u komprende i minalago’ Yu’os.

Nihi ya ta dalalaki si Jesukristo sa’ hita lokkue’ esta manmaguaiya hit. Siña ha’ na mas dichosu i mapoksai-ña ki hita. Lao en fin esta manmaguaiya hit yan esta lokkue’ ta li’e’ i guinaiya. Maseha taimanu fatto-ña i guinaiya giya hita lao esta en fin matto. Este ti siña ta pune. Hita ni taotao guaha na biahi nai ta cho’gue i tailayi kontra otro taotao. Lao meggai na biahi lokkue’ nai ta cho’gue manna’manman na cho’cho’ yine’ase’.

Kumeke ilek-hu na naturat i guinaiya na u gaige giya hita. Lao hafa este kumeke ilek-ña? Kumeke ilek-ña na naturat i guinaiya gi taotao. Para si Jesukristo i guinaiya ni ha li’e’ gi taotao kalan maya’ na guinaiya gi espehos ni ha reflelekta todu i tano’. Lao ti siña ta usa este para ta prueba na presente i guinaiya gi tano’. Pues mana’lo hita tatte gi primet na kuestion-ta - KAO GAIBALI YO’ GUINI NA TANO’? Taya’ prifekto ineppe para este na kuestion. Maseha maya’ lao ta li’e’ guini ineppe-ña si Jesukristo. Ilek-ña: "Hunggan, sa’ pot ha sen guaiya si Yu’os i tano’ na ha entrega i uniku na Lahi-ña."

Si yu’os ma’ase’ ni atension-miyu yan adios asta otro simana. Si Yu’os en fambinendisi, i + Tata, yan i Lahi-ña, yan i Espiritu Santo. Amen.

99

MANA'I HAO LINA'LA', PUES DEBI DI UN FANNA'I April 06, 2003

Mañe'lu-hu gi Saina-ta as Jesukristo. Pa'go i mina' V na Damenggo Kuaresma. I Ebaghelio machuchule' ginen i tinige' San Juan 12:20-33. Guiya este na Ebanghelio anai ilek-ña si Jesukristo, "... solu poddong ya matai i granon trigu gi hilo' tano' pues granon tririgu ha'. Lao yanggen matai, manonokcha' meppa'." (Jn 12:24) Para ta komprende hafa si Jesukristo ha keke fana'gue hit maila' ya ta atituyi este i sigiente na sinangan.

Manmasangani hit na i mas guaguan na guinaha-ta era i lina'la'-ta. Ya yanggen ta ripara hunggan magahet sa' kon todu i ga'ga' siha i lina'la'-ñiha mas mana'tatkilo'. Hagu ni tiradot pat kasadules un sen tungo' ha' na gigon kalaskas hao malago siempre i binadu, sa' ma'añao matai. Sa' hafa i alu na guihan na ha dalalalaki i atulai? Sa' pot no u matai ñalang. Sa' hafa na gigon lini'e hao ni kukuracha malalagu? Sa' pot no un gachcha' ya un figes gue'. Pot no u matai.

Hita lokkue' ta popo'lo na i mas guaguan na guinaha-ta era i lina'la'-ta. Pot enao na manhahanao hit manmacho'cho' achokka manmalalangu hit. Para u guaha salape'-ta para ta fahan i nengkanno'-ta. Pot no ta fanmatai. Pot enao na ta fanana'gue i famagu'on-ta para u ma'atan ambos banda antes di u makrusa i chalan, yan ta kandadalu i petta-ta antes di ta fanmaigo', yan manhahanao hit para i dokto yanggen manmalangu hit. Mamparehu hit yan i ga'ga' siha, ta na'sen guaguan i lina'la'-ta. Naturat este na siniente-ta giya hita. Lao ti todu i tiempo taiguiguini. Guaha na biahi este na siniente-ta na inipos ni otro siniente-ta ni mas metgot.

Pot ehemplo ayu i che'lo ni ha atotga para u machule' unu na reñon-ña para u mana'i i otro che'lu-ña. Yan ayu na nana ni ha tago' i dokto para u satba i neni-ña fine'na anai ha hungok na kalang guaha piligro gi mafañagu-ña.

