Ga Baw: Dawi a Mahkawn Ga

Ga Baw: Dawi a Mahkawn Ga

ISBN:

Ka lajang ai: Rev. Dr. James Paul Humphries (Rev. Dr. Lahtaw Zau Sam)

Laika Gale ai: Sara Labya Bawk Lat

Hkrang Pan Sara: Naw Ra (CanaaN)

Layout: Actsco Printing

Dip shabra ai: Project L.A.M.B.S. International Inc.

E-mail: [email protected]

Facebook: Project LAMBS International

Website: www.projectlambs.com

www.discipleshipempowerment.com

Buga hpung kata shadawn sharam ai hte dip shapraw ai.

David's Song_Book_English_2020_09_17.indd 4 9/17/2020 10:28:30 AM

Maumwi Hpang Sai:Dawi ngu ai shabrang kasha langai mi gaw, shan nau ni lasha hkrai marai shi nga ai hta na kaji dik rai nna, kawa a sagu hpung ni hpe shani shagu rem ai wa re. Sagu ni hpe rem ai aten, ndai nden ja ai shabrang kasha wa gaw tsap hte hkang hkyi ni zawn re ai dusat matse labye ni hpe gasat shaden kau let sagu ni hpe makawp maga ai.

Lani mi hta, sagu rem let hka makau na hpun shingnip hta dung nga yang, shi myit hta lama mi shadut pru wa ai gaw, shakawn mahkawn ni ka shalat sharawng wa nna, dai hpe shi a tingse hte dum jahtuk wa sai.

Mahkawn ga hkum ni ka let myit aru yu ai shaloi, shinggyim masha ni hta masha hpan lahkawng nga ai hpe shi chye na wa ai. Hpan mi gaw, tara hkan nna dingman ai masha rai nna, shi galaw ai lam yawng hte hta chyeju hkan nga ai. Bai, kaga hpan mi gaw, shi myit ra lam sha hkan nna, n dingman ai masha re.

Dai hpang, Dawi a myit hta daw kru hku nna ka na matu hkawn wa ai. Daini, shaning 3000 na ai hpang, Shakawn Kungdawn Laika ngu nna dai chyum daw ni hpe ka shinggyin da ai manu dan ai laika langai mi byin wa sai. Myit shang sha hpa lam gaw, dai aten Dawi ka ai dai chyum daw ni gaw daini na anhte a matu mung htuk manu ai lam re.

Dai re majaw, dai ga hkum (mungga) ni gaw, Dawi a aten na zawn, anhte a makau grup-yin na masha ni kaning rai asak hkrung ra ai lam hte seng nna anhte hpe hpa baw tsun nga ai, ngu ai lam hpe myit aru hpang wa saga.


Dawi ka ai lam ni gaw:“Dinghpring ai wa hte Tara n lang ai wa”

1. Tara n lang ai ni a bawng ai hku hta n hkawm, Yubakkap ai ni a lam e n tsap, Jahpoi ai ni a hpawng hta ndung lawm ai sha,

2. Yehowa a tara hta awng nga nna, Shi a tara hpeshani shana myit mang ai wa gaw, a nga ai.

3. Dai wa gaw hka kau e hkai ai, shi a aten hta asi sinna, Alap mung n nyip ai hpun hte bung nga ai: Shigalaw ai yawng mayawng mung tai na ra ai.

4. Tara n lang ai ni chyawm gaw, dai zawn n rai;Nbung e shapoi ai mahkaw hte bung ma ai.

5. Dai majaw tara n lang ai ni, tara dara ai hta, Yubakkap ai ni, dinghpring ai ni a hpung hta, n rawt tsaplu na ma ai.

6. Kaning rai nme law, dinghpring ai ni a lam hpeYehowa chye nga ai; Tara n lang ai ni a lam chyawmgaw, hten mat na ra ai.

Shakawn Kungdawn 1:1-6


Anhte kaji ten, kanu kawa ni gaw nawku jawng hte Laban jawng (Sunday school) de woi sa ma ai. Bat mi ting hta mung, shana shagu yup akyu hpyi let, mahkawn shakawn ai, Chyum Laika hti ai, hte akyu hpyi ai lam ni woi galaw ai. Dai gaw, anhte Karai Kasang hpe kam sham ai makam myit hte Shi anhte hpe kaning rai asak hkrung shangun mayu ai lam a matu npawt hkridun jahkrat hpang wa ai lam ni re.