Sa' hafa na bumoluntario este na che'lo para u fanna'i unu na reñon? Siña ha' ilek-ña po'lo ya i otro che'lu-hu u fanna'i riñon. Hafa gaige gi hinasso-ña este na nana anai ha sangan na i neni u masatba, ahe' ti guiya. Siña ha' mamatkilo ya i neni u matai ya guiya u la'la'. Hunggan magahet i mas guaguan na guinaha-ta era i lina'la'-ta. Taya' siña kumuestiona este. Lao guaha otro minagahet guini gi tano' ni guaha na biahi nai ha tulaika este na minagahet.

Estague' na minaghet ha sangangani hit si Jesukristo pa'go guini na Ebanghelio. Ha sangan na para ta sodda' i lina'la' yanggen ta na'falingu i lina'la', para u mamta' i lina'la' yanggen mangeftao hit ya ta chalapon huyong. Para u na'klaru este na sinangan-ña ilek-ña si Jesukristo, "... solu poddong ya matai i granon trigu gi hilo' tano' pues granon tririgu ha'. Lao yanggen matai, manonokcha' meppa'." Ti mappot para ta komprende este na minagahet guini gi granon trigu. Kalan mohon taya' siknifikasion este i granon trigu. Ya mientras ki gagaige gi halom taru pues granon tririgu ha'. Lao yanggen ha na'enñaihon o sino ha dingu este na estao i granon trigu pues siempre dokko yan luma'chok yan manokcha' meppa'.

Ha aplika si Jesukristo giya guiya este na fina'akomparasion. Guiya para u na'enñaihon i lina'la'-ña. Ya pot i ha na'enñaihon i lina'la'-ña na dumangkuloña gue' ki guiya mismo. Ta li'e' este gi lina'la'-ña si Jesukristo. Yanggen ti ha na'enñaihon i lina'la'-ña siguru na katpenteru ha' matungo'-ña. Yanggen ti ha na'enñaihon i lina'la'-ña siguru na un ma'estro ha' ginen Galilea matungo'-ña. Lao anai matai gue' gi kilu'us humuyong matungo' gue' komu Nana'libren i tano'. Enao mina' ilek-ña si San Pablo, "Guiya si Jesukristo mama' tronkon i taihinekkok na lina'la' para todu i umosge gue'." Ahe', taya' giya hita para ta famparehu yan guiya. Lao mamparehu hit yan i granon trigu guaha kapasidat-ta para ta fandangkuloña ki hita mismo pa'go na momento. Hokkok ha para ta disidi kao para ta go'te para hita ha' na maisa i lina'la'-ta pat sino para ta na'enñaihon i lina'la'-ta.

100

Yanggen para ta dalalaki i otdinario na kuentas ni manmafana'gue hit gi eskuela, era yanggen guaha ta na'enñaihon iyo-ta pues siempre menos guaha-ta. Yanggen kuatro na'-ña na mangga i patgon ya ha na'i dos i amigu-ña pues siempre dos ha' sopbla na'-ña na mangga. Yanggen dos muñeka-ña i patgon palao'an ya ha na'i i prima-ña unu pues siempre unu ha' sopbla muñeka-ña. Lao ti taiguenao yanggen ta na'enñaihon i lina'la'. I atlibes masusesedi. Mientras mas ta mantieni i lina'la'-ta para hita ha' na maisa mas menos lina'la'-ta. Lao mientras mas manmanna'i hit ni lina'la'-ta para otro mas bula lina'la' para hita. Gaige gi kannai-ta este i lina'la' ni depotsi ma'intensiona para ta na'enñaihon otro taotao. Mana'i hao lina'la' pues debi di un fanna'i.