Ma ni gaw, Chyum Laika hte Yesu Hkristu hpe kam sham ai lam hte seng nna, shanhte a kanu kawa ni hte nawku hpung ni tsun dan ai tengman ai lam shagu hpe kam ai. Shanhte gaw dai tengman ai lam hpe kam ai hte maren, Shi a Wenyi kaw nna du wa ai Karai Kasang a tsaw ra myit hpe mung hkam sha lu ma ai. Ma ni gaw Karai Kasang a lam hpe grau chye hkra sharin la mayu ma ai, dai re majaw, shanhte gaw laika ni hti ai hte, Karai Kasang ngu ai kadai re ta? ngu ai ga san ni hte ma ni a asak hkrung lam ni hta Shi hpa baw galaw shangun mayu ai kun? ngu ai ga san ni san chye ai. Ma ni gaw, shanhte hpe ga shaga ai Karai Kasang a nsen hte Shi a matu asak hkrung na matu shaga ai Karai Kasang a nsen hpe na lu ai.

Anhte gaw shaman chyeju hkam la na matu hte Karai Kasang a tsaw ra myit hte ngwi pyaw simsa ai lam ni hpring tsup na matu myit mada ai rai yang, anhte kaning rai asak hkrung ra ai lam hte kaning re ai lam hta hkawm sa ra ai hte seng nna Karai Kasang anhte hpe hpa tsun nga ai hpe chye na na matu, ndai chyum daw kru hpe ma langai mi a myi hte yu yu ga.


Dawi gaw, anhte kaning rai asak hkrung nga ai lam hte kade a matu asak hkrung nga ai lam hpe atsawm sha jep jen yu ra ai, nga nna anhte hpe tsun ai. Masha ni hpe hkra machyi nna jahten sharun kau mayu ai wenyi hpyen langai mi nga ai.

Anhte asak kaba wa ai hte Chyum Laika hpe hti hka ja wa ai hte maren, Karai Kasang a mungga hpe sung sung myit aru yu nna anhte a myit masin hta manu shadan let kyem mazing da na matu grai ahkyak ai hpe chye wa ai. Raitim, kade n na yang, anhte a kraw lawang hte myit nyan kata hta lama ma gasat hpang wa ai zawn, n bung ai lam yan lahkawng de gang la hkrum ai zawn rai wa ai. Anhte Karai a lam myit yu ai, raitim, manang ni galaw ai lam ni hpe mung hkan myit yu chye ga ai. Shanhte gaw, amyu myu re ai lam ni shanhte hte rau galaw chyam yu na matu anhte hpe saw ai. Dai lam ni gaw anhte hpe n hkra machyi shangun ai, pyaw hpa she re, anhte kam ai aten bai mai tawn kau ai, nga nna tsun ai.

Nye manang ni gaw Laban Shani nawku jawng she sa tim, bat mi ting gaw shanhte kam ai hku nga ma ai. Karai Mungga hpe atsawm sha aten la nna myit yu yang, Shi a tengman ai lam ni hpe atsawm sha chye na wa nna, manang ni grai n jaw ai hku hkawm sa ai hpe mung chye wa lu ai.

Dawi gaw, mungkan a lam ni hpe ningdang ra ai, yubak kap ai ni a hpang n mai hkan ai, hte Karai Kasang n nga ai, ngu nna tsun ai ni hte n mai kanawn ai, nga nna sharin ai.

Anhte gaw n bung ai lam yan lahkawng de gang la hkrum nga ai hpe dum ra ai.


Dawi gaw, akyu hpyi ai lam (Karai Kasang hte ga shaga ai hte Karai Kasang anhte hpe ga shaga ai), Shi Mungga hpe hti ai (hka ja ai) hte Karai Kasang a Mungga hpe sung sung myit yu ai lam (myit aru yu ai hte bai nhtang jep jen yu ai) gaw masha shagu a matu ahkyak ai hpe chye na ai.

Asak kaba wa ai hte maren, Karai Mungga hti nna dai hta asak hkrung ai hte aten la nna akyu hpyi ai lam hpe anhte matut galaw ra ai. Dawi ka ai dai chyum daw ni a lam myit yu nna, “Dai hta tsun da ai hte maren anhte asak hkrung mayu ga ai kun?” ngu nna anhte hkum anhte ga san san na matu ahkyak ai. Raitim kalang lang, Karai Kasang madun ai lam hte Shi a myit ra hkan na matu yak la ai zawn re ai. Jawng, bungli, hte nta hkan e galaw ra ai lam ni law la ai sha n-ga, manang ni mung htaw ra de, le ra de hkawm sa na matu anhte hpe shaga nga ai.