Manmana'i hit lina'la' dibatde. Ahe' ti hita fuma'tinas maisa hit. Taya' minapot-ta anai mana'fanhuyong hit. I lina'la'-ta mismo rigalu para hita. Si tata-ta yan si nana-ta numa'i hit didide' ginen kada unu gi lina'la'-ñiha. Ya i dumaña' este i dos na nina'en-ñiha na humuyong hao yan humuyong yo'. Estague' i milagron henerasion. Lao guaha mas na'manman guini na milagro. Ahe' ti i primet na mañaina-ta tumutuhon este. Si Yu’os mismo finene'na tumutuhon este. Guiya fuma'tinas hit gi pinarehon i imahen-ña. Kumeke ilek-ña este na si Yu’os ha na'i hit kada unu didide' patte ginen guiya mismo. Ya estague' i magahet na lina'la'-ta, ayu na patte giya hita ni ti siña ta esplika ni muna'fanatacho hit yan numana'i hit rason para ta fanla'la'.

Desde i tutuhon i tano' asta i mafañagon i uttimu na neni, i lina'la' regalu. Pot este na taya' direcho-ta para ta fanambiento ya ta go'te para hita ha' na maisa. Sesso ta li'e' este na ambienterias gi otro taotao ya ha na'fambababa siniente-ta. Pot ehemplo, maila' ya ta atan este i dos patgon ni chume'lo. Mama'tinas i nana kanden bokayu ya ha na'i i amko' kuatro pidasu, dos para guiya yan dos para i che'lu-ña. Lao i amko' ti malago' ha na'i i patgon ni na'-ña dos pidasu. Ripara este siha: ti guiya mamfe niyok, ti guiya kumacha' ni ti giya kumamyo, yan pot los uttimu ti guiya tumohge gi me'nan i feggon para u fa'tinas. I bokayu regalu enteramente. Lao ti malago' ha nafañagi i che'lu-ña.

Hunggan ta komprende ha' este na klasen heñu gi famagu'on. Lao guaha na biahi na dumangkulo ha' hulo' i patgon yan este na baban heñu-ña. Pot ehemplo, un taotao ha erensia dangkulo na kantidan salape' ginen as tata-ña. Ti siña ha lachai gumasta todu i mana'i-ña. Sosopbla ha' gue' ni interes ginen salape'-ña gi banko. Hahasso na ti guiya macho'cho' pot este na salape'. Regalu ha' este enteramente ginen as tata-ña para guiya. Lao taya' nai ha hasso manayuda gi che'cho' karidat. Guiya ha' na maisa ha hahasso. Lao kao guaha direcho'-ña este na taotao i para guiya ha na maisa u hahasso? Siguru yo' na lache gue'. Guaha obligasion-ña para u hasso i manna'mase'.

Pot los uttimu, hafañe'los, hagu yan guahu esta monhayan ta risibi taiguini na irensia. Ahe', ti salape', lao i lina'la' mismo. Ya ta tungo' ha' na mas guaguan i lina'la' ki todu i miyon pesos guini gi tano'. Hahasso na riku hao yan riku yo' lokkue'. Ha na'i hit si Yu’os ni mas guaguan na klasen guinaha, i lina'la'. Ya taya' rason para ta go'te para hita ha' na maisa este na regalu. MANA'I HAO LINA'LA', PUES DEBI DI UN FANNA'I.

Si Yu’os ma'ase' ni atension-miyu yan adios asta otro simana. Si Yu’os en fambinendisi, i + Tata, yan i Lahi-ña, yan i Espiritu Santo. Amen.

LATGA NA GUINAIYA April 13, 2003

Pa’go i Damenggon Ramos o sino Damenggon Pinadesi, matutuhon i Simana Santa, anai ta hahasso gi espesiat na manera i pinadesen i Saina. I Ebanghelio machuchule’ ginen i tinige’ San Marcos, kapitulu 14:1-15. Este na Ebanghelio ha sangan un patte gi ayu i masusedi antes ha’ di u maklaba si Jesukristo gi kilu’os. Guaguaguato si Jesukristo para Jerusalen ya sumugo’ giya Betania na songsong para u bisita uttimu na biahi unos kuantos na manatungo’. A’annok na maguputi gue’; ya durante i sentada, kahulo’ un palao’an ni mañuñule’ guaguan na fraskiton paopao ya ha tutuhon chumo’me i ilon i Saina. Guini na Ebanghelio ilek-ña si San Juan este na palao’an si Maria, i che’lon Lazaro.