Htaw ra de, le ra de sa na saw shaga ai hpe hkap la ai shaloi, myit kata hta n jaw ai hpe hkam sha wa ai hte, myit hkanu nna katsi katsang nga wa ai. Karai Kasang a matu hte Shi madun ai lam ni a matu anhte gaw myit ja ai ni tai wa sai zawn re.

Karai Kasang a Mungga hka ja ai, myit aru yu ai (sung sung myit yu ai), hte akyu hpyi ai lam matut manoi galaw yang, Shi anhte hpe lam madun na ra ai hte galaw ai lam hta mung Shi shaman ya na re, ngu nna Dawi tsun ai hpe kam ra ai. Dai tengman lam ni hta hkan ai rai yang, Karai Kasang a matu anhte a myit masin ni si mani wa na hte anhte kaning rai hkawm sa asak hkrung ra na hpe mung Shi madun matsun ya na re.


Masha gaw MADU Karai Kasang hta madat mara let matut hkawm sa yang, hka kau e tu ai hpun zawn rai wa na lam Dawi tsun ai. Dai zawn rai hkawm sa ai a mahtai gaw anhte a asak hkrung lam ni hta teng sha akyu pru wa lu ai.

Langai: Anhte tu kaba wa nna “a lap ni” mung galoi n nyip na re! Anhte ra kadawn ai lam ni shatup ya hkrum nna hkam kaja ngang grin ai hpun langai mi zawn kung hpan tu kaba wa na re. Anhte a alap ni mung ga de n run hkrat ai sha, dai hpun a asak matut grin nga shangun na re.

Lahkawng: Anhte asi si na re! Anhte a lakung lakying ni hta asi si na rai nna, dai asi ni gaw kung hpan ai hte hkam kaja ai kumla re. Anhte hta kaga ni hpe shaman chyeju jaw na atsam hte hpun law law shatut ya lu ai nli tum si ya lu ai atsam nga ai.

Masum: Anhte awng dang na re! Karai Kasang anhte hte rau re ai majaw, anhte a sat lawat ni gaw anhte hte kaga ni a matu shaman chyeju tai na re. Karai Kasang a Wenyi anhte hpe lam woi nna anhte mung Shi a nsen hte lam madun ai hta hkan nang yang, kung hpan galu kaba jat wa na matu Shi karum ya na rai nna, ndai mungkan a agung alau ni hte yak hkak lam ni hpe anhte tawt lai lu na re.

Dai zawn re ai ni a matu ndai lam yawng byin wa na re, hpa majaw nga yang, shanhte gaw Shi a Mungga, Chyum Laika rai nga ai Karai Kasang a hka makau e tu kaba wa ai majaw re. Karai Kasang gaw asak re hte, anhte hpe bai hkrung grin shangun ai. Anhte gaw Karai a man e nga nna, Shi a n-gun atsam hte tsaw ra myit kata hta matut asak hkrungai rai yang, shaman chyeju hkam la lu na re.


Dawi gaw tara n lang ai masha ni hpa baw hte bung ai hpe hkrang shaleng dan ai. Mungkan a n kaja ai lam ni hpe ningdang kau nna Karai Kasang a ga madat na malai, tara n lang ai masha ni gaw nbung e shapoi kau ai numhkaw hte bung ma ai.

Shanhte gaw manu n dan ai shanut shanaw arai ni zawn re. Myit ai lam hte sat lawat ni mung angawk angak rai ma ai. Wenyi lam hta ngang kang ai lam mung n nga ai. Dai zawn re lachyum n pru ai ni yawng hpe magawn la nna wan e nat kau na mara ai.

Dai zawn re ai masha ni gaw mungkan a nbung e ahpawt jang, shara shagu de mawng ayai mat ai rai nna, shanhte gaw yak hkak dakat lam ni law law mung hkrum hkra na hpe anhte chye na ra ai.

Mam dan ten du yang, sun madu gaw nai mam ni yawng shinggyin la nna, numhkaw maza ni yawng hpe chyawm gaw magawn la nna wan e nat kau na ra ai hpe Dawi chye ai. Dai zawn re ai ni gaw shanhte lu malu yawng hpe wan hta sum mat na re.

Myit n pyaw hpa gaw, lama wa dai zawn re ai masha ni gaw, nli tum kaja ni zawn, lusha ni lajang ya ai hte ja kat ai nsi nai-si ni si ya ai rai yang, shanhte gaw sun madu hte kaga masha ni a matu akyu ara chyeju hkam la shangun na re.


Tara n lang ai ni gaw mungkan a nsin hta mat mat chye ai. Shanhte a asak hkrung lam ni hta chyam dinglik lam ni hte agung alau ni hkrai hpring nga nna, Karai Kasang kaw na daw hka wa sai re majaw, mungkan lailen ni hta pyau wa sai. Shanhte gaw masha shada kamhpa ai, hpungtang hpaji hpe kam ai, mungkan lailen hku myit sawn ai hte sharin achyin ai hpe kam ma ai. Shanhte gaw, masha a a-ngawk a-ngak re ai lam hte mungkan lam ni hpe myit marin ai lam ni a majaw lam dam ma ai.

Ramma ni gaw shanhte myit hta grai ja dum chye ai. Ritkawp tara ni hpe lu adawt na zawn nawn ai, lam dam timung hpa n byin ai sha, bai kaja wa lu na zawn shadu chye ai. Raitim tengman ai lam gaw, mungkan a nsin de shang sai hte gaw, nsin a laikyang ni a gyit hkang ai hkrum mat sai. Manghkang re ngu dum ai aten gaw grai hpang hkrat mat sai. Dai “sat lawat nli tum ni” gaw laikyang hten za ai hte si ai lam de du wa shangun ai.

Shanhte a myit masin na myit mada ai lam hte simsa ai lam jahten kau hkrum sai. Grai pawt sindawng wa ai hte lawhpa myit hkrai hpring nna, Karai Mungga a tengman ai lam mung n chye sai. Karai Kasang a nsen hpe mung shanhte n na mat masai.

Kawa kaw na sali wunli hpyi la nna shi hpe kadai mung n chye ai mungdan de hprawng makoi hkawm ai “Mat Mat Ai Kasha” ngu ai maumwi langai mi nga ai. Shi hpe hku hkau ai ngu nna shadu ai manang ni hte rau n kaja ai sat lawat ni hte pyau hkawm ai gaw, gumhpraw ni yawng ma mat nna manang ni mung tawn kau da hkrum ai shaloi she, “gumhpraw n nga yang”, “manang mung kadai n kam tai ai”, “kadai mung n kam karum a hka!” ngu nna dum wa ai aten, shi hkrai sha rai mat sai.

Raitim shi myit malai lu nna, shi wa hte nta masha ni hpang de bai nhtang wa ai. Shanhte shi hpe naw tsaw ra nga ai kun, ngu ai hpe n chye timung, shi myit hta kawa kaw bungli lama ma wa hpyi galaw nna, lusha gaw lu sha nhten, ngu nna myit mada ai. Raitim mauhpa byin wa ai. Shi kawa kaw hpyi nem tawngban ai shaloi, dai shaloi jang kawa gaw shi a mara raw dat ya nna, mi na hte maren kasha langai mi a ahkaw ahkang yawng bai jaw ya sai (Luk 15:11-32).


Masha law malawng n hkawn ai gaw, asak hkrung lam hta anhte gat hkai ai hte maren, kaja ai nsi, shing n rai, n kaja ai nsi shu la dan la lu na re (Gal 6:7-8). Asak hkrung lam gaw gat hkai ai hte shu la dan la ai lam galaw ai hkrun-lam re. Asak hkrung ai aten masha ni hte mung, Karai Kasang hte mung kaning rai asak hkrung ai hta hkan nna, anhte a jahtum nhtoi ni hta shu la dan la ra na ga ai.

Tara n lang ai ni gaw Karai man hta tsap let, ndai mungkan hta galaw lai wa sai hta hkan nna tara jeyang ai hkrum na re, ngu nna Chyum mungga hta anhte hpe tsun nga ai. Karai Kasang gaw sumsing laika hta anhte a asak hkrung lam shagu ka matsing da ai. Dai laika hpaw na nhtoi hpe anhte kadai mung koi yen n lu ai. Hpan Karai a man e anhte sa tsap nna dinghta mungkan a lam ni yawng hpaw shadan dan ra na re. Dai hpang, anhte a lam sakse hkam ai jahtum e, tara jeyang hkrum na re (Shr 20:12). Anhte myit malai n lu ai hte Yesu Hkristu hku nna jaw ai Karai Kasang a kumhpa hkye hkrang la ai lam hpe n hkap la yang, mara lu ai lam dan dawng ai majaw, htani htana si ai de dam jaw hkrum na re (Rom 6:23).