101

En tingo’ ha’ hafa masangan pot i bida-ña este na palao’an. Guaha gi entre i mandisipulu, espesiatmente si Judas, manlalalo’ as Maria ya ilek-ñiha na mampos este na despetdisio. Ilek-ñiha maolekña mabende este na paopao ya u fanmana’i i mamopble ni salape’. Lao ti taiguini gaige gi hinasson-ña i Saina. Si Jesukristo ilek-ña maolek bida-ña este na palao’an ya siempre mahahasso gi todu i tano’ este na bida-ña. Ilek-ña i Saina ni ayu siha i manlalalo’, "Bai asigura hamyo, maseha manu gi tano’ nai masetmonñaihon i maolek na notisia, u masañgan este na bida-ña para memorias-ña." Asta pa’go na ha’ani magagahet ha’ este na sinangan i Saina sa’ estague’ na ta hahasso ta’lo este na sinisedi.

Lao i siknifikasion-ña este na sinisedi ahe’ ti la’yiyi pot i hafa ha cho’gue si Maria, ni tampoko ti pot guaguan i paopao. Lao i siknifikasion-ña este na sinisedi era i rason sa’ hafa na ha cho’gue este si Maria. Anai si Maria ha cho’me paopao ilon i Saina ha hahasso si Jesukristo i finatai-ña. Ilek-ña, "Anai ha na’ye paopao i tataotao-hu ha prepapara para i mahafot-ña." Ti ta tungo’ kao ha komprende si Maria na esta ti abmam matai si Jesukristo. Lao unu mansen siguru hit - guaha si Maria ha siente gi korason-ña ni gaige lokkue’ gi korason i Saina, ya ha cho’gue kuanto i siña para u asiste i Saina guini na nisisidat-ña.

Ripara ha’ sa’ taya’ masangan pot guinaiya guini na estoria. Ti annok i guinaiya na palabra guini. Lao klaru na i espiriton guinaiya muna’ ha cho’gue este si Maria. Buente ti la’yiyi maolek pumalabra gue’. Tat komu guaha giya hita manluluhan yanggen para ta fanguentos gi me’nan taotao. Lao guaha na biahi lokkue’ gi lina’la’-ta na ilek-ta basta hit kuentos ha’, maila’ ya ta na’annok gi aksion-ta hafa kumeke ilek-ta. Este i rason na guaha na biahi na en lugat di ta fanguentos mangati hit yanggen na’pinti, pat sino mañalek hit yanggen na’magof. Guaha na biahi na ayu i ta siesiente gi korason-ta guihi na momento taya’ palabras siña ta usa para ta sangan. Siguru yo’ na este sinientete-ña si Maria guihi na ha’ani. Matto gi korason-ña dangkulon guinaiya gi as Jesukristo. Malago’ para u sangani i Saina ni este na siniente-ña, lao ti siña malaknos i palabras; pot enao na mamahan paopao ya ha cho’me ilon i Saina kuentan para u alok, hu guaiya hao.

Ayu i manlalalo’ as Maria ilek-ñiha na siña ha’ mabendi i paopao pot tres sientos pidason salape’. Ti siña ta katkula kuanto enao bali-ña pa’go na tiempo, lao a’annok na sen guaguan. Para si Maria siguru na dangkulo na kantida ha gasta pot i paopao. Lao estague’ kumeke ilek-ña latga na guinaiya, taya’ guaguan pat mappot yanggen para i guinaiya-mu. Ayu i gumuaiya hao taya’ nai ha tufong kuanto gasto-ña pot hagu. Kao guaha nai kinepbla hao as nana-mu pot i meggai nai disbelao gue’ anai malangu hao anai didikike’ hao?

Estague’ i fine’na na punto ni malago’ yo’ hu sangan. Ahe’ ti kumeke ilek-ña guini na i latga na guinaiya taya’ mas ki manguaguan ha’ yan ti mampraktiku na gasto.