Ndai mungkan hta si ai lam gaw anhte a asak hkrung lam laika ni hpe pat kau ya nna, galai shai na ahkaw ahkang mung jasum kau ya ai. Hkristu a hkye hkrang la n hkrum yang, htani htana mat mat na re. Anhte a gam maka gaw dazik dawk shakap kau hkrum na rai nna hpa mung n mai galai shai sai. Hkristu gaw matsan wa Lazaru hte sahti wa a lam tsun ai hta, matsan mayan wa gaw sumsing mungdan shang lu nna sahti wa chyawm gaw Katsan Ga de du mat ai. Sahti wa gaw hka mung n lu lu ai hte wan ni shinggrup da hkrum let kaga ni hpe shadum na mung hpang hkrat mat sai (Luk 16:19-31).


Mat mat ai ni hkrum katut na nsin hte shanhte a asak hkrung ai lailen gaw, shanhte hpe Karai Kasang hte mung, Shi amyu masha ni hte mung daw hka shangun na re. Shanhte a nta masha ni hte mung tsan gang let htani htana pat shingdang kau ya ai lam hkrum wa ai. Yubak mara gaw anhte hpe gyit hkang ai, anhte a shanglawt ai lam jahten ya ai, hte myit mada shara n nga ai zawn rai mat shangun ai. N kam sham ai ni gaw n ding n man ai lam hkrai hpring nna, Karai Kasang hte tsan gang wa ai hpe dum wa na re.

Shanhte gaw, Karai Kasang a masha ni Shi hpe nawku ai hte shakawn shagrau ai, shada da karum shingtau let tsaw ra myit madun hkat ai hpe mu wa na re. Shanhte gaw Shi hta tsep kawp kamhpa ai hte myit mada nga ai kam sham ai nta masha ni hpe Karai Kasang a lahpyen hta mu lu na ra ai. Dai hkye shaw la hkrum ai masha ni gaw tsawm htap ai lam ni hpe hkrum lu na re, hpa majaw nga yang, shanhte gaw ma zawn re ai kam sham ai myit hpe hkang zing da ai hte Karai Kasang hte Shi a Mungga hpe tsaw ra ai myit n tat kau ai majaw re.

Raitim tara n lang ai ni gaw Karai Kasang a masha ni hpe n hkungga ai, n gawn n sawn di nna, tinang hkum grai hpaji rawng dum let, Karai Kasang a masha ni hpe asawng asang matsa mawa di ma ai. Raitim dai zawn re ai ni gaw “zaibru jang e nta gap ai” masha angawk ni, gyit hkang da hkrum ai ni re hpe Chyum Laika hta tsun ai hpe shanhte n dum ma ai. Hka tung wa ai hte nbung e adawt kau ai shaloi, dai nta kadawng mat na re (Mht 7:24-27). Jahtum e, shanhte a myit hta hkrit kajawng ai hte myit pu myit tsam ai lam hkrai hpring nna tinang a mara a majaw masha ni hpe hkrai mara shagun wa nhtawm, shanhte kraw kata n-yun bu let nchyi nmu byin wa ai.


Ndai sumla gaw anhte hta lata la na lam nga ai hpe madun ai. Gara mahtang hpe lata na lam hte seng nna anhte a matu yak chye ai. Anhte a asak prat hta, gara de mahtang sa na hpe lata daw dan la ra na lam numshe kaw du nga sai (Mht 7:13-14). Tinang lata la sai hte maren mung lit la galaw ra ai. Masha ni hpe mara shagun n mai ai, dai gaw lani mi anhte teng sha hkrum na lam re. Madu gaw dingman ai ni hpe chye ai zawn, shanhte mung Shi hpe chye ai. Shanhte gaw htani htana asak de hkrang ai gyip ai lam hpe lata la ma ai. Shanhte gaw Yesu Hkristu hte rau sumsing mungdan hta htani htana nga lu na re; mungkan lam hte n madat mara ai lam hpe ningdang kau nna, kam sham ai hte Madu Yesu Hkristu a myit ra lam hta madat mara ma ai. Tara n lang ai ni gaw, Karai Kasang hte Shi a tsaw ra myit hpe ningdang na hpe lata la ma ai hte, mungkan a jahten shabyak lam hta asak hkrung na matu lata la ma ai. Shanhte gaw ru npawt mung n nga ai hte tinggyeng myit hte asak hkrung na matu lata la nna, maza mala numhkaw zawn tai wa ai. Dai ni gaw hten za mat na re. Mawshe, Israela masha ni hpe n-gun jaw shadut ai ga hpe madat yu ga: “Yu u, nang asak galu nna mayat maya wa lu na hte, …, na a Karai Kasang Yehowa nang hpe shaman ya lit ga gaw, na a Karai Kasang Yehowa hpe tsaw ra ai hta, shi a lam hkan nga nna, shi a hkang da ai ga, shi a matsun maroi hte ga madat hpe hkan nang nga nu, ngu nna dai ni nang hpe hkang da ai ga hta, asak hkrung lam hte ngamu lam, si hkrung si htan, lam hte matsan tsin-yam lam na a man e ngai dai ni tawn da ya sade ai. Dai n rai, na a myit dam mat wa nna, madat mara myit n rawng ai hte agung alau ai de hkan nang nna Hpara shaje sa nawku mat wa n yang gaw; …; nanhte teng teng hten byak mat na marin dai, ngu nna dai ni ngai nanhte hpe shadum da nga nngai. Asak hkrung lam hte si htan lam, shaman ai chyeju lam hte dagam dala dingnye lam, na a man e dai ni ngai tawn da ya sade ai, ngu nna na a lam sumsing lamu hte ginding aga hpe ngai sakse da ya se ai: dai rai nna, nang hte na a amyu matu ni hkrung nga lu myit ga gaw, asak hkrung ai lam lata la mu: na a Karai Kasang Yehowa hpe tsaw ra u, shi a nsen madat mara nga u, shi hta manoi manat nga u; kaning rai nme law, shi gaw na a asak hkrung lam hte na a prat galu na lam rai nga ai: …, ngu nna Israela amyu masha mi hpe tsun da wu ai.” (Trj 30:15-20)Chyum Laika Tengman ai rai yang, gara lam lata ra na hpe aten garai n hpang hkrat yang, daini nan anhte lata la ra sai. Tinang nan lata la ra sai re majaw, htauli htaula myit hte lata la ga (2Kor 6:2).

Apnawng Ai Akyu Hpyi Ga

Madu Yesu Hkristu e, Ngai gaw yubak kap ai wa rai nga ai. Nye a mungkan myit ra ai hku hkan nang let asak hkrung lai wa ni ai. Dai ni ngai Hkristu Yesu hpe nye a Madu, hkye la ai wa hku nna kam sham hkap la mayu nga nngai. Hkristu gaw nye a yubak mara a matu wudang hta sai hkaw jen hkam let, yubak a jahpu hpe nye a malai jaw ya sai majaw dai ni ngai htani htana asak ngu ai hpe lu la na kam nngai. Nye a yubak mara galaw ai lam kaw nna kayin let Hkristu hpang de sit shang wa na, ngai jin jin rai sani ai. Hkristu hpe nye a myit masin hte nye a sak hkrung lam mahkra hpe lam woi up hkang nga na matu dai ni ngai saw shaga mayu nga nngai. Hkristu a sape majing tai let, kaga masha ni hpe mung daw jau lu ai wa tai lu na matu karum la rit. Nye a yubak mara a majaw lu la na si ai ari kaw na hkye mawai la let, htani htana asak hpe jaw ya ai Madu hpe chyeju dum nngai law. Nye myit masin hte a ding tawk rai Karai Kasang hte matut mahkai na ahkang jaw ya ai majaw mung chyeju dum nga nngai law…Amen

Karai Kasang hte matut mahkai ai ga sadi lekmat

Nye a Yubak mara hpe yin la ai lamNgai gaw nye a law la ai yubak mara ni hpe Karai Kasang a man hta yin la sai sha n-ga, nye a yubak mara mahkra hpe Hkristu gaw raw dat kau ya na hpe mung kam sham nga nngai.

Nye a hkap la kam sham ai lam Ya ngai gaw a hkrung nga ai Hkristu hpe nye a prat, sak hkrung lam a matu Madu hte hkye la ai wa hku nna hkap la kam sham ni ai.

Nye a ga sadi ap nawng ai lam Nye a sak hkrung lam ma hkra hpe Hkristu Yesu a lata hta ngai tsep kawp ap nawng ni ai. Hkristu gaw nye a Madu rai nga ai.

Ga sadi la ap nawng ai nhtoi: ____________________

Lekmat: ____________________

Sakse: ______________________

Documents

Ga Baw: Dawi a Mahkawn Ga