I nana gi gima’ atrasao mamaigo’ sa’ ha tayuyuyuti i familia-ña yan tataftaf makmamata para u fama’tinas para u fañocho’ antes di eskuela yan oran cho’cho’. I guinaiya ahe’ ti manguaguan ha’ yan ti mampraktiku na gasto. Pot guinaiya guaha nai bumela i nana sa’ malangu i patgon-ña. Pot guinaiya na i tata ha bisita i lahi-ña ni mapreresu achokka’ nina’mamahlao gue’. Pot guinaiya na i dos saina magasta todu i pine’lon-ñiñiha para ma’amte i hagan-ñiha. Pot guinaiya machocho’cho’ i lahi 40 oras gi papa’ somnak para u na’fañocho i familia-ña.

Yanggen ta sangan pot latga na guinaiya ta sasangan lokkue’ pot ayu siha i manotdinario ni machocho’gue kada dia ni nana yan i tata gi familia. Este i bida-ña guini si Maria sen bonitu sa’ asta matuge’ guini gi biblia ya u sigi ha’ maripiti asta i uttimon i tano’. Ahe’ ti ha planuyi este si Maria; hokkok ha’ na masusedi nu guiya. Ta tungo’ ha’ na meggai na biahi na ti manmaripara hafa ta chocho’gue pot guinaiya-ta.

I otro punto ni ta keke sangan guini; ayu i manguaiya ti ha tutufong i minappot-ña pot i guinaiya-ña.

Ripara ha’ sa’ si Judas tumuka’ na guaguan este na paopao. Ya siguru yo’ na ti matto este gi hinasson Maria kao guaguan. Hokkok ha’ gaige gi hinasson Maria na sen magof gue’ para u cho’gue este. Magof gue’ sa’ estaba guenao si Jesukristo. Ha tungo’ na makkat sinientete-ña si Jesukristo. Kalan humahallom

102

na guaha dangkulo na achaki para u fatto gi as Jesukristo. Ayu na klasen siniente i kalan ha lili’e’ na uma’akalaye’ i hemhom uchan gi uriyan i Saina. Kalan mohon ilek-ña si Maria na debi di bai na’tungo’ i Saina na hu tungo’ na atborotatao hinasso-ña. Ti siña ha sodda’ i palabras para sangan-ña; pot enao na matto yan i taron paopao, ha cho’me ilu-ña, ya magap i paopao gi halom guma’.

Hunggan latga este na cho’cho’, kalan despetdisio; lao yanggen matto este na siniente, i manguaiya ti ha tutufong kuanto gasto-ña. Mafatto este na siniente gi lina’la’-ta anai taya’ guaguan para ta gasta pot i guinaiya-ta. Taiguihi yanggen malangu i haga-mu ya sinangani hao ni dokto na siriosu chetnot-ña. Ilek-ña i dokto na guaguan yan anakko’ na tiempo para u homlo’. Pues ilek-mu, dokto, neni-hu enao, ti hu tungo’ taimanu para apas-hu lao siempre ha’ hu apasi. Bai ayao gi banko, bai bendi kareta-hu, bai bende tano’-hu. Neni-hu enao ya taya’ guaguan yanggen para guiya.

Pot los uttimu, ta sasangan na manguaguan i kosas siha pa’go na tiempo. Lao i manguaiya mas guaguan guini gi tano’, sa’ siña latga i guinaiya. Taya’ mas maolek na ehemplo era i kilu’os giya Katbario. Pot i guinaiya-ña na si Jesukristo ha na’enñaihon todu i guinaha-ña, asta i uttimu na gotan haga’ gi korason-ña. Guiya lokkue’ latga gue’ manguaiya. Si San Pablo gi katta-ña ha sangan: "Maseha riku gue’, lao ha na’popble gue’ pot hita, ya ginen i pinepble-ña na ha na’fanriku hit."

Manguekuentos hit guini pot latga gi salape’ na banda. Si Jesukristo latga gue’ ni haga’-ña. I guinaiyan Jesukristo i mas latga entre todos.

Si yu’us ma’ase’ ni atension-miyu yan adios asta otro simana. Si Yu’os en fambinendisi, i + Tata, yan i Lahi-ña, yan i Espiritu Santo. Amen.

This PDF file was made possible by

Peter J. Santos

http://chamoruboy.com/mailahalom.htm

